“Oʻzbekyengilsanoat” davlat-aksiyadorli kompaniyasining pillakashlik korxonalarini texnika bilan qayta jihozlash toʻgʻrisida (193-son)

26.04.2001

Oʻzbekiston Respublikasi Vazirlar Mahkamasining

qarori

[Koʻchirma]

Pillani qayta ishlash hajmlarini koʻpaytirish, xorijiy investitsiyalar va kreditlarni jalb etish asosida ishlab chiqarishni zamonaviylashtirish, shuningdek pillakashlik korxonalarining eksport imkoniyatini kengaytirish maqsadida Vazirlar Mahkamasi qaror qiladi:

1. “Oʻzbek ipagi” uyushmasining 2001-2002-yillarda tarmoqning pillakashlik korxonalarini texnika bilan qayta jihozlash, 2005-yilda ipak ip xomashyosi ishlab chiqarishni 2525 tonnaga yetkazish toʻgʻrisidagi taklifiga 1-ilovaga* muvofiq rozilik berilsin.

* 1-ilova berilmaydi.

2. Belgilab qoʻyilsinki, “Oʻzbek ipagi” uyushmasining pillakashlik korxonalarini texnika bilan qayta jihozlash boʻyicha umumiy qiymati 24,96 mln AQSh dollari boʻlgan loyihasini mablagʻ bilan taʼminlash 2-ilovaga* muvofiq:

* 2-ilova berilmaydi.

Koreya Respublikasi Eksimbankining 12,75 mln AQSh dollari miqdoridagi mablagʻlarini (koʻrsatib oʻtilgan kontraktlar qiymatining 85 foizi) qayta moliyalashtirish yoʻli bilan Oʻzbekiston Respublikasi Tashqi iqtisodiy faoliyat milliy banki krediti hisobiga;

eksport qilinadigan ipak xomashyosi uchun “IDM Corporation” firmasining 2,25 mln AQSh dollari (kontraktlar qiymatining 15 foizi) miqdoridagi avans toʻlovlari hisobiga;

“Oʻzbek ipagi” uyushmasining import jihozlarni montaj qilish boʻyicha ish hajmlariga kirmaydigan qurilish-montaj ishlari xarajatlarini qoplash uchun 6,43 mln AQSh dollariga teng miqdordagi oʻz mablagʻlari hisobiga;

aylanma mablagʻlarni toʻldirishga yoʻnaltiriladigan, 3,53 mln AQSh dollariga teng boʻlgan milliy valyutadagi kreditlar hisobiga amalga oshiriladi.

3. Belgilansinki, xorijiy bankning kreditini asosiy qarz, foizlar, sugʻurta mukofoti, vositachilik haqi va kreditga xizmat koʻrsatish yuzasidan boshqa xarajatlar boʻyicha qaytarish 2007-yildan boshlab “Oʻzbekyengilsanoat” davlat-aksiyadorlik kompaniyasi tomonidan, kompaniya korxonalarining xoʻjalik faoliyati natijasida tushadigan oʻz valyuta mablagʻlari hisobiga 3-ilovaga* muvofiq prognoz jadvali boʻyicha amalga oshiriladi.

* 3-ilova berilmaydi.

4. “Oʻzbek ipagi” uyushmasi tomonidan “IDM Corporation” firmasi (Koreya Respublikasi) bilan:

texnologik jihozlar yetkazib berish, ularni keltirish, montaj qilish, ishga tushirish va kadrlarni oʻqitish yuzasidan qiymati 15 mln AQSh dollari boʻlgan;

Koreya Respublikasi Eksimbanki krediti boʻyicha majburiyatlarni va “IDM Corporation” firmasi oldidagi majburiyatlarni bajarish uchun texnika bilan qayta jihozlanadigan korxonalarning yangi ishga tushiriladigan jihozlarida ishlab chiqarilgan ipak ip xomashyosining 80 foizini eksport qilish yuzasidan kontraktlar tuzilganligi maʼlumot uchun qabul qilinsin.

5. Oʻzbekiston Respublikasi Tashqi iqtisodiy faoliyat milliy banki Koreya Respublikasi Eksimbankining kredit resurslarini belgilangan tartibda jalb etsin va ularni ushbu qarorga muvofiq qayta moliyalashtirsin.

6. Oʻzbekiston Respublikasi Moliya vaziri Oʻzbekiston Respublikasi Hukumati nomidan Tashqi iqtisodiy faoliyat milliy bankining toʻlov majburiyatlari boʻyicha Koreya Respublikasi Eksimbankiga hamda “Oʻzbek ipagi” uyushmasining toʻlov majburiyatlari boʻyicha Tashqi iqtisodiy faoliyat milliy bankiga belgilangan tartibda kafolatnomalar berishga vakil qilinsin.

7. Oʻzbekiston Respublikasi Adliya vazirligi Koreya Respublikasi Eksimbankiga Oʻzbekiston Respublikasi Hukumatining kafolatnomasi yuzasidan yuridik xulosani kredit bitimiga ilovada belgilangan shakl boʻyicha belgilangan tartibda rasmiylashtirsin.

8. “Oʻzbekyengilsanoat” davlat-aksiyadorlik kompaniyasi va uning tarkibiga kiruvchi pillakashlik korxonalari ushbu loyihani amalga oshirish doirasida asbob-uskunalar, xizmatlar va ehtiyot qismlarni import qilishda bojxona toʻlovlaridan (bojxona rasmiylashtirishi uchun yigʻimlardan tashqari) ozod qilinsin.

10. Oʻzbekiston Respublikasi Tashqi ishlar vazirligi va Ichki ishlar vazirligi “Oʻzbekyengilsanoat” davlat-aksiyadorlik kompaniyasi buyurtmanomalariga binoan, ushbu loyihani amalga oshirish uchun keluvchi xorijiy mutaxassislarga, ularni davlat bojlari toʻlovidan ozod qilgan holda, koʻp martalik vizalar berishni, ularni vaqtinchalik roʻyxatdan oʻtkazishni va vaqtinchalik roʻyxatdan oʻtkazish muddatini uzaytirishni taʼminlasinlar.

11. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari M.Z. Usmonov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2001-yil 26-aprel,

193-son