“Qatagʻon qurbonlari xotirasi” muzeyining faoliyatini yanada takomillashtirish toʻgʻrisida (PQ-861-son)

05.05.2008

Oʻzbekiston Respublikasi Prezidentining

Qarori

Xalqimizning ozodlik va mustaqillik uchun olib borgan koʻp yillik mashaqqatli kurashini haqqoniy va toʻlaqonli aks ettirish, mustabid tuzum davridagi ommaviy qatagʻonlar tufayli qurbon boʻlgan, insonlik shaʼni, qadr-qimmati toptalgan vatandoshlarimizning hurmati va xotirasini joyiga qoʻyish, fuqarolarimiz, ayniqsa, yosh avlod qalbida Vatanga muhabbat, istiqlol gʻoyalariga sadoqat tuygʻularini kuchaytirish borasida “Qatagʻon qurbonlari xotirasi” muzeylari alohida muhim ahamiyatga ega ekanini nazarda tutib respublika jamoat tashkilotlari, taʼlim muassasalari, jamoatchilik vakillari tomonidan bildirilgan taklif va mulohazalarni inobatga olib hamda muzey faoliyatini yanada takomillashtirish maqsadida:

1. “Qatagʻon qurbonlari xotirasi” muzeyining yangi ilmiy ekspozitsiyasini yaratish boʻyicha ishchi guruhi tarkibi ilovaga muvofiq tasdiqlansin.

2. Ishchi guruhi bir oy muddatda yangi ekspozitsiyaning har tomonlama puxta oʻylangan ilmiy-tarixiy konsepsiyasi va mavzu rejasini ishlab chiqsin.

3. Oʻzbekiston Respublikasi Fanlar akademiyasi, Madaniyat va sport ishlari vazirligi, Badiiy akademiya, Milliy gʻoya va mafkura ilmiy-amaliy markazi, Respublika Maʼnaviyat targʻibot markazi muzeyning yangi ekspozitsiyasini yaratish ishlarini 2008-yilning 1-avgustiga qadar yakuniga yetkazsin.

4. Toshkent shahar hokimligi 2008-yilning 1-iyuliga qadar muzeyning mavjud binosini rekonstruksiya qilish, yangi ikkita ekspozitsiya zalini oʻz ichiga olgan qoʻshimcha bino qurish ishlarining yakunlanishini taʼminlasin.

5. Qurilish, rekonstruksiya, yangi ekspozitsiyasini yaratish, tegishli asbob-uskuna va jihozlarni xarid qilish boʻyicha ishlarni belgilangan muddatda oxiriga yetkazish maqsadida loyihalash va qurilish ishlarining bir vaqtda amalga oshirilishi, yuqorida zikr etilgan barcha ishlarning tender tanlovlari savdosi oʻtkazmasdan amalga oshirilishiga istisno tariqasida ruxsat berilsin.

6. Oʻzbekiston Respublikasi Milliy xavfsizlik xizmati, Bosh Prokuratura, Oliy sud, Ichki ishlar vazirligi, Mudofaa vazirligi, Fanlar akademiyasi, Prezident devoni arxivi, “Oʻzarxiv” agentligi, Madaniyat va sport ishlari vazirligi va boshqa tegishli vazirlik va idoralar mustamlakachilik va qatagʻon davriga oid hujjatlar, kino-foto materiallar, ashyoviy dalillardan ishchi guruhining foydalanishi, ekspozitsiya faoliyati uchun kerakli deb topilgan arxiv hujjatlarining belgilangan tartibda muzeyga berilishi uchun zarur chora- tadbirlarni koʻrsin.

7. Oʻzbekiston Respublikasi Moliya vazirligi muzeyning yangi ekspozitsiyasini yaratish ishlari uchun taqdim etilgan hisob-kitoblar asosida Vazirlar Mahkamasining zaxira jamgʻarmasidan oʻz vaqtida mablagʻ ajratishni taʼminlasin.

8. Mazkur qarorning bajarilishini nazorat qilish Oʻzbekiston Respublikasi Bosh vaziri Sh.Mirziyoyev zimmasiga yuklansin.

Oʻzbekiston Respublikasi Prezidenti I. KARIMOV

Toshkent sh.,

2008-yil 5-may,

PQ-861-son

Oʻzbekiston Respublikasi Prezidentining 2008-yil 5-maydagi PQ-861-sonli qaroriga ILOVA

“Qatagʻon qurbonlari xotirasi” muzeyning yangi ilmiy ekspozitsiyasini yaratish boʻyicha

ishchi guruhi tarkibi