Sanoat kooperatsiyasi asosida tayyor mahsulotlar, butlovchi buyumlar va materiallar ishlab chiqarishni mahalliylashtirishni chuqurlashtirishga doir qoʻshimcha chora-tadbirlar toʻgʻrisida (PQ-1236-son)

01.12.2009

Oʻzbekiston Respublikasi Prezidentining

Qarori

Eksport-import operatsiyalarini amalga oshirishda bozor prinsiplari va mexanizmlarini yanada chuqurlashtirish, birja va yarmarka savdolarining xoʻjalik yurituvchi subyektlar oʻrtasidagi kooperatsiya aloqalarini rivojlantirishdagi rolini oshirish, shuningdek mahalliy xom ashyo hamda sanoat kooperatsiyasi negizida tayyor mahsulotlar, butlovchi buyumlar va materiallar ishlab chiqarishni mahalliylashtirish loyihalarini shakllantirish chora-tadbirlarini amalga oshirishda saʼy-harakatlarni muvofiqlashtirish maqsadida:

1. Shunday tartib belgilansinki, unga muvofiq tayyor mahsulotlar, butlovchi buyumlar va materiallar ishlab chiqarishni mahalliylashtirish loyihalarini shakllantirish va amalga oshirishda:

Oʻzbekiston Respublikasi Tashqi iqtisodiy aloqalar, investitsiyalar va savdo vazirligi import qilinayotgan mahsulotlar hajmlari va turlarini chuqur tahlil qilish, shuningdek tashqi bozorlar konyunkturasini tizimli oʻrganish asosida tayyor mahsulotlar, butlovchi buyumlar va materiallarning yoʻnalishlari hamda aniq roʻyxatlari boʻyicha ishlab chiqarishni mahalliylashtirishni chuqurlashtirish yuzasidan takliflar ishlab chiqadi hamda ularni Iqtisodiyot vazirligiga taqdim etadi;

Oʻzbekiston Respublikasi Iqtisodiyot vazirligi Tashqi iqtisodiy aloqalar, investitsiyalar va savdo vazirligining takliflari asosida respublika tarmoqlari va mintaqalari boʻyicha mamlakatimiz korxonalarida mahalliylashtirilayotgan mahsulotlar (xizmatlar)ning yangi turlarini ishlab chiqarishni oʻzlashtirish yuzasidan buyurtmalarni joylashtirishni amalga oshiradi, Mahalliylashtirish dasturini shakllantiradi, ularning amalga oshirilishi yuzasidan tizimli monitoringni taʼminlaydi;

Mahalliylashtirish dasturini shakllantirish va amalga oshirish ishlarini umumiy muvofiqlashtirishni Hukumat qarori bilan tashkil etiladigan Sanoat kooperatsiyasi asosida tayyor mahsulotlar, butlovchi buyumlar va materiallar ishlab chiqarishni mahalliylashtirish dasturini amalga oshirish boʻyicha maxsus idoralararo komissiya bajaradi.

2. Quyidagilar:

Sanoat kooperatsiyasi asosida tayyor mahsulotlar, butlovchi buyumlar va materiallar ishlab chiqarishni mahalliylashtirish dasturini tuzish jarayonida davlat boshqaruvi organlari va loyihalar tashabbuskorlarining oʻzaro hamkorlik qilish tartibi toʻgʻrisidagi Nizom 1-ilovaga muvofiq;

Sanoat kooperatsiyasi asosida tayyor mahsulotlar, butlovchi buyumlar va materiallar ishlab chiqarishni mahalliylashtirish dasturini amalga oshirish boʻyicha maxsus idoralararo komissiya tarkibi 3-ilovaga muvofiq tasdiqlansin.

4. Oʻzbekiston Respublikasi Tashqi iqtisodiy aloqalar, investitsiyalar va savdo vazirligi:

Oʻzbekiston Respublikasi Tashqi iqtisodiy aloqalar, investitsiyalar va savdo vazirligi huzuridagi Xalqaro sanoat yarmarkasi va Kooperatsiya birjasi Direksiyasi faoliyatini tashkil etish tartibi toʻgʻrisidagi nizomni oʻn kun muddatda Vazirlar Mahkamasiga tasdiqlash uchun kiritsin;

2010-yil 1-sentabrgacha boʻlgan muddatda “Oʻzekspomarkaz” milliy koʻrgazma kompaniyasi ochiq aksiyadorlik jamiyatining ikkita pavilyonini rekonstruksiya qilsin, umumiy koʻrgazma maydonini 14,5 ming kvadrat metrgacha yetkazsin.

5. Belgilab qoʻyilsinki, begʻaraz texnik koʻmakni (grantlarni) jalb etishga doir har bir loyiha boʻyicha mukofotlarning aniq miqdorlari va mukofotlanadigan mansabdor shaxslarning roʻyxati tegishli tuzilmalar taqdimiga koʻra Moliya vazirligi tomonidan Oʻzbekiston Respublikasi Tashqi iqtisodiy aloqalar, investitsiyalar va savdo vazirligi bilan birgalikda aniqlashtiriladi va tasdiqlanadi.

6. Quyidagilar:

Oʻzbekiston Respublikasi Prezidentining “Xorijiy investitsiyalarni axborot bilan taʼminlash va koʻmaklashish agentligi — “Oʻzinfoinvest”ni tashkil etish toʻgʻrisida” 2007-yil 6-fevraldagi PQ-578-son qarori 4-bandining uchinchi xatboshi va qarorga 2-ilova;

Oʻzbekiston Respublikasi Vazirlar Mahkamasining “Respublika sanoat yarmarkasi va Kooperatsiya birjasi faoliyatini tashkil etish chora-tadbirlari toʻgʻrisida” 2008-yil 11-apreldagi 67-son qarori 3-bandining birinchi xatboshi va qarorga 1-ilova;

Oʻzbekiston Respublikasi Vazirlar Mahkamasining “Oʻzbekiston Respublikasiga grantli begʻaraz texnik koʻmakni jalb etishni yanada kengaytirish chora-tadbirlari toʻgʻrisida” 2009-yil 20-oktabrdagi 275-son qarori 2-bandining toʻrtinchi xatboshi;

7. Oʻzbekiston Respublikasi Adliya vazirligi Oʻzbekiston Respublikasi Tashqi iqtisodiy aloqalar, investitsiyalar va savdo vazirligi, Iqtisodiyot vazirligi bilan birgalikda ikki hafta muddatda Vazirlar Mahkamasiga qonun hujjatlariga ushbu qarordan kelib chiquvchi oʻzgartirishlar va qoʻshimchalar yuzasidan takliflar kiritsin.

8. Mazkur qarorning ijrosini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov va Oʻzbekiston Respublikasi Bosh vazirining oʻrinbosari E.M. Gʻaniyev zimmasiga yuklansin.

Oʻzbekiston Respublikasi Prezidenti I. KARIMOV

Toshkent sh.,

2009-yil 1-dekabr,

PQ-1236-son

Oʻzbekiston Respublikasi Prezidentining 2009-yil 1-dekabrdagi PQ-1236-son qaroriga 1-ILOVA

Sanoat kooperatsiyasi asosida tayyor mahsulotlar, butlovchi buyumlar va materiallar ishlab chiqarishni mahalliylashtirish dasturini tuzish jarayonida davlat boshqaruvi organlari va loyihalar tashabbuskorlarining oʻzaro hamkorlik qilish tartibi toʻgʻrisida

NIZOM

I. Umumiy qoidalar

1. Ushbu Nizom Sanoat kooperatsiyasi asosida tayyor mahsulotlar, butlovchi buyumlar va materiallar ishlab chiqarishni mahalliylashtirish dasturini (keyingi oʻrinlarda Mahalliylashtirish dasturi deb yuritiladi) tuzish, tasdiqlash va amalga oshirilishini nazorat qilish tartibini, shuningdek ushbu jarayonda uning asosiy qatnashchilari — Oʻzbekiston Respublikasi Tashqi iqtisodiy aloqalar, investitsiyalar va savdo vazirligi, Iqtisodiyot vazirligi, Moliya vazirligi, Raqobatni rivojlantirish va isteʼmolchilar huquqlarini himoya qilish qoʻmitasi, boshqa vazirliklar va idoralar, Vazirlar Mahkamasining axborot-tahlil departamentlari, xoʻjalik birlashmalari va mahalliylashtirish loyihalari tashabbuskorlari boʻlgan xoʻjalik yurituvchi subyektlar oʻrtasidagi oʻzaro hamkorlik mexanizmini belgilaydi.

2. Mahalliylashtirish dasturini tuzish unga:

xoʻjalik yurituvchi subyektlar tashabbus koʻrsatgan ishlab chiqarishni mahalliylashtirish loyihalarini;

import qilinadigan mahsulotlarning hajmi, tarkibi va turlarini chuqur tahlil qilish, tashqi bozorlar konyunkturasini tizimli oʻrganish asosida ishlab chiqilgan Tashqi iqtisodiy aloqalar, investitsiyalar va savdo vazirligining takliflari asosida Iqtisodiyot vazirligi tomonidan joylashtiriladigan tayyor mahsulotlar, xizmatlar, butlovchi buyumlar va materiallarning yangi turlarini ishlab chiqarishni mahalliylashtirish loyihalarini;

monopoliyalashtirish darajasini va raqobat muhiti rivojlanishini, tovarlar (xizmatlar)ning oʻzaro bir-birining oʻrnini bosishi va narx omilini hisobga olgan holda tovarlar (xizmatlar) bilan ichki bozorning toʻldirilganligini baholashdan kelib chiqib Raqobatni rivojlantirish va isteʼmolchilar huquqlarini himoya qilish qoʻmitasining takliflari asosida tuziladigan mahsulotlar, butlovchi buyumlar va materiallarning yangi turlarini oʻzlashtirish loyihalarini kiritish yoʻli bilan amalga oshiriladi.

3. Mahalliylashtirish dasturiga kiritish Oʻzbekiston Respublikasi Iqtisodiyot vazirligi, Tashqi iqtisodiy aloqalar, investitsiyalar va savdo vazirligi, Moliya vazirligi, Raqobatni rivojlantirish va isteʼmolchilar huquqlarini himoya qilish qoʻmitasining (keyingi oʻrinlarda vakolatli organlar deb yuritiladi) xulosalari asosida amalga oshiriladi.

4. Mahalliylashtirish dasturini tuzish va amalga oshirish ishlarini muvofiqlashtirish uchun Sanoat kooperatsiyasi asosida tayyor mahsulotlar, butlovchi buyumlar va materiallar ishlab chiqarishni mahalliylashtirish dasturini amalga oshirishni taʼminlash boʻyicha maxsus idoralararo komissiya (keyingi oʻrinlarda maxsus komissiya deb yuritiladi) tashkil etiladi. Maxsus komissiyaning shaxsiy tarkibi Oʻzbekiston Respublikasi Prezidenti tomonidan tasdiqlanadi.

Oʻzbekiston Respublikasi Iqtisodiyot vazirligi Maxsus komissiyaning ishchi organi hisoblanadi. Uning xodimlaridan kotib boshchilik qiladigan Maxsus komissiya Kotibiyati tuziladi.

5. Sanoat kooperatsiyasi asosida tayyor mahsulotlar, butlovchi buyumlar va materiallar ishlab chiqarishni mahalliylashtirish dasturini tasdiqlash belgilangan tartibda Oʻzbekiston Respublikasi Prezidenti tomonidan amalga oshiriladi.

6. Mahalliylashtirish dasturiga yangi loyihalarni kiritish, shuningdek tasdiqlangan Mahalliylashtirish dasturiga tuzatishlar kiritish toʻgʻrisidagi qaror:

Mahalliylashtirish dasturi loyihalari parametrlariga tuzatishlar kiritish yuzasidan — Maxsus komissiya tomonidan, mahalliylashtirishning belgilangan darajasini pasaytirish bundan mustasno;

Maxsus komissiyaning takliflari boʻyicha mahalliylashtirish loyihalari parametrlari va roʻyxatiga oʻzgartirishlar kiritish yuzasidan -Vazirlar Mahkamasi tomonidan qabul qilinadi.

Mahalliylashtirilayotgan mahsulotlarni ishlab chiqarish hajmlarini koʻpaytirish ishlab chiqarish quvvatlari doirasida Maxsus Idoralararo komissiya va Oʻzbekiston Respublikasi Vazirlar Mahkamasi bilan kelishilmagan holda loyihalar tashabbuskorlari tomonidan amalga oshiriladi.

II. Mahalliylashtirish dasturini tuzish boʻyicha davlat boshqaruvi organlari va loyihalar tashabbuskorlarining asosiy funksiyalari va vakolatlari

7. Mahalliylashtirish dasturini tuzish jarayonida samarali oʻzaro hamkorlikni taʼminlash va uni amalga oshirishning sifatli monitoringini tashkil etish maqsadida:

a) loyihalarning tashabbuskorlari — vazirliklar, idoralar, mahalliy davlat hokimiyati organlari, xoʻjalik birlashmalari va korxonalar:

tashabbus koʻrsatilayotgan mahalliylashtirish loyihalari boʻyicha hujjatlarni oʻz vaqtida va sifatli tayyorlaydilar hamda mahalliylashtirish loyihalarini Mahalliylashtirish dasturiga kiritish uchun hujjatlarni belgilangan tartibda Maxsus komissiya Kotibiyatiga taqdim etadilar;

ishlab chiqariladigan mahsulotning mamlakatimizdagi potensial xaridorlarini va xorijiy xaridorlarni hamkorlikka jalb qilish hamda ichki va tashqi bozorlarda talab qilingan tovarlarni ishlab chiqarishni tashkil etishga buyurtmachilarni faollik bilan izlaydilar, hamkorlikni rivojlantirish shartlarini muhokama qiladilar va shartnoma bilan rasmiylashtirish boʻyicha ular bilan muzokaralar tashkil etadilar va olib boradilar;

mahalliylashtirish dasturlarini samarali va oʻz vaqtida amalga oshiradilar va belgilangan parametrlarga erishadilar;

b) Oʻzbekiston Respublikasi Tashqi iqtisodiy aloqalar, investitsiyalar va savdo vazirligi:

import kontraktlari boʻyicha elektron maʼlumotlar bazasini ishlab chiqadi va yuritadi hamda shu asosda respublika tarmoqlari va korxonalari boʻyicha import qilinadigan mahsulotlar (xizmatlar) tarkibi va turlarini chuqur tahlil qiladi;

import qilinadigan mahsulotlar tarkibi va turlarini chuqur tahlil qilish, tashqi bozorlar konyunkturasini tizimli oʻrganish asosida tayyor mahsulotlar, butlovchi buyumlar va materiallarning yoʻnalishlari va aniq roʻyxatlari boʻyicha ishlab chiqarishni mahalliylashtirishga doir takliflarni, shu jumladan eksportga yetkazib berishni kengaytirish uchun ishlab chiqadi, keyinchalik ushbu takliflarni Iqtisodiyot vazirligiga taqdim etadi;

xorijiy kompaniyalar va tashkilotlarning takliflari va salohiyatini oʻrganish asosida importning oʻrnini bosadigan va eksportga yoʻnaltirilgan mahsulotlarning eng koʻp talab qilinadigan turlarini oʻzlashtirish boʻyicha xorijiy sheriklarni sanoat kooperatsiyasiga jalb etishga doir takliflarni ishlab chiqadi va Maxsus komissiya Kotibiyatiga kiritadi;

belgilangan holatlarda mahalliylashtirish loyihalarini baholash natijalari boʻyicha ekspertiza oʻtkazadi va xulosalar beradi;

v) Oʻzbekiston Respublikasi Iqtisodiyot vazirligi:

importning oʻrnini bosadigan mahalliylashtiriladigan mahsulotlar, butlovchi buyumlar va materiallarning yangi turlarini ishlab chiqarishni oʻzlashtirish boʻyicha Tashqi iqtisodiy aloqalar, investitsiyalar va savdo vazirligining, Raqobatni rivojlantirish va isteʼmolchilar huquqlarini himoya qilish qoʻmitasining takliflarini respublikaning xoʻjalik birlashmalari va korxonalari bilan birgalikda batafsil oʻrganadi hamda importning oʻrnini bosadigan mahalliylashtiriladigan mahsulotlar, butlovchi buyumlar va materiallarning yangi turlarini mamlakatimiz korxonalarida ishlab chiqarishga buyurtmalarni joylashtirish, shu jumladan yangi korxonalar tashkil etish, shu jumladan xorijiy investitsiyalar ishtirokida korxonalar tashkil etish boʻyicha tadbirlarni ishlab chiqadi;

mamlakatimiz iqtisodiyotini kompleks va muvozanatli rivojlantirishni taʼminlashni, tabiiy, mineral-xom ashyo, ishlab chiqarish, ilmiy-texnik va mehnat salohiyatidan, shuningdek tegishli infratuzilmadan samarali foydalanishni hisobga olgan holda mahalliylashtiriladigan ishlab chiqarishni iqtisodiyotning muayyan tarmoqlarida va mintaqalarida joylashtirishga doir takliflarni ishlab chiqadi;

davlat va xoʻjalik boshqaruviga tegishli organlari, sanoat korxonalari bilan birgalikda bir nechta tashkilotlar va korxonalarni jalb etishni talab qiladigan mahalliylashtiriladigan mahsulotlarning yangi murakkabroq turlarini oʻzlashtirish uchun uzellar va detallar ishlab chiqarishni joylashtirishning samarali sxemalarini, shuningdek ishlab chiqarishni mahalliylashtirishni chuqurlashtirish tadbirlarini ishlab chiqadi;

ishlab chiqarish quvvatlari va texnologik jihatdan qayta taqsimlash, mahsulotlarning ishlab chiqariladigan turlari elektron maʼlumotlar bazasini ishlab chiqadi va yuritadi hamda shu asosda sanoat kooperatsiyasini rivojlantirish va ishlab chiqarishni mahalliylashtirish boʻyicha takliflar tayyorlaydi;

belgilangan xollarda ishlab chiqarishni mahalliylashtirish loyihalarini baholash natijalari boʻyicha ekspertiza oʻtkazadi va xulosalar beradi;

xoʻjalik yurituvchi subyektlarning buyurtmanomalarini, tayyor mahsulotlar, materiallar va butlovchi buyumlar roʻyxatlari boʻyicha Tashqi iqtisodiy aloqalar, investitsiyalar va savdo vazirligi hamda Raqobatni rivojlantirish va isteʼmolchilar huquqlarini himoya qilish qoʻmitasining takliflari boʻyicha respublika korxonalarida joylashtirilgan buyurtmalarni koʻrib chiqish asosida Mahalliylashtirish dasturini tuzadi;

Mahalliylashtirish dasturini amalga oshirishning, shu jumladan Mahalliylashtirish dasturiga kiritilgan loyihalar bilan belgilangan parametrlarga erishishning tizimli monitoringini olib boradi, ularni amalga oshirish davomida muammoli masalalarni aniqlaydi hamda tegishli takliflarni Vazirlar Mahkamasiga kiritadi;

g) Oʻzbekiston Respublikasi Raqobatni rivojlantirish va isteʼmolchilar huquqlarini himoya qilish qoʻmitasi:

monopoliyalashtirish va raqobat muhitini rivojlantirish darajasini, tovarlar (xizmatlar)ning oʻzaro oʻrnini bosishini va narx omilini hisobga olgan holda bozorning tovarlar (xizmatlar) bilan toʻldirilganligini baholaydi hamda tayyor mahsulotlar, materiallar va butlovchi buyumlarning aniq roʻyxati bilan birga tovarlar (xizmatlar)ni mamlakatimiz ishlab chiqaruvchilari tomonidan oʻzlashtirishning maqsadga muvofiqligi toʻgʻrisida Iqtisodiyot vazirligiga takliflar kiritadi;

belgilangan hollarda ishlab chiqarishni mahalliylashtirish loyihalarini baholash natijalari boʻyicha ekspertiza oʻtkazadi va xulosalar beradi;

mavjud boʻsh yotgan ishlab chiqarish quvvatlari, binolar va inshootlar, shu jumladan bepul xarid qiymati boʻyicha aniq investitsiya majburiyatlari evaziga taklif etilayotgan quvvatlar, binolar va inshootlar mahalliylashtiriladigan ishlab chiqarishlarni oʻzlashtirishni tashkillashtirish uchun ular toʻgʻrisida Iqtisodiyot vazirligiga har chorakda axborot berib borish.

d) Oʻzbekiston Respublikasi Fanlar akademiyasi oʻzlashtirishga tavsiya qilinayotgan mahsulotlar roʻyxatini texnologik qayta taqsimlash, asbob- uskunalar va respublika sanoat korxonalari salohiyatini, foydalanilayotgan ishlab chiqarish texnologiyalarini oʻrganish asosida yangi samarali texnologiyalarni va ilmiy-tadqiqot, tajriba-konstruktorlik ishlarini, bir nechta tashkilotlar va korxonalarni jalb etishni talab qiladigan mahalliylashtiriladigan mahsulotlarning yangi murakkabroq turlarini oʻzlashtirish uchun uzellar va detallar ishlab chiqarishni joylashtirishning oqilona va eng maqbul sxemasi boʻyicha tavsiyalar ishlab chiqadi;

j) “Oʻzstandart” agentligi ishlab chiqariladigan mahsulotni sifati va dizayni boʻyicha zamonaviy talablar va standartlar darajasiga yetkazish yuzasidan takliflarni ishlab chiqadi va Maxsus komissiya Kotibiyatiga kiritadi;

z) Oʻzbekiston Respublikasi Moliya vazirligi moliyalashtirishning markazlashtirilgan manbalari yoki Oʻzbekiston Respublikasi Hukumatining kafolati ostidagi kredit mablagʻlari hisobiga Mahalliylashtirish dasturiga kiritish taklif qilinayotgan loyihalar amalga oshirilgan taqdirda iqtisodiy samaradorlikni kelishish yuzasidan ishlab chiqarishni mahalliylashtirish loyihalarini baholash natijalari boʻyicha ekspertiza oʻtkazadi va xulosalar beradi.

III. Xoʻjalik yurituvchi subyektlar tomonidan tashabbus koʻrsatilgan loyihalarni Mahalliylashtirish dasturiga kiritish tartibi

8. Davlat va xoʻjalik boshqaruvi organlari, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, xoʻjalik yurituvchi subyektlar — mahalliylashtirish loyihalari tashabbuskorlari (keyingi oʻrinlarda loyiha tashabbuskori deb yuritiladi) loyihalarni Mahalliylashtirish dasturiga kiritish boʻyicha takliflarni Vazirlar Mahkamasi tasdiqlaydigan shakl boʻyicha Maxsus komissiya Kotibiyatiga “bir darcha” prinsipi boʻyicha kiritadi.

Xoʻjalik yurituvchi subyektlar loyihalarni Mahalliylashtirish dasturiga kiritish boʻyicha elektron shaklda takliflar berish huquqiga ega.

9. Loyiha tashabbuskori taqdim etiladigan maʼlumotlarning ishonchliligi uchun qonun hujjatlariga muvofiq javob beradi.

10. Loyiha tashabbuskoridan qonun hujjatlarida nazarda tutilmagan qoʻshimcha maʼlumotlarni taqdim etishni talab qilishga yoʻl qoʻyilmaydi.

11. Maxsus komissiya Kotibiyati loyihaning maqsadidan, uni moliyalashtirish manbalaridan kelib chiqqan holda tushgan takliflarni koʻrib chiqish uchun ikki kun muddatda vakolatli organlarga yuboradi.

12. Takliflar bir vaqtning oʻzida quyidagi vakolatli organlar:

a) Oʻzbekiston Respublikasi Iqtisodiyot vazirligi tomonidan:

loyihaning Mahalliylashtirish dasturi maqsadlari va vazifalariga muvofiqligi;

loyihani amalga oshirish imkoniyati;

mahalliylashtirishning taklif etilayotgan darajasiga erishish imkoniyati;

loyihani Mahalliylashtirish dasturiga kiritish yoki loyiha parametrlarini oʻzgartirishning maqsadga muvofiqligi yuzasidan loyihani amalga oshirishning umumiy iqtisodiy maqsadga muvofiqligi baholanadi;

b) Oʻzbekiston Respublikasi Tashqi iqtisodiy aloqalar, investitsiyalar va savdo vazirligi tomonidan:

marketingning taklif etilayotgan konsepsiyasi, shu jumladan mahalliylashtiriladigan mahsulotni sotish istiqbollari;

mahalliylashtiriladigan mahsulotni tashqi bozorda sotish narxlari parametrlari (loyiha tashabbuskori tomonidan mahsulotni eksport qilish nazarda tutilgan taqdirda);

shunga oʻxshash mahsulot importini tahlil qilish (TIF TN kodi boʻyicha 10 belgi darajasida);

loyihani Mahalliylashtirish dasturiga kiritish yoki loyiha parametrlarini oʻzgartirishning maqsadga muvofiqligi asosida loyihani amalga oshirish samaradorligi va imkoniyati baholanadi;

v) Raqobatni rivojlantirish va isteʼmolchilar huquqlarini himoya qilish qoʻmitasi tomonidan — raqobat muhitini, monopoliya qilib olish darajasini, tovarlarning oʻzaro bir-birining oʻrnini bosishini hisobga olgan holda bozorni toʻldirish va narx belgilash baholanadi;

g) Oʻzbekiston Respublikasi Moliya vazirligi tomonidan (loyiha moliyalashtirishning markazlashtirilgan manbalari yoki Hukumat kafolati ostidagi kredit mablagʻlari hisobiga amalga oshirilgan taqdirda) — loyihaning iqtisodiy samaradorligi baholanadi.

Zaruriyat boʻlganda Vazirlar Mahkamasi bilan kelishgan holda Iqtisodiyot vazirligida vakolatli organlar mutaxassislaridan iborat vaqtinchalik ishchi guruhlar tashkil etilishi mumkin.

13. Vakolatli organlar loyiha tashabbuskorlarining takliflarini koʻrib chiqish natijalari boʻyicha asoslangan xulosalarni hujjatlar tushgan paytdan boshlab oʻn kundan kech boʻlmagan muddatda Maxsus komissiya Kotibiyatiga yuboradi.

Xulosaning nusxasi vakolatli organ tomonidan loyiha tashabbuskoriga yuboriladi.

14. Fikr-mulohazalar mavjud boʻlgan taqdirda hujjatlar vakolatli organlar tomonidan loyiha tashabbuskoriga puxta ishlash uchun qaytariladi.

Puxta ishlangan hujjatlar loyiha tashabbuskorlari tomonidan vakolatli organlarga taqdim etiladi. Hujjatlarni takroriy koʻrib chiqish va tegishli xulosalarni Maxsus komissiya Kotibiyatiga taqdim etish vakolatli organlar tomonidan ilgari bildirilgan fikr-mulohazalar loyiha tashabbuskorlari tomonidan bartaraf etish sharti bilan bir hafta muddatda amalga oshiriladi.

Puxta ishlangan loyihani koʻrib chiqishda vakolatli organlar tomonidan yangi fikr-mulohazalar bildirilishiga yoʻl qoʻyilmaydi.

15. Maxsus komissiya Kotibiyati ikki hafta muddatda vakolatli organlarning tushgan ijobiy xulosalarini umumlashtiradi va maxsus Komissiya Protokoli loyihasini, zaruriyat boʻlganda, Hukumat qarori loyihasini tayyorlaydi, belgilangan tartibda uning kelishilishini taʼminlaydi va Vazirlar Mahkamasi kiritadi.

Bir yoki bir nechta vakolatli organning salbiy xulosasi mavjud boʻlgan taqdirda loyihani Mahalliylashtirish dasturiga kiritish toʻgʻrisidagi qaror Maxsus komissiya majlisida tegishli xulosalar asosida qabul qilinadi.

IV. Mahalliylashtirish dasturiga kiritilgan loyihalarni amalga oshirish monitoringini olib borish

16. Tasdiqlangan Mahalliylashtirish dasturiga kiritilgan har bir loyiha boʻyicha loyihani amalga oshirishning tarmoq jadvali ishlab chiqiladi. Jadvalda loyiha orqali Iqtisodiyot vazirligi bilan kelishiladigan aniq belgilangan muddatlarda belgilangan parametrlarga erishish nazarda tutiladi.

17. Iqtisodiyot vazirligi tarmoq jadvali asosida Mahalliylashtirish dasturini amalga oshirishning, shu jumladan Mahalliylashtirish dasturiga kiritilgan loyihalarda belgilangan parametrlarga erishishning tizimli monitoringini olib boradi, ularni amalga oshirish davomida muammoli masalalarni aniqlaydi va tegishli takliflarni Vazirlar Mahkamasiga kiritadi.

18. Tashqi iqtisodiy aloqalar, investitsiyalar va savdo vazirligi Mahalliylashtirish dasturi loyihalarining tashqi iqtisodiy koʻrsatkichlar, shuningdek bajarilishi monitoringini olib boradi, ularni amalga oshirish davomida muammoli masalalarni aniqlaydi va tegishli takliflarni Vazirlar Mahkamasiga kiritadi.

19. Vazirlar Mahkamasining axborot-tahlil departamentlari Oʻzbekiston Respublikasi Iqtisodiyot vazirligi bilan birgalikda Mahalliylashtirish loyihalarini amalga oshirish monitoringini olib borishda aniqlangan muammolar va toʻsiqlarni bartaraf etish boʻyicha davlat va xoʻjalik boshqaruvi organlari, barcha vazirliklar, idoralar va xoʻjalik birlashmalari faoliyatini muvofiqlashtiradi.

Oʻzbekiston Respublikasi Prezidentining 2009-yil 1-dekabrdagi PQ-1236-son qaroriga 3-ILOVA

Sanoat kooperatsiyasi asosida tayyor mahsulotlar, butlovchi buyumlar va materiallar ishlab chiqarishni mahalliylashtirish dasturining amalga oshirilishini taʼminlash boʻyicha idoralararo maxsus komissiya

TARKIBI

Izoh: Idoralararo maxsus komissiya aʼzolari boshqa ishga oʻtgan taqdirda uning tarkibiga ushbu lavozimga yangidan tayinlangan shaxslar kiritiladi.

Oʻzbekiston Respublikasi Prezidentining 2009-yil 1-dekabrdagi PQ-1236-son qaroriga 4-ILOVA

Xalqaro sanoat yarmarkasi va Kooperatsiya birjasi direksiyasining

TUZILMASI