Germaniya Federativ Respublikasi fuqarolari uchun viza berish tartibotlarini soddalashtirish toʻgʻrisida (202-son)

02.05.2001

Oʻzbekiston Respublikasi Vazirlar Mahkamasining

qarori

Oʻzbekiston Respublikasi va Germaniya Federativ Respublikasi oʻrtasidagi siyosiy, savdo-iqtisodiy, ilmiy-texnik va madaniy hamkorlikni yanada faollashtirish, ish bilan va turistik maqsadda Oʻzbekiston Respublikasiga kelishadigan Germaniya Federativ Respublikasi fuqarolariga vizalarni rasmiylashtirish tartibotini takomillashtirish maqsadida Vazirlar Mahkamasi qaror qiladi:

1. Oʻzbekiston Respublikasi Tashqi ishlar vazirligi:

ish bilan Oʻzbekistonga kelishadigan Germaniya Federativ Respublikasi fuqarolariga bir yil muddatga beriladigan koʻp martalik vizalarni Oʻzbekiston Respublikasining xorijiy muassasalarida 2 ish kuni mobaynida rasmiylashtirsin, Oʻzbekiston Respublikasidagi taklif etuvchi yuridik shaxsning Oʻzbekiston Respublikasi Tashqi ishlar vazirligiga murojaat qilishini talab etishni bekor qilsin;

2. Oʻzbekiston Respublikasi Tashqi ishlar vazirligi Oʻzbekiston Respublikasi Vazirlar Mahkamasining “Xorijiy fuqarolarning va fuqaroligi boʻlmagan shaxslarning Oʻzbekiston Respublikasiga kelishlari, ketishlari, bu yerda boʻlishlari va tranzit oʻtishlari tartibi toʻgʻrisida” 1996-yil 21-noyabrdagi 408-son qaroriga oʻzgartirishlar va qoʻshimchalar kiritish boʻyicha takliflarni bir oy muddatda ishlab chiqsin va belgilangan tartibda kiritsin.

3. Oʻzbekiston Respublikasining manfaatdor vazirliklari va idoralari oʻzlarining idoraviy hujjatlarini ushbu qarorga muvofiqlashtirsinlar.

4. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ.T. Sultonov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2001-yil 2-may,

202-son