Tez tibbiy yordam koʻrsatish tizimi faoliyatini takomillashtirish toʻgʻrisida (PQ-1114-son)

21.05.2009

Oʻzbekiston Respublikasi Prezidentining

Qarori

Qayd etib oʻtilsinki, Respublika shoshilinch tibbiy yordam markazining moddiy-texnika bazasini mustahkamlashga gʻoyat katta mablagʻlar yoʻnaltirilayotganiga qaramasdan, zamonaviy asbob-uskunalardan foydalanishda jiddiy kamchiliklar mavjud, ixtisoslashtirilgan tibbiyot avtotransporti parki yetarlicha tashkil etilmagan.

Ayrim viloyat sogʻliqni saqlash boshqarmalari va Respublika shoshilinch tibbiy yordam markazi filiallari tomonidan ixtisoslashtirilgan avtotransportdan nooqilona va maqsadga nomuvofiq tarzda foydalanish holatlariga yoʻl qoʻyilmoqda, garaj xoʻjaligi va transportga texnik xizmat koʻrsatish tizimlari sust tashkil etilgan, sogʻliqni saqlash boshqarmasi hududiy organlari tomonidan nazorat-taftish ishlari past darajada olib borilmoqda, ayrim hollarda esa batamom xoʻjasizlikka yoʻl qoʻyilmoqdaki, bunga mutlaqo toqat qilib boʻlmaydi.

Navoiy, Namangan, Sirdaryo va Fargʻona viloyatlarida ayniqsa noxush holat yuzaga kelgan boʻlib, mazkur viloyatlardagi tez tibbiy yordam koʻrsatish avtomobil parki deyarli toʻliq eskirib ketgan va oʻz resursini tugatib boʻlgan.

Yuqorida qayd etilgan kamchiliklarni bartaraf etish, mavjud ixtisoslashtirilgan avtotransport parkidan maqsadli va samarali foydalanishni taʼminlash yuzasidan joylardagi sogʻliqni saqlash tizimi hamda davlat hokimiyati organlari rahbarlarining javobgarligini tubdan oshirish, shuningdek tez tibbiy yordam xizmatining moddiy-texnika bazasini yanada mustahkamlash va rivojlantirish maqsadida:

1. Sogʻliqni saqlash vazirligi rahbariyatiga sogʻliqni saqlash hududiy boshqarmalari va Respublika shoshilinch tibbiy yordam markazi hamda uning joylardagi filiallari faoliyati vazirlik tomonidan yetarlicha nazorat qilinmayotganligi koʻrsatib oʻtilsin.

Oʻzbekiston Respublikasi Sogʻliqni saqlash vazirligi Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda Respublika shoshilinch tibbiy yordam markazi, birinchi navbatda uning hududiy filiallari kadrlar tarkibini mustahkamlash borasida qoʻshimcha chora-tadbirlarni qabul qilsin.

Qabul qilingan chora-tadbirlar toʻgʻrisida bir oy muddatda Vazirlar Mahkamasiga maʼlumot berilsin.

3. Oʻzbekiston Respublikasi Sogʻliqni saqlash vazirligi va Moliya vazirligi:

sogʻliqni saqlash muassasalarining mansabdor shaxslari va haydovchilari tomonidan avtomobillarning chiqish-kirishini hisobga olish tizimiga rioya etilishi, shuningdek ularning ixtisoslashtirilgan avtotransportdan maqsadli foydalanishni taʼminlashlari ustidan doimiy ravishda qattiq nazoratni amalga oshirsin;

ixtisoslashtirilgan tibbiyot avtotransportidan maqsadga nomuvofiq foydalanilishining har bir aniqlangan faktini Respublika shoshilinch tibbiy yordam markazining hududiy filiallari rahbarlari tomonidan xizmat mavqeyini suiisteʼmol qilish deb hisoblasin. Bundan kelib chiqadigan barcha oqibatlarni qonun hujjatlariga muvofiq holda koʻrib chiqsin.

4. Oʻzbekiston Respublikasi Sogʻliqni saqlash vazirligi Moliya vazirligi, boshqa manfaatdor vazirliklar va idoralar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda:

bir oy muddatda tez tibbiy yordam tizimi avtogaraj xoʻjaligiga va uning moddiy-texnika vositalari bilan taʼminlanganligiga nisbatan talablarni, shuningdek ixtisoslashtirilgan avtotransportning uzluksiz ishlashi uchun yoqilgʻi-moylash materiallari hamda ehtiyot qismlar sarfi normalarini ishlab chiqsin va tasdiqlasin;

ikki oy muddatda avtoxoʻjaliklarni yiriklashtirishni, ularning moddiy-texnika bazasini rivojlantirish, taʼmirlash ustaxonalari bilan taʼminlashni va ixtisoslashtirilgan avtotransport vositalariga texnik xizmat koʻrsatish uchun shart-sharoitlar yaratilishini nazarda tutgan holda garaj xoʻjaligini boshqarish va undan foydalanishni toʻliq qayta tashkil etsin;

ixtisoslashtirilgan avtotransportga xizmat koʻrsatuvchi muhandis-texnik va taʼmirlovchi xodimlar malakasini oshirish chora-tadbirlari muntazam asosda amalga oshirilishini taʼminlasin.

Hududiy moliya organlari va sogʻliqni saqlash organlari rahbarlari zimmasiga ixtisoslashtirilgan avtotransportning uzluksiz ishlashini taʼminlash uchun sarf normalariga muvofiq, zarur ehtiyot qismlar hamda yoqilgʻi-moylash materiallarining oʻz vaqtida xarid qilinishi yuzasidan shaxsiy javobgarlik yuklansin.

5. Oʻzbekiston Respublikasi Sogʻliqni saqlash vazirligi, Iqtisodiyot vazirligi va Moliya vazirligining:

Respublika shoshilinch tibbiy yordam markazi va uning viloyat filiallariga Koreya Respublikasi hukumatining grant mablagʻlari hisobiga keltirilgan 110 ta tez yordam avtomobillarini 2-ilovaga* muvofiq foydalanishga topshirish;

* 2-ilova rus tilidagi matnda berilgan

Respublika shoshilinch tibbiy yordam markazi avtoparkida mavjud boʻlgan sanitariya avtotransportini 3-ilovaga* muvofiq tuman (shahar) tibbiyot birlashmalarining shoshilinch tibbiy yordam xizmatlariga topshirish toʻgʻrisidagi takliflariga rozilik berilsin.

* 3-ilova rus tilidagi matnda berilgan

6. Oʻzbekiston Respublikasi Prezidentining “Tez hamda shoshilinch tibbiy yordam xizmatlarini sanitar avtotransporti bilan jihozlash uchun Koreya Respublikasi hukumatining grantidan samarali foydalanishni taʼminlash chora-tadbirlari toʻgʻrisida” 2007-yil 5-noyabrdagi PQ–724-son qarorining ilovasi oʻz kuchini yoʻqotgan deb hisoblansin.

7. Mazkur qarorning ijrosini nazorat qilish Oʻzbekiston Respublikasining Bosh vaziri Sh.M. Mirziyoyev zimmasiga yuklansin.

Oʻzbekiston Respublikasi Prezidenti I. KARIMOV

Toshkent sh.,

2009-yil 21-may,

PQ-1114-son