Oʻzbekiston Respublikasida pasport tizimini yanada takomillashtirish chora-tadbirlari toʻgʻrisida (PF-4117-son)

23.06.2009

Oʻzbekiston Respublikasi Prezidentining

Farmoni

Xalqaro fuqaro aviatsiyasi toʻgʻrisidagi Chikago konvensiyasi (1944-yil dekabr) va Xalqaro fuqaro aviatsiyasi tashkilotining (IKAO) Monreal Assambleyasining 2004-yildagi qarori (rezolyutsiyasi)ga muvofiq ushbu tashkilotga aʼzo davlatlar 2010-yildan kechiktirmay egalarining shaxsiy biometrik parametrlari va belgilangan maʼlumotlari haqida elektron axborot jamlangan hamda yuqori himoya darajasiga ega fuqaro pasportlarining joriy etilishini taʼminlashi shart.

Biometrik maʼlumotlarga ega pasportlar xalqaro fuqaro aeronavigatsiyasi xavfsizligini taʼminlash, shaxsni tasdiqlovchi hujjatlarning qalbakilashtirilishiga qarshi himoya darajasini oshirish, Davlat chegarasidan oʻtishda shaxsni tezkor va aniq identifikatsiyalash mexanizmlarini takomillashtirish, xalqaro aviatashishlar sifati va samaradorligini oshirish maqsadida joriy etilmoqda.

hozirgacha dunyoning 100 dan ortiq mamlakatida zamonaviy axborot texnologiyalari yordamida tayyorlangan biometrik parametrli pasportlar joriy etilgan.

IKAO aʼzosi boʻlgan Oʻzbekiston Respublikasida aviatashishlar xavfsizligini taʼminlash, aviatsiya texnikasining ishonchliligini va xalqaro bozordagi raqobatbardoshliligini oshirish, aviatransport xizmatlaridan foydalanuvchi yoʻlovchilar uchun maksimal qulayliklar yaratish, aeroportlar infratuzilmasini rivojlantirish, ushbu sohada kadrlar tayyorlash va boshqa tadbirlar borasida tizimli va izchil ish olib borilmoqda.

Oʻzbekiston Respublikasining “Oʻzbekiston Respublikasi Fuqaroligi toʻgʻrisida”gi Qonuniga muvofiq va zamonaviy xalqaro andozalar hamda talablarni hisobga olgan holda, milliy pasport tizimini yanada takomillashtirish maqsadida:

1. Oʻzbekiston Respublikasi Vazirlar Mahkamasi, Ichki ishlar vazirligi, Milliy xavfsizlik xizmatining 2011-yil 1-yanvardan Oʻzbekistonda egalarining biometrik maʼlumotlari boʻlgan Oʻzbekiston Respublikasi fuqarosi pasportini (bundan buyon biometrik pasport deb yuritiladi) joriy etish toʻgʻrisidagi takliflariga rozilik berilsin.

2. Aholining amaldagi Oʻzbekiston Respublikasi fuqarosi pasportini biometrik pasportga bosqichma-bosqich almashtirish tartibi tasdiqlansin:

birinchi bosqich (2011-yil) — respublika vazirliklari, idoralari va muassasalari xizmatchilariga, xorijga chiqayotgan yoki chet eldagi jismoniy shaxslarga, shuningdek, muayyan yoshga toʻlgan yoki qonunchilikda koʻzda tutilgan boshqa sabablarga koʻra pasport olayotgan fuqarolarga;

ikkinchi bosqich (2012 — 2015-yillar) — qonunchilikda belgilangan tartib boʻyicha Oʻzbekiston Respublikasining barcha fuqarolariga.

3. Biometrik pasportlarni markazlashgan holda tayyorlash va ularning hisobini samarali yuritish, Oʻzbekiston Respublikasi fuqarolarini mazkur pasportlar bilan oʻz vaqtida taʼminlash maqsadida Oʻzbekiston Respublikasi Vazirlar Mahkamasi huzurida Davlat personallashtirish markazi (DPM) tashkil etilsin, markaz biometrik pasportlar blankalarini tayyorlovchi Oʻzbekiston Respublikasi Markaziy bankining “Davlat belgisi” davlat ishlab chiqarish birlashmasi (DIB) hududida joylashtrilsin.

4. Belgilab qoʻyilsinki:

pasport olish uchun murojaat etgan shaxslar boʻyicha belgilangan maʼlumotlar va biometrik parametrlarni toʻplash, ushbu maʼlumotlarni DPMga yuborish, Oʻzbekiston Respublikasi fuqarolariga biometrik pasportlarning oʻz vaqtida berilishini taʼminlash Oʻzbekiston Respublikasi IIVning Xorijga chiqish-kelish va fuqarolikni rasmiylashtirish boshqarmasining boʻlinmalariga va Oʻzbekiston Respublikasi TIVning xorijdagi konsullik muassasalalariga yuklanadi;

fuqarolar tomonidan Oʻzbekiston Respublikasi Davlat chegerasidan oʻtish paytida pasportlarda koʻrsatilgan biometrik parametrlarga binoan shaxsni identifikatsiya qilish Oʻzbekiston Respublikasi Davlat xavfsizlik xizmati chegara qoʻshinlarining chegara nazorati boʻlinmalari tomonidan amalga oshiriladi.

5. Vazirlar Mahkamasi oʻrnatilgan tartibda quyidagilarni ishlab chiqsin va tasdiqlasin:

bir oy ichida — Davlat personallashtirish markazi toʻgʻrisidagi nizomni;

ikki oy ichida — ushbu Farmon talablarini hisobga olgan holda, Oʻzbekiston Respublikasida pasport tizimi toʻgʻrisidagi nizomning yangi tahririni.

6. Ichki ishlar vazirligi, Tashqi ishlar vazirligi, Milliy xavfsizlik xizmati mamlakat fuqarolarini biometrik pasportlar bilan taʼminlash tizimi samarali amal qilishini taʼminlash maqsadida IIV, TIV, MXXning tegishli boʻlinmalarini 1 va 2-ilovalarga* muvofiq, zamonaviy jihozlar bilan taʼminlasin.

* №№ 1-2 Ilovalar berilmaydi.

7. Oʻzbekiston Respublikasi Markaziy banki bir oy muddatda DPMning “Davlat belgisi” DIB hududida joylashtirilishi va jihozlanishini, ajratilgan binoning kapital va joriy taʼmirlanishini, zarur tashkiliy texnika, ofis mebeli, aloqa vositalari va markazning samarali faoliyati uchun zarur boʻlgan boshqa moddiy-texnik vositalar bilan taʼminlasin.

8. Ichki ishlar vazirligi, Tashqi ishlar vazirligi, Milliy xavfsizlik xizmati, Tashqi iqtisodiy aloqalar, investitsiyalar va savdo vazirligi respublikaning boshqa manfaatdor vazirliklari va idoralari bilan birgalikda:

bir oy muddatda xorijiy tajribani chuqur tahlil qilgan holda va texnik-iqtisodiy asoslarga muvofiq DPMning ishlab chiqarish moddiy-texnik bazasini shakllantirishga doir dastur ishlab chiqsin va uning 2009-2010-yillarda amalga oshirilishini taʼminlasin;

Oʻzbekiston Respublikasi fuqarolarini biometrik pasportlar bilan taʼminlash boʻyicha tashkil etilayotgan tizimning samarali ishlashini taʼminlash va unga xizmat koʻrsatadigan yuqori malakali kadrlar tayyorlashni izchillik asosida tashkil etsin.

9. Moliya va Iqtisodiyot vazirliklari bir oy muddatda Oʻzbekistonda biometrik pasportlarni joriy etish boʻyicha loyihani moliyalashtirish masalasini ishlab chiqsin va koʻrib chiqish uchun oʻrnatilgan tartibda Oʻzbekiston Respublikasi Vazirlar Mahkamasiga kiritsin.

10. Oʻzbekiston Respublikasi Tashqi ishlar vazirligi oʻrnatilgan tartibda xorijiy davlatlar hukumatlarini, Xalqaro fuqaro aviatsiyasi tashkilotini va Xalqaro standartlashtirish tashkilotini Oʻzbekistonda milliy pasport tizimini takomillashtirish boʻyicha amalga oshirilayotgan tadbirlar toʻgʻrisida xabardor qilsin.

11. Adliya vazirligi manfaatdor vazirliklar va idoralar bilan hamkorlikda ikki oy muddatda ushbu Farmon talablarini hisobga olgan holda, amaldagi meʼyoriy-huquqiy hujjatlarga oʻzgartish va qoʻshimchalar kiritish boʻyicha oʻrnatilgan tartibda takliflar kiritsin.

12. Ushbu Farmon ijrosini nazorat qilish Oʻzbekiston Respublikasi Bosh vaziri Sh. Mirziyoyev zimmasiga yuklansin.

Oʻzbekiston Respublikasi Prezidenti I. KARIMOV

Toshkent sh.,

2009-yil 23-iyun,

PF-4117