Qoʻqon temir yoʻl kasb-hunar kollejini “Oʻzbekiston temir yoʻllari” davlat-aksiyadorlik kompaniyasi tasarrufiga oʻtkazish toʻgʻrisida (165-son)

17.06.2009

Oʻzbekiston Respublikasi Vazirlar Mahkamasining

qarori

Oʻrta maxsus, kasb-hunar taʼlim muassasalarining moddiy-texnika bazasini yanada mustahkamlash, pedagog va muhandis-pedagoglarning tajribasini orttirish, oʻquvchilarning ishlab chiqarish amaliyotini hamda bitiruvchilarni ishga joylashtirish ishlarini muvofiqlashtirish maqsadida Vazirlar Mahkamasi qaror qiladi:

1. Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi, “Oʻzbekiston temir yoʻllari” davlat-aksiyadorlik kompaniyasi, Davlat mulki qoʻmitasi va Fargʻona viloyati hokimligining Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markaziga qarashli Qoʻqon temir yoʻl kasb-hunar kollejini 2009/2010 oʻquv yilidan boshlab “Oʻzbekiston temir yoʻllari” davlat-aksiyadorlik kompaniyasi tasarrufiga oʻtkazish toʻgʻrisidagi taklifiga rozilik berilsin.

2. Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi Qoʻqon temir yoʻl kasb-hunar kollejini belgilangan tartibda “Oʻzbekiston temir yoʻllari” davlat-aksiyadorlik kompaniyasi tasarrufiga oʻtkazish, kollejning moddiy boyliklarini topshirish va qabul qilish bilan bogʻliq tashkiliy, moliyaviy va huquqiy masalalarni 2009-yil 1-iyulgacha hal etsin.

3. Belgilab qoʻyilsinki:

“Oʻzbekiston temir yoʻllari” davlat-aksiyadorlik kompaniyasi belgilangan tartibda Qoʻqon temir yoʻl kasb-hunar kollejini oʻz tasarrufiga qabul qilib olgandan soʻng, uni moddiy va moliyaviy taʼminlashni, oʻquvchilarni kasbga oʻrgatishni va ularda amaliy koʻnikmalarni shakllantirishni amalga oshiradi;

Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi “Oʻzbekiston temir yoʻllari” davlat-aksiyadorlik kompaniyasi bilan birgalikda Qoʻqon temir yoʻl kasb-hunar kollejiga tashkiliy, oʻquv-uslubiy va ilmiy rahbarlik qilish, oʻquv taʼlim va kasb-hunar dasturlarini birxillashtirish, pedagog kadrlar bilan taʼminlash, ularni tayyorlash va qayta tayyorlash ishlarini olib boradi;

“Oʻzbekiston temir yoʻllari” davlat-aksiyadorlik kompaniyasi va Qoʻqon temir yoʻl kasb-hunar kolleji Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi hamda Mehnat va aholini ijtimoiy muhofaza qilish vazirligi bilan birgalikda hududda mutaxassislarga boʻlgan ehtiyojni aniqlaydilar, bitiruvchilarni mutaxassisliklari boʻyicha ishga joylashtiradilar va ularning ish bilan bandligini monitoringini olib boradilar.

4. “Oʻzbekiston temir yoʻllari” davlat-aksiyadorlik kompaniyasi Fargʻona viloyati hokimligi bilan birgalikda Qoʻqon temir yoʻl kasb-hunar kollejini mukammal taʼmirlash, oʻquv ustaxonalarini kasbga oid jihozlar bilan boyitish chora-tadbirlarini koʻrsin.

5. Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi, “Oʻzbekiston temir yoʻllari” davlat-aksiyadorlik kompaniyasi Adliya vazirligi hamda boshqa manfaatdor vazirliklar va idoralar bilan birgalikda bir oy muddatda idoraviy normativ-huquqiy hujjatlarni ushbu qarorga muvofiqlashtirsinlar.

6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari R.S.Qosimov va N.M.Xanov zimmalariga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2009-yil 17-iyun,

165-son