Oʻzbekiston Respublikasi sportchilarining 2012-yil London shahri (Buyuk Britaniya)da boʻlib oʻtadigan XXX yozgi olimpiada va XIV paralimpiada oʻyinlarida ishtirok etishga tayyorgarligi toʻgʻrisida (PQ-1029-son)
05.01.2009
Oʻzbekiston Respublikasi Prezidentining
Qarori
Oʻzbekiston sportchilarining 2012-yil London shahri (Buyuk Britaniya)da boʻlib oʻtadigan XXX yozgi Olimpiada va XIV Paralimpiada oʻyinlariga tayyorgarlik koʻrishi va muvaffaqiyatli ishtirok etishi uchun zarur shart-sharoitlar yaratish maqsadida:
1. Oʻzbekiston sportchilarining 2012-yil London shahrida boʻlib oʻtadigan XXX yozgi Olimpiada va XIV Paralimpiada oʻyinlariga tayyorgarlik koʻrishini tashkil etish va takomillashtirish boʻyicha 1-ilovaga* muvofiq tarkibda Respublika komissiyasi tuzilsin.
* 1-ilova rus tilidagi matnda berilgan.
2. Respublika komissiyasi toʻgʻrisidagi nizom 2-ilovaga* muvofiq tasdiqlansin.
* 2-ilova rus tilidagi matnda berilgan.
3. Respublika komissiyasi (Sh.M. Mirziyoyev) ikki oy muddatda Oʻzbekiston sportchilarini XXX yozgi Olimpiada va XIV Paralimpiada oʻyinlarida ishtirok etishga bosqichma-bosqich tayyorlash Dasturini ishlab chiqsin va tasdiqlasin, bunda:
sport klublari va jamoalari tarbiyalanuvchilari orasidan, ayniqsa respublikamiz mintaqalaridan yosh, iqtidorli sportchilarni tanlab olishni takomillashtirish tadbirlarini amalga oshirishga hamda ularning sport mahoratini oshirish boʻyicha tayyorgarlikni tashkil etishga;
oliy sport mahorati maktablari va olimpiya zaxirasi kollejlarini yanada rivojlantirish negizida sportchilar zaxirasini tayyorlash uchun zarur shart-sharoitlar yaratishga;
olimpiya musobaqalari turlari boʻyicha sport markazlari va bazalarini sport federatsiyalariga biriktirish, ularni zarur holda rekonstruksiya qilish va jahon standartlariga javob beradigan sport anjomlari va uskunalari bilan jihozlashga;
sportchilar va ularni tayyorlayotgan sport bazalarini maxsus oziq-ovqat, tibbiy xizmat, zamonaviy sport anjomlari va uskunalari bilan taʼminlashni moliyalashtirish mexanizmini takomillashtirishga;
olimpiya sport turlarini rivojlantirishni qoʻllab-quvvatlash uchun yirik korxonalar va xususiy biznes vakillarini homiylar sifatida jalb etishga;
sportchilar bilan ishlayotgan murabbiylar va mutaxassislarning uzluksiz taʼlim olishini rivojlantirish, zamonaviy ilmiy-metodik texnologiyalarni tatbiq etish hisobidan sport boʻyicha kadrlar malakasini yanada oshirishga alohida eʼtibor qaratsin.
4. Oʻzbekiston Respublikasi Madaniyat va sport ishlari vazirligi, Milliy olimpiya qoʻmitasi, olimpiya sport turlari federatsiyalari va fizkultura-sport jamiyatlari 2009 — 2012-yillar mobaynida Oʻzbekiston Respublikasi Vazirlar Mahkamasi tomonidan tasdiqlanadigan roʻyxat boʻyicha olib kelinadigan sport jihozlari, anjomlar va maxsus sport kiyimi uchun bojxona toʻlovlaridan (bojxona rasmiylashtiruvi yigʻimlaridan tashqari) ozod etilsin.
Oʻzbekiston Respublikasi Madaniyat va sport ishlari vazirligi Milliy olimpiya qoʻmitasi bilan birgalikda olib kelinadigan anjomlar va uskunalardan maqsadli foydalanish va ularning saqlanishi, olimpiya sport turlari boʻyicha biriktirilgan sport markazlari va bazalarining faoliyati samarali tashkil etilishi ustidan nazoratni taʼminlasin.
5. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, shuningdek manfaatdor sport tashkilotlari bir oy muddatda mintaqaviy dasturlarni ishlab chiqsin va Respublika komissiyasiga taqdim etsin, unda quyidagilar nazarda tutilsin:
jumladan, mahalliy budjet mablagʻlari va homiylar mablagʻlari hisobidan Oʻzbekiston terma jamoalari uchun sportchilarni tayyorlashga qaratilgan chora-tadbirlarni amalga oshirishda faol ishtirok etish, shuningdek ularga biriktirilgan sport markazlari va bazalarini rekonstruksiya qilish;
mamlakat terma jamoalari sportchilari, murabbiylari va boshqa mutaxassislari uchun qulay ijtimoiy-maishiy va moddiy shart-sharoitlar yaratishga har tomonlama koʻmaklashish.
6. Mazkur qarorning ijrosini nazorat qilish Oʻzbekiston Respublikasi Bosh vaziri Sh.M. Mirziyoyev zimmasiga yuklansin.
Oʻzbekiston Respublikasi Prezidenti I. KARIMOV
Toshkent sh.,
2009-yil 5-yanvar,
PQ-1029-son