2008-yilda meva-sabzavot, poliz mahsulotlari va uzum resurslaridan oqilona foydalanish chora-tadbirlari toʻgʻrisida (93-son)

08.05.2008

Oʻzbekiston Respublikasi Vazirlar Mahkamasining

qarori

Meva, sabzavot, poliz mahsulotlari, kartoshka va uzum resurslaridan oqilona foydalanish, ular bilan birinchi navbatda ichki bozorni toʻldirish, mamlakatimizning qayta ishlash korxonalari ehtiyojlarini taʼminlash, shuningdek mahsulotlarni eksportga yetkazib berishni puxta tashkil etish maqsadida Vazirlar Mahkamasi qaror qiladi:

1. Quyidagi tartib belgilansin, unga muvofiq meva-sabzavot mahsulotlarini eksport qilish, birinchi navbatda ular bilan ichki isteʼmol bozorini toʻldirishni hisobga olgan holda:

hoʻl meva-sabzavot, poliz mahsulotlari va uzum eksporti — “Oʻzulgurjisavdoinvest” uyushmasi, “Matlubotsavdo” hududiy aksiyadorlik kompaniyalari va ularning yuridik shaxs maqomiga ega boʻlgan boʻlinmalari tomonidan;

quritilgan va muzlatilgan meva-sabzavot, poliz mahsulotlari va uzum, shuningdek dukkakli mahsulotlar eksporti— mulkchilik shaklidan qatʼi nazar yuridik shaxslar tomonidan amalga oshiriladi.

Meva-sabzavot, poliz mahsulotlari va uzumni eksport qilish kontrakt asosida, erkin konvertatsiya qilinadigan valyutada, valyutani tartibga solish boʻyicha amaldagi qonun hujjatlariga muvofiq, ularning bajarilishini qatʼiy nazoratga olgan holda, amalga oshiriladi.

2. Respublikaning ichki bozorida meva, sabzavot, poliz mahsulotlari, kartoshka, uzum va dukkakli mahsulotlardan oqilona foydalanish, shuningdek ularni eksportga yetkazib berishni tashkil etish masalalarini hal etish uchun ilovaga muvofiq tarkibda ishchi guruh tashkil etilsin.

Quyidagilar ishchi guruhning asosiy vazifalari etib belgilansin:

meva-sabzavot, poliz mahsulotlari, kartoshka va uzum yetishtirish va ulardan foydalanishning 2008-yil uchun tasdiqlangan asosiy prognoz parametrlari bajarilishini tanqidiy koʻrib chiqish;

ichki isteʼmol bozorini meva-sabzavot, poliz mahsulotlari, kartoshka, uzum va dukkakli mahsulotlar bilan zarur hajmda va assortimentda barqaror ravishda va uzluksiz toʻldirish masalalarini hal etish, shuningdek mazkur mahsulotlarga narxlar monitoringini olib borish;

eksport uchun tavsiya etilayotgan meva-sabzavot, poliz mahsulotlari va uzum hajmlari va assortimentini belgilash, shuningdek “Oʻzulgurjisavdoinvest” uyushmasining va “Matlubotsavdo” hududiy kompaniyalarining mahsulotlarni chetga chiqarish boʻyicha takliflarini mahsulotlar hajmlari, turlari va narx omili asoslanganligini hisobga olgan holda koʻrib chiqish;

meva-sabzavot, poliz mahsulotlari va uzumni eksportga yuklab joʻnatish uchun vagonlar va refrijeratorlarni oʻz vaqtida ajratish, bojxonada rasmiylashtirish va ular boʻyicha hisobotlar taqdim etishni tashkil qilish bilan bogʻliq masalalarni tezkorlik bilan koʻrib chiqish.

3. Ishchi guruh (Sh.M.Mirziyoyev):

ishlar rejasini hamda joriy yilning may — dekabr oylarida meva-sabzavot, poliz mahsulotlari, uzum va dukkakli mahsulotlarni eksportga yetkazib berishni tashkil etish bilan bogʻliq masalalarni tezkorlik bilan hal qilish mexanizmini bir hafta muddatda tasdiqlasin;

paydo boʻladigan barcha masalalarni tezkorlik bilan koʻrib chiqish yuzasidan ishchi guruh majlislari har oʻn kunda oʻtkazilishini taʼminlasin.

4. Oʻzbekiston Respublikasi Tashqi iqtisodiy aloqalar, investitsiyalar va savdo vazirligi Davlat bojxona qoʻmitasi bilan birgalikda har haftada “Oʻzulgurjisavdoinvest” uyushmasi va “Matlubotsavdo” hududiy aksiyadorlik kompaniyalariga, shuningdek boshqa manfaatdor korxonalarga asosiy import qilinadigan mamlakatlar va meva-sabzavot, poliz mahsulotlari va uzum nomenklaturasi boʻyicha eksport narxlarining quyi chegaralarini belgilab bersin va ularga yetkazsin.

5. Oʻzbekiston Respublikasi Markaziy banki tijorat banklari bilan birgalikda “Oʻzulgurjisavdoinvest” uyushmasi va “Matlubotsavdo” hududiy aksiyadorlik kompaniyalari boʻlinmalariga Markaziy bankning qayta moliyalashtirish stavkalaridan ortiq boʻlmagan stavkalar boʻyicha kredit resurslari, shuningdek keyinchalik eksport qilish uchun aholidan meva, sabzavot, poliz mahsulotlari va uzum xarid qilish uchun zarur hajmda naqd mablagʻlarning tezkorlik bilan berilishini belgilangan tartibda taʼminlasin.

6. “Oʻzbekiston temir yoʻllari” davlat-aksiyadorlik kompaniyasi ishchi guruh qabul qilgan qarorlarga muvofiq “Oʻzulgurjisavdoinvest” uyushmasi va “Matlubotsavdo” hududiy aksiyadorlik kompaniyalari va boshqa eksport qiluvchilarning buyurtmanomalari boʻyicha meva-sabzavot, poliz mahsulotlari va uzumni tashish uchun vagonlarning oʻz vaqtida ajratilishini belgilangan tartibda taʼminlasin.

7. Oʻzbekiston Respublikasi Davlat bojxona qoʻmitasi:

tuzilgan kontraktlar boʻyicha “Oʻzulgurjisavdoinvest” uyushmasi va “Matlubotsavdo” hududiy kompaniyalari boʻlinmalari tomonidan chetga chiqariladigan hoʻl meva, sabzavot, poliz mahsulotlari va uzum uchun yuklab joʻnatish hujjatlarining oʻz vaqtida (bir kun muddatda) rasmiylashtirilishini;

meva-sabzavot, poliz mahsulotlari va uzumni, shuningdek dukkakli mahsulotlarni eksportga yuklab joʻnatishga doir axborotning har oʻn kunda ishchi guruhga taqdim etilishini taʼminlasin.

Davlat bojxona qoʻmitasi va uning hududiy boʻlinmalari rahbarlari zimmasiga hoʻl meva-sabzavot, poliz mahsulotlari va uzumning bojxonada rasmiylashtirish davrida yaroqsizlanishiga yoʻl qoʻyilmasligi yuzasidan javobgarlik yuklansin.

8. Oʻzbekiston Respublikasi Davlat statistika qoʻmitasi mintaqalar va mahsulot turlari boʻyicha ichki bozorda sotiladigan hoʻl meva, sabzavot, poliz mahsulotlari va uzum, shuningdek dukkakli mahsulotlar narxlari darajasi yuzasidan doimiy monitoring olib borilishini hamda har haftada ishchi guruhga axborot taqdim etilishini taʼminlasin.

9. Oʻzbekiston Respublikasi Davlat bojxona qoʻmitasi Milliy xavfsizlik xizmatining Davlat chegaralarini himoya qiluvchi qoʻmitasi va Ichki ishlar vazirligi bilan birgalikda respublika hududidan meva-sabzavot mahsulotlari va oziq-ovqat mahsulotlarini noqonuniy olib chiqishning oldini olish boʻyicha ishlarni kuchaytirish yuzasidan kompleks chora-tadbirlarni amalga oshirsin.

10. Mazkur qarorning bajarilishini nazorat qilish Oʻzbekiston Respublikasining Bosh vaziri Sh.M.Mirziyoyev zimmasiga yuklansin.

Oʻzbekiston Respublikasi Prezidenti I.KARIMOV

Toshkent sh., ,

2008-yil 8-may,

93-son

Vazirlar Mahkamasining 2008-yil 8-maydagi 93-son qaroriga ILOVA

Respublikaning ichki bozorida meva, sabzavot, poliz mahsulotlari, kartoshka va uzum, shuningdek dukkakli mahsulotlardan oqilona foydalanish hamda ularni eksportga yetkazib berishni tashkil etish masalalarini hal etish boʻyicha ishchi guruh

TARKIBI