Yangiyoʻl sellyuloza-qogʻoz fabrikasining samarali faoliyat koʻrsatishini taʼminlash chora-tadbirlari toʻgʻrisida (406-son)

12.10.2001

Oʻzbekiston Respublikasi Vazirlar Mahkamasining

qarori

Yangiyoʻl sellyuloza-qogʻoz fabrikasida sellyuloza va qogʻoz ishlab chiqarish boʻyicha loyihadagi quvvatga erishishni xamda ishlab chiqarishning samarali faoliyatini taʼminlash, “Oʻzqogʻoz” aksiyadorlik jamiyatiga ajratilgan kreditlarni qaytarish uchun shart-sharoitlar yaratish maqsadida Vazirlar Mahkamasi qaror qiladi:

1. Oʻzbekiston Respublikasi Moliya vazirligi Yangiyoʻl sellyuloza-qogʻoz fabrikasi qurilishini mablagʻ bilan taʼminlash uchun “Oʻzqogʻoz” aksiyadorlik jamiyatiga berilgan kredit boʻyicha asosiy qarzni va foizlarni toʻlash muddatini imtiyozli davrda qoʻshilgan foizlarni asosiy qarz bilan birga oʻnta teng yarim yillik toʻlovlar bilan uzish shartlarida 2002-yil 1-noyabrgacha uzaytirsin.

2. Oʻzbekiston Respublikasi Markaziy bankiga:

“Oʻzqogʻoz” aksiyadorlik jamiyatiga ajratilgan markazlashtirilgan kredit boʻyicha asosiy qarzni va foizlarni toʻlashni boshlash muddatini imtiyozli davrda qoʻshilgan foizlarni asosiy qarz bilan birga oʻn ikkita teng yarim yillik toʻlovlar bilan uzish shartlarida 2002-yil 1-oktabrgacha uzaytirish;

Oʻzbekiston Respublikasi Tashqi iqtisodiy faoliyat milliy bankining oʻz mablagʻlari hisobiga asosiy qarzni va foizlarni toʻlashga yoʻnaltirilgan 116,43 mln soʻm miqdoridagi pul mablagʻlarini bankning vakillik hisob raqamida tiklash tavsiya qilinsin.

3. Oʻzbekiston Respublikasi Tashqi iqtisodiy faoliyat milliy banki Yangiyoʻl sellyuloza-qogʻoz fabrikasi qurilishini mablagʻ bilan taʼminlash uchun bankning oʻz resurslari hisobidan “Oʻzqogʻoz” aksiyadorlik jamiyatiga ajratilgan kredit tarkibini:

kredit boʻyicha asosiy qarzni toʻlashni boshlash muddatini 2002-yil 15-fevralgacha uzaytirish va 2001-yil 1-oktabrgacha qoʻshilgan foizlarni asosiy qarz bilan birga oʻnta teng toʻlovlar bilan uzish;

2001-yil 1-oktabrdan boshlab qoʻshiladigan foizlarni 2001-yil 30-oktabrdan boshlab xar oydagi toʻlovlar bilan uzish shartlari bilan qayta oʻzgartirsin.

4. Oʻzbekiston Respublikasi Moliya vazirligi kreditlar boʻyicha toʻlovlarni boshlash muddati uzaytirilishini hisobga olgan holda Hukumat kafolatlariga belgilangan tartibda tegishli oʻzgartirishlar kiritsin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari R.S. Azimov va M.Z. Usmonov zimmasiga yuklansin.

Vazirlar Mahkamasining Raisi I.KARIMOV

Toshkent sh.,

2001-yil 12-oktabr,

406-son