Xususiy operatorlar faoliyatini tashkil etish va elektr energiyasi uchun oʻz vaqtida haq toʻlash chora-tadbirlari toʻgʻrisida (186-son)

04.07.2009

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Iqtisodiyotning real sektori korxonalarini qoʻllab-quvvatlash, ularning barqaror ishlashini taʼminlash va eksport salohiyatini koʻpaytirish chora-tadbirlari dasturi toʻgʻrisida” 2008-yil 28-noyabrdagi PF-4058-son Farmonini bajarish yuzasidan Vazirlar Mahkamasi qaror qiladi:

1. Quyidagilar:

Elektr energiyasi uchun isteʼmolchilardan toʻlovni yigʻish funksiyalarini bajaradigan xususiy operatorlarni tashkil etish uchun investorlarni tanlov boʻyicha tanlashni oʻtkazish toʻgʻrisidagi Nizom 1-ilovaga muvofiq;

Elektr energiyasi uchun isteʼmolchilardan toʻlovni yigʻish funksiyalarini bajaradigan xususiy operatorlar faoliyatini amalga oshirish tartibi toʻgʻrisidagi Nizom 2-ilovaga muvofiq tasdiqlansin.

2. “Oʻzbekenergo” DAK faoliyat koʻrsatayotgan, elektr energiyasi uchun isteʼmolchilardan toʻlovni yigʻish funksiyalarini bajarayotgan xususiy operatorlar bilan birgalikda 2009-yil 1-sentabrgacha boʻlgan muddatda ularning faoliyati ushbu qarorda belgilangan talablarga muvofiqlashtirilishini hamda zarur darajada bajarilishini taʼminlasin.

3. “Oʻzbekenergo” DAK Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, Oʻzbekiston Respublikasi Iqtisodiyot vazirligi, Moliya vazirligi, Monopoliyadan chiqarish, raqobat va tadbirkorlikni qoʻllab-quvvatlash davlat qoʻmitasi hamda “Oʻzdavenergonazorat” inspeksiyasi bilan birgalikda:

2010-yil 1-yanvargacha xususiy operatorlarni tashkil etish uchun investorlar oʻrtasida tanlov boʻyicha tanlashning oʻtkazilishini, ularga elektr energiyasi uchun isteʼmolchilardan toʻlovni yigʻish funksiyalari berilishini 3-ilovadagi jadvalga muvofiq taʼminlasin;

hududida elektr energiyasi uchun isteʼmolchilardan toʻlovni yigʻish funksiyalari xususiy operatorlarga berilishi taklif qilinayotgan qolgan tumanlar (shaharlar) roʻyxatini, shuningdek tegishli tanlov boʻyicha tanlashlarni oʻtkazish jadvallarini uch oy muddatda tayyorlasin va tasdiqlash uchun Oʻzbekiston Respublikasi Vazirlar Mahkamasiga kiritsin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari E.R.Shaismatov zimmasiga yuklansin.

Oʻzbekiston Respublikasi Bosh vaziri Sh. MIRZIYOYEV

Toshkent sh,

2009-yil 4-iyul,

186-son

Vazirlar Mahkamasining 2009-yil 4-iyuldagi 186-son qaroriga 1-ILOVA

Elektr energiyasi uchun isteʼmolchilardan toʻlovni yigʻish funksiyalarini bajaradigan xususiy operatorlarni tashkil etish uchun investorlarni tanlov boʻyicha tanlashni oʻtkazish tartibi toʻgʻrisida

NIZOM

I. Umumiy qoidalar

1. Ushbu Nizom investorlarni tanlov boʻyicha tanlash, keyinchalik ular tomonidan elektr energiyasi uchun isteʼmolchilardan toʻlovni yigʻish funksiyalari beriladigan xususiy operatorlarni tashkil etish tartibini belgilaydi.

2. Elektr energiyasi uchun isteʼmolchilardan toʻlovni yigʻish funksiyalarini xususiy operatorlarga berish:

elektr energiyasi uchun oʻzaro hisob-kitoblarni boshqarish va hisobga olishning zamonaviy usullarini joriy etish;

elektr energiyasi berishda uning notexnologik nobudgarchiliklarini kamaytirish;

berilgan elektr energiyasi uchun toʻlovni samarali yigʻish maqsadida amalga oshiriladi.

3. 110 kV va undan yuqori kuchlanishli tarmoqlarga bevosita ulangan isteʼmolchilardan elektr energiyasi uchun toʻlovni yigʻish funksiyalari xususiy operatorlarga berilmaydi.

4. Ushbu Nizomda quyidagi asosiy tushunchalardan foydalaniladi:

hududiy elektr tarmoqlari korxonasi — elektr taʼminoti shartnomasi boʻyicha elektr energiyasini sotish va taqsimlash huquqiga ega boʻlgan yuridik shaxs;

elektr energiyasi isteʼmolchisi (isteʼmolchi) — elektr taʼminoti shartnomasiga muvofiq elektr energiyasidan ishlab chiqarish va (yoki) maishiy ehtiyojlar uchun foydalanadigan yuridik yoki jismoniy shaxs;

faoliyat hududi — hududiy elektr tarmoqlari korxonasi va isteʼmolchilarning tarmoqlari bilan aniq belgilangan boʻlinish chegaralariga ega boʻlgan tegishli hududdagi taqsimlovchi elektr tarmoqlari uchastkasi;

investor — xususiy operatorni tashkil etish va xususiy operatorga yuklanadigan vazifalar va majburiyatlarga muvofiq uning faoliyatini taʼminlash uchun texnik va moliyaviy imkoniyatga ega boʻlgan yuridik shaxs — Oʻzbekiston Respublikasi rezidenti yoki norezidenti;

xususiy operator — investor tomonidan tashkil etiladigan va elektr energiyasi uchun isteʼmolchilardan toʻlovni yigʻish funksiyalarni bajaradigan yuridik shaxs— Oʻzbekiston Respublikasi rezidenti.

II. Tanlov boʻyicha tanlashga tayyorlanish

5. “Oʻzbekenergo” DAK investorlarni tanlov boʻyicha tanlash oʻtkazilgunga qadar hududida elektr energiyasi uchun isteʼmolchilardan toʻlovni yigʻish funksiyalari hududiy elektr tarmoqlari korxonalaridan xususiy operatorlarga berilishini amalga oshirish moʻljallanayotgan tumanlar (shaharlar) roʻyxatini tuzadi.

Roʻyxatga birinchi navbatda ular boʻyicha elektr energiyasi uchun isteʼmolchilardan toʻlovni yigʻishning past darajasi shakllangan tumanlar (shaharlar) kiritiladi.

6. Investorlar tomonidan elektr energiyasi uchun isteʼmolchilardan toʻlovni yigʻish funksiyalari beriladigan xususiy operatorlar tashkil etilishi uchun investorlar oʻrtasida tanlov boʻyicha tanlashni oʻtkazish roʻyxati va jadvali Oʻzbekiston Respublikasi Iqtisodiyot vazirligi, Moliya vazirligi, Monopoliyaga qarshi kurashish qoʻmitasi hamda “Oʻzdavenergonazorat” inspeksiyasi bilan kelishiladi va tasdiqlash uchun belgilangan tartibda Vazirlar Mahkamasiga kiritiladi.

III. Tanlov komissiyasi ishini tashkil etish

7. Tanlov boʻyicha tanlashning tasdiqlangan jadvaliga muvofiq Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining qarori bilan tegishli mintaqalarda tanlov komissiyalari tuziladi.

Tanlov komissiyasining tarkibi Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining qarori bilan tasdiqlanadi.

Tanlov komissiyasi tarkibiga mahalliy davlat hokimiyati organlari, “Oʻzdavenergonazorat” inspeksiyasi, “Oʻzbekenergo” DAK va uning korxonalari, Oʻzbekiston Respublikasi Iqtisodiyot vazirligi, Moliya vazirligi, Davlat soliq qoʻmitasi, Monopoliyaga qarshi kurashish qoʻmitasi vakillari kiritiladi.

Tanlov komissiyasi aʼzolari soni toq boʻlishi va kamida 9 kishidan iborat boʻlishi kerak.

Tanlov komissiyasiga tegishli ravishda Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlari boshchilik qiladi.

8. Tanlov komissiyasi quyidagi funksiyalarni bajaradi:

a) tanlov komissiyasining ish reglamentini tasdiqlaydi;

b) investorlarning tanlov takliflari tarkibini (formatini), tanlov boʻyicha tanlash qatnashchilariga qoʻyiladigan malaka talablarini va boshqa talablarni tasdiqlaydi;

v) tanlov boʻyicha tanlashni eʼlon qilish sanasini, tanlov hujjatlarini olish joyini, investorlar tomonidan tanlov takliflari berish muddatini, tanlov takliflarini ochish joyi, sanasi va vaqtini belgilaydi;

g) belgilangan muddatda investorlarning tanlov takliflari bildirilgan konvertlarni ochadi, ularning tanlov hujjatlarida nazarda tutilgan talablarga muvofiqligini (hujjatlarning toʻliq taqdim etilishi, rasmiylashtirilishi va hokazolarni) tekshiradi va buyurtmanomalar konvertlarini ochish protokolini tasdiqlaydi;

d) zaruriyat boʻlganda tanlov takliflarini baholash uchun mustaqil ekspertlarni (maslahatchilarni) jalb qiladi;

e) tanlov hujjatlarida koʻrsatilgan mezonlarga muvofiq tanlov takliflarini koʻrib chiqadi va tanlov boʻyicha tanlash gʻolibini eʼlon qiladi yoki tanlovni boʻlib oʻtmagan deb eʼtirof etish toʻgʻrisida qaror qabul qiladi;

j) tanlov komissiyasi oldiga qoʻyilgan vazifalarni hal etish uchun zarur boʻlgan boshqa funksiyalarni amalga oshiradi.

9. Agar tanlov komissiyasi majlisida uning aʼzolaridan kamida toʻrtdan uch qismi qatnashsa tanlov komissiyasi qarorlari vakolatli boʻladi. Qaror tanlov komissiyasining majlisda qatnashgan aʼzolarining koʻpchilik ovozi bilan qabul qilinadi. Ovozlar teng boʻlgan taqdirda tanlov komissiyasi raisining ovozi hal qiluvchi hisoblanadi.

10. Tanlov komissiyasining qarori protokollar shaklida, yozma ravishda rasmiylashtiriladi va besh ish kuni mobaynida qatnashchilarga yetkaziladi.

11. Hududiy elektr tarmoqlari korxonasi tanlov boʻyicha tanlashning tashkilotchisi hisoblanadi.

12. Tanlov boʻyicha tanlash tashkilotchisi:

a) tanlov komissiyasi aʼzolari chaqirilishini, ularga ish xonalari, majlislarni oʻtkazish uchun tashkiliy-texnika va sarflash materiallari berilishini tashkil etadi hamda tanlov boʻyicha tanlashni oʻtkazish boʻyicha boshqa sarf-xarajatlarni qoplaydi;

b) taklifnomalarni joʻnatadi va tanlov komissiyasining topshirigʻi boʻyicha yozishmalar olib boradi;

v) qatnashchilarning tanlov takliflarini qabul qiladi va konvertlar ochilgunga qadar tanlov komissiyasi belgilagan tartibda tanlov takliflarining hisobga olinishi, saqlanishi va maxfiyligini taʼminlaydi;

g) tanlov komissiyasi tomonidan jalb qilinadigan ekspertlar va maslahatchilar faoliyatini muvofiqlashtiradi, shuningdek ularga haq toʻlash xarajatlarini qoplaydi.

IV. Tanlashni oʻtkazish boʻyicha tanlov hujjatlarini ishlab chiqish

13. “Oʻzbekenergo” DAK investorlarga qoʻyiladigan tasdiqlangan malaka talablarini hisobga olgan holda xususiy operatorlarni tashkil etish uchun investorlarni tanlov boʻyicha tanlashga doir tanlov hujjatlarini ishlab chiqadi.

“Oʻzbekenergo” DAK tanlov hujjatlarini ular Oʻzbekiston Respublikasi Iqtisodiyot vazirligi, Moliya vazirligi, Monopoliyaga qarshi kurashish qoʻmitasi va “Oʻzdavenergonazorat” inspeksiyasi bilan kelishilgandan keyin tasdiqlaydi.

14. Tanlov hujjatlarida quyidagi asosiy maʼlumotlar boʻlishi kerak:

a) boʻlajak xususiy operatorning faoliyati doirasi, shu jumladan hududiy doirasida elektr energiyasi uchun isteʼmolchilardan toʻlov yigʻish funksiyalari xususiy operatorga beriladigan elektr tarmoqlari joylashgan uchastka (tuman, shahar) joyining tavsifi;

b) faoliyat hududida tanlov boʻyicha tanlash eʼlon qilingan sanada amal qiladigan yoki keyingi yilga tasdiqlangan elektr energiyasi nobudgarchiligi normativlari;

v) tarif guruhlari boʻyicha faoliyat hududida isteʼmolchilar soni hamda elektr energiyasining oylik va yillik isteʼmol qilish hajmi;

g) tanlov boʻyicha tanlashni oʻtkazish shartlari, tanlov takliflarini berish va koʻrib chiqish muddati hamda potensial talabgorning tanlash qatnashchilariga qoʻyiladigan malaka talablariga muvofiqligini tasdiqlaydigan boshqa hujjatlar (maʼlumotlar);

d) tanlov taklifining mazmuniga qoʻyiladigan talablar va biznes-reja;

e) bank kafolatini berishga qoʻyiladigan talablar;

j) qayd etilgan vaqt davri mobaynida tanlov boʻyicha tanlash qatnashchisining taklifi qaytarib olinmasligini taʼminlaydigan tanlov boʻyicha tanlashda qatnashish uchun garov summasi miqdori va uni toʻlash tartibi;

z) tanlov boʻyicha tanlash gʻolibi bilan tuziladigan shartnomaning shakli;

i) tanlov boʻyicha tanlashlarni oʻtkazishga nisbatan “Oʻzbekenergo” DAK vakilidan tushuntirishlar olish uchun manzil, telefonlar (faks) raqami va elektron pochta manzili;

k) tanlov boʻyicha tanlash gʻolibini aniqlash mezonlari va tartibi.

V. Tanlov boʻyicha tanlashni oʻtkazish va gʻolibni aniqlash tartibi

15. “Oʻzbekenergo” DAK xususiy operatorlarni tashkil etish uchun investorlarni tanlov boʻyicha tanlashning tasdiqlangan jadvaliga muvofiq ommaviy axborot vositalarida tanlov boʻyicha tanlashni oʻtkazish toʻgʻrisida eʼlon beradi. Eʼlonda quyidagi maʼlumotlar boʻlishi kerak:

a) tanlov boʻyicha tanlashni oʻtkazishning asosiy shartlari;

b) xususiy operatorning taklif etayotgan faoliyat hududi;

v) investorga qoʻyiladigan asosiy talablar;

g) dastlabki malaka aniqlashni va tanlov boʻyicha tanlashni oʻtkazish joyi va muddatlari;

d) tanlov hujjatlarini olish joyi va shartlari;

e) tanlov hujjatlari uchun toʻlov, shuningdek garov summasi miqdori va uni toʻlash tartibi.

16. Quyidagi:

a) tanlov hujjatlariga muvofiq barcha zarur hujjatlarni belgilangan muddatlarda taqdim etmagan;

b) tugatish yoki toʻlovga qobiliyatsizlik jarayonidagi;

v) tanlov boʻyicha tanlash eʼlon qilinishidan bir yildan kam boʻlgan muddatda taʼsis etilgan;

g) “Oʻzbekenergo” DAK va/yoki uning korxonalari bilan sud muhokamasi holatida boʻlgan investorlar tanlov boʻyicha tanlashda qatnashishga qoʻyilmaydi.

17. Tanlov hujjatlarini olish uchun investorlar oʻtkaziladigan tanlov boʻyicha tanlash doirasida olinadigan maxfiy axborotni oshkor qilmaslik toʻgʻrisidagi shartnomani imzolaydilar va “Oʻzbekenergo” DAKning hisob raqamiga tanlov hujjatlari uchun toʻlov va garov summasini oʻtkazadilar.

Tanlov hujjatlari uchun toʻlov tanlov boʻyicha tanlash eʼlon qilingan paytdagi bazaviy hisoblash miqdorining oʻn baravari miqdoridan ortiq boʻlmasligi kerak.

Garov summasi tanlov boʻyicha tanlash eʼlon qilingan paytdagi bazaviy hisoblash miqdorining ming baravari miqdoridan ortiq boʻlmasligi kerak.

18. Tanlov boʻyicha tanlash qatnashchilari tanlov hujjatlarida koʻrsatilgan muddatdan kechikmay tanlov komissiyasiga oʻz tanlov takliflarini taqdim etishlari kerak.

19. Qatnashchilar tanlov takliflari bildirilgan konvertga quyidagilarni joylaydilar:

faoliyati maqsadi elektr energiyasi uchun isteʼmolchilardan toʻlovni yigʻish boʻyicha xususiy operator funksiyalarini bajarishdan iborat boʻlgan yuridik shaxsni tashkil etish va uning faoliyat koʻrsatishi boʻyicha biznes-reja;

investorning oxirgi hisobot yili uchun yillik moliyaviy hisoboti va u boʻyicha milliy yoki xalqaro standartlarga muvofiq tuzilgan mustaqil auditorning xulosasi;

investorning xususiy operator shtatini elektr energetikasi, iqtisodiyot va moliya sohasida ish tajribasiga ega boʻlgan malakali mutaxassislarning zarur soni bilan butlash majburiyati;

investorning soliqlar va budjetga boshqa majburiy toʻlovlar boʻyicha budjetga yoki Oʻzbekiston Respublikasining davlat maqsadli jamgʻarmalariga toʻlovlar boʻyicha qarzlari yoʻqligini tasdiqlaydigan hujjatlar;

tanlov hujjatlarida nazarda tutilgan boshqa zarur hujjatlar (maʼlumotlar).

20. Xususiy operatorni tashkil etish va uning faoliyat koʻrsatishi boʻyicha biznes-reja kamida uch yilga tuzilishi va quyidagi asosiy parametrlarni nazarda tutishi kerak:

investor tomonidan xususiy operatorning faoliyat hududida elektr energiyasi uchun pul mablagʻlari oʻtkazish boʻyicha majburiyatlar uning tomonidan tanlov boʻyicha tanlash eʼlon qilingan paytda amal qilingan tariflar boʻyicha faoliyat hududida berilgan elektr energiyasi oʻrtacha oylik hajmining uch baravar qiymatiga teng boʻlgan summa doirasida bajarilishi yuzasidan bank kafolati berilishi;

tanlov hujjatlarida belgilangan shartlarga muvofiq elektr energiyasi isteʼmolchilariga zarur darajada xizmat koʻrsatilishini taʼminlash;

bir kilovatt-soat hisobiga soʻmlardagi mutlaq ifodada yoki xususiy operator tomonidan yigʻilgan toʻlovdan hisoblab chiqariladigan isteʼmolchilar uchun elektr energiyasiga oʻrtacha tarifga nisbatan foizlarda xususiy operatorni mukofotlashning cheklangan miqdori.

21. Tanlov komissiyasi taqdim etilgan takliflarni ularning barcha belgilangan talablarga muvofiqligi yuzasidan koʻrib chiqadi hamda taklifi boshqa takliflarga taqqoslaganda xususiy operatorning mukofot summasi chiqarib tashlangandan keyin elektr energiyasi uchun isteʼmolchilardan toʻlovni eng koʻp va samarali yigʻishga erishish imkonini beradigan investorni tanlaydi.

22. Investor tomonidan tanlov taklifi toʻliq boʻlmagan hajmda yoki belgilangan talablar buzilgan holda taqdim etilgan taqdirda tanlov taklifi tanlov boʻyicha tanlashda qatnashishga qoʻyilmaydi va investorga qaytariladi.

23. Faqat bitta qatnashchi ishtirok etgan tanlov boʻyicha tanlash boʻlib oʻtmagan deb hisoblanadi.

VI. Yakuniy qoidalar

24. “Oʻzbekenergo” DAK korxonalarining mulki boʻlgan elektr energiyasini berish va taqsimlash elektr tarmoqlari berilishi, sotilishi va xususiy operatorning mulki sifatida berishning shakllariga, garov predmeti yoki ularning oʻzgaga berilishi yoki yoʻqotilishiga olib kelishi mumkin boʻlmagan boshqa harakatlarning predmeti boʻlishi mumkin emas.

25. Investor, tanlov komissiyasi, “Oʻzbekenergo” DAK va tanlov boʻyicha tanlashning tashkilotchisi oʻrtasida paydo boʻladigan barcha nizoli masalalar qonunchilikka muvofiq tartibga solinadi.

26. Quyidagilar:

tushayotgan tanlov takliflarining zarur tarzda hisobga olinishi, ularning saqlanishi va maxfiyligi taʼminlanishi uchun — “Oʻzbekenergo” DAK va tanlov boʻyicha tanlash tashkilotchisining masʼul shaxslari;

oʻtkaziladigan tanlov boʻyicha tanlash toʻgʻrisidagi maxfiy axborot oshkor qilinmasligi, uning qatnashchilari, komissiyaning boshqa aʼzolari bilan oldindan kelishib olishga yoʻl qoʻyilmasligi uchun— tanlov komissiyasi raisi va aʼzolari, “Oʻzbekenergo” DAKning masʼul shaxslari qonunchilikda belgilangan tartibda javob beradilar.

27. Tuzilgan shartnomalar boʻyicha oʻz majburiyatlarini bajarmagan tanlov boʻyicha tanlash gʻolibi qonunchilikda va tuzilgan shartnomada nazarda tutilgan tartibda javob beradi.

Vazirlar Mahkamasining 2009-yil 4-iyuldagi 186-son qaroriga 2-ILOVA

Elektr energiyasi uchun isteʼmolchilardan toʻlovni yigʻish funksiyalarini bajaradigan xususiy operatorlar faoliyatini amalga oshirish tartibi toʻgʻrisida

NIZOM

I. Umumiy qoidalar

1. Ushbu Nizom elektr energiyasi uchun isteʼmolchilardan toʻlovni yigʻish funksiyalari beriladigan xususiy operatorlar faoliyatini amalga oshirish tartibini belgilaydi.

2. Ushbu Nizomda quyidagi asosiy tushunchalardan foydalaniladi:

hududiy elektr tarmoqlari korxonasi — elektr taʼminoti shartnomasi boʻyicha elektr energiyasini sotish va taqsimlash huquqiga ega boʻlgan yuridik shaxs;

elektr energiyasi isteʼmolchisi (isteʼmolchi) — elektr taʼminoti shartnomasiga muvofiq elektr energiyasidan ishlab chiqarish va (yoki) maishiy ehtiyojlar uchun foydalanadigan yuridik yoki jismoniy shaxs;

faoliyat hududi — hududiy elektr tarmoqlari korxonasi va isteʼmolchilarning tarmoqlari bilan aniq belgilangan boʻlinish chegaralariga ega boʻlgan tegishli hududdagi taqsimlovchi elektr tarmoqlari uchastkasi;

investor — xususiy operatorni tashkil etish va xususiy operatorga yuklanadigan vazifalar va majburiyatlarga muvofiq uning faoliyatini taʼminlash uchun texnik va moliyaviy imkoniyatga ega boʻlgan yuridik shaxs — Oʻzbekiston Respublikasi rezidenti yoki norezidenti;

xususiy operator — investor tomonidan tashkil etiladigan va elektr energiyasi uchun isteʼmolchilardan toʻlovni yigʻish funksiyalarni bajaradigan yuridik shaxs — Oʻzbekiston Respublikasi rezidenti.

3. Xususiy operator tomonidan yigʻilishi kerak boʻlgan, maqsadli hajmi hisoblangan normativ nobudgarchiliklar (elektr energiyasini berishdagi fizik jarayonlar bilan belgilanadigan) chegirib tashlangan holda xususiy operator faoliyati hududining hisobga olish nuqtalari tarmogʻida beriladigan, pirovard isteʼmolchilar uchun oʻrtacha tarifga koʻpaytirilgan elektr energiyasi hajmi sifatida hisoblab chiqariladi. Tegishli ravishda, tushumning yigʻilishi ushbu darajaga zid ravishda hisoblab chiqariladi.

II. Elektr energiyasi uchun isteʼmolchilardan toʻlovni yigʻish funksiyalarini hududiy elektr tarmoqlari korxonalaridan xususiy operatorga berish tartibi

4. Tanlov komissiyasi tomonidan tanlov boʻyicha tanlash gʻolib investor aniqlangandan keyin bir oy muddatda, gʻolib investor tanlov komissiyasi tomonidan taqdim etilgan biznes-reja parametrlariga muvofiq, belgilangan tartibda xususiy operatorni tashkil etadi va roʻyxatdan oʻtkazadi.

5. Xususiy operator davlat roʻyxatidan oʻtkazilgandan keyin hududiy elektr tarmoqlari korxonasi xususiy operatorga:

xususiy operator faoliyati hududidagi isteʼmolchilarning xatlovdan oʻtkazilishi boʻyicha materiallarni va energiya taʼminotiga oid tuzilgan shartnomalarni;

xususiy operatorning faoliyat hududidagi elektr-tarmoq xoʻjaligi obyektlarining xatlovdan oʻtkazilishi boʻyicha materiallarni texnik holat toʻgʻrisidagi maʼlumotlar bilan birga beradi.

Hududiy elektr tarmoqlari korxonasi va xususiy operator xatlovdan oʻtkazish boʻyicha materiallar berilgan kundan boshlab uch kun muddatda topshirish-qabul qilish dalolatnomasini imzolaydilar.

6. Hududiy elektr tarmoqlari korxonasi va xususiy operator faoliyati hududidagi elektr energiyasini hisobga olish nuqtalarini (yetkazib berish nuqtalarini) birgalikda belgilaydilar.

Hududiy elektr tarmoqlari korxonasi elektr energiyasini hisobga olishning zamonaviy elektron priborlarining elektr energiyasi uchun isteʼmolchilardan toʻlovni yigʻish funksiyalari xususiy operatorga berilguniga qadar elektr energiyasini hisobga olishning koʻrsatilgan nuqtalarida oʻrnatilishini taʼminlaydi.

Hisobga olishning kelishilgan nuqtalarida oʻrnatilgan elektr energiyasini hisobga olish priborlari hududiy elektr tarmoqlari korxonasi va xususiy operatorning vakillari tomonidan plombalanishi kerak.

7. Xususiy operator davlat roʻyxatidan oʻtkazilgandan keyin uch kun muddatda vakolatli bankka:

xususiy operatorning joriy faoliyatini moliyalashtirish uchun asosiy talab qilib olinadigan depozit hisob raqami (keyingi oʻrinlarda joriy hisob raqami deb ataladi);

elektr energiyasi uchun hisob-kitob qilish uchun ikkilamchi jamgʻarib boriladigan hisob raqami ochadi;

xususiy operatorning bank hisob raqamlari rekvizitlari ochilgan paytdan boshlab uch kun muddatda hududiy elektr tarmoqlari korxonasiga taqdim etiladi.

Xususiy operator hududiy elektr tarmoqlari korxonasi bilan kelishmasdan bank hisob raqamlari rekvizitlarini oʻzgartirish huquqiga ega emas.

8. Xususiy operator davlat roʻyxatidan oʻtkazilgandan keyin bir hafta muddatda hududiy elektr tarmoqlari korxonasi bilan:

a) elektr energiyasi uchun isteʼmolchilardan toʻlovni yigʻishni taʼminlash boʻyicha shartnomani;

b) buxgalteriya hujjatlari, elektr energiyasi uchun isteʼmolchilarning qarzlari toʻgʻrisidagi maʼlumotlarni va boshqa zarur maʼlumotlarni xususiy operatorga berish muddatlari, shartlari va reglamentini belgilaydigan protokolni imzolaydi.

9. Elektr energiyasi uchun isteʼmolchilardan toʻlovni yigʻishni taʼminlash boʻyicha shartnoma xususiy operator bilan ikki yil muddatga tuziladi. Tomonlar shartnoma shartlarini bajargan taqdirda uning amal qilishi har bir navbatdagi yilga uzaytiriladi.

Elektr energiyasi uchun isteʼmolchilardan toʻlovni yigʻishni taʼminlash boʻyicha shartnoma imzolangan paytdan boshlab oʻn kundan kechikmay kuchga kiradi.

Elektr energiyasi uchun isteʼmolchilardan toʻlovni yigʻishni taʼminlash boʻyicha shartnoma kuchga kirishi bilan bir vaqtda hududiy elektr tarmoqlari korxonasi xususiy operatorga:

a) isteʼmolchilarda va xususiy operator faoliyati hududining elektr energiyasi yetkazib berish nuqtalarida oʻrnatilgan elektr energiyasini hisobga olish priborlari koʻrsatkichlari yozib olinganligi;

b) elektr energiyasi uchun isteʼmolchilardan toʻlov yigʻilganligi yuzasidan ishonchnoma beradi.

10. Elektr energiyasi uchun isteʼmolchilardan toʻlovni yigʻishni taʼminlash boʻyicha tuzilgan shartnomaga muvofiq xususiy operatorning faoliyati hududida elektr energiyasi uchun isteʼmolchilar va hududiy elektr tarmoqlari korxonasi oʻrtasida hisob-kitob qilish qonunchilikda belgilangan tartibda xususiy operator orqali amalga oshiriladi.

11. Elektr energiyasi uchun isteʼmolchilardan toʻlovni yigʻishni taʼminlash boʻyicha shartnomada:

a) xususiy operatorning faoliyati hududidagi yetkazib berish nuqtalarida, shuningdek har bir isteʼmolchi boʻyicha va isteʼmolchilarning tarif guruhlari boʻyicha elektr energiyasini hisobga olish tartibi natura va pul ifodasida;

b) xususiy operator boʻyicha toʻlash uchun hisob raqamlarini taqdim etish va tushgan toʻlovlarni hisobga olish tartibi;

v) elektr energiyasining har bir isteʼmolchisi boʻyicha toʻlash uchun hisob raqamlarini taqdim etish va tushgan toʻlovlarni hisobga olish tartibi;

g) isteʼmolchilarga yetkazib berilgan elektr energiyasi uchun hisob-kitob qilish va xususiy operatorga mukofot toʻlash tartibi;

d) eʼtiroz-daʼvo ishlari yuritilishida xususiy operator va hududiy elektr tarmoqlari korxonasi funksiyalari chegaralanishi;

e) isteʼmolchilarga yetkazib beriladigan elektr energiyasining uzluksizligi, oʻz vaqtida yetkazib berilishi va sifati hamda uning uchun hisob-kitob qilish uchun hududiy elektr tarmoqlari korxonasi va xususiy operatorning majburiyatlari va javobgarligini chegaralash;

j) elektr energiyasini isteʼmol qiluvchilarda va xususiy operatorning faoliyat hududidagi elektr energiyasini yetkazib berish nuqtalarida oʻrnatilgan hisobga olish priborlaridan koʻrsatkichlarni yozib olish tartibi;

z) isteʼmolchilarda oʻrnatilgan elektr energiyasini hisobga olish priborlarini plombalash tartibi;

i) hududiy elektr tarmoqlari korxonasiga isteʼmolchilar tomonidan elektr energiyasi uchun toʻlov boʻyicha hisobotlar va maʼlumotlarni taqdim etish tartibi (hisob-kitob davri tamom boʻlgandan keyin 10 kundan kechikmay);

k) xususiy operatorning buyurtmasi boʻyicha isteʼmolchilarni elektr tarmoqlariga ulash va tarmoqlardan uzish tartibi;

l) isteʼmolchilarning va/yoki xususiy operatorlarning buyurtmanomalari boʻyicha taʼmirlash ishlarini amalga oshirish tartibi;

m) qonunchilikda belgilangan boshqa qoidalar.

12. Xususiy operator elektr energiyasi uchun isteʼmolchilardan toʻlovni yigʻishni taʼminlash boʻyicha shartnoma kuchga kirgandan keyin bir oy muddatda faoliyat hududidagi isteʼmolchilar bilan elektr energiyasi uchun toʻlovni yigʻish boʻyicha shartnoma tuzadi.

Elektr energiyasi isteʼmolchilari bilan shartnomalar tuzilgandan keyin xususiy operatorning faoliyat hududi elektr energiyasi uchun barcha toʻlovlar faqat xususiy operatorning tranzit hisob raqamiga tushishi kerak.

13. Elektr energiyasi uchun toʻlov yigʻish boʻyicha xususiy operator bilan elektr energiyasi isteʼmolchilari oʻrtasida shartnomalar tuzish Oʻzbekiston Respublikasining Fuqarolik kodeksiga va boshqa qonunchilik hujjatlariga muvofiq amalga oshiriladi.

III. Xususiy operatorning daromadlarini shakllantirish

14. Xususiy operatorning daromadlari hisobot davrida isteʼmolchilar tomonidan toʻlanishi kerak boʻlgan summaning 90 foizidan ortiq toʻlov yigʻilishini taʼminlash sharti bilan (yaʼni tushum 90 foizdan ortiq yigʻilgan taqdirda) isteʼmolchilarga berilgan elektr energiyasi uchun yigʻilgan toʻlovdan unga qoldiriladigan mukofot puli hisobiga shakllantiriladi.

15. Operator tomonidan yigʻish darajasining 90 foizidan ortiq yigʻilgan elektr energiyasi uchun tushum sifatida hisoblab chiqariladigan, xususiy operatorga mukofot puli sifatida berilishi kerak boʻlgan summa uning tushumi hisoblanadi.

Xususiy operatorning mukofot puli summasini hisoblab chiqarish tartibi tanlov boʻyicha tanlash oʻtkazilgunga qadar “Oʻzbekenergo” DAKning hisob-kitoblari asosida Iqtisodiyot vazirligi va Moliya vazirligi bilan kelishilgan formula boʻyicha aniqlanadi. Bunda mukofot puli sifatida xususiy operatorga berilishi kerak boʻlgan mablagʻlar ulushi tushum yigʻilishi koʻrsatkichi oʻsishiga qarab oshishi mumkin.

Isteʼmolchilar uchun elektr energiyasi uchun tariflar oʻzgargan taqdirda hududiy elektr tarmoqlari korxonasi foydasiga xususiy operatorga toʻlanishi kerak boʻlgan summa, amalga oshirilgan avans toʻlovlarini hisobga olgan holda, belgilangan tartibda qayta hisoblab chiqiladi.

16. Xususiy operator tashkil etilgunga qadar elektr energiyasi uchun tushum yigʻilishi darajasi 80 foizdan ortiq boʻlmagan tumanlarda (shaharlarda) xususiy operator faoliyat koʻrsatishi davrining dastlabki oylarida (biroq 9 oydan ortiq emas) undan boshlab operatorning daromadlari shakllanadigan, bosqichma-bosqich 90 foizgacha oshirgan holda tushum yigʻilishining pasaytirilgan maqsadli eng kam darajasi belgilanishiga yoʻl qoʻyiladi. Ushbu holatda xususiy operator bilan hududiy elektr tarmoqlari korxonasi oʻrtasidagi oʻzaro hisob-kitoblar tushum yigʻilishining belgilangan maqsadli eng kam darajasidan kelib chiqqan holda amalga oshiriladi, operatorga mukofot puli sifatida qoldiriladigan ushbu darajadan ortiqcha yigʻilgan tushum ulushi esa “Oʻzbekenergo” DAKning hisob-kitoblari asosida Moliya vazirligi va Iqtisodiyot vazirligi bilan kelishilgan formula boʻyicha aniqlanadi.

Tushum yigʻilishining maqsadli eng kam darajasining har oylik oshishi miqdori quyidagi formula boʻyicha aniqlanadi:

P=(US1-U S2)/T, bunda:

P - tushum yigʻilishining maqsadli eng kam darajasi miqdori;

T - tushum yigʻilishining pasaytirilgan maqsadli eng kam darajasini taqdim etish davri;

US1- tushum yigʻilishining 90 foizli darajasi;

US2 - elektr energiyasi uchun toʻlovni yigʻish funksiyalari xususiy operatorga berilgan paytdan oldingi davr uchun tushum yigʻilishi darajasi.

Operator ishlagan birinchi oyda tushum yigʻilishining maqsadli eng kam darajasi US2+P sifatida aniqlanadi.

Tumanlar (shaharlar) boʻyicha tushum yigʻilishining pasaytirilgan maqsadli eng kam darajasini belgilash muddatlari:

US2 holatida kamida 60% boʻlganda — 9 oydan;

US2 holatida kamida 70% boʻlganda — 7 oydan;

US2 holatida kamida 80% boʻlganda — 5 oydan oshmasligi kerak.

17. Agar xususiy operator tushum yigʻilishining maqsadli eng kam darajasiga erishmasa, tegishli davr uchun unga mukofot puli hisoblanmaydi.

18. Xususiy operator elektr energiyasi uchun toʻlov yigʻish funksiyalari xususiy operatorga berilgunga qadar hosil boʻlgan isteʼmolchilarning elektr energiyasi uchun qarzlarini yuqorida koʻrsatilgan mexanizmga muvofiq xususiy operatorning daromadini shakllantirgan holda undirib olishi mumkin.

IV. Yetkazib berilgan elektr energiyasi uchun xususiy operator bilan hududiy elektr tarmoqlari korxonasi oʻrtasidagi oʻzaro hisob-kitoblar tartibi

19. Elektr energiyasi uchun toʻlov yigʻilishini taʼminlash boʻyicha shartnoma kuchga kirgunga qadar va ushbu shartnomaning amal qilish muddati mobaynida investor quyidagi hollarda tushum tushishini taʼminlaydigan hududiy elektr tarmoqlari korxonasi foydasiga bank kafolatini qoʻyadi:

xususiy operator yetkazib berilgan elektr energiyasi uchun mablagʻlarning 90 foizi darajasiga erishmaganda;

yoki elektr energiyasi uchun isteʼmolchilardan toʻlov yigʻishni taʼminlash boʻyicha shartnomada koʻrsatilgan darajada hududiy elektr tarmoqlari korxonasi foydasiga toʻlovlarni taʼminlamasa.

Bank kafolati amaldagi tariflar boʻyicha xususiy operatorning faoliyat hududida elektr energiyasini sotish oʻrtacha oylik hajmining uch baravar qiymatiga teng boʻlgan summaga qoʻyiladi.

Investor quyidagi hollarda bank kafolatini yuqorida koʻrsatib oʻtilgan miqdorda qoʻygan holda yangilashi shart:

a) agar hududiy elektr tarmoqlari korxonasi pul mablagʻlarini kafolat boʻyicha uning cheklangan summasining 50 foizidan ortiq summada undirib olsa;

b) elektr energiyasiga tariflar oshgan taqdirda.

20. Xususiy operatorning faoliyat hududida elektr energiyasi uchun isteʼmolchilardan tushgan barcha pul mablagʻlari (penya va jarimalar ham shu jumlaga kiradi) toʻliq hajmda uning tranzit hisob raqamiga oʻtkaziladi.

Pul mablagʻlarini boshqa manbalardan tranzit hisob raqamiga oʻtkazish taqiqlanadi, hududiy elektr tarmoqlari korxonasi bilan oʻz vaqtida hisob-kitob qilish uchun investor tomonidan operatorning aylanma mablagʻlarini toʻldirish uchun oʻtkaziladigan mablagʻlar bundan mustasno.

21. Tranzit hisob raqamidan pul mablagʻlari:

a) elektr energiyasi uchun isteʼmolchilardan toʻlov yigʻilishini taʼminlash boʻyicha shartnomaga muvofiq elektr energiyasi uchun hududiy elektr tarmoqlari korxonasiga;

b) xususiy operatorni taqdirlash uchun joriy hisob raqamiga oʻtkaziladi.

22. Isteʼmolchilardan xususiy operatorning tranzit hisob raqamiga tushgan tushumning kamida 90 foizi miqdoridagi pul mablagʻlari har kuni hududiy elektr tarmoqlari korxonasiga oʻtkaziladi.

23. Hisobot oyida elektr energiyasi uchun isteʼmolchilardan toʻlov yigʻishni taʼminlash boʻyicha shartnomada koʻrsatilgan tushum yigʻilishining maqsadli eng kam darajasi oshirilishi xususiy operator tomonidan taʼminlangan taqdirda tranzit hisob raqamida qolgan summada hududiy elektr tarmoqlari korxonalari bilan kelishuv boʻyicha xususiy operatorni taqdirlash puli summasi uning joriy hisob raqamiga oʻtkaziladi.

24. Elektr energiyasi uchun isteʼmolchilardan toʻlov yigʻishni taʼminlash boʻyicha shartnomada koʻrsatilgan toʻlovlar hisobot oyi uchun tushum yigʻilishining maqsadli eng kam darajasidan kam boʻlgan taqdirda xususiy operator pul mablagʻlari qoldigʻini tranzit hisob raqamidan hisobot oyi uchun elektr energiyasi boʻyicha qarzlarni qaytarish uchun zarur boʻlgan hududiy elektr tarmoqlari korxonasi hisob raqamiga oʻtkazadi.

Hisobot oyi uchun elektr energiyasi boʻyicha qarzlarni toʻlash uchun tranzit hisob raqamidan oʻtkazilgan pul mablagʻlari yetarli boʻlmagan taqdirda hududiy elektr tarmoqlari korxonasi xususiy operatorga qarzlarni investor tomonidan qoʻyilgan bank kafolati hisobiga toʻlash talabini qoʻyadi. Koʻrsatib oʻtilgan qarzlarni toʻlash akseptsiz tartibda amalga oshiriladi.

25. Elektr energiyasi uchun isteʼmolchilardan tushgan toʻlovlar hisobi xususiy operator tomonidan isteʼmolchilardagi elektr energiyasini hisobga olish priborlari koʻrsatkichlari asosida amalga oshiriladi.

Bu holda isteʼmolchilarda oʻrnatiladigan elektr energiyasini hisobga olish priborlari hududiy elektr tarmoqlari korxonasi vakillari va xususiy operator tomonidan birgalikda plombalanishi kerak.

Elektr energiyasi isteʼmolchilarining hisobga olish priborlaridan koʻrsatkichlarni yozib olish mumkin boʻlmagan taqdirda xususiy operator, keyinchalik amalda isteʼmol qilingan elektr energiyasiga qayta hisoblagan holda, isteʼmolning shartnoma miqdori boʻyicha hisob-kitob qiladi, uning miqdori belgilangan tartibda xususiy operator va/yoki hududiy elektr tarmoqlari korxonasi va isteʼmolchi tomonidan belgilanadi.

26. Monitoringni taʼminlash uchun hududiy elektr tarmoqlari korxonasi xususiy operator bilan birgalikda hisobot oyi tamom boʻlgandan keyin besh kun mobaynida xususiy operator faoliyati hududining elektr energiyasini hisobga olish nuqtalarida oʻrnatilgan hisobga olish priborlaridan koʻrsatkichlarni yozib oladi.

V. Tomonlarning huquq va majburiyatlari

27. Hududiy elektr tarmoqlari korxonasi elektr energiyasi uchun isteʼmolchilardan toʻlovni yigʻish funksiyalari xususiy operatorga berilgandan keyin:

a) isteʼmolchilar bilan elektr taʼminoti shartnomalarini belgilangan tartibda tuzishi;

b) tuzilgan elektr taʼminoti shartnomalariga muvofiq elektr energiyasi isteʼmolchilarini taʼminlashi;

v) oʻzining elektr-tarmoq xoʻjaligi obyektlarida elektr energiyasi sifatini davlat standartlari tomonidan belgilangan koʻrsatkichlar darajasida saqlashi;

g) xususiy operator faoliyati hududida elektr-tarmoq xoʻjaligi obyektlaridan foydalanilishi, shu jumladan ushbu obyektlarni taʼmirlashi va rekonstruksiya qilishi;

d) elektr energiyasini berish va taqsimlash boʻyicha xizmatlar koʻrsatishi;

e) oʻzining elektr-tarmoq xoʻjaligi obyektlarida elektr energiyasining texnologik nobudgarchiliklarini qisqartirishga doir tashkiliy-texnik tadbirlarni ishlab chiqishi va amalga oshirishi;

j) elektr energiyasi tarmoqlari ajralishi chegarasida hisobga olinmagan isteʼmolni aniqlashi;

z) isteʼmolchilar tomonidan buyurtma berilgan elektr energiyasi hajmini berishning texnik imkoniyatlarini va ularning tijorat hisobi tizimlari qonunchilikka muvofiqligini baholashi;

i) isteʼmolchilarning elektr tarmoqlari va qurilmalarini oʻzining hududiy elektr tarmoqlariga ulash yuzasidan texnik shartlar berishi;

k) elektr energiyasi isteʼmolchilariga belgilangan tartibda ishlab chiqarishning uzluksiz jarayoni bilan berilishini taʼminlashi shart.

28. Hududiy elektr tarmoqlari korxonasi oʻzining aybi bilan elektr taʼminotidagi uzilishlar va belgilangan davlat standartlariga va elektr energiyasi sifati koʻrsatkichlariga muvofiq boʻlmagan elektr energiyasi yetkazib berilganligi uchun isteʼmolchilarning eʼtirozlari boʻyicha qonunchilikda belgilangan tartibda (shu jumladan moddiy) javob beradi.

29. Xususiy operator:

a) biznes-rejaning, elektr energiyasi uchun isteʼmolchilardan toʻlov yigʻilishini taʼminlash boʻyicha shartnoma shartlarining bajarilishini taʼminlashi;

b) elektr taʼminoti shartnomasi asosida elektr energiyasi uchun toʻlovni yigʻish boʻyicha faoliyatning oʻz hududi isteʼmolchilari bilan belgilangan tartibda shartnoma tuzishi;

v) isteʼmolchilar tomonidan elektr energiyasidan ruxsat berilmagan foydalanishlarni aniqlash ishlarini olib borishi;

g) oʻz faoliyati hududida isteʼmolchilarning elektr energiyasini hisobga olish priborlari koʻrsatkichlarini yozib olishi;

d) hududiy elektr tarmoqlari korxonasiga oʻz faoliyati hududida oʻrnatilgan elektr energiyasini hisobga olish priborlaridan yozib olingan maʼlumotlarni taqdim etishi shart.

Xususiy operator qonunchilikka muvofiq boshqa faoliyatni amalga oshirishi mumkin.

30. Xususiy operator oʻzining elektr energiyasi uchun isteʼmolchilardan toʻlovni yigʻishni taʼminlash boʻyicha shartnoma majburiyatlarini bajarmagan taqdirda:

a) investor qonunchilikka muvofiq xususiy operatorning hududiy elektr tarmoqlari korxonasidan qarzlarining qaytarilishini amalga oshiradi;

b) xususiy operatorning hududiy elektr tarmoqlari korxonasidan qarzlari investor tomonidan toʻlanmagan taqdirda elektr energiyasi uchun isteʼmolchilardan toʻlov yigʻishni taʼminlash boʻyicha shartnomaning amal qilishi hududiy elektr tarmoqlari korxonasi tomonidan bir tomonlama tartibda toʻxtatilishi mumkin.

Bunda elektr energiyasi uchun isteʼmolchilardan toʻlov yigʻish funksiyalari bajarilishi davrida hududiy elektr tarmoqlari korxonasidan hosil boʻlgan qarzlarni qaytarish boʻyicha majburiyatlar xususiy operator va investor zimmasida saqlanib qoladi.

31. Elektr energiyasi isteʼmolchilarining hududiy elektr tarmoqlari korxonasi va xususiy operator bilan oʻzaro munosabatlari ushbu Nizom, Elektr energiyasidan foydalanish qoidalari va boshqa qonunchilik hujjatlari bilan tartibga solinadi.

VI. Elektr energiyasini hisobga olish

32. Xususiy operatorning faoliyati hududiga yetkazib beriladigan elektr energiyasi hajmini hisobga olish hisobot davrida elektr energiyasini hisobga olish priborlarining koʻrsatkichlari asosida amalga oshiriladi.

33. Elektr energiyasi isteʼmolchilariga yetkazib beriladigan elektr energiyasi hajmini hisobga olish hududiy elektr tarmoqlari korxonalari va xususiy operatorlar tomonidan, hisob-kitob davri uchun isteʼmolchilarning elektr energiyasini hisobga olish priborlari koʻrsatkichlari asosida amalga oshiriladi.

34. Isteʼmolchilarga yetkazib berilgan elektr energiyasi hajmi hisobga olinishini taʼminlash uchun xususiy operator isteʼmolchi bilan birgalikda har oyda hisobga olish priborlaridan koʻrsatkichlarni yozib oladi va hisob-kitob davri uchun elektr energiyasi isteʼmoli hajmini qayd qiladi.

Hisobga olish priborlaridan koʻrsatkichlar yozib olinmagan yoki elektr energiyasi isteʼmoli toʻgʻrisidagi hisobot isteʼmolchilar tomonidan taqdim etilmagan hollarda xususiy operator oʻzi isteʼmolchi bilan birgalikda aniqlagan amalda isteʼmol qilingan elektr energiyasi hajmini keyinchalik hisob-kitob qilgan holda elektr energiyasi isteʼmolining shartnomaviy miqdori boʻyicha hisob-kitob qiladi.

35. Xususiy operator hududiy elektr tarmoqlari korxonasiga hisob-kitob oyidan keyingi oyning 10-kunigacha:

iqtisodiyot tarmoqlari boʻyicha elektr energiyasi isteʼmoli toʻgʻrisidagi (9 PS va 23-N shakl boʻyicha);

isteʼmolchilar boʻyicha tariflar qoʻllanilishi toʻgʻrisidagi (46-E shakl boʻyicha) maʼlumotlarni yozma shaklda taqdim etishi shart.

36. Hududiy elektr tarmoqlari korxonasi elektr energiyasi uchun isteʼmolchilardan toʻlovni yigʻishni taʼminlash boʻyicha shartnoma shartlari bajarilishi, shuningdek uning shartlari buzilgan taqdirda xususiy operatorga moddiy zarar va boy berilgan foyda qoplanishi boʻyicha talablar qoʻyishi shart.

37. Hududiy elektr tarmoqlari korxonasi, xususiy operator va elektr energiyasi isteʼmolchisi oʻzlarining rekvizitlari, yuridik manzili va joylashgan joyi oʻzgarganligi toʻgʻrisida bir-birlariga oʻz vaqtida maʼlum qilishlari shart.

VII. Xususiy operator faoliyatini toʻxtatish

38. Ushbu Nizomga va elektr energiyasi uchun isteʼmolchilardan toʻlovni yigʻish taʼminlanishi boʻyicha tuzilgan shartnomaga muvofiq investor va/yoki xususiy operator tomonidan oʻz zimmasiga qabul qilingan majburiyatlar zarur tarzda bajarilmagan taqdirda hududiy elektr tarmoqlari korxonasi shartnomada koʻrsatilgan amal qilish muddati tamom boʻlishini kutmasdan shartnomaning amal qilishini toʻxtatishga haqlidir.

Bildirishnoma shartnomaning amal qilishi toʻxtatilishi sanasidan 30 kun oldin xususiy operatorga yozma shaklda yuboriladi, u ushbu muddat mobaynida elektr energiyasi uchun isteʼmolchilardan toʻlovni yigʻish funksiyalarini qaytarib berishi kerak.

39. Elektr energiyasi uchun isteʼmolchilardan toʻlov yigʻish funksiyalari qaytarib berilganda xususiy operator hududiy elektr tarmoqlari korxonasi bilan birgalikda oʻz faoliyati hududi doirasida elektr energiyasi isteʼmolchilarini va ularning qarzlarini toʻliq xatlovdan oʻtkazadi.

Xususiy operator (investor) yoki hududiy elektr tarmoqlari korxonasi quyidagi formula boʻyicha aniqlanadigan qarzlarni toʻliq toʻlashi shart:

Zp =Dp + Spo- So- Dpo, bunda:

Zp - qarzlar;

Dp — hududiy elektr tarmoqlari korxonasi tomonidan xususiy operatorga berilgan debitorlik qarz;

Spo — elektr energiyasi uchun isteʼmolchilardan toʻlovni yigʻish funksiyalari bajarilishi davri uchun xususiy operator tomonidan hududiy elektr tarmoqlari korxonasiga toʻlanishi kerak boʻlgan summa (elektr energiyasi uchun isteʼmolchilardan toʻlov yigʻishni taʼminlash boʻyicha shartnomada koʻrsatilgan tushum yigʻilishining maqsadli eng kam darajasi);

So — elektr energiyasi uchun isteʼmolchilardan toʻlovni yigʻish funksiyalari bajarilishi davri uchun xususiy operator tomonidan hududiy elektr tarmoqlari korxonasiga toʻlangan summa;

Dpo — xususiy operator tomonidan hududiy elektr tarmoqlari korxonasiga berilgan debitorlik qarz.

40. Xususiy operator elektr energiyasi uchun isteʼmolchilardan toʻlovni yigʻishni taʼminlash boʻyicha shartnoma amal qilishi tamom boʻlishi muddatigacha ushbu Nizomda nazarda tutilgan talablarga, shartnoma shartlariga va oʻz zimmasiga olgan majburiyatlarga rioya qilgan taqdirda oʻz funksiyalarini amalga oshirishni rad etishi mumkin.

Bunda xususiy operator elektr energiyasi uchun isteʼmolchilardan toʻlovni yigʻish funksiyalarini shartnomaga muvofiq ushbu funksiyalar belgilangan tartibda toʻliq qaytadan berilgungacha, biroq 2 kalendar oydan koʻp boʻlmagan muddatda amalga oshirishni davom ettiradi.

VIII. Yakuniy qoidalar

41. Xususiy operator faoliyati hududida Elektr energiyasidan foydalanish qoidalariga rioya qilish ustidan nazorat belgilangan tartibda hududiy elektr tarmoqlari korxonasi, “Oʻzdavenergonazorat” inspeksiyasi, “Oʻzbekenergo” DAK va xususiy operator tomonidan amalga oshiriladi.

42. Xususiy operator faoliyati hududida normativ nobudgarchiliklar miqdori belgilangan tartibda “Oʻzdavenergonazorat” inspeksiyasi tomonidan tasdiqlanadi.

43. Elektr energiyasini yetkazib berish va toʻlovni amalga oshirish jarayonida isteʼmolchi, xususiy operator va hududiy elektr tarmoqlari korxonasi oʻrtasida kelib chiqadigan barcha nizoli masalalar Oʻzbekiston Respublikasi qonunchiligiga muvofiq tartibga solinadi.

44. “Oʻzbekenergo” DAK korxonalarining mulki boʻlgan elektr-tarmoq xoʻjaligi obyektlari berilishi, sotilishi va oʻzgaga berishning boshqa shakllari boʻyicha xususiy operatorga mulk qilib berilishi mumkin emas, garov predmeti boʻlolmaydi.

45. Tranzit hisob raqamidan mablagʻlarni ushbu Nizomda va elektr energiyasi uchun isteʼmolchilardan toʻlovni yigʻishni taʼminlash boʻyicha shartnomada nazarda tutilmagan maqsadlar uchun oʻtkazish va vaqtincha olish taqiqlanadi. Xususiy operatorning tranzit hisob raqamidagi mablagʻlardan qatʼiy ravishda maqsadli foydalanilishi yuzasidan javobgarlik ushbu Nizomga va shartnomaga muvofiq xususiy operatorga va xizmat koʻrsatuvchi bankka yuklanadi.

Vazirlar Mahkamasining 2009-yil 4-iyuldagi 186-son qaroriga 3-ILOVA

Isteʼmolchilardan elektr energiyasi uchun toʻlovlarni yigʻish funksiyalarini bergan holda xususiy operatorlar tashkil etish uchun investorlarni tanlov boʻyicha tanlashni oʻtkazish

jadvali

(Oʻzbekiston Respublikasi qonun hujjatlari toʻplami, 2009-y., 28-son, 327-modda; 2013-y., 37-son, 485-modda; Qonun hujjatlari maʼlumotlari milliy bazasi, 20.12.2019-y., 09/19/1014/4173-son; 29.12.2019-y., 09/19/1046/4242-son; Qonunchilik maʼlumotlari milliy bazasi, 05.04.2022-y., 09/22/153/0266-son; 22.07.2023-y., 09/23/304/0510-son)