Yengil sanoat mahsulotlari yarmarka savdosini tashkil etish boʻyicha chora-tadbirlar toʻgʻrisida (25-son)

28.01.2009

Oʻzbekiston Respublikasi Vazirlar Mahkamasining

qarori

Marketing tadqiqotlari oʻtkazishga koʻmaklashish va yengil sanoat korxonalarining eksport salohiyatini oshirish, mahalliy toʻqimachilik mahsulotlarini tashqi bozorlarga chiqarish, import qilinadigan past sifatli buyumlar hajmlarini qisqartirish, respublika ishlab chiqaruvchilarining manfaatlarini himoya qilish, mavjud ishlab chiqarish quvvatlaridan foydalanish darajasini oshirish va ichki bozorning mahalliy yengil sanoat tovarlariga boʻlgan ehtiyojini qondirish uchun yangi ishlab chiqarish quvvatlarini tashkil etish maqsadida Vazirlar Mahkamasi qaror qiladi:

1. “Oʻzbekyengilsanoat” davlat-aksiyadorlik kompaniyasi, Oʻzbekiston Respublikasi Iqtisodiyot vazirligi va Moliya vazirligining “Oʻzbekyengilsanoat” davlat-aksiyadorlik kompaniyasi binosining koʻrgazmalar zalida doimiy ravishda yengil sanoat mahsulotlarini sotish boʻyicha koʻrgazma-yarmarka (keyingi oʻrinlarda koʻrgazma-yarmarka deb ataladi) oʻtkazish toʻgʻrisidagi taklifi maʼqullansin.

2. Yengil sanoat mahsulotlarini sotish boʻyicha koʻrgazma-yarmarka ishini muvofiqlashtirish maqsadida ilovaga muvofiq tarkibda koʻrgazma-yarmarkaning tashkiliy qoʻmitasi tashkil etilsin.

Quyidagilar koʻrgazma-yarmarka tashkiliy qoʻmitasining asosiy vazifalari etib belgilansin:

tayyor toʻqimachilik mahsulotlarini (trikotaj mato, gazlamalar, tikuvchilik buyumlari va boshqalar) sotish boʻyicha salohiyatli tashqi bozorlarni oʻrganish va mahalliy korxonalarning xalqaro koʻrgazmalarda ishtirok etishiga koʻmaklashish;

koʻrgazma-yarmarka ishida ishtirok etish uchun xorijiy mamlakatlarning yirik xaridorlari va importchilarini jalb etish, yengil sanoat mahsulotlarini yetkazib berish geografiyasini kengaytirish va sotishning muqobil bozorlarini, ayniqsa MDH, Janubi-Sharqiy Osiyo va Yaqin Sharq mamlakatlariga aniqlash boʻyicha tizimli chora-tadbirlar koʻrish;

koʻrgazma-yarmarka ishida qatnashish uchun mamlakatimiz korxonalarining keng doirasini, shu jumladan raqobatbardosh yengil sanoat mahsulotlari ishlab chiqaruvchi kichik va xususiy biznes korxonalarini jalb etish, ular tomonidan ishlab chiqarilayotgan tovarlarni yarmarka savdolariga qoʻyish va sotish;

mahsulotlarni mintaqaviy va xalqaro miqyosda faol ilgari surish uchun koʻchma koʻrgazma-yarmarkalarni muntazam oʻtkazish asosida respublika korxonalari tomonidan ishlab chiqarilayotgan yengil sanoat tovarlarini ulgurji va chakana sotish ishlarini tashkil etish;

koʻrgazma-yarmarkalarning oʻtkazilishi toʻgʻrisida har chorakda Oʻzbekiston Respublikasi Vazirlar Mahkamasiga tegishli axborot taqdim etish.

3. Tashkiliy qoʻmita manfaatdor vazirlik va idoralar bilan birgalikda bir oy muddatda oʻziga yuklatilgan vazifalarni amalga oshirishni nazarda tutuvchi kompleks chora-tadbirlarni ishlab chiqsin.

4. “Oʻzbekyengilsanoat” davlat-aksiyadorlik kompaniyasi huzuridagi Toʻqimachilik mahsulotlari reklamasi va marketingi agentligi koʻrgazma-yarmarka tashkiliy qoʻmitasining ishchi organi (keyingi oʻrinlarda — ishchi organ) etib belgilansin.

5. Ishchi organga quyidagi vazifalar yuklansin:

yengil sanoat mahsulotlarining ichki va tashqi bozorlarida marketing tadqiqotlari oʻtkazish, mavzuli namoyishlarning har xil turlarini tashkil etish va tovarlarning yangi modellarini sotish, shuningdek respublika korxonalarida buyurtmalarni joylashtirishga koʻmaklashish;

mahalliy yengil sanoat mahsulotlari ishlab chiqaruvchilarga xorijiy isteʼmolchilar bilan aloqalar oʻrnatishda, yengil sanoat mahsulotlarining salohiyatli xorijiy importchilari bilan oʻzaro manfaatli kontraktlar tuzishda koʻmaklashish;

koʻrgazma-yarmarka ishi natijalari boʻyicha aholining talabi yuqori boʻlgan yengil sanoat tovarlari nomenklaturasini aniqlash, tovar ishlab chiqaruvchilarga mahsulot ishlab chiqarish uchun buyurtmalar tayyorlash masalalarini ishlab chiqish, ishlab chiqarilayotgan mahsulotlar turlarini kengaytirishga, tovarlar dizayni va sifatini yaxshilashga yoʻnaltirilgan tavsiyalar ishlab chiqish;

yengil sanoat mahsulotlari ishlab chiqaruvchi korxonalar, savdo-vositachi tashkilotlar va isteʼmolchilar oʻrtasida amaliy aloqalar oʻrnatishga koʻmaklashish;

mahalliy tovarlarni ichki va tashqi bozorlarda ilgari surish maqsadida reklama-axborot faoliyati boʻyicha kompleks tadbirlarni doimiy asosda oʻtkazish;

Oʻzbekiston Respublikasining xorijiy mamlakatlardagi savdo uylari, kompaniyalari va diplomatik vakolatxonalari manziliga yengil sanoat mahsulotlari ishlab chiqarish boʻyicha respublikaning ishlab chiqarish va eksport salohiyatini ochib beruvchi axborot va taqdimot materiallarini yuborish.

6. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari yengil sanoat tovarlari ishlab chiqarishga ixtisoslashgan korxonalarning koʻrgazma-yarmarka ishida faol ishtirok etishini taʼminlasinlar, shuningdek koʻrgazma-yarmarkada qatnashishga savdo-vositachi tashkilotlarni jalb etishga koʻmaklashsin.

7. “Oʻzbekyengilsanoat” davlat-aksiyadorlik kompaniyasi koʻrgazma-yarmarka qatnashchilari boʻlgan korxonalarga yengil sanoat tovarlarini sotish uchun zarur shart-sharoitlar yaratsin, ularni omborxona binolari va tegishli inventar bilan taʼminlasin.

8. Oʻzbekiston Milliy teleradiokompaniyasi va Milliy axborot agentligi “Oʻzbekyengilsanoat” davlat-aksiyadorlik kompaniyasi bilan birgalikda tashkil etilayotgan koʻrgazma-yarmarkaning maqsad va vazifalari, respublika ishlab chiqaruvchilari tomonidan ishlab chiqarilayotgan yengil sanoat tovarlarining yangi turlari toʻgʻrisida aholini va manfaatdor ishbilarmon doiralarni ommaviy axborot vositalari orqali keng xabardor qilishni taʼminlasin.

9. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2009-yil 28-yanvar,

25-son

Vazirlar Mahkamasining 2009-yil 28-yanvardagi 25-son qaroriga ILOVA

Yengil sanoat mahsulotlarini sotish boʻyicha koʻrgazma-yarmarka tashkiliy qoʻmitasi

TARKIBI

Eslatma. Tashkiliy qoʻmita aʼzolari boshqa ishga oʻtganda uning tarkibiga mazkur lavozimlarga yangidan tayinlangan shaxslar kiritiladi.