Oʻzbekiston Milliy aviakompaniyasini tashkil qilish toʻgʻrisida (PF-326-son)

28.01.1992

Oʻzbekiston Respublikasi Prezidentining

Farmoni

“Oʻzbekiston Respublikasi davlat mustaqilligining asoslari toʻgʻrisida”gi Oʻzbekiston Respublikasining Qonuniga muvofiq va Oʻzbekiston Respublikasi hududida havo transportini boshqarish tizimini takomillashtirish maqsadida:

1. Oʻzbekiston fuqaro aviatsiyasi boshqarmasi, fuqaro aviatsiyasining 243-zavodi, “Aviastroy” qurilish-montaj birlashmasiga qarashli “Aviaspetsmontajnaladka” xoʻjalik hisobidagi uchastkasi negizida Oʻzbekiston Milliy aviakompaniyasi — “Oʻzbekiston havo yoʻllari” tashkil qilinsin.

2. Oʻzbekiston Milliy aviakompaniyasi — “Oʻzbekiston havo yoʻllari” Oʻzbekiston fuqaro aviatsiyasi boshqarmasining huquqiy vorisi deb hisoblansin va u Oʻzbekiston Respublikasi hududida havo transporti sohasidagi siyosatni ishlab chiqish, muvofiqlashtirish va amalga oshirishni taʼminlaydigan fuqaro aviatsiyasi masalalari bilan shugʻullanuvchi davlat boshqaruvi organi qilib belgilansin.

3. Oʻzbekiston Respublikasi Vazirlar Mahkamasi mazkur Farmonni roʻyobga chiqarishning tashkiliy chora-tadbirlarini koʻzda tutuvchi qarorni bir hafta muddat ichida qabul qilib, aviakompaniyaning tuzilmasi va Nizomini tasdiqlashi zarur.

Oʻzbekiston Respublikasining Prezidenti I. KARIMOV

Toshkent sh.,

1992-yil 28-yanvar,

PF-326-son