Xalqaro shartnomalarni tasdiqlash toʻgʻrisida (PQ-1224-son)

11.11.2009

Oʻzbekiston Respublikasi Prezidentining

Qarori

1. 2009-yil 25-fevral kuni Toshkent shahrida imzolangan:

Oʻzbekiston Respublikasi Hukumati bilan Turkmaniston Hukumati oʻrtasida jinoyatchilikka qarshi kurashishda hamkorlik qilish toʻgʻrisidagi Bitim;

Oʻzbekiston Respublikasi Hukumati bilan Turkmaniston Hukumati oʻrtasida davlatlar hududiga nolegal kelib turgan shaxslarni qabul qilish-topshirish toʻgʻrisidagi Bitim;

Oʻzbekiston Respublikasi Hukumati bilan Turkmaniston Hukumati oʻrtasida Oʻzbekiston — Turkmaniston Davlat chegarasidagi chegarachi komissarlar faoliyati toʻgʻrisidagi Bitim tasdiqlansin.

2. Oʻzbekiston Respublikasi Tashqi ishlar vazirligi Oʻzbekiston Respublikasi tomonidan mazkur xalqaro shartnomalar kuchga kirishi uchun zarur boʻlgan ichki davlat tartib-qoidalari bajarilgani toʻgʻrisida turkman tomoniga tegishli bildirishnoma yoʻllasin.

3. Oʻzbekiston Respublikasi Vazirlar Mahkamasi hamda tegishli vazirlik va idoralar rahbarlari ushbu xalqaro shartnomalar kuchga kirgandan keyin belgilangan tartibda Oʻzbekiston Respublikasining majburiyatlari bajarilishi ustidan nazoratni taʼminlasinlar.

4. Mazkur qarorning ijrosini nazorat qilish Oʻzbekiston Respublikasi Bosh vaziri Sh.M. Mirziyoyev va Oʻzbekiston Respublikasi Prezidenti huzuridagi Milliy xavfsizlik kengashi Kotibi M.I. Atayev zimmalariga yuklansin.

Oʻzbekiston Respublikasi Prezidenti I. KARIMOV

Toshkent sh.,

2009-yil 11-noyabr,

PQ-1224-son