“Traktorlar, oʻziyurar shassilar, traktor tirkamalari va meliorativ yoʻl-qurilish mashinalarini roʻyxatdan oʻtkazish, qayta roʻyxatdan oʻtkazish, davlat raqami belgilarini berish va ularni almashtirish tartibi toʻgʻrisidagi nizomni tasdiqlash haqida (1949-son)

28.04.2009

OʻZBEKISTON RESPUBLIKASI QIShLOQ VA SUV XOʻJALIGI VAZIRINING

buyrugʻi

[Oʻzbekiston Respublikasi Adliya vazirligi tomonidan 2009-yil 28-aprelda 1949-son bilan davlat roʻyxatidan oʻtkazildi]

Oʻzbekiston Respublikasi Vazirlar Mahkamasining 2008-yil 14-noyabrdagi 247-sonli qaroriga hamda 1998-yil 6-yanvardagi 8-sonli qarori bilan tasdiqlangan “Oʻzbekiston Respublikasi Qishloq va suv xoʻjaligi vazirligi mashina va asbob-uskunalarning texnikaviy holatini nazorat qilish davlat Bosh inspeksiyasi toʻgʻrisida”gi nizomga asosan traktorlar, oʻziyurar shassilar, traktor tirkamalari va oʻziyurar yoʻl qurilish mashinalarini roʻyxatdan oʻtkazish va ularga davlat raqami belgilarini berishni tartibga solish maqsadida buyuraman:

1. “Traktorlar, oʻziyurar shassilar, traktor tirkamalari va oʻziyurar yoʻl qurilish mashinalarini roʻyxatdan oʻtkazish va davlat raqami belgilarini berish tartibi toʻgʻrisida”gi nizom ilovaga muvofiq tasdiqlansin.

2. Mazkur Nizom Oʻzbekiston Respublikasi Adliya vazirligida davlat roʻyxatidan oʻtkazilgandan soʻng 10 (oʻn) kundan keyin kuchga kiradi.

Qishloq va suv xoʻjaligi vaziri S. ISMOILOV

Toshkent sh.,

2009-yil 30-mart,

53-son

Qishloq va suv xoʻjaligi vazirining 2009-yil 30-martdagi 53-sonli buyrugʻi bilan TASDIQLANGAN

Traktorlar, oʻziyurar shassilar, traktor tirkamalari va meliorativ yoʻl-qurilish mashinalarini roʻyxatdan oʻtkazish, qayta roʻyxatdan oʻtkazish, davlat raqami belgilarini berish va ularni almashtirish tartibi toʻgʻrisida

NIZOM

Ushbu Nizom Oʻzbekiston Respublikasi Vazirlar Mahkamasining 1998-yil 6-yanvardagi 8-son “Oʻzbekiston Respublikasi Qishloq va suv xoʻjaligi vazirligi mashina va asbob-uskunalarning texnikaviy holatini nazorat qilish davlat bosh inspeksiyasi toʻgʻrisidagi nizomni tasdiqlash haqida”gi (Oʻzbekiston Respublikasi Hukumatining qarorlari toʻplami, 1998-y., 1-son, 1-modda) hamda 2008-yil 14-noyabrdagi 247-son “2009-yilda qishloq xoʻjaligi texnikalarini ishlab chiqarish va sotishning asosiy parametrlari toʻgʻrisida”gi qarorlariga asosan traktorlar, oʻziyurar shassilar, traktor tirkamalari va meliorativ yoʻl-qurilish mashinalarini roʻyxatdan oʻtkazish, qayta roʻyxatdan oʻtkazish, davlat raqami belgilarini berish va ularni almashtirish tartibini belgilaydi.

I. Umumiy qoidalar

1. Ushbu Nizom talablarini bajarish mulkchilik shaklidan va idoraviy boʻysunuvdan qatʼi nazar, korxonalar, tashkilotlar va muassasalar, shuningdek dehqon va fermer xoʻjaliklari hamda fuqarolar (bundan keyingi oʻrinlarda mashina egalari deb yuritiladi) uchun majburiydir.

2. Traktorlar, oʻziyurar shassilar, traktor tirkamalari va meliorativ yoʻl-qurilish mashinalarini (bundan keyingi oʻrinlarda mashinalar deb yuritiladi), roʻyxatdan oʻtkazish, qayta roʻyxatdan oʻtkazish, roʻyxatdan chiqarish, texnik hujjatlar va davlat raqami belgilarini berish Davlat texnika nazorati inspeksiyasining tuman va shahar inspeksiyalari (bundan keyingi oʻrinlarda “Davtexnazorat” inspeksiyalari deb yuritiladi) tomonidan amalga oshiriladi.

3. Mashina egalari tomonidan mashinalar sotib olinganda yoki qabul qilib olinganda, shuningdek texnik hujjatlarga oʻzgartirishlar kiritish lozim boʻlganda, mashinaning texnik holatidan qatʼi nazar, 10 kun ichida “Davtexnazorat” inspeksiyalariga murojaat etishlari shart.

4. Notariuslar tomonidan tasdiqlangan mashinalarni boshqa shaxsga berish bilan bogʻliq ishonchnomalar va ijaraga berish shartnomalari notarial tartibda tasdiqlangan vaqtdan boshlab 10 kun ichida roʻyxatdan oʻtkazish uchun “Davtexnazorat” inspeksiyalariga taqdim etiladi. Ishonchnomalarni va ijara shartnomasini hisobga qoʻyish “Davtexnazorat” inspeksiyalari tomonidan belgilangan tartibda, toʻlov undirilmasdan amalga oshiriladi.

5. Mashinalarni roʻyxatdan oʻtkazishda “Davtexnazorat” inspeksiyalari tomonidan mashinaning texnik hujjatlarida koʻrsatilgan maʼlumotlarga mashina turi, rusumi, ishlab chiqarilgan yili, zavod raqami, agregatlar raqami, shuningdek mashinani qayta roʻyxatdan oʻtkazishda davlat raqam belgisining muvofiqligi tekshiriladi.

6. Mashinalarni roʻyxatdan va qayta roʻyxatdan oʻtkazishda, texnik hujjatlar va davlat raqami belgisini berishda, shuningdek roʻyxatdan chiqarishda “Davtexnazorat” inspeksiyalari tomonidan Oʻzbekiston Respublikasi Vazirlar Mahkamasining 1998-yil 6-yanvardagi 8-sonli qarorning 2-ilovasiga muvofiq eng kam oylik ish haqining belgilangan koeffitsiyentlari miqdorida yigʻimlar undiriladi.

7. Mashinalarni roʻyxatdan oʻtkazish va boshqa oʻzgartirishlar kiritish uchun asos boʻlib xizmat qilgan hujjatlar toʻplami “Davtexnazorat” inspeksiyalarida kamida 3 yil muddatda davomida saqlanadi (qayd etish kitoblari, qatʼiy hisobdagi “Davtexnazorat” inspeksiyalari blanklari va raqam belgilarining kirim-chiqim daftarlari bundan mustasno).

8. Mashinalardan texnik hujjatlarsiz va davlat raqam belgilarisiz foydalanish qatʼiyan taqiqlanadi.

II. Mashinalarni roʻyxatdan va qayta roʻyxatdan oʻtkazish tartibi

9. Mashinalarni roʻyxatdan oʻtkazish uchun mashina egalari “Davtexnazorat” inspeksiyalariga quyidagi hujjatlarni taqdim etadilar:

mazkur Nizomning 1, 2-ilovalariga muvofiq ariza;

mashinaning qonuniy sotib olinganligi yoki berilganligini tasdiqlovchi hujjatlar;

mashina ishlab chiqarilgan zavodlar tomonidan berilgan texnik hujjatlar;

xorijiy davlatlardan olib kelingan mashinalarning bojxona rasmiylashtiruvidan oʻtkazilganligi toʻgʻrisida guvohnomasi;

10. Mashinalar quyidagi hollarda qayta roʻyxatdan oʻtkaziladi:

Mashinalarning turgan oʻrni yoki mashina egalarining yashash joyi oʻzgarganda, quyidagi hujjatlar asosida:

mazkur Nizomning 1, 2-ilovalariga muvofiq ariza;

texnik hujjatlar (texnik pasport, texnik talon);

mashinalarning turgan oʻrni oʻzgarishiga asos boʻlgan hujjat (buyruq, ijara shartnomasi, hokimlik qarori);

mashinalar turgan oʻrnining “Davtexnazorat” inspeksiyalari tomonidan texnik koʻrikdan oʻtkazilganligi haqidagi dalolatnoma;

jismoniy shaxslar uchun pasport.

Mashina egalarining nomi oʻzgarganda quyidagi hujjatlar asosida:

mazkur Nizomning 1, 2-ilovalariga muvofiq ariza;

nomi oʻzgarganligini tasdiqlovchi hujjat (nomini oʻzgartirish toʻgʻrisida yuqori turuvchi organ yoki korxona, tashkilot va muassasaning qarorlari, farmoyishlari va buyruqlari);

jismoniy shaxslar uchun pasport, familiyasi, ismi va otasining ismi oʻzgarganligini tasdiqlovchi hujjat (fuqarolik holatini qayd etish organi yoki sud organi tomonidan berilgan hujjat).

Mashina egalari oʻzgarganda quyidagi hujjatlar asosida:

mazkur Nizomning 1, 2-ilovalariga muvofiq ariza;

notarial idoralari tomonidan berilgan oldi-sotdi, hadya, ayirboshlash, lizing, sublizing shartnomalari, vorislik, meros va mulkka egalik qilish huquqini beruvchi guvohnomalar;

sud qarori;

Oʻzbekiston Respublikasi Davlat mulki qoʻmitasi idoralari tomonidan berilgan order;

korxona, tashkilot va muassasaning roʻyxatida boʻlgan mashinalarni balansdan balansga ajratilganligi toʻgʻrisidagi qarorlari va buyruqlarining nusxalari;

bir vazirlikka qarashli va bir moliyaviy tizimdagi tashkilotlar uchun yuqori organlarning”Davtexnazorat” inspeksiyalari roʻyxatida boʻlgan mashinalarning balansdan balansga bepul ajratilganligi toʻgʻrisidagi buyrugʻidan nusxa.

Mashinaning raqamli agregatlari oʻzgarganda quyidagi hujjatlar asosida:

mazkur Nizomning 1, 2-ilovalariga muvofiq ariza;

raqamli agregatlar qonuniy sotib olinganligi toʻgʻrisida hujjat (hisob-maʼlumotnoma, oldi-sotdi shartnomasi, bojxona guvohnomasi, kirim kassa orderi va yuk xati).

III. Mashinalarni roʻyxatdan chiqarish tartibi

11. Mashinalar quyidagi hollarda roʻyxatdan chiqariladi:

mashinalar foydalanishga yaroqsiz deb topilganda;

mashinalarning belgilangan xizmat muddati tugaganda.

12. Roʻyxatdan chiqarilgan mashinalarning davlat raqam belgilari “Davtexnazorat” inspeksiyalariga topshiriladi, texnik hujjatlarga va qayd qilish kitobida tegishli belgilar qoʻyiladi.

IV. Yaroqsiz holatga kelgan yoki yoʻqotilgan davlat raqam belgilari, texnik hujjatlar oʻrniga yangisini berish tartibi

13. Yaroqsiz holga kelgan yoki yoʻqotilgan texnik hujjatlar va davlat raqam belgilari oʻrniga yangisi mashina egalarining arizasiga davlat yoʻl harakati xavfsizligi xizmati tomonidan texnik hujjatlar va davlat raqam belgilari olib qoʻyilmaganligi toʻgʻrisida tegishli belgi qoʻyilgandan soʻng hujjatga “Dublikat” soʻzi yozib beriladi.

Yangi texnik hujjatlar va davlat raqam belgilari mashina texnik koʻrikdan oʻtkazilgandan soʻng beriladi.

14. Yaroqsiz holga kelgan davlat raqami belgilari, texnik hujjatlar “Davtexnazorat” inspeksiyalari tomonidan tegishli dalolatnomalar tuzilgan holda chiqimga chiqariladi.

V. Roʻyxatdan oʻtkazilgan mashinalar toʻgʻrisidagi yillik maʼlumotni taqdim etish tartibi

15. Oʻzbekiston Respublikasi Qishloq va suv xoʻjaligi vazirligi Mashina va asbob-uskunalarning texnikaviy holatini nazorat qilish davlat bosh inspeksiyasi tomonidan “Davtexnazorat” inspeksiyalarida roʻyxatdan oʻtkazilgan mashinalar toʻgʻrisidagi maʼlumotlar umumlashtirilib, har yili 20-fevralga qadar Oʻzbekiston Respublikasi Vazirlar Mahkamasiga va Oʻzbekiston Respublikasi Davlat statistika qoʻmitasiga taqdim etiladi.

VI. Yakuniy qoidalar

16. Ushbu Nizom Oʻzbekiston Respublikasi Ichki ishlar vazirligi, Davlat statistika qoʻmitasi, Monopoliyadan chiqarish, raqobat va tadbirkorlikni qoʻllab-quvvatlash davlat qoʻmitasi, Oʻzbekiston Fermer xoʻjaliklari uyushmasi va “Oʻzagromashservis” uyushmasi bilan kelishilgan.

Ichki ishlar vaziri B. MATLYUBOV

Toshkent sh.,

2009-yil 30-mart

Davlat statistika qoʻmitasi raisi Gʻ. QUDRATOV

Toshkent sh.,

2009-yil 30-mart

Monopoliyadan chiqarish raqobat va tadbirkorlikni qoʻllab-quvvatlash davlat qoʻmitasi raisi v.b. B. ULAShOV

Toshkent sh.,

2009-yil 30-mart

Oʻzbekiston Fermer xoʻjaliklari uyushmasi raisi A. ORIPOV

Toshkent sh.,

2009-yil 30-mart

“Oʻzagromashservis” uyushmasi raisi B. ABDUQODIROV

Toshkent sh.,

2009-yil 30-mart

1-ILOVA

2-ILOVA

(Oʻzbekiston Respublikasi qonun hujjatlari toʻplami, 2009-y., 18-son, 231-modda)