Qishloq aholi punktlari oʻrtasida “Respublikadagi eng yaxshi qishloq” tanlovini oʻtkazish toʻgʻrisida (135-son)

13.05.2009

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Qishloq taraqqiyoti va farovonligi yili” Davlat dasturi toʻgʻrisida” 2009-yil 26-yanvardagi PQ-1046-son qarorining ijrosini taʼminlash, respublikadagi qishloq aholi punktlarining meʼmoriy-badiiy qiyofasini yanada yaxshilash, qishloqlarda anʼanaviy va zamonaviy qurilish materiallaridan foydalanilgan holda namunaviy loyihalar asosida uy-joy, madaniy-maishiy va ijtimoiy obyektlar qurilishi sohasidagi bunyodkorlik va obodonlashtirish borasida amalga oshirilayotgan ibratli ishlarni munosib baholash hamda ragʻbatlantirish maqsadida Vazirlar Mahkamasi qaror qiladi:

1. Mamlakatimizda qishloq aholi punktlari oʻrtasida “Respublikadagi eng yaxshi qishloq” tanlovi 2009-yilning noyabr oyida oʻtkazilsin.

Tanlovning asosiy tashkilotchilari etib, “Davarxitektqurilish” qoʻmitasi, Iqtisodiyot vazirligi va Moliya vazirligi belgilansin.

2. Respublika tanlovi tashkiliy qoʻmitasining tarkibi 1-ilovaga, Qishloq aholi punktlari oʻrtasida “Respublikadagi eng yaxshi qishloq” tanlovini oʻtkazish tartibi toʻgʻrisidagi nizom 2-ilovaga muvofiq tasdiqlansin.

Tashkiliy qoʻmita zimmasiga quyidagi vazifalar yuklatilsin:

tanlovning yuqori saviyada oʻtkazilishini taʼminlashga qaratilgan chora-tadbirlarni ishlab chiqish;

tanlovning barcha bosqichlari doirasida amalga oshiriladigan chora-tadbirlarni muvofiqlashtirish va joylardagi mahalliy hokimliklarga tegishli amaliy yordam koʻrsatish;

tanlovning yakuniy bosqichining yuqori saviyada tashkil etilishini taʼminlash;

tanlov Nizomiga koʻra, gʻoliblarni taqdirlash, ragʻbatlantirish va ularning ish tajribalarini ommalashtirish.

3. Qoraqalpogʻiston Respublikasi Vazirlar Kengashi raisi va viloyatlar hokimlari:

joylarda tanlovning saralash bosqichlarini tashkil etish boʻyicha tegishli hokim oʻrinbosarlari rahbarligida Ishchi guruhlarni tuzsin va ularning faoliyati uchun zarur shart-sharoitlar yaratsin;

ishchi guruh tomonidan tanlovning saralash bosqichlari natijalarini umumlashtirish, Nizom talablariga muvofiq tanlovga tavsiya etiladigan qishloq aholi punktlari va ularni kompleks rivojlantirish va farovonligini taʼminlash borasida viloyat miqyosida amalga oshirilayotgan ishlarga oid hujjatlarni Tashkiliy qoʻmitaga oʻz vaqtida taqdim etilishini taʼminlasin;

tuman, Qoraqalpogʻiston Respublikasi, viloyat saralash bosqichlari gʻolib va ishtirokchilarini mahalliy budjet hamda homiylar mablagʻlari hisobiga munosib ragʻbatlantirish choralarini koʻrsin.

4. Belgilab qoʻyilsinki:

gʻoliblarni mukofotlash bilan bogʻliq xarajatlar Oʻzbekiston Respublikasi Vazirlar Mahkamasining zaxira jamgʻarmasi hisobidan;

tanlovning tumanlar, Qoraqalpogʻiston Respublikasi hamda viloyatlar saralash bosqichiga tayyorgarlik koʻrish va uni oʻtkazish, gʻoliblarni mukofotlash, viloyat saralash bosqichi gʻoliblarining respublika bosqichida ishtirok etishini taʼminlash bilan bogʻliq xarajatlar tegishli mahalliy budjet doirasida va homiylar mablagʻlari hisobidan qoplanadi.

5. Oʻzbekiston milliy teleradiokompaniyasi, Oʻzbekiston milliy axborot agentligi va boshqa ommaviy axborot vositalariga tanlov tadbirlarini keng yoritish tavsiya etilsin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Qosimov zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2009-yil 13-may,

135-son

Vazirlar Mahkamasining 2009-yil 13-maydagi 135-son qaroriga 1-ILOVA

Qishloq aholi punktlari oʻrtasida “Respublikadagi eng yaxshi qishloq” tanlovini oʻtkazish boʻyicha Tashkiliy qoʻmita

TARKIBI

* Qoraqalpogʻiston Respublikasi Vazirlar Kengashi Raisining va viloyatlar hokimlarining iqtisodiyot va tadbirkorlik masalalari boʻyicha birinchi oʻrinbosarlari hamda sanoatni rivojlantirish, kapital qurilish, kommunikatsiyalar va kommunal xoʻjalik masalalari boʻyicha oʻrinbosarlari Tashkiliy qoʻmita aʼzosi hisoblanadilar.

Vazirlar Mahkamasining 2009-yil 13-maydagi 135-son qaroriga 2-ILOVA

Qishloq aholi punktlari oʻrtasida “Respublikadagi eng yaxshi qishloq” tanlovini oʻtkazish tartibi toʻgʻrisida

NIZOM

I. Umumiy qoidalar

1. Mazkur Nizom “Qishloq taraqqiyoti va farovonligi yili” Davlat dasturi ijrosini taʼminlash maqsadida qishloq aholi punktlari oʻrtasida tashkil etiladigan “Respublikadagi eng yaxshi qishloq” tanlovini (keyingi oʻrinlarda “Tanlov” deb ataladi) oʻtkazish tartibini belgilaydi.

2. Qoraqalpogʻiston Respublikasi, barcha viloyatlar va ulardagi qishloq aholi punktlari tanlovning ishtirokchilari hisoblanadi.

3. Tashkiliy qoʻmita tomonidan tanlov gʻoliblarini aniqlash boʻyicha tegishli vazirliklar, idoralar hamda soha mutaxassislaridan iborat tarkibda “Oʻzdavarxitektqurilish” qoʻmitasi qoshida hakamlar hayʼati tuziladi.

II. Tanlovning asosiy maqsad va vazifalari

4. Tanlovning asosiy maqsadi qishloqlarda istiqomat qilayotgan aholi turmush darajasini yanada yaxshilash hamda qishloqlar taraqqiyotining turli sohalarini qamrab olgan holda ularni kompleks rivojlantirish yoʻnalishida amalga oshirilayotgan bunyodkorlik ishlarini oʻrganish, ragʻbatlantirish, munosib taqdirlash hamda bu boradagi mavjud tajribalarni ommalashtirishdan iboratdir.

5. Respublikadagi qishloq aholi punktlarining meʼmoriy-badiiy qiyofasini yaxshilash, muhandislik infratuzilmasini rivojlantirish, anʼanaviy va zamonaviy qurilish materiallaridan foydalanilgan holda namunaviy loyihalar asosida uy-joy, madaniy-maishiy va ijtimoiy obyektlar qurilishi, obodonlashtirish boʻyicha amalga oshirilayotgan ishlarni keng ommaga yetkazish, bu boradagi tashkiliy-amaliy va targʻibot ishlarni yanada kuchaytirish va tizimli tashkil etish mazkur tanlovning vazifasidir.

III. Tanlovni tashkil etish tartibi va shartlari

6. Tanlov tuman, Qoraqalpogʻiston Respublikasi va viloyat saralash va yakuniy Respublika bosqichidan iborat boʻladi.

7. Tanlovning saralash bosqichlari quyidagi yoʻnalishlar boʻyicha barcha tumanlarda 2009-yilning 30-iyuliga qadar, Qoraqalpogʻiston Respublikasi va viloyatlarda 2009-yilning 30-sentabriga qadar oʻtkaziladi:

“Tumandagi eng yaxshi qishloq”;

“Viloyatdagi eng yaxshi qishloq”.

8. Tanlovning saralash bosqichlarini oʻtkazish boʻyicha tumanlarda, Qoraqalpogʻiston Respublikasi va viloyatlarda Ishchi guruhlar tuziladi.

9. Tuman ishchi guruhi tomonidan saralash bosqichi natijalari umumlashtirilib, 1, 2, 3-oʻrinlarni egallagan ishtirokchilar Qoraqalpogʻiston Respublikasi hamda viloyatlar saralash bosqichlariga tavsiya etiladi.

Gʻoliblar mahalliy budjet mablagʻlari hamda homiylar tomonidan moddiy ragʻbatlantiriladi.

10. Qoraqalpogʻiston Respublikasi, viloyatlar ishchi guruhi tuman saralash bosqichlarida 1, 2, 3-oʻrinlarni egallagan ishtirokchilar natijalarini umumlashtirib, 1, 2, 3-oʻrinlarni egallagan ishtirokchilarni yakuniy bosqich — “Respublikadagi eng yaxshi qishloq” tanloviga tavsiya etadi.

Gʻoliblar mahalliy budjet mablagʻlari hamda homiylar tomonidan moddiy ragʻbatlantiriladi.

11. Barcha bosqichlarda ishtirokchilar quyidagi mezonlar asosida, 100 balli tizimda baholanadi:

qishloq aholi punktlarini namunali saqlash hamda bunyodkorlik borasidagi ishlarning homiylarni va aholi keng qatlamini jalb etgan holda, rejali tarzda tashkil etilganligi uchun — 20 ballgacha;

qishloq aholi punktining meʼmoriy-badiiy qiyofasi holatiga — 20 ballgacha;

ijtimoiy, maishiy hamda muhandislik infratuzilmalari bilan taʼminlanganligi darajasiga — 15 ballgacha;

Qishloq taraqqiyoti va farovonligi yilida qishloq aholi punktida zamonaviy binolarni qurish boʻyicha tayyorlangan eng yaxshi loyihalar uchun — 15 ballgacha;

qishloq aholi punktida transport hamda piyodalar uchun moʻljallangan yoʻllar va yoʻlaklarning oqilona tashkil etilganligi darajasiga — 15 ballgacha;

amalga oshirilgan obodonlashtirish ishlarining (aholi turar joylarida, barcha muassasa, tashkilot va jamoatchilik joylarida sanitariya-gigiyena talablarining bajarilishi) sifati darajasiga — 15 ballgacha.

12. Ishtirokchilar toʻgʻrisidagi maʼlumotlar quyidagi mazmunda va shakllarda taqdim etilishi lozim:

qishloq aholi punktining umumiy koʻrinishi, unga avtomobil yoʻli orqali asosiy kirib keladigan joy, maʼmuriy markaz, ijtimoiy (tibbiyot, taʼlim muassasalari va boshq.), madaniy-maishiy va savdo obyektlari joylashgan hududlar, aholi turar joylari, umumiy foydalanishdagi dam olish maskanlari, ishlab chiqarish korxonalari, mavjud tarixiy va madaniy yodgorliklari, sport inshootlari, suv havzalari, irrigatsiya tizimlari, maishiy chiqindilarni yigʻish joyi, muhandislik kommunikatsiyalari tarmoqlari (ichimlik suv, oqova suvlar va tabiiy gaz tarmoqlari, koʻcha yoritgichlari bilan birga elektr tizimlari), maydonlar va koʻchalar tasvirlangan 10 daqiqalik videolavha, 15 x 20 (sm) oʻlchamdagi fotosuratlardan iborat fotoalbom;

qishloq aholi punktining bosh rejasi (mavjud boʻlganda) va ushbu aholi punktida qurilishi rejalashtirilgan obyektlarning 1 x 1 (m) yoki 1 x 2 (m) oʻlchamli planshet va podramniklarga joylashtirilgan loyihalari, mavjud maketlari hamda ularga berilgan izohlar;

qishloq va hududning nomi, joylashgan manzili, qishloq aholisining demografik va mehnat resurslarining bandligi holatini aks ettiradigan A-4 formatli yozuv qogʻozidagi tushuntirish xati.

Taqdim etiladigan materiallar (matn va jadval shaklidagi maʼlumotlar, fotosuratlar va hokazo) aniq va tushunarli tarzda aks ettirilishi, 1 x 1 (m) yoki 1 x 2 (m) oʻlchamli planshet va podramniklarga joylashtirilgan boʻlishi hamda ularning har biriga qishloq va hududning nomi, joylashgan manzili koʻrsatilishi lozim.

13. Tanlov ishtirokchilari toʻgʻrisidagi hujjatlar 2009-yil oktyabr oyining birinchi oʻn kunligida Tashkiliy qoʻmitaga taqdim etilishi zarur.

Belgilangan muddatlardan kechiktirib topshirgan ishtirokchilarning hujjatlari qabul qilinmaydi.

14. Tanlovning yakuniy — Respublika bosqichi Toshkent shahrida 2009-yilning noyabr oyida oʻtkaziladi.

IV. Tanlov mukofotlari va gʻoliblarni taqdirlash

15. Tanlovning respublika bosqichi gʻoliblari Tashkiliy qoʻmitaning maxsus diplomi, qimmatbaho sovrin hamda pul mukofotlari bilan, ikkita nominatsiya boʻyicha (1 ta qishloq, 1 ta viloyat) gʻoliblar pul mukofoti bilan taqdirlanadi. Ishtirokchilarga diplom va homiylar tomonidan taʼsis etiladigan boshqa qimmatbaho sovgʻalar beriladi.

16. Gʻoliblarga egallagan oʻrniga mos holda quyidagi sovrinlar va pul mukofoti topshiriladi:

1-oʻringa — “Neksiya” avtomobili;

2-oʻringa — “Damas” avtomobili;

3-oʻringa — 7 million soʻm.

Shuningdek:

“Eng obod qishloq” nominatsiyasi boʻyicha gʻolib qishloqqa — 4 million soʻm;

“Eng koʻp koʻrkam qishlogʻi bor viloyat” nominatsiyasi boʻyicha gʻolib viloyatga — 4 million soʻm.

17. Gʻoliblarning maxsus diplomlari va ishtirokchilar diplomlari Tashkiliy qoʻmita raisi tomonidan imzolanadi.

18. Sovrinli oʻrinlar hamda nominatsiyalar boʻyicha diplomlar, sovrinlar, belgilangan pul mukofotlari va sovgʻalar tanlov gʻoliblari deb topilgan tegishli qishloq fuqarolar yigʻinlari raislariga hamda mahalliy davlat hokimiyati organlari vakillariga Tashkiliy qoʻmita raisi tomonidan tantanali ravishda topshiriladi.

Tegishli qishloq fuqarolar yigʻinlari raislari, mahalliy davlat hokimiyati organlari rahbarlari diplomlarni saqlash, sovrinlar, pul mukofotlari va qimmatbaho sovgʻalardan belgilangan tartibda maqsadli foydalanilishi uchun masʼuldirlar.

19. Tanlovlar natijalarini eʼlon qilish hamda gʻoliblarni taqdirlash barcha Tanlovlar ishtirokchilari, hayʼat aʼzolari, ijodiy jamoatchilik, ommaviy axborot vositalari vakillari taklif qilingan holda amalga oshiriladi.

Tanlov gʻoliblari va sovrindorlari matbuotda eʼlon qilinadi.