Oʻzbekiston Respublikasi vakillarining oʻqishini tashkil etish uchun Yaponiya Hukumatining grantlaridan samarali foydalanish chora-tadbirlari toʻgʻrisida (201-son)

16.07.2009

Oʻzbekiston Respublikasi Vazirlar Mahkamasining

qarori

Yaponiya Hukumatining Oʻzbekiston Respublikasi vakillarining Yaponiyada oʻqishini tashkil etish uchun berilayotgan 244 mln. Yaponiya yenasi grantlaridan samarali foydalanish maqsadida Vazirlar Mahkamasi qaror qiladi:

1. Yaponiya Hukumatining Oʻzbekiston Respublikasi vakillarining Yaponiya yetakchi universitetlari magistraturasida oʻqishini tashkil etish toʻgʻrisidagi taklifi qabul qilinsin.

Oʻqish uchun nomzodlarni tanlab olish Yaponiya Xalqaro hamkorlik agentligi (JISA), Yaponiya Xalqaro hamkorlik markazi (JISE), Oʻzbekiston Respublikasi Oliy va oʻrta maxsus taʼlim vazirligi hamda Tashqi iqtisodiy aloqalar, investitsiyalar va savdo vazirligi tomonidan amalga oshirilishi maʼlumot uchun qabul qilinsin.

2. Bosh vazirning oʻrinbosari R.S. Qosimovga Oʻzbekiston Respublikasi Hukumati nomidan Ayirboshlash notalari va Grant Bitimini imzolash vakolati berilsin.

3. Quyidagilarga:

Oʻzbekiston Respublikasi Oliy va oʻrta maxsus taʼlim vazirligi, Tashqi iqtisodiy aloqalar, investitsiyalar va savdo vazirligiga — loyihani amalga oshirish uchun begʻaraz yordam mablagʻlarini olish va ularga xizmat koʻrsatish uchun Yaponiya tomoni bilan kelishgan holda barcha tartib-qoidalarni rasmiylashtirish;

Oʻzbekiston Respublikasi Tashqi iqtisodiy faoliyat milliy bankiga — yuqorida koʻrsatib oʻtilgan begʻaraz yordam mablagʻlariga hisob-kitob xizmati koʻrsatish yuklansin.

4. Oʻzbekiston Respublikasi Oliy va oʻrta maxsus taʼlim vazirligi koʻrsatib oʻtilgan begʻaraz yordamga hisob-kitob xizmati koʻrsatilganligi uchun Yaponiya tomoniga vositachilik haqini vazirlikning Oliy taʼlim muassasalarini rivojlantirish jamgʻarmasi mablagʻlari hisobidan toʻlasin.

5. Oʻzbekiston Respublikasi Tashqi ishlar vazirligi Oʻzbekiston Respublikasi Oliy va oʻrta maxsus taʼlim vazirligining buyurtmanomalari boʻyicha ushbu loyihani amalga oshirishda qatnashadigan xorijiy mutaxassislarga kirish vizalari konsullik yigʻimlari va boshqa yigʻimlar undirilmasdan belgilangan tartibda rasmiylashtirilishini taʼminlasin.

6. Oʻzbekiston Respublikasi Ichki ishlar vazirligi Oʻzbekiston Respublikasi Oliy va oʻrta maxsus taʼlim vazirligi buyurtmanomalari boʻyicha loyihani amalga oshirishda qatnashadigan xorijiy mutaxassislarga koʻp martalik vizalar berilishi va uzaytirilishini, shuningdek ular yashash joylarida davlat bojlari undirilmasdan vaqtincha roʻyxatdan oʻtkazilishini va vaqtincha roʻyxatdan oʻtkazish muddati uzaytirilishini taʼminlasin.

7. Oʻzbekiston milliy teleradiokompaniyasi ushbu loyiha boʻyicha JISE tomonidan tayyorlangan videoroliklar va audiomateriallar belgilangan tartibda televideniye va radioda joylashtirilishini taʼminlasin.

8. Oʻzbekiston Respublikasi Oliy va oʻrta maxsus taʼlim vazirligi manfaatdor vazirliklar va idoralar bilan birgalikda:

Yaponiyada JISA loyihasi doirasida oʻqigan oʻzbekistonlik mutaxassislarning maʼlumoti toʻgʻrisidagi hujjatlar nostrifikatsiya qilinishiga va ularning ishga joylashtirilishiga koʻmaklashsin;

ularning mehnat faoliyati ustidan doimiy monitoring olib borsin.

9. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Qosimov zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2009-yil 16-iyul,

201-son