Oʻzbekiston Respublikasi makroiqtisodiyot va statistika vazirligini qayta tashkil etish toʻgʻrisida (PF-3183-son)

24.12.2002

Oʻzbekiston Respublikasi Prezidentining

Farmoni

Iqtisodiyotga bozor mexanizmi va uslublarini joriy qilishni davom ettirish, jamiyat hayotining barcha tomonlarini erkinlashtirish talablariga muvofiq iqtisodiyot va statistika organlarining tashkiliy tuzilmasini takomillashtirish maqsadida:

1. Oʻzbekiston Respublikasi Makroiqtisodiyot va statistika vazirligi tugatilib, uning negizida Oʻzbekiston Respublikasi Iqtisodiyot vazirligi va Oʻzbekiston Respublikasi Davlat statistika qoʻmitasi tashkil qilinsin.

2. Mamlakatni rivojlantirishning uzoq muddatli strategiyasi hamda kompleks dasturlarini ishlab chiqish va amalga oshirish, quyidagi gʻoyat muhim vazifalarni hal etishga qaratilgan chuqur oʻylangan va mutanosib ijtimoiy-iqtisodiy siyosatni oʻtkazish Oʻzbekiston Respublikasi Iqtisodiyot vazirligi zimmasiga yuklansin:

makroiqtisodiy barqarorlikni, iqtisodiyotning barqaror, mutanosib va jadal surʼat bilan rivojlanishini taʼminlash;

koʻp ukladli va samarali faoliyat koʻrsatuvchi iqtisodiyotni shakllantirish, xususiy mulkchilikning yetakchi rolini taʼminlash, bozor infratuzilmasini rivojlantirish;

boy tabiiy va mineral-xomashyo zaxiralaridan, bunyod etilgan ishlab chiqarish va fan-texnika salohiyatidan samarali hamda oqilona foydalanishga qaratilgan aniq maqsad yoʻlidagi strukturaviy siyosatni amalga oshirish, eksport salohiyatini rivojlantirish hamda mamlakat iqtisodiyotining jahon iqtisodiy tizimiga keng miqyosda integratsiyalashuvini taʼminlash;

yangi ish joylarini yaratish, mehnat resurslarini oqilona band qilish muammosini hal etish, aholini aniq yoʻnaltirilgan ijtimoiy muhofaza qilishni kuchaytirish, aholining turmush darajasi barqaror, jadal oʻsishini, ijtimoiy infratuzilmani rivojlantirishni taʼminlash;

mamlakat mintaqalari iqtisodiyotining kompleks rivojlanishini, ishlab chiqaruvchi kuchlarning mamlakat hududi boʻyicha maqbul hamda samarali rivojlantirish va joylashtirishni taʼminlash.

5. Iqtisodiyot va statistika boʻyicha faoliyat koʻrsatayotgan boʻlinmalar negizida quyidagilar tashkil qilinsin:

Qoraqalpogʻiston Respublikasida — Iqtisodiyot vazirligi va statistika boshqarmasi;

respublika viloyatlari va Toshkent shahrida — Iqtisodiyot bosh boshqarmalari va statistika boshqarmalari;

respublika shahar va tumanlarida — iqtisodiyot boʻlimlari va statistika boʻlimlari.

6. Quyidagilar belgilansin:

iqtisodiyot hududiy organlari Oʻzbekiston Respublikasi Iqtisodiyot vazirligiga hamda Qoraqalpogʻiston Respublikasi Vazirlar Kengashi, viloyat, shahar, tuman hokimliklariga qarashli;

7. Belgilab qoʻyilsinki, ishlab chiqarilgan va sotilgan mahsulot (ishlar, xizmatlar) hajmlarining sunʼiy ravishda kamaytirilishiga, korxonalar faoliyatiga noxolis baho berilishiga, pul mablagʻlarining bankdan tashqari noqonuniy aylanishiga olib keladigan notoʻgʻri statistik hisobotni taqdim etishda, statistika maʼlumotlarini yashirishda aybdor boʻlgan mansabdor shaxslar qonunga muvofiq qattiq javobgarlikka, hatto jinoiy javobgarlikka ham tortiladilar.

Oʻzbekiston Respublikasi Adliya vazirligi Oʻzbekiston Respublikasi Davlat statistika qoʻmitasi, Bosh prokuraturasi hamda boshqa manfaatdor idoralar bilan birgalikda bir oy muddatda Jinoyat kodeksiga va Maʼmuriy javobgarlik toʻgʻrisidagi kodeksga statistik hisobotni yashirganlik va buzganlik uchun javobgarlikni kuchaytirish nazarda tutilgan oʻzgartirish va qoʻshimchalar kiritish boʻyicha takliflarni Vazirlar Mahkamasiga taqdim etsin.

8. “Oʻzbekiston Respublikasi Istiqbolni belgilash va statistika davlat qoʻmitasini Makroiqtisodiyot va statistika vazirligiga oʻzgartirish toʻgʻrisida” Oʻzbekiston Respublikasi Prezidentining 1997-yil 15-maydagi PF-1780-son Farmoni oʻz kuchini yoʻqotgan deb hisoblansin.

9. Oʻzbekiston Respublikasi Adliya vazirligi bir oy muddatda Oʻzbekiston Respublikasining amaldagi qonunchiligiga ushbu Farmondan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

10. Vazirlar Mahkamasi oʻn kun muddatda Oʻzbekiston Respublikasi Iqtisodiyot vazirligi hamda Oʻzbekiston Respublikasi Davlat statistika qoʻmitasi faoliyatini tashkil etish toʻgʻrisida Hukumatning tegishli qarorlarini qabul qilsin.

Oʻzbekiston Respublikasining Prezidenti I. KARIMOV

Toshkent sh.,

2002-yil 24-dekabr,

PF-3183-son