2009-yilda sanoat kooperatsiyasi asosida tayyor mahsulotlar, butlovchi buyumlar va materiallar ishlab chiqarishni mahalliylashtirish dasturiga tuzatishlar kiritish toʻgʻrisida (314-son)

15.12.2009

Oʻzbekiston Respublikasi Vazirlar Mahkamasining

qarori

Vazirlar Mahkamasining “Mahalliylashtirish dasturiga tuzatishlar kiritish mexanizmini soddalashtirishga doir qoʻshimcha chora-tadbirlar toʻgʻrisida” 2009-yil 2-apreldagi 94-son qaroriga muvofiq hamda raqobatbardoshli, eksportga yoʻnaltirilgan va importning oʻrnini bosadigan mahsulotlar ishlab chiqarishni yanada ragʻbatlantirish, tarmoq ichida va tarmoqlararo sanoat kooperatsiyasini, shu jumladan respublikaning kichik biznes va yirik korxonalari oʻrtasida mustahkamlash maqsadida Vazirlar Mahkamasi qaror qiladi:

1. Sanoat kooperatsiyasi asosida tayyor mahsulotlar, butlovchi buyumlar va materiallar ishlab chiqarishni mahalliylashtirish dasturining amalga oshirilishini taʼminlash boʻyicha maxsus komissiyaning Oʻzbekiston Respublikasi Prezidentining 2009-yil 27-yanvardagi PQ-1048-son qarori bilan maʼqullangan 2009-yilda sanoat kooperatsiyasi asosida tayyor mahsulotlar, butlovchi buyumlar va materiallar ishlab chiqarishni mahalliylashtirish dasturiga (keyingi oʻrinlarda Mahalliylashtirish dasturi deb ataladi):

Mahalliylashtirish dasturining 2a-ilovasiga Butlovchi uzellar va detallar ishlab chiqarishni mahalliylashtirishning 1-ilovaga* muvofiq yangi loyihalarini kiritish toʻgʻrisidagi;

*1-ilova rus tilidagi matnda berilgan.

Mahalliylashtirish dasturining 3a-ilovasiga Mahsulotlarning tayyor turlari, xomashyo va materiallar ishlab chiqarishni mahalliylashtirishning 2-ilovaga* muvofiq yangi loyihalarini kiritish toʻgʻrisidagi;

*2-ilova rus tilidagi matnda berilgan.

Mahalliylashtirish dasturidan korxonalarning tugatilganligi, ichki bozorda ehtiyojning yoʻqligi, shuningdek ishlab chiqarilayotgan mahsulotning narxi va sifati boʻyicha raqobatga bardoshli emasligi sababli 3-ilovaga* muvofiq loyihalarni chiqarib tashlash toʻgʻrisidagi taklifi qabul qilinsin.

*3-ilova rus tilidagi matnda berilgan.

2. Belgilab qoʻyilsinki, ushbu qaror bilan Mahalliylashtirish dasturiga kiritilgan loyihalarni amalga oshiruvchi korxonalarga Oʻzbekiston Respublikasi Prezidentining “2009-yilda sanoat kooperatsiyasi asosida tayyor mahsulotlar, butlovchi buyumlar va materiallar ishlab chiqarishni mahalliylashtirish dasturi toʻgʻrisida” 2009-yil 27-yanvardagi PQ-1048-son qarorining 3-bandida nazarda tutilgan imtiyozlar bojxona toʻlovlari boʻyicha — ushbu qaror qabul qilingan vaqtdan boshlab, soliqlar boʻyicha esa — 2009-yil 1-dekabrdan boshlab qoʻllanadi.

3. Oʻzbekiston Respublikasi Iqtisodiyot vazirligi loyihaning tashabbuskorlari bilan birgalikda ikki hafta muddatda 1 va 2-ilovalarga muvofiq mahalliylashtirilayotgan mahsulotlarni ishlab chiqarish yuzasidan ishlab chiqarishni tashkil etish hamda prognoz hajmlarini bajarishning tarmoq jadvallarini tasdiqlasin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S.Azimov zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2009-yil 15-dekabr,

314-son