Yaylov chorvachiligi (qorakoʻlchilik, qoʻychilik, uyur yilqichiligi va tuyachiligi) xodimlarini ijtimoiy jihatdan himoya qilishning qoʻshimcha tadbirlari toʻgʻrisida (PF-307-son)

07.01.1992

Oʻzbekiston Respublikasi Prezidentining

Farmoni

Oʻzbekiston Respublikasi qorakoʻlchiligi, qoʻychiligi, uyur yilqichiligi va tuyachiligida band boʻlgan xodimlarning gʻoyat ogʻir mehnat sharoitini, noqulay ob-havo va iqlim sharoitida uzoq muddat boʻlishlarini hisobga olib hamda ularni ijtimoiy jihatdan himoya qilishni taʼminlash maqsadida:

2. Yaylov chorvachiligi xodimlari uchun har yilgi mehnat taʼtili muddati 36 ish kuni belgilansin.

3. 1992-yildan boshlab qorakoʻlchilik va qoʻychilik xoʻjaliklari xodimlarining ish haqiga qoʻshimcha koeffitsiyent mehnat sharoitidagi suvsiz olislik va boshqa tabiiy-iqlimiy xususiyatlar hisobga olinib joriy qilinsin. Mehnat vazirligi Qishloq xoʻjaligi vazirligi bilan birgalikda bir oy muddat ichida Oʻzbekiston Respublikasi Prezidenti huzuridagi Vazirlar Mahkamasiga tegishli takliflar taqdim etsin.

4. Qoraqalpogʻiston Respublikasi Vazirlar Kengashi, xalq deputatlari mahalliy Kengashlari ijroiya komitetlari, kolxozlar, sovxozlar va boshqa qishloq xoʻjalik korxonalari:

— respublikaning yaylov chorvachiligida, qorakoʻlchilik va qoʻychilik xoʻjaliklaridagi kamida 5 yil uzluksiz ish stajiga ega boʻlgan xodimlarga qishloq aholi manzilgohlaridagi davlat uy-joy fondining ular yashab turgan uylari yoki kvartiralarini shaxsiy mulk qilib bepul bersinlar;

— yaylov chorvachiligi xodimlariga sovxozlar va kolxozlarning iqtisodiy ragʻbatlantirish jamgʻarmalari mablagʻlaridan hovli imoratlari boʻlgan joylar qurish uchun bepul qarz berib, binokorlik materiallarini xarid qilishda koʻmaklashsinlar;

— yosh choʻponlarning oilalariga shaxsiy yordamchi xoʻjalikni tashkil etish uchun imtiyozli shartlarda sigirlar yoki otlar (tuyalar), qoʻylar berib, ularni yem-xashak bilan taʼminlashda yordam koʻrsatsinlar;

— tarmoqda kamida 5 yil uzluksiz ish stajiga ega boʻlgan xodimlarga yengil avtomobillar, mototsikllar, xolodilniklar, televizorlar, kir yuvish mashinalari hamda boshqa gʻoyat xaridorgir madaniy-maishiy va xoʻjalik mollarini birinchi galda sotib olish huquqini bersinlar.

5. Oʻzbekiston Respublikasi Qishloq xoʻjaligi vazirligi Sogʻliqni saqlash vazirligining ishtirokida 1992—1995-yillarda Samarqand, Buxoro, Jizzax va Qashqadaryo viloyatlarida choʻponlar va ularning oilalarini sogʻlomlashtirish uchun sanatoriy-profilaktoriylar ochsin.

6. Oʻzbekiston Kasaba uyushmalari federatsiyasi Kengashiga respublika qorakoʻlchilik va qoʻychilik xoʻjaliklarining choʻponlari hamda boshqa xodimlariga sanatoriylar va dam olish uylariga qoʻshimcha ravishda yoʻllanmalar ajratishni koʻzda tutish tavsiya etilsin.

7. Tarmoqning alohida oʻrnak koʻrsatgan xodimlarini ragʻbatlantirish uchun “Oʻzbekiston Respublikasida xizmat koʻrsatgan qorakoʻlchi” faxriy unvonini taʼsis etish maqsadga muvofiq deb hisoblansin.

Oʻzbekiston Respublikasi Prezidenti huzuridagi Vazirlar Mahkamasi “Oʻzbekiston Respublikasida xizmat koʻrsatgan qorakoʻlchi” faxriy unvoni va koʻkrak nishoni toʻgʻrisidagi nizomni ishlab chiqsin hamda Oʻzbekiston Respublikasi Oliy Kengashi muhokamasiga taqdim etsin.

8. Oʻzbekiston Respublikasi Qishloq xoʻjaligi vazirligi 10 kun muddat ichida qorakoʻlchilik va qoʻychilik xodimlari toifalari roʻyxatini, borib ishlash ushbu Farmonda belgilangan imtiyozlarga ega boʻlish huquqini beradigan rayonlar va xoʻjaliklarning roʻyxatlarini tasdiqlasin.

Oʻzbekiston Respublikasining Prezidenti I. KARIMOV

Toshkent sh.,

1992-yil 7-yanvar,

PF-307-son