Yangidan tashkil etilayotgan ixtisoslashtirilgan taʼmirlash-qurilish tashkilotlari tomonidan soliq va bojxona imtiyozlarini qoʻllash tartibi toʻgʻrisidagi nizomni tasdiqlash haqida (2009-son)

19.09.2009

OʻZBEKISTON RESPUBLIKASI DAVLAT SOLIQ QOʻMITASI OʻZBEKISTON RESPUBLIKASI MOLIYA VAZIRLIGI OʻZBEKISTON RESPUBLIKASI DAVLAT BOJXONA QOʻMITASI OʻZBEKISTON RESPUBLIKASI DAVLAT ARXITEKTURA VA QURILISh QOʻMITASINING

Qarori

[Oʻzbekiston Respublikasi Adliya vazirligi tomonidan 2009-yil 19-sentabrda roʻyxatdan oʻtkazildi, roʻyxat raqami 2009]

Oʻzbekiston Respublikasi Prezidentining 2009-yil 29-yanvardagi PQ-1051-son “Uy-joy fondini foydalanishga tayyor holda topshirish shartlarida rekonstruksiya qilish va taʼmirlash boʻyicha pudrat ishlarini kengaytirishni ragʻbatlantirishga doir qoʻshimcha chora-tadbirlar toʻgʻrisida”gi qaroriga muvofiq (Oʻzbekiston Respublikasi qonun hujjatlari toʻplami, 2009-y., 5-son, 38-modda.) Oʻzbekiston Respublikasi Davlat soliq qoʻmitasi, Moliya vazirligi, Davlat bojxona qoʻmitasi va Davlat arxitektura va qurilish qoʻmitasi qaror qiladilar:

1. Yangidan tashkil etilayotgan ixtisoslashtirilgan taʼmirlash-qurilish tashkilotlari tomonidan soliq va bojxona imtiyozlarini qoʻllash tartibi toʻgʻrisidagi nizom ilovaga muvofiq tasdiqlansin.

2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

Davlat soliq qoʻmitasi raisi B. PARPIYEV

Toshkent sh.,

2009-yil 16-avgust,

2009-21-son

Moliya vaziri R. AZIMOV

Toshkent sh.,

2009-yil 16-avgust,

83-son

Davlat bojxona qoʻmitasi raisi S. NOSIROV

Toshkent sh.,

2009-yil 16-avgust,

01-02/8-14-son

Davlat arxitektura va qurilish qoʻmitasi raisi B. XOʻJAYEV

Toshkent sh.,

2009-yil 16-avgust,

5-son

Oʻzbekiston Respublikasi Davlat soliq qoʻmitasi, Moliya vazirligi, Davlat bojxona qoʻmitasi va Davlat arxitektura va qurilish qoʻmitasining 2009-yil 16-avgustdagi 2009-21, 83, 01-02/8-14, 5-son qaroriga ILOVA

Yangidan tashkil etilayotgan ixtisoslashtirilgan taʼmirlash-qurilish tashkilotlari tomonidan soliq va bojxona imtiyozlarini qoʻllash tartibi toʻgʻrisida

NIZOM

Ushbu Nizom Oʻzbekiston Respublikasi Prezidentining “Uy-joy fondini foydalanishga tayyor holda topshirish shartlarida rekonstruksiya qilish va taʼmirlash boʻyicha pudrat ishlarini kengaytirishni ragʻbatlantirishga doir qoʻshimcha chora-tadbirlar toʻgʻrisida” 2009-yil 29-yanvardagi PQ-1051-son qaroriga (Oʻzbekiston Respublikasi qonun hujjatlari toʻplami, 2009-yil, 5-son, 38-modda) muvofiq yangi tashkil etilayotgan ixtisoslashtirilgan taʼmirlash-qurilish tashkilotlari tomonidan soliq va bojxona imtiyozlarini qoʻllash tartibini belgilaydi.

I. Umumiy qoidalar

1. Oʻzbekiston Respublikasi Prezidentining “Uy-joy fondini foydalanishga tayyor holda topshirish shartlarida rekonstruksiya qilish va taʼmirlash boʻyicha pudrat ishlarini kengaytirishni ragʻbatlantirishga doir qoʻshimcha chora-tadbirlar toʻgʻrisida” 2009-yil 29-yanvardagi PQ-1051-son qaroriga asosan yangidan tashkil etilayotgan taʼmirlash-qurilish tashkilotlari 2017-yil 1-yanvargacha:

soliqlarning barcha turlarini va davlat maqsadli jamgʻarmalariga majburiy ajratmalarni toʻlashdan ozod qilinadi, budjetdan tashqari Pensiya jamgʻarmasi bundan mustasno;

Vazirlar Mahkamasi tomonidan tasdiqlanadigan roʻyxatlar boʻyicha Oʻzbekiston Respublikasi hududiga olib kiriladigan qurilish texnikasi va kichik mexanizatsiyalash vositalari uchun bojxona toʻlovlari toʻlashdan (bojxona rasmiylashtiruvi yigʻimlari bundan mustasno) ozod qilinadi.

2. Ixtisoslashtirilgan taʼmirlash-qurilish tashkiloti faqat foydalanishga tayyor holda topshirish shartlarida uy-joy fondi obyektlarini rejalashtirish, qayta rejalashtirish, bezash, qurish, qayta qurish va taʼmirlash ishlarini amalga oshiradigan tashkilotdir.

Bunda:

a) binoni rejalashtirish deganda tekislikdagi gorizontal kesim koʻrinishida binoning rejalashtirilgan hajmiy tuzilmasining maʼlum masshtabdagi tasviri (chizmalari) tushuniladi;

b) binoni qayta rejalashtirish deganda binoning va/yoki uning alohida xonalari funksional vazifalarining oʻzgarishiga olib keladigan ishlar majmuasi tushuniladi. Bunday ishlarga, jumladan, quyidagilar kiradi:

koʻtarib turmaydigan pardevorlarni butunlay yoki qisman almashtirish;

koʻtarib turmaydigan pardevorlarda teshiklar teshish;

muhandislik yoki santexnika asbob-uskunalarini almashtirish;

v) dizayn deganda qulaylik, tejamkorlik va goʻzallikning mushtarakligi prinsipiga asoslangan holda binoning old tomoni va ichki xonalarini meʼmoriy bezash, interyer elementlarini badiiy konstruksiyalash tushuniladi;

g) rekonstruksiya deganda bino (xona) va inshootlarning asosiy texnik-iqtisodiy koʻrsatkichlarini va funksional vazifalarini (xonalar soni va maydonini, binolarning qurilish hajmi va umumiy maydonini) oʻzgartirish bilan bogʻliq ishlar majmui tushuniladi;

d) taʼmirlash deganda quyidagilar tushuniladi:

kapital taʼmirlash — bino yoki uning alohida elementlarining foydalanish koʻrsatkichlarini yaxshilash bilan bogʻliq, bino (bino elementi) mustahkamligini va qulayligini taʼminlashga yoʻnaltirilgan tiklash boʻyicha ishlar majmui, shuningdek, daha ichida eskirgan uy-joy muhandislik tarmoqlarini almashtirish va turar joylarga qayta qurish, shu jumladan turar joy fondining uylari oldidagi hududda landshaft loyiha yechimlaridan foydalangan holda obodonlashtirish ishlarini amalga oshirish;

joriy taʼmirlash — binoning yoki uning alohida elementlarining foydalanish koʻrsatkichlarini saqlab turish boʻyicha ishlar majmui;

e) qurilish inshootlarini tayyor holda topshirish deganda buyurtmachining topshirigʻiga binoan obyektda barcha ishlar majmuini bajarish, shu bilan birga loyihalashtirish hujjatlarini ishlab chiqish, qurilish-montaj, maxsus va ishga tushirish-sozlash ishlarini bajarish, obyektni texnologik va muhandislik asbob-uskunalari bilan jihozlash, foydalanishga tayyor qurilish mahsulotini yaratish tushuniladi.

3. Mazkur Nizomning 1-bandida koʻrsatilgan imtiyozlar ixtisoslashtirilgan qurilish-taʼmirlash korxonalari tomonidan faqat oʻz kuchlari bilan bajarilgan ishlarga qoʻllaniladi.

4. Ixtisoslashtirilgan taʼmirlash-qurilish tashkiloti agar Oʻzbekiston Respublikasi Prezidentining “Uy-joy fondini foydalanishga tayyor holda topshirish shartlarida rekonstruksiya qilish va taʼmirlash boʻyicha pudrat ishlarini kengaytirishni ragʻbatlantirishga doir qoʻshimcha chora-tadbirlari toʻgʻrisida” 2009-yil 29-yanvardagi PQ-1051-son qarori chiqqandan keyin yuridik shaxs sifatida roʻyxatga olingan boʻlsa, u yangidan tashkil etilgan hisoblanadi.

Faoliyat koʻrsatib kelayotgan korxonalarni qayta tashkil etish yoʻli bilan ular huzurida yoki ularning mol-mulklari huzurida tashkil etilgan tashkilotlar yangidan tashkil etilgan taʼmirlash-qurilish tashkilotlari sifatida qaralmaydi.

5. Yuridik shaxslarga soliqlar, bojxona va majburiy toʻlovlarni budjetga toʻlash boʻyicha berilgan imtiyozlarni rasmiylashtirish va buxgalterlik hisobida aks ettirish tartibi toʻgʻrisidagi nizomga (roʻyxat raqami 1463-son, 2005-yil 2-aprel) (Oʻzbekiston Respublikasi qonun hujjatlari toʻplami, 2005-y., 14-son, 105-modda) muvofiq boʻshayotgan mablagʻlarni maqsadli ishlatish nazarda tutilmagan soliqlar va bojxona imtiyozlari berilganda budjetga toʻlanadigan soliqlar, bojxona va majburiy toʻlovlar hisoblab chiqarilmaydi va mahsulotlar (tovarlar, ishlar, xizmatlar) hamda boshqa mol-mulkning sotish (xarid) qiymatiga kiritilmaydi.

Boʻshayotgan mablagʻlarni maqsadli ishlatishni nazarda tutmaydigan soliqlar va bojxona imtiyozlarini buxgalteriya hisobida aks ettirish tartibi yuqorida qayd qilingan Nizom bilan tartibga solinadi.

II. Imtiyozlarni qoʻllash tartibi

6. Yangidan tashkil etilayotgan ixtisoslashtirilgan taʼmirlash-qurilish tashkilotlariga soliq va bojxona toʻlovlari boʻyicha imtiyozlar va preferensiyalar ushbu Nizomning 1-ilovasida keltirilgan shaklga muvofiq davlat soliq xizmati va davlat bojxona xizmati organlariga taqdim etiladigan arizaga asosan taqdim etiladi. Ariza davlat soliq xizmati organlariga yoki davlat bojxona xizmati organlariga ikki nusxada taqdim etiladi, shulardan bittasi vakolatli organning tegishli belgisi bilan soliq toʻlovchiga qaytariladi. Bunda, yangidan tashkil etilayotgan ixtisoslashtirilgan taʼmirlash-qurilish tashkilotlari hisoblangan mikrofirma va kichik korxonalar tomonidan soliq va bojxona toʻlovlari boʻyicha imtiyozlar va preferensiyalarni qoʻllash uchun ariza taqdim etilmaydi.

7. Bojxona toʻlovlari boʻyicha imtiyozlar (bojxona rasmiylashtiruvi uchun yigʻimlaridan tashqari) Oʻzbekiston Respublikasi Vazirlar Mahkamasi tomonidan tasdiqlangan roʻyxat asosida olib kirilayotgan tovarlarni erkin muomalaga chiqarish rejimiga oʻtkazish bojxona rasmiylashtiruvi vaqtida taqdim etiladi.

8. Imtiyozlardan foydalangan ixtisoslashtirilgan taʼmirlash-qurilish tashkilotlari haqiqatda ixtisoslashganligini tasdiqlash uchun yil yakuni boʻyicha soliq hisobotlarini taqdim etish bilan bir vaqtda davlat soliq xizmati organlariga ushbu Nizomning 2-ilovasida keltirilgan shaklga muvofiq Maʼlumotnoma — hisob-kitobni taqdim etadilar. Maʼlumotnoma — hisob-kitob davlat soliq xizmati organlariga ikki nusxada taqdim etiladi, shulardan bittasi davlat soliq xizmatining tegishli belgisi bilan soliq toʻlovchiga qaytariladi.

9. Agar ixtisoslashtirilgan taʼmirlash-qurilish tashkiloti hisobot yili yakuni boʻyicha taqdim etilgan Maʼlumotnoma — hisob-kitobdan kelib chiqqan holda imtiyozlar taqdim etish uchun belgilangan mezonlarga mos kelmasa (ixtisoslashtirilgan taʼmirlash-qurilish tashkiloti hisoblanmaganda), soliq va bojxona toʻlovlari boʻyicha berilgan imtiyozlar bekor qilinadi va ushbu toʻlovlarni budjetga toʻlash majburiyati qonun hujjatlarida nazarda tutilgan jarima sanksiyalarini hisobga olgan holda tiklanadi.

Korxona imtiyozlarni qoʻllash uchun belgilangan mezonlarga mos kelmasligi holatlari aniqlangan taqdirda davlat soliq xizmati organlari 10 ish kuni ichida davlat bojxona organlarini aniqlangan hollar toʻgʻrisida ilgari toʻlanmagan bojxona toʻlovlarini undirish choralarini koʻrish uchun xabardor qiladi.

III. Yakuniy qoida

10. Soliq va bojxona imtiyozlarini toʻgʻri qoʻllanilishi ustidan nazorat Oʻzbekiston Respublikasi davlat soliq xizmati va davlat bojxona xizmati organlari tomonidan amalga oshiriladi.

Yangidan tashkil etilayotgan ixtisoslashtirilgan taʼmirlash-qurilish tashkilotlari tomonidan soliq va bojxona imtiyozlarini qoʻllash tartibi toʻgʻrisidagi nizomga 1-ILOVA

Yangidan tashkil etilayotgan ixtisoslashtirilgan taʼmirlash-qurilish tashkilotlari tomonidan soliq va bojxona imtiyozlarini qoʻllash tartibi toʻgʻrisidagi nizomga 2-ILOVA

(2-ilova Oʻzbekiston Respublikasi Davlat soliq qoʻmitasi, Moliya vazirligi, Davlat bojxona qoʻmitasi va Davlat arxitektura va qurilish qoʻmitasining 2016-yil 16-maydagi 2016-12, 31, 01-02/8-37 va 2-sonli qarori tahririda (roʻyxat raqami 2009-1, 19.05.2016-y.) — OʻR QHT, 2016-y., 20-son, 229-modda)