Oliy taʼlim muassasalari tasarrufidagi litsey va litsey-internatlar negizida akademik litseylar tashkil etish toʻgʻrisida (188-son)

31.08.2006

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Umumiy oʻrta taʼlim maktablarining bitiruvchilarini akademik litsey va kasb-hunar kollejlarida oʻqishini yanada kengaytirish chora-tadbirlari toʻgʻrisida” 2006-yil 27-iyuldagi PQ-427-son qarorini bajarish yuzasidan hamda Oʻrta maxsus, kasb-hunar taʼlimi tizimini Kadrlar tayyorlash milliy dasturi talablariga muvofiq ravishda takomillashtirish, iqtidorli yoshlarning bilim olishlariga shart-sharoitlar yaratib berish va ularni akademik litseylarda taʼlim-tarbiya olishini taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Oliy va oʻrta maxsus taʼlim, Xalq taʼlimi, qishloq va suv xoʻjaligi, Sogʻliqni saqlash vazirliklarining hamda Aloqa va axborotlashtirish agentligining oliy taʼlim muassasalari tasarrufidagi litsey, litsey-internatlar negizida ilovaga muvofiq akademik litseylar tashkil etish toʻgʻrisidagi takliflariga rozilik berilsin.

2. Oʻzbekiston Respublikasi Oliy va oʻrta maxsus taʼlim vazirligi, Oʻrta maxsus, kasb-hunar taʼlimi markazi manfaatdor vazirlik va idoralar bilan birgalikda:

bir oy muddatda akademik litseylar uchun tasdiqlangan namunaviy ustavlar asosida yangi tashkil etilayotgan akademik litseylarning ustavini hamda shtatlar jadvalini ishlab chiqsin va oʻrnatilgan tartibda tasdiqlasin;

akademik litseylarning quvvatidan kelib chiqqan holda 2006/2007 oʻquv yili uchun birinchi kursga oʻquvchilarni qabul qilishni tashkil etsin;

akademik litseylarning oʻqituvchilar tarkibini tanlov asosida malakali, chuqur kasbiy bilimga, yuksak axloqiy va maʼnaviy sifatlarga ega boʻlgan oʻqituvchilar bilan toʻldirilishini taʼminlasin.

Litsey va litsey-internatlardagi 11-sinf oʻquvchilari oʻqishni umumiy oʻrta taʼlim oʻquv dasturi boʻyicha tugatishlari maʼlumot uchun qabul qilinsin.

3. Oʻzbekiston Respublikasi Iqtisodiyot vazirligi Oʻrta maxsus, kasb-hunar taʼlimi markazi va Moliya vazirligi bilan birgalikda 2007—2009-yillar investitsiya dasturlarini shakllantirishda, ilovadagi akademik litseylarni Vazirlar Mahkamasining “Umumiy oʻrta va oʻrta maxsus, kasb-hunar taʼlimiga izchil oʻtishni taʼminlashga doir qoʻshimcha chora-tadbirlar toʻgʻrisida” 2003-yil 29-oktabrdagi 473-son qarori bilan tasdiqlangan 2004—2009-yillarda respublika boʻyicha akademik litseylarni ishga tushirishning aniq yoʻnaltirilgan dasturida koʻzda tutilgan akademik litseylarda joylashtirilishini nazarda tutsin.

Oʻrta maxsus, kasb-hunar taʼlimi markazi, zarur hollarda, 2004—2009-yillarda respublika boʻyicha akademik litseylarni ishga tushirishning aniq yoʻnaltirilgan dasturiga Vazirlar Mahkamasining 2003-yil 29-oktabrdagi 473-son qarori bilan tasdiqlangan umumiy barpo qilinadigan oʻquvchi oʻrni quvvatlari doirasida oʻzgartirishlar kiritish boʻyicha 1 oy muddatda taklif kiritsin.

4. Oʻzbekiston Respublikasi Moliya vazirligi mazkur qaror talablaridan kelib chiqqan holda, oliy taʼlim muassasalari tasarrufidagi litsey va litsey-internatlarning xarajatlar smetasiga hamda 2006-yil uchun tasdiqlangan Davlat budjetining maorif sohasi parametrlari doirasida tegishli oʻzgartirishlar kiritilishini taʼminlasin.

5. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S.Qosimov zimmasiga yuklansin.

Oʻzbekiston Respublikasi Bosh vaziri Sh. MIRZIYOYEV

Toshkent sh.

2006-yil 31-avgust,

188-son

Vazirlar Mahkamasining 2006-yil 31-avgustdagi 188-son qaroriga ILOVA

Oliy taʼlim muassasalari tasarrufidagi litsey va litsey-internatlar hamda ular negizida tashkil etilayotgan akademik litseylar

roʻyxati