“Oʻzbekinvest” milliy eksport-import sugʻurta kompaniyasining maʼmuriy binosini rekonstruksiya qilishni tugallash chora-tadbirlari toʻgʻrisida (63-son)

07.04.2008

Oʻzbekiston Respublikasi Vazirlar Mahkamasining

qarori

“Oʻzbekinvest” milliy eksport-import sugʻurta kompaniyasining maʼmuriy binosini rekonstruksiya qilishni oʻz vaqtida tugallash va foydalanishga topshirishni taʼminlash maqsadida Vazirlar Mahkamasi qaror qiladi:

1. Quyidagilar:

ochiq tender savdolari yakunlariga koʻra “Oʻzbekinvest” milliy eksport-import sugʻurta kompaniyasining Toshkent shahar, Abdulla Qodiriy koʻchasi, 2-uyda joylashgan 14 qavatli maʼmuriy binosini (keyingi oʻrinlarda “obyekt” deb ataladi) rekonstruksiya qilish boʻyicha “12-trest” OAJ bosh pudratchi tashkilot etib belgilanganligi;

“Oʻzbekinvest” milliy eksport-import sugʻurta kompaniyasi (keyingi oʻrinlarda “Oʻzbekinvest” kompaniyasi deb ataladi) tomonidan obyektni rekonstruksiya qilish boʻyicha buyurtmachi funksiyasi kompaniya taʼsis etgan “Oʻzbekinvest qurilish” unitar korxonasiga yuklanganligi;

obyektni rekonstruksiya qilish ishlari “Oʻzbekinvest” kompaniyasining oʻz mablagʻlari va jalb etilgan mablagʻlar hisobiga moliyalashtirilishi maʼlumot uchun qabul qilinsin.

2. “Oʻzbekinvest” kompaniyasiga va “12-trest” OAJga, istisno tariqasida, obyektni rekonstruksiya qilishni ishchi chizmalar boʻyicha, loyiha-smeta hujjatlarini loyihalashtirish bilan bir vaqtda amalga oshirishga ruxsat etilsin, loyiha-smeta hujjatlarini loyihalashtirish va tasdiqlash 2008-yil 1-avgustgacha tugallansin, shuningdek obyektni rekonstruksiya qilish uchun asbob-uskunalar, qurilish materiallari va mebel xarid qilish boʻyicha tanlov savdolari ishlab chiqaruvchilar va yetkazib beruvchilarning tijorat takliflari asosida oʻtkazilsin.

3. “12-trest” OAJ obyektni rekonstruksiya qilish davrida obyektni rekonstruksiya qilish maqsadida respublikaga chetdan keltiriladigan asbob-uskunalar, qurilish materiallari va mebel uchun bojxona toʻlovlari toʻlashdan (bojxonada rasmiylashtirish yigʻimlaridan tashqari) ozod qilinsin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S.Azimov va Oʻzbekiston Respublikasi Bosh vazirining oʻrinbosari N.M.Xanov zimmasiga yuklansin.

Oʻzbekiston Respublikasi Bosh vaziri Sh. MIRZIYOYEV

Toshkent sh.,

2008-yil 7-aprel,

63-son