“VISO” Oʻzbekiston – Avstriya qoʻshma korxonasi faoliyatini tashkil etish toʻgʻrisida (141-son)

22.03.2001

Oʻzbekiston Respublikasi Vazirlar Mahkamasining

qarori

Maxsus foydalanuvchilarni zamonaviy va sifatli maxsus poyabzallar bilan taʼminlash, isteʼmol bozorini yuqori sifatli poyabzallar bilan toʻldirish hamda bevosita xorijiy investitsiyalarni respublika iqtisodiyotiga qoʻshimcha ravishda jalb etish maqsadida Vazirlar Mahkamasi qaror qiladi:

1. Quyidagilar:

Toshkent shahar hokimligining investitsiyalar bosh boshqarmasi tomonidan “Oʻzbekcharmpoyabzali” uyushmasi 2-poyabzal fabrikasining “Etikdoʻz” shuʼba korxonasi, “Lanit-Ta” qoʻshma korxonasi va Avstriyaning “Vega Marketing GmbX” firmasi bilan birgalikda har yili 150 ming juft maxsus poyabzal ishlab chiqaradigan ochiq aksiyadorlik jamiyati shaklidagi “VISO” Oʻzbekiston—Avstriya qoʻshma korxonasi tashkil etilganligi;

“VISO” qoʻshma korxonasining ustav jamgʻarmasi 1,747 mln AQSH dollari miqdorida shakllantirilganligi, undagi ulushlar: Toshkent shahar hokimligining investitsiyalar bosh boshqarmasi boʻyicha — 827,0 ming AQSH dollari (47,3 foiz), Avstriyaning “Vega Marketing GmbX” firmasi boʻyicha 550,0 ming AQSH dollari (31,5 foiz), “Etikdoʻz” shuʼba korxonasi boʻyicha 295,0 ming AQSH dollari (16,9 foiz), “Lanit-Ta” qoʻshma korxonasi boʻyicha 75,0 ming AQSH dollari (4,3 foiz) miqdorida taqsimlanganligi;

umumiy qiymati 5,9 mln AQSH dollari boʻlgan loyihani mablagʻ bilan taʼminlash “Asaka” banki tomonidan qayta moliyalashtiriladigan Yevropa tiklanish va taraqqiyot bankining 4,2 mln AQSH dollari miqdoridagi kredit liniyasi mablagʻlari hamda “VISO” qoʻshma korxonasining 1,7 mln AQSH dollari miqdoridagi oʻz mablagʻlari hisobiga amalga oshirilishi;

“VISO” qoʻshma korxonasi ishlab chiqaradigan maxsus poyabzallar umumiy hajmining kamida 35 foizini eksport qilish xorijiy sherik “vega Marketing GmbX” firmasi tomonidan kafolatlanganligi maʼlumot uchun qabul qilinsin.

2. Xorijiy investitsiyalar ishtirokidagi yirik va strategik jihatdan muhim investitsiya loyihalarini amalga oshirish masalalari boʻyicha muvofiqlashtiruvchi kengash (A.N.Isayev) ushbu loyihani xorijiy investitsiyalar va kreditlar hisobiga amalga oshiriladigan 2001-yilgi investitsiya loyihalari dasturining aniq manzilli qismiga kiritsin.

3. “VISO” qoʻshma korxonasi Yevropa tiklanish va taraqqiyot banki kreditini uzish davrida import boʻyicha keltiriladigan hamda maxsus poyabzallar ishlab chiqarish uchun foydalaniladigan xom ashyo va materiallar uchun bojxona toʻlovlaridan (bojxona rasmiylashtirishi uchun yigʻimlardan tashqari) ozod etilsin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari M.Z. Usmonov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2001-yil 22-mart,

141-son