Oʻzbekiston Respublikasi oliy taʼlim muassasalari talabalari oʻqishini koʻchirish, qayta tiklash va oʻqishdan chetlashtirish tartibi va qoidalari toʻgʻrisidagi muvaqqat nizomni tasdiqlash haqida (1984-son)
17.07.2009
OʻZBEKISTON RESPUBLIKASI OLIY VA OʻRTA MAXSUS TAʼLIM VAZIRLIGI OʻZBEKISTON RESPUBLIKASI VAZIRLAR MAHKAMASI HUZURIDAGI DAVLAT TEST MARKAZINING
qarori
[Oʻzbekiston Respublikasi Adliya vazirligi tomonidan 2009-yil 17-iyulda 1984-son bilan davlat roʻyxatidan oʻtkazilgan]
Oʻzbekiston Respublikasining “Taʼlim toʻgʻrisida”gi va “Kadrlar tayyorlash milliy dasturi toʻgʻrisida”gi qonunlariga muvofiq, shuningdek idoraviy tasarrufidan va mulkchilik shaklidan qatʼi nazar, barcha oliy taʼlim muassasalarida talabalar oʻqishini koʻchirish, qayta tiklash va oʻqishdan chetlashtirish tartibini belgilash maqsadida Oʻzbekiston Respublikasi Oliy va oʻrta maxsus taʼlim vazirligi va Oʻzbekiston Respublikasi Vazirlar Mahkamasi huzuridagi Davlat test markazi qaror qiladi:
1. Oʻzbekiston Respublikasi oliy taʼlim muassasalari talabalari oʻqishini koʻchirish, qayta tiklash va oʻqishdan chetlashtirish tartibi va qoidalari toʻgʻrisidagi muvaqqat nizom ilovaga muvofiq tasdiqlansin.
2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan soʻng oʻn kun oʻtgach kuchga kiradi.
Oliy va oʻrta maxsus taʼlim vaziri A. PARPIYEV
Toshkent sh.,
2009-yil 16-iyul,
246-son
Vazirlar Mahkamasi huzuridagi Davlat test markazi direktori B. ISMOILOV
Toshkent sh.,
2009-yil 16-iyul,
01-255-son
Oʻzbekiston Respublikasi Oliy va oʻrta maxsus taʼlim vazirligi va Oʻzbekiston Respublikasi Vazirlar Mahkamasi huzuridagi Davlat test markazining 2009-yil 16-iyuldagi 246 va 01-255-sonli qaroriga ILOVA
Oʻzbekiston Respublikasi oliy taʼlim muassasalari talabalari oʻqishini koʻchirish, qayta tiklash va oʻqishdan chetlashtirish tartibi va qoidalari toʻgʻrisidagi
MUVAQQAT NIZOM
Mazkur Muvaqqat nizom Oʻzbekiston Respublikasining “Taʼlim toʻgʻrisida”gi (Oʻzbekiston Respublikasi Oliy Majlisining Axborotnomasi, 1997-y., 9-son, 225-modda) va “Kadrlar tayyorlash milliy dasturi toʻgʻrisida”gi (Oʻzbekiston Respublikasi Oliy Majlisining Axborotnomasi, 1997-y., 11-12-son, 295-modda) qonunlariga muvofiq Oʻzbekiston Respublikasi oliy taʼlim muassasalari talabalari oʻqishini koʻchirish, qayta tiklash va oʻqishdan chetlashtirish tartibi va qoidalarini belgilaydi.
Mazkur Muvaqqat nizom qoidalari idoraviy tasarrufidan va mulkchilik shaklidan qatʼi nazar, barcha oliy taʼlim muassasalariga taalluqlidir.
I. Umumiy qoidalar
1. Talabalar oʻqishini koʻchirish yoki qayta tiklash, odatda, yozgi taʼtil davrida, tegishli kurs (semestr)da oʻquv mashgʻulotlari boshlanishiga qadar amalga oshiriladi.
2. Talabalar oʻqishini koʻchirish yoki qayta tiklash Oʻzbekiston Respublikasi taʼlim muassasalariga qabul qilish boʻyicha Davlat komissiyasi qoshidagi Talabalar oʻqishini koʻchirish va qayta tiklash idoralararo komissiyasining (keyingi oʻrinlarda Idoralararo komissiyasi deb yuritiladi) ishchi guruhlari yoki oliy taʼlim muassasalari tomonidan hujjatlarni qabul qilish orqali amalga oshiriladi.
3. Idoralararo komissiyasining ishchi guruhlari tomonidan qabul qilingan hujjatlar umumlashtirilib, Oʻzbekiston Respublikasi Oliy va oʻrta maxsus taʼlim vazirligiga, tasarrufida oliy taʼlim muassasalari boʻlgan vazirlik va idoralarga mazkur Muvaqqat nizom talablari asosida vakolat doirasida talabalar oʻqishini koʻchirish yoki qayta tiklash boʻyicha qaror qabul qilish uchun taqdim etadi.
Oʻzbekiston Respublikasi Oliy va oʻrta maxsus taʼlim vazirligi, tasarrufida oliy taʼlim muassasalari boʻlgan vazirlik va idoralar talabalar oʻqishini koʻchirish yoki qayta tiklash boʻyicha qaror qabul qilish oʻzining vakolati doirasiga kirmaydigan holatlarda hujjatlarni Idoralararo komissiyaga taqdim etadi.
4. Oʻzbekiston Respublikasi hududida taʼlim faoliyatini olib borish uchun litsenziyaga ega boʻlmagan nodavlat oliy taʼlim muassasalari va boshqa mamlakatlar oliy taʼlim muassasalarining filiallari (markazlar, boʻlimlar, oʻquv-maslahat punktlari va boshqalar)dan davlat oliy taʼlim muassasalariga talabalar oʻqishini koʻchirish va qayta tiklash taqiqlanadi.
5. Birinchi kursga oʻqishni koʻchirish va qayta tiklash man etiladi (istisno tariqasida, talabaga kasallik tufayli akademik taʼtil berilishi mumkin).
6. Talabalar oʻqishini bir oliy taʼlim muassasasi doirasida oliy taʼlimning mos va Oʻzbekiston Respublikasi Oliy va oʻrta maxsus taʼlim vazirligi tomonidan belgilanadigan turdosh yoʻnalishlari (mutaxassisliklari) boʻyicha koʻchirish va qayta tiklash oliy taʼlim muassasasi rektorining qarori bilan amalga oshiriladi.
7. Talabalar oʻqishini oliy taʼlimning mos va turdosh yoʻnalishlari (mutaxassisliklari) boʻyicha bir vazirlik va turli vazirliklar doirasida bir oliy taʼlim muassasasidan boshqa oliy taʼlim muassasasiga koʻchirish va oʻqishga qayta tiklash talabani qabul qilayotgan oliy taʼlim muassasasi boʻysunadigan vazirlik (idora) bilan kelishgan holda mazkur oliy taʼlim muassasasi rektorining qarori bilan amalga oshiriladi.
8. Quyidagi hollarda talabalar oʻqishini koʻchirish va qayta tiklash idoraviy tasarruflikdan qatʼi nazar, Idoralararo komissiya qarori bilan amalga oshiriladi:
xorijiy davlatlarning akkreditatsiyaga ega boʻlgan oliy taʼlim muassasalaridan Oʻzbekiston Respublikasi oliy taʼlim muassasalariga;
bir oliy taʼlim muassasasi doirasida yoki bir vazirlik (idora) va turli vazirliklar (idoralar) tasarrufidagi oliy taʼlim muassasalariga oliy taʼlimning turdosh boʻlmagan yoʻnalishlari (mutaxassisliklari) boʻyicha.
9. Oliy taʼlimning turdosh yoʻnalishlari (mutaxassisliklari) roʻyxatiga Oʻzbekiston Respublikasi Oliy va oʻrta maxsus taʼlim vazirligi tomonidan tasarrufida oliy taʼlim muassasalari boʻlgan vazirlik va idoralar bilan kelishilgan holda oʻzgartirish va qoʻshimchalar kiritilishi mumkin.
10. Oʻqishning barcha shakllari boʻyicha mos va turdosh taʼlim yoʻnalishi (mutaxassisligi) boʻyicha davlat grantlari oʻrinlariga koʻchirish va qayta tiklashga, faqatgina davlat grantlari asosida tahsil olayotgan talabalar arizasiga koʻra muayyan taʼlim yoʻnalishi (mutaxassisligi)da oliy taʼlim muassasalariga tegishli oʻquv yilidagi qabul qilish kvotalarida belgilangan davlat grantlarining soni doirasida ruxsat etiladi.
Boshqa hollarda oʻqishni koʻchirish yoki qayta tiklash toʻlov-kontrakt asosida amalga oshiriladi.
11. Talabalarning oʻqishini koʻchirish yoki qayta tiklash haqidagi arizalari mazkur Muvaqqat nizomga muvofiq koʻrib chiqiladi.
12. Oʻqishni koʻchirish yoki qayta tiklash haqidagi arizaga talabaning reyting daftarchasi yoki belgilangan shakldagi akademik maʼlumotnoma nusxalari ilova etiladi.
13. Talabalarning oʻqishini koʻchirish yoki qayta tiklash boʻyicha arizalarni koʻrib chiqish natijalari oliy taʼlim muassasasi qabul komissiyasining majlis bayonnomasiga kiritiladi va ariza mualliflari eʼtiboriga yetkaziladi.
14. Talabalarning oʻqishini koʻchirish yoki qayta tiklashni rasmiylashtirishda oliy taʼlim muassasasi rektori oʻrnatilgan tartibda oʻquv rejalari va dasturlardagi mavjud akademik qarzlarni yoki farqlarni (umumkasbiy va ixtisoslik fanlari boʻyicha farqlar 4 tadan oshmasligi lozim) topshirish tartibi va muddatlarini (oʻquv yili boshlangandan keyin ikki oydan ortiq emas) belgilaydi hamda oʻqitish kursi va oʻqishga qabul qilishning boshqa shartlarini aniqlaydi.
15. Shartli ravishda talabalarning oʻqishini koʻchirish yoki qayta tiklash taqiqlanadi.
16. Davlat oliy taʼlim muassasalarida oʻqishni koʻchirish yoki qayta tiklash jarayoni bepul amalga oshiriladi.
17. Toʻlov-kontrakt asosida talabalar oʻqishini koʻchirish yoki qayta tiklashda kontraktni tuzish tartibi va shartlari, jumladan, toʻlov mablagʻlari va muddatlari Oʻzbekiston Respublikasi oliy va oʻrta maxsus taʼlim muassasalarida oʻqitishning toʻlov-kontrakt shakli va tushgan mablagʻlarni taqsimlash tartibi haqidagi nizomga (roʻyxat raqami 795, 1999-yil 6-avgust) muvofiq aniqlanadi.
II. Talabalar oʻqishini koʻchirish
18. Davlat grantlari asosida tahsil olayotgan talabalar oʻqishini oʻz taʼlim yoʻnalishidan boshqa turdosh boʻlmagan taʼlim yoʻnalishiga koʻchirish toʻlov-kontrakt asosida amalga oshiriladi.
19. Boshqa oliy taʼlim muassasasiga oʻqishni koʻchirish istagidagi talaba ushbu oliy taʼlim muassasasi rektoriga, tegishli vazirlik (idora)ga, mazkur Muvaqqat nizomning 8-bandida koʻrsatilgan hollarda esa Idoralararo komissiyaning ishchi guruhlariga ariza bilan murojaat etadi.
Ariza oliy taʼlim muassasasiga, tegishli vazirlik (idora)ga yoki Idoralararo komissiyasiga ishchi guruhlaridan kelib tushgandan soʻng bir oylik muddat ichida koʻrib chiqilishi lozim. Masala ijobiy hal etilgan taqdirda, tegishli vazirlik (idora) yoki Idoralararo komissiya oliy taʼlim muassasasiga belgilangan shaklda xat yoʻllaydi.
Tegishli vazirlik (idora) yoki Idoralararo komissiyaning xati asosida oliy taʼlim muassasasi rektorining buyrugʻi bilan oʻqishi koʻchirilayotgan talaba darslarga qoʻyiladi hamda ushbu oliy taʼlim muassasasi tomonidan talaba ilgari taʼlim olgan oliy taʼlim muassasasiga uning shaxsiy yigʻma jildini joʻnatish haqida soʻrovnoma yuboriladi. Soʻrovnoma olingandan soʻng, talaba ilgari taʼlim olgan oliy taʼlim muassasasi rektorining talabalar safidan chetlashtirish haqida buyrugʻi asosida uch kun muddatda talabaning shaxsiy yigʻmajildi (roʻyxati bilan) uni oʻqishga qabul qilgan oliy taʼlim muassasasiga joʻnatiladi. Oliy taʼlim muassasasida esa talabaning akademik maʼlumotnomasi, reyting daftarchasi, oʻquv kartochkasi, shuningdek joʻnatilayotgan hujjatlar roʻyxatining nusxasi qoldiriladi.
Oliy taʼlim muassasasi rektorining talabani talabalar safiga qabul qilish toʻgʻrisidagi buyrugʻi talaba ilgari taʼlim olgan oliy taʼlim muassasasidan uning shaxsiy yigʻmajildi olinib, akademik farqlar bartaraf etilgandan soʻng 10 kun muddatda chiqariladi. Shaxsiy yigʻma jild joʻnatilishi mumkin boʻlmagan hollarda (yopiq yoʻnalishlar va mutaxassisliklar boʻyicha kadrlar tayyorlash), talabani oʻqishga qabul qilish, oliy taʼlim muassasasi rektori tomonidan imzolangan va gerbli muhr bilan tasdiqlangan akademik maʼlumotnoma olingandan soʻng amalga oshiriladi.
20. Oliy taʼlim muassasasida yuridik shaxs bilan tuzilgan toʻlov-kontrakt asosida taʼlim olayotgan talabalar oʻqishini koʻchirish faqat buyurtmachining roziligi bilan amalga oshiriladi.
III. Oʻqishni qayta tiklash
21. Oliy taʼlim muassasasi oʻqishga qayta tiklash toʻgʻrisidagi ariza kelib tushgan kundan boshlab ikki haftalik muddatda uni koʻrib chiqadi va murojaat qilgan shaxsni talabalikka qayta tiklash kursi (semestri) hamda qayta tiklashning boshqa shartlarini koʻrib chiqadi.
22. Oliy taʼlim muassasasida taʼlim oluvchilar soni doirasida boʻsh oʻrinlar mavjud boʻlmaganligi va shaxsning akademik qarzdorligi hamda shaxsning tegishli mutaxassislik boʻyicha zarur bilimlarni oʻzlashtirishiga toʻsqinlik qilish darajasidagi oʻquv rejalari va dasturlarida farq mavjud boʻlgan taqdirda talabalikka qayta tiklashni soʻrab murojaat qilgan shaxsga rad javobi berilishi mumkin.
23. Ilgari oliy taʼlim muassasalaridan maʼmuriyatning tashabbusi bilan chetlashtirilgan shaxslarni, barcha oʻquv shakllari boʻyicha talabalar safiga qayta tiklash toʻlov-kontrakt asosida mazkur Muvaqqat nizomning 6-7-bandlari talablariga rioya qilingan holda, rektorning buyrugʻi bilan amalga oshiriladi.
24. Oʻqishdan chetlashtirilgan oʻquv yilida talabani oʻqishga qayta tiklashga yoʻl qoʻyilmaydi. Talabani oʻqishga qayta tiklashda uning ilgari taʼlim olgan oliy taʼlim muassasasi roziligi talab etilmaydi.
25. Davlat grantlari boʻyicha taʼlim olgan etimlar, I va II-guruh nogironlari, shuningdek muddatli harbiy xizmatni oʻtagan shaxslar (zaxiraga boʻshagan kunlaridan boshlab uch yil mobaynida), istisno tariqasida, oʻqishga davlat grantlari oʻrinlariga qayta tiklanishi mumkin.
26. Oʻqishdan chetlatilgandan keyin 5 yildan ortiq muddat (harbiy xizmatda boʻlganlik, uch yoshgacha boʻlgan bolalarni parvarishlash bilan bogʻliq mehnat taʼtili hamda sogʻliqni qayta tiklash vaqtlari ushbu muddatga kirmaydi) oʻtgan hollarda talabalar oʻqishini qayta tiklash Oʻzbekiston Respublikasi Oliy va oʻrta maxsus taʼlim vazirligi yoki Idoralararo komissiyaning ruxsati bilan amalga oshiriladi.
27. Xorijiy davlatlarning tegishli oliy taʼlim muassasalaridan ilgari chetlashtirilgan shaxslarni respublika oliy taʼlim muassasalari talabalari safiga qayta tiklash faqat Idoralararo komissiyaning ruxsati bilan amalga oshiriladi.
IV. Talabalar safidan chetlashtirish
28. Talaba oliy taʼlim muassasasidan quyidagi hollarda chetlashtirilishi mumkin:
a) oʻz xohishiga binoan;
b) oʻqishning boshqa taʼlim muassasasiga koʻchirilishi munosabati bilan;
v) salomatligi tufayli (tibbiy komissiyasi maʼlumotnomasi asosida);
g) akademik oʻzlashtirolmaganligi (qarzdorligi) uchun;
d) oʻquv intizomini va oliy taʼlim muassasasining ichki tartib-qoidalarini buzganligi uchun;
e) bir semestr davomida darslarni uzrli sabablarsiz 74 soatdan ortiq qoldirganligi sababli;
j) shartnoma bandlarini bajarmaganligi tufayli (toʻlov-kontrakt boʻyicha tahsil olayotganlar uchun);
z) talaba tomonidan jinoyat sodir etilganligi, shuningdek, sud tomonidan oʻqishini davom ettirish imkoniyatidan (ozodlikdan) mahrum etilganligi munosabati bilan;
i) vafot etganligi sababli.
Harbiy xizmatni oʻtayotgan, salomatligini tiklayotgan, homiladorlik va tugʻish, shuningdek bolalarni parvarishlash taʼtillari davrida talabaga akademik taʼtil berilishi mumkin.
29. Oliy taʼlim muassasasi maʼmuriyati tashabbusi bilan talabalarni oʻqishdan chetlashtirish talabalar kasaba uyushmasining yozma roziligini inobatga olgan holda amalga oshiriladi. Shuningdek, talaba mazkur Muvaqqat nizomning 28-bandi “d” kichik bandiga koʻra chetlashtirilayotgan holda, taʼlim muassasasining “Kamolot” yoshlar ijtimoiy harakati boshlangʻich tashkiloti bilan ham kelishilishi lozim.
30. Talaba oliy taʼlim muassasasidan chetlashtirilganda, unga shaxsiy hujjatlari, belgilangan shakldagi akademik maʼlumotnoma topshiriladi va ularning nusxasi shaxsiy yigʻma jildiga tikib qoʻyiladi.
V. Yakuniy qoidalar
31. Talabalar oʻqishini koʻchirish yoki qayta tiklash jarayonida hujjatlar toʻliq taqdim etilmagan yoki belgilangan talablarga javob bermaydigan hujjatlar aniqlangan hollarda oliy taʼlim muassasasi rektori mazkur hujjatlarni tekshirish va buyruq chiqarmaslik huquqiga ega.
33. Oliy taʼlim muassasalari har yili Oʻzbekiston Respublikasi Oliy va oʻrta maxsus taʼlim vazirligiga zarur miqdordagi akademik maʼlumotnoma blanklariga buyurtmalar beradilar.
Akademik maʼlumotnoma blanklari qatʼiy hisobda yuritiladi. Akademik maʼlumotnomalar blanklarining oliy taʼlim muassasalarida saqlanishi, roʻyxatga olinishi va berilishi oʻrnatilgan tartibda amalga oshiriladi.
34. Talabalar oʻqishini koʻchirish, qayta tiklash va oʻqishdan chetlashtirish toʻgʻrisidagi qarorlardan norozi boʻlgan holda oʻrnatilgan tartibda Oʻzbekiston Respublikasi Oliy va oʻrta maxsus taʼlim vazirligiga yoki sudga murojaat qilinishi mumkin.
35. Talabalar oʻqishini koʻchirish, qayta tiklash va oʻqishdan chetlashtirish toʻgʻrisidagi taqdim etilgan hujjatlarning toʻgʻri rasmiylashtirilishi va ularning qonuniyligi uchun javobgarlik ishchi guruhlar va oliy taʼlim muassasalari zimmasiga yuklanadi.
Zarurat boʻlganda rektor hujjatlarni yuborgan oliy taʼlim muassasalaridan rasmiy xat bilan maʼlumotlar toʻgʻriligini tasdiqlashni soʻrashi mumkin. Soxta hujjatlarni toʻgʻriligini tasdiqlab bergan oliy taʼlim muassasasi qonun hujjatlariga asosan javobgar boʻladi.
36. Oliy taʼlim muassasalariga talabalar oʻqishini koʻchirish va qayta tiklashiga asos boʻlgan barcha hujjatlar vakolat doirasi boʻyicha Oʻzbekiston Respublikasi Oliy va oʻrta maxsus taʼlim vazirligida, tasarrufida oliy taʼlim muassasalari boʻlgan vazirlik va idoralar, shuningdek oliy taʼlim muassasalarida 3 yil davomida saqlanishi lozim.
37. Mazkur Muvaqqat nizom talablarini buzgan shaxslar qonun hujjatlariga asosan javobgarlikka tortiladi.
38. Mazkur Muvaqqat nizom Oʻzbekiston Respublikasi taʼlim muassasalariga qabul qilish boʻyicha Davlat komissiyasi tomonidan maʼqullangan.
39. Mazkur Muvaqqat nizom 2010-yil 1-yanvargacha amal qiladi.