Darsliklar va oʻquv-metodik qoʻllanmalar xarid qilish yuzasidan tanlov savdolari oʻtkazish tartibi toʻgʻrisidagi nizomni tasdiqlash haqida (1943-son)

17.04.2009

Oʻzbekiston Respublikasi Xalq taʼlimi vazirligi Oʻzbekiston Respublikasi Oliy va oʻrta maxsus taʼlimI vazirligi Oʻrta maxsus, kasb-hunar taʼlim markazining

Qarori

[Oʻzbekiston Respublikasi Adliya vazirligi tomonidan 2009-yil 17-aprelda 1943-son bilan davlat roʻyxatidan oʻtkazilgan]

Oʻzbekiston Respublikasi Vazirlar Mahkamasining 2009-yil 19-martdagi “Vazirlar Mahkamasining “2005 — 2009-yillarda umumtaʼlim maktablari uchun darsliklar va oʻquv-metodik qoʻllanmalar nashr etish dasturi toʻgʻrisida” 2004-yil 22-noyabrdagi 548-sonli qaroriga oʻzgartirish va qoʻshimchalar kiritish haqida”gi 77-sonli qarorining (Oʻzbekiston Respublikasi qonun hujjatlari toʻplami, 2009-yil, 13-son, 142-modda) 2-bandiga muvofiq Oʻzbekiston Respublikasi Xalq taʼlimi vazirligi, Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi qaror qiladi:

1. Darsliklar va oʻquv-metodik qoʻllanmalar xarid qilish yuzasidan tanlov savdolari oʻtkazish tartibi toʻgʻrisidagi nizom ilovaga muvofiq tasdiqlansin.

2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kundan keyin kuchga kiritilsin.

Xalq taʼlimi vaziri Gʻ. ShOUMAROV

Toshkent sh.,

2009-yil 14-aprel,

17-son

Oʻrta maxsus, kasb-hunar taʼlimi markazi direktori Z. SATTOROV

Toshkent sh.,

2009-yil 14-aprel,

14 Q/Q-son

Xalq taʼlimi vazirligi, Oliy va oʻrta maxsus taʼlim vazirligi Oʻrta maxsus, kasb-hunar taʼlimi markazining 2009-yil 14-apreldagi 17, 14 Q/Q-son qarori bilan TASDIQLANGAN

Darsliklar va oʻquv-metodik qoʻllanmalar xarid qilish yuzasidan tanlov savdolari oʻtkazish tartibi toʻgʻrisida NIZOM

Mazkur Nizom Oʻzbekiston Respublikasi Vazirlar Mahkamasining 2009-yil 19-martdagi 77-sonli “Vazirlar Mahkamasining “2005 — 2009-yillarda umumtaʼlim maktablari uchun darsliklar va oʻquv-metodik qoʻllanmalar nashr etish dasturi toʻgʻrisida” 2004-yil 22-noyabrdagi 548-son qaroriga oʻzgartirish va qoʻshimchalar kiritish haqida”gi qaroriga (Oʻzbekiston Respublikasi qonun hujjatlari toʻplami, 2009-y., 13-son, 142-modda) muvofiq darsliklar va oʻquv-metodik qoʻllanmalarni xarid qilish yuzasidan tanlov savdolarini tashkil qilish va oʻtkazish tartibini belgilaydi.

I. Umumiy qoidalar

1. Tanlov savdolari darsliklar va oʻquv-metodik qoʻllanmalar (komplekslar)ni xarid qilishga tatbiq etiladi.

Darsliklar va oʻquv-metodik komplekslarga (bundan keyingi oʻrinlarda oʻquv adabiyoti deb yuritiladi) darsliklar, qoʻshimcha oʻquv, metodik, maʼlumotnoma adabiyotlar va ish daftarlari kiradi.

2. Tanlov savdolari faqat oʻquv adabiyotlari boʻyicha Uzluksiz taʼlim tizimi uchun oʻquv dasturlari, darsliklar va oʻquv qoʻllanmalarini qayta koʻrib chiqish va yangilarini yaratish boʻyicha Hukumat komissiyasining (bundan keyingi oʻrinlarda Hukumat komissiyasi deb yuritiladi) qarori va huquq egalarining (mualliflar va mualliflar jamoalarining, shuningdek oʻquv adabiyotlarining original-maketi uchun huquqlarga ega boʻlgan nashriyotlarning) roziligi mavjud boʻlgan oʻquv adabiyotlariga eʼlon qilinishi mumkin.

Bunda, koʻzi ojiz, kar, zaif eshituvchi va ruhiy rivojlanishida nuqsonlari boʻlgan oʻquvchilari uchun maxsus maktab va maktab internatlari tomonidan oʻquv adabiyotlarini xarid qilish yuzasidan tanlov savdolarini oʻtkazishga Hukumat komissiyasining qarori talab etilmaydi.

3. Tanlov savdolari oʻquv adabiyotlarini xarid qilishda bir kontrakt boʻyicha 100 ming AQSh dollariga teng boʻlgan miqdordan kam boʻlganda amalga oshiriladi, bunda takliflar tanlov yoʻli bilan aniqlanadi.

II. Tanlov savdolarining qatnashchilari

4. Buyurtmachi (Oʻzbekiston Respublikasi Xalq taʼlimi vazirligi, Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi), tanlov komissiyasi, tanlov savdolarining tashkilotchisi va oferent-qatnashchilar tanlov savdolarining asosiy ishtirokchilari hisoblanadi.

5. Buyurtmachi:

a) buyruq chiqargan holda tanlovning turi, sanasi, joyi va shartlarini belgilaydi;

b) oʻquv adabiyotining boshlangʻich qiymatini mustaqil ravishda yoki ixtisoslashtirilgan tashkilotlarni jalb qilgan holda belgilaydi;

v) talabgorlarning malakasiga qoʻyiladigan asosiy talablarni, oʻquv adabiyotiga qoʻyiladigan maxsus va texnik talablarni belgilaydi;

g) tanlov hujjatlarini tasdiqlaydi;

d) tanlov savdolarini oʻtkazish tartib-qoidalarini belgilaydi;

e) tanlov takliflarini baholash mezonlarini tasdiqlaydi;

j) tanlov takliflarini qabul qilishning oxirgi kuni va vaqtini, konvertlarni ochish vaqti va joyini belgilaydi;

z) tanlov savdolari gʻolibi bilan shartnoma tuzadi.

6. Tanlov komissiyasi oʻquv adabiyotlarini nashr etish va qayta nashr etishga davlat buyurtmasini joylashtirish uchun tanlov savdolarini oʻtkazish boʻyicha doimiy organ hisoblanadi. Tanlov komissiyasining son tarkibi aʼzolarning toq sonidan, qoidaga koʻra, kamida 5 kishidan iborat boʻladi. Tanlov komissiyasining aʼzolariga Buyurtmachining xodimlari kiradi. Buyurtmachining rahbari yoki uning oʻrinbosari komissiya raisi boʻlishi mumkin.

7. Tanlov komissiyasi:

a) tegishlicha rasmiylashtirgan holda tanlov savdolarini oʻtkazadi;

b) takliflar bildirilgan konvertlarni ochadi, ularning tanlov hujjatlari bilan belgilangan talablarga (taqdim etilgan hujjatlarning toʻliqligi, ularning rasmiylashtirilishi va hokazo) muvofiqligini tekshiradi;

v) baholash guruhiga jalb etiladigan mustaqil ekspertlar yoki maslahatchilar ishini tashkil etadi va muvofiqlashtiradi;

g) tanlov gʻoliblarini belgilaydi.

8. Tanlov savdolarining tashkilotchisi (Buyurtmachining taklifiga koʻra tanlov komissiyasi tomonidan tayinlanadigan ishchi guruh yoki buyurtmachi tomonidan shartnoma asosida jalb etiladigan konsalting kompaniyasi):

a) tanlov hujjatlarining ishlab chiqilishini taʼminlaydi;

b) tasdiqlangan tanlov hujjatlarini talabgorlarga taqdim etadi;

v) tanlov oʻtkazilishi toʻgʻrisida eʼlon beradi va potensial talabgorlarga taklifnomalar yuborilishini taʼminlaydi;

g) tanlov takliflarini baholash mezonlari ishlab chiqilishini taʼminlaydi;

d) arizalar va tanlov takliflarini qabul qiladi, ularning hisobga olinishi va maxfiyligini taʼminlaydi;

e) ilgari tuzilgan shartnomalar boʻyicha oʻz zimmasiga olgan majburiyatlarni zarur darajada bajarmagan oferentlar toʻgʻrisidagi axborotni tanlov komissiyasiga taqdim etadi;

j) tanlov ishtirokchilarining belgilangan malaka talablariga mosligini oʻrganadi va tanlov komissiyasiga xulosalar beradi;

z) tanlov takliflarining asl nusxalarini konvertlarni ochish va tanlov oʻtkazish uchun tanlov komissiyasiga taqdim etadi.

Savdolarni tashkil etish uchun konsalting kompaniyasi jalb etilgan taqdirda, tanlov savdolari tashkilotchisining huquq va majburiyatlari u bilan buyurtmachi oʻrtasida tuziladigan shartnomada belgilanadi.

9. Tanlov takliflarini ekspertizadan oʻtkazish va baholash uchun Buyurtmachi tomonidan baholash guruhi tayinlanadi.

Baholash guruhi tanlov komissiyasi aʼzolaridan yoki oʻquv adabiyotini nashr etish va kitob nashri texnologiyasi sohasida vakolatli boʻlgan kamida uch nafar mutaxassisdan iborat tarkibdagi mustaqil ekspertlar yoki maslahatchilardan iborat boʻladi.

10. Baholash guruhi:

a) tanlov takliflarini koʻrib chiqadi va tahlil qiladi;

b) tanlov hujjatlarida koʻrsatilgan mezonlar asosida ballar qoʻyadi;

v) eng yaxshi tanlov taklifini aniqlaydi, savdo gʻolibini aniqlash va tasdiqlash uchun tanlov komissiyasiga xulosalar kiritadi.

11. Mulkchilik shakllaridan qatʼi nazar, nashriyot-matbaa faoliyatida tajribaga ega boʻlgan tashkilotlar hamda xorijiy tashkilotlar ham tanlov savdolarining oferentlari-qatnashchilari boʻlishi mumkin.

12. Tanlov savdolariga:

a) tanlov savdolari eʼlon qilingan sanada roʻyxatdan oʻtkazish paytidan boshlab oʻz faoliyatini 6 oydan kam muddatda amalga oshirayotgan;

b) ilgari tuzilgan shartnomalar boʻyicha qabul qilingan majburiyatlarni lozim darajada bajarmagan;

v) qayta tashkil etish (boʻlish, qoʻshish va hokazo), tugatish yoki bankrotlik bosqichida turgan;

g) sud muhokamasi holatida turgan tashkilotlar, korxonalar va yakka tartibdagi tadbirkorlar qoʻyilmaydi.

13. Tanlov komissiyasi aʼzolaridan kimgadir bevosita tashkiliy-huquqiy yoki moliyaviy bogʻliq boʻlgan tashkilotlar savdo qatnashchilari boʻlishi mumkin emas.

14. Tanlov savdolari qatnashchilari:

a) tanlov takliflarini tayyorlaydi va savdo tashkilotchisiga taqdim etadilar;

b) ularning faoliyatini va moliyaviy holatini baholash uchun zarur boʻlgan qoʻshimcha axborotni taqdim etadilar (tanlov komissiyasining soʻroviga koʻra);

v) tanlov takliflarini tayyorlash va taqdim etish davomida sarflangan barcha moliyaviy xarajatlarni oʻz manbalaridan qoplaydilar;

g) tanlov savdolarida gʻolib chiqqan taqdirda, buyurtmachi bilan shartnoma tuzadilar.

III. Tanlov hujjatlari

15. Tanlov hujjatlari quyidagilarni oʻz ichiga oladi:

a) tanlov savdolari qatnashchilariga qoʻyiladigan malaka talablari;

b) nashr etiladigan oʻquv adabiyotlarining roʻyxati, texnik talablari va spetsifikatsiyasi;

v) tanlov taklifining shakli;

g) shartnoma proformasi.

16. Talabgorlarga tanlovda qatnashish uchun quyidagi malaka talablari qoʻyiladi:

a) shartnoma tuzishga fuqarolik huquqiy layoqati va vakolatlari (qatnashchining roʻyxatdan oʻtkazilganligi va sud majburiyatlari mavjudligi toʻgʻrisidagi axborot hamda faoliyatning mazkur turini amalga oshirish huquqini tasdiqlovchi hujjatlar);

b) davlat buyurtmasining butun hajmini bajarish uchun zarur boʻlgan oʻzining yoxud shartnoma asosida foydalanayotgan ishlab chiqarish bazasining, mehnat resurslarining va malakali mutaxassislarning mavjudligi;

v) oʻquv adabiyotini nashr etish va qayta nashr etish uchun moʻljallangan qiymatning kamida 10 foizi miqdorida Buyurtmachining talablariga koʻra boʻsh aylanma mablagʻlarning mavjudligi yoki koʻrsatib oʻtilgan mablagʻlarni berishga bankning kafolat xati;

g) kitob, shu jumladan, oʻquv adabiyoti nashr etish va qayta nashr etishga doir ish tajribasi;

d) tanlov savdolariga qoʻyilgan oʻquv adabiyotini nashr etish va qayta nashr etishning prognozlashtirilayotgan hajmi (faqat oʻz kuchlari bilan nashr etilishi va qayta nashr etilishi mumkin boʻlgan hajm-foizlarda).

Tanlov savdolarida qatnashish uchun talabgorga buyurtmachi tomonidan belgilanadigan, biroq talabgorlarning oʻz tijorat sirining muhofaza qilinishi huquqini buzmaydigan boshqa talablar ham qoʻyilishi mumkin.

17. Nashr etiladigan oʻquv adabiyotlarining roʻyxati, texnik talablari va oʻziga xosligi quyidagilarni oʻz ichiga oladi:

nomi va nusxasi;

tuzilma va maketga qoʻyilgan talablar;

qogʻoz formati va sifati, boʻyoqlarning hajmi va soni, materiallar va matbaaning sifati;

nashr etilayotgan oʻquv adabiyotining yuqori sifati va uzoq muddat foydalanilishini taʼminlashga koʻmaklashadigan boshqa texnologik talablar.

18. Tanlov taklifi texnik taklif, tijorat taklifi, vakilga berilgan ishonchnoma, majburiyatlar bajarilishini taʼminlash shakllari hamda oʻquv adabiyotini nashr etish va qayta nashr etish jadvalidan iborat boʻladi.

19. Shartnoma proformasi Oʻzbekiston Respublikasi qonun hujjatlariga muvofiq tuziladi va oʻquv adabiyotini nashr etish shartlari, narxi va jadvalini, xizmatlarning manbalari va haq toʻlash shaklini, toʻlovlar shartlari va jadvalini, tomonlarning majburiyatlarini, nizolarni hal etish tartibini, shuningdek bitimlar tuzishda majburiy boʻlgan boshqa shartlar va holatlarni oʻz ichiga olishi kerak.

Shartnoma proformasini tuzishda buyurtmachi yoki tanlov savdolari tashkilotchisi shartnoma asosida ixtisoslashtirilgan konsalting kompaniyalariga murojaat qilishga haqlidir.

20. Tanlov savdolari tashkilotchisi takliflarni taqdim etish muddati tamom boʻlgunga qadar, tanlov hujjatlarini sotib olgan talabgorlarga maʼlum qilgan holda, taklifga tuzatish kiritish uchun yetarli boʻlgan vaqt berib, uning muddatini uzaytirib, tanlov hujjatlariga oʻzgartirish va qoʻshimchalar kiritishga haqlidir.

21. Talabgorning soʻroviga koʻra, tanlov savdolari tashkilotchisi tanlov takliflarini taqdim etishning soʻnggi muddatidan kamida 10 kun oldin soʻrov manbaini koʻrsatmagan holda tanlov savdolarining barcha qatnashchilariga majburiy tartibda javob yuborishi va tanlov hujjatlarining mohiyati yoki mazmuni bilan bogʻliq savolga yozma ravishda javob berishi shart.

22. Tanlov komissiyasi, savdo tashkilotchisi va talabgorlar oʻrtasida xabar, bildirishnoma va boshqa axborotni ayirboshlash yozma shaklda amalga oshiriladi.

IV. Tanlov savdolarini oʻtkazish tartibi va shartlari

23. Ommaviy axborot vositalarida tanlov savdolarini oʻtkazish toʻgʻrisida rasmiy eʼlon berilgan sana yoki talabgorga pochta (sana pochta shtempeli boʻyicha aniqlanadi), telefaks yoki boshqa shaklda qatnashish uchun rasmiy bildirishnoma (taklifnoma) yuborilgan sana tanlov savdosi ochilgan sana hisoblanadi.

24. Tanlov savdolari toʻgʻrisidagi eʼlon markaziy va boshqa eng koʻp tarqalgan gazeta va jurnallarda tanlov takliflari bildirilgan konvertlar rasmiy ochilishidan kamida 30 kun oldin eʼlon qilinadi.

25. Eʼlonda quyidagilar koʻrsatiladi:

a) buyurtmachining nomi va manzili;

b) davlat buyurtmasini shakllantirish manbalari;

v) nashr etilishi moʻljallangan oʻquv adabiyotining nomi va nusxasi;

g) talabgorlarga qoʻyiladigan asosiy shartlar va talablar;

d) tanlov hujjatlari olinadigan joy (tanlov savdolari tashkilotchisining manzili, aloqa telefoni va telefaksi);

e) tanlov hujjatlari uchun haq toʻlash qiymati va tanlov taklifi berishda tanlov qatnashchisi uchun zakalat summasi;

j) zakalat summasi va tanlov hujjatlari uchun haq toʻlash shartlari, ularni toʻlash uchun bank rekvizitlari;

z) tanlov hujjatlarini taqdim etish joyi, oxirgi muddati (kun va soat koʻrsatilgan holda);

i) tanlov takliflari bildirilgan konvertlarni ochish joyi, kuni va vaqti.

26. Tanlov savdolarida qatnashish istagini bildirilgan talabgorlar eʼlon berilgandan keyin savdo tashkilotchisidan tanlov hujjatlarini oladi.

Tanlov hujjatlari uchun toʻlov miqdori Buyurtmachi tomonidan Buyurtmachining tanlovga tayyorgarlik koʻrish va tanlovni oʻtkazish uchun ketadigan mablagʻlaridan kelib chiqib belgilanadi.

27. Tanlov takliflari tanlov hujjatlariga qoʻyiladigan talablarga muvofiq ishlab chiqiladi va konvertda taqdim etilib, quyidagilardan iborat boʻladi:

a) texnik taklif qatnashchining malakasi va moliyaviy holatini tasdiqlovchi hujjatlardan, zakalat toʻlanganligini tasdiqlovchi bank hujjatlaridan (nashr etilayotgan oʻquv adabiyotining hisoblangan qiymatining bir foizidan besh foizigacha Buyurtmachi tomonidan belgilanadigan miqdorda), oʻquv adabiyoti maketidan iborat boʻladi;

b) tijorat taklifi narx takliflarini, boʻlishi mumkin boʻlgan chegirmalarni, taklif etilayotgan jadvalni va oʻquv adabiyotini nashr etish va qayta nashr etish muddatlarini oʻz ichiga oladi.

28. Konvertda tanlov qatnashchisining, tanlov savdosi tashkilotchisining nomi va manzili, nashr etilishi va qayta nashr etilishi taklif etilayotgan oʻquv adabiyotining nomi va taklifnomaning tartib raqami koʻrsatiladi.

29. Tanlov taklifining tegishli ravishda “Asl nusxa” va “Nusxa” soʻzlari bilan belgi qoʻyilgan, talabgorning imzosi va muhri bilan tasdiqlangan asl nusxasi va nusxasi tanlov savdolari tashkilotchisiga muhrlangan shaklda yuboriladi.

30. Tanlov taklifining amal qilish muddati tanlov hujjatlarida belgilanadi.

Qatnashchilar oʻzlarining tanlov takliflarini ularni taqdim etishning oxirgi kuni va vaqti tamom boʻlgunga qadar qaytarib olishlari mumkin.

Taqdim etish muddati tamom boʻlgandan keyin tushgan tanlov taklifi koʻrib chiqilmaydi va konvertlar ochilmasdan savdo qatnashchisiga qaytariladi.

31. Tanlov takliflarini taqdim etish sanasi tanlov savdolari tashkilotchisining pochta bildirishnomasi olinganligi toʻgʻrisidagi belgisi yoki xat tashuvchi orqali yuborilgan tanlov takliflari roʻyxatdan oʻtkazilgan sana boʻyicha aniqlanadi.

32. Tanlov takliflari berishning belgilangan muddati tamom boʻlgach belgilangan kun va soatda komissiya tanlov takliflari konvertini ochadi.

Hozir boʻlish istagini bildirgan tanlov qatnashchilari yoki ularning toʻlaqonli vakillari ishtirokida konvertlar ochiladi.

33. Konvertlar ochilgandan soʻng savdo qatnashchilarining nomlari oʻqiladi, savdo shartlari va tartib-qoidalariga rioya qilish, tegishli hujjatlarning mavjudligi tekshiriladi.

34. Hujjatlar paketida tanlov hujjatlariga qoʻyiladigan talablar buzilganligi aniqlangan taqdirda, hujjatlar ularning mazmuni eʼlon qilinmasdan qatnashchiga qaytariladi.

35. Tanlov komissiyasi majlisining natijalari bayonnoma bilan rasmiylashtiriladi. Bayonnomada savdo qatnashchilari tomonidan eʼtirof etilgan tashkilotlar sanab oʻtiladi.

Bayonnomada shakl boʻyicha taqdim etilmagan va savdolarga qoʻyilmagan takliflarning rad etilish sabablari koʻrsatilgan holda alohida sanab oʻtiladi.

36. Tanlov takliflari bildirilgan konvertlarni ochish toʻgʻrisidagi bayonnoma ommaviy axborot vositalarida eʼlon qilinmaydi.

37. Texnik va narx takliflari oʻrganish, tahlil etish va baholash uchun baholash guruhiga beriladi.

Takliflarni baholashda qatnashchining malakasi va moliyaviy ahvoli, taklif etilayotgan narx, ishlarni bajarish shakli va muddatlari, oʻquv adabiyoti namunalari parametrlarining buyurtmachi tomonidan belgilangan texnik talablar va spetsifikatsiyasiga muvofiqligi majburiy tartibda hisobga olinadi.

38. Takliflarni baholash tanlov komissiyasi tomonidan belgilangan har bir baholash mezoni boʻyicha ballar qoʻyish yoʻli bilan amalga oshiriladi. Savdo qatnashchilari yoki ularning vakillari tanlov takliflarini baholashda hozir boʻlishga haqli emas.

39. Baholash davomida tanlov komissiyasi tushuntirishlar olish uchun qatnashchilarga yozma ravishda murojaat qilish, ulardan qoʻshimcha maʼlumotlar va tasdiqnomalar olish huquqiga ega.

40. Qatnashchining malaka maʼlumotlari toʻgʻrisida ishonchsiz axborot aniqlangan taqdirda, tanlov komissiyasining qarori bilan talabgor tanlov savdolarida bundan keyin ishtirok etishdan chetlatiladi.

41. Tanlov komissiyasi tomonidan belgilanadigan tanlov takliflarini baholashning umumiy davri takliflar bildirilgan konvertlar rasman ochilgan paytdan boshlanadi va 10 kalendar kundan ortiq boʻlishi mumkin emas.

42. Tanlov takliflarini baholash va savdo gʻolibini aniqlash tanlov komissiyasi tomonidan uning majlisi boshlangunga qadar tasdiqlangan mezonlar asosida amalga oshiriladi. Tanlov paytida mezonlarga oʻzgartirish va qoʻshimchalar kiritishga yoʻl qoʻyilmaydi.

43. Tushgan takliflarning koʻrib chiqilishi va ularning tanlov komissiyasi va baholash guruhi aʼzolari tomonidan baholanishi toʻgʻrisidagi axborot maxfiy hisoblanadi hamda tanlov tartib qoidasiga rasman aloqador boʻlmagan shaxslarga maʼlum qilinmaydi.

44. Tanlov hujjatlarini tekshirish chogʻida aniqlangan arifmetik xatolar mavjud boʻlgan taqdirda, tanlov komissiyasi talabgorga tanlov taklifiga tuzatish kiritish imkoniyatini berishi yoki takliflarni baholashda, agar oʻquv adabiyoti birligi narxi bilan birlik narxi va sonini koʻpaytirish natijasida olingan yakuniy narx oʻrtasida nomuvofiqlik mavjud boʻlsa, oʻquv adabiyoti birligi narxi ustunlik qiladigan, umumiy narxda tuzatish kiritiladigan qaror qabul qilishi mumkin.

Agar soʻzlar bilan yozilgan summa bilan raqamda koʻrsatilgan summa oʻrtasida nomuvofiqlik mavjud boʻlsa, u holda soʻzlar bilan yozilgan summa ustunlik qiladi.

45. Texnik va tijorat takliflarini baholash yakunlari yigʻindisi boʻyicha tanlov taklifi eng koʻp ball olgan qatnashchi tanlov savdosining gʻolibi deb eʼlon qilinadi. Ballarning yakuniy yigʻindisi teng boʻlganda eng kam narx takliflarini bergan qatnashchiga ustunlik beriladi.

46. Yakuniy xulosa va savdo gʻolibi toʻgʻrisidagi qaror tanlov komissiyasi tomonidan qabul qilinadi. Tanlov savdosi gʻolibini tanlash baholash guruhining xulosalari natijalariga va tanlov komissiyasi aʼzolarining yakka tartibdagi xulosasiga asoslanadi. Qaror tanlov komissiyasi aʼzolari umumiy sonining koʻpchilik ovozi bilan qabul qilinadi. Ovozlar teng boʻlib qolganda tanlov komissiyasi raisining ovozi hal qiluvchi hisoblanadi.

47. Tanlov komissiyasining yakuniy bayonnomasida gʻolib va zaxiradagi qatnashchilar, tanlov komissiyasi tarkibi, baholash guruhining xulosasi, qatnashchilarning tanlov takliflari yigʻma jadvali va gʻolib bilan shartnoma imzolashning moʻljallanayotgan muddatlari toʻgʻrisidagi axborot koʻrsatiladi.

Bayonnoma tanlov komissiyasi yigʻilishida ishtirok etayotgan aʼzolar tomonidan imzolanadi va tanlov komissiyasi raisi tomonidan tasdiqlanadi.

48. Tanlov savdolari tashkilotchisi tanlov savdolari gʻolibiga savdo yakunlangandan keyin uch kundan kechiktirmay yozma bildirishnoma yuboradi va tanlov savdolari yakunlarini ommaviy axborot vositalarida eʼlon qiladi.

49. Tanlov savdolari gʻolibi bildirishnomani olgan kundan boshlab oʻn kun muddat ichida Buyurtmachi bilan shartnoma tuzadi.

50. Agar tanlov savdolari gʻolibi shartnoma tuzishni rad etsa yoki belgilangan muddatda shartnomani bajarish uchun kafolat bermasa, u holda buyurtmachi tanlov komissiyasi bilan birgalikda tanlov gʻolibidan keyingi oʻrinni egallagan qatnashchini tanlov savdolari gʻolibi deb eʼtirof etishi yoki takroriy tanlov savdolari oʻtkazishni tayinlashi mumkin.

V. Yakuniy qoidalar

51. Tanlov komissiyasi majlisini oʻtkazish uchun aʼzolarning kamida uchdan ikki qismi ishtirok etishi lozim. Agar tanlov komissiyasi majlisida komissiya raisi qatnashmasa yoxud aʼzolarning kamida uchdan ikki qismi ishtirok etmasa tanlov komissiyasi majlisi huquqiy vakolatli hisoblanmaydi.

52. Quyidagi hollarda tanlov savdolari boʻlib oʻtmagan deb hisoblanadi:

a) tanlov takliflarini taqdim etishning eng oxirgi muddatigacha faqat bitta taklif tushsa;

b) barcha tanlov takliflari tanlov hujjatlariga qoʻyiladigan talablarga muvofiq boʻlmasa;

v) barcha tanlov takliflarida tanlov hujjatlari shartlari bilan talab qilinadigan hujjatlar mavjud boʻlmasa;

g) barcha qatnashchilarning taklif etgan narxlari oʻquv adabiyotining boshlangʻich qiymatidan ancha yuqori boʻlsa.

53. Agar tanlov savdolari boʻlmagan deb eʼtirof etilsa, takroriy tanlov savdolari oʻtkaziladi, unda tanlov hujjatlari shartlarini qayta koʻrib chiqishga yoʻl qoʻyiladi.

54. Zakalat quyidagi hollarda qaytariladi:

a) tanlov savdolari gʻolibiga — shartnoma bajarilishining talab etiladigan taʼminlanishi (kafolati) taqdim etilishi boʻyicha shartnoma tuzilgandan keyin;

b) boshqa qatnashchilarga — tanlov savdolari gʻolibi bilan shartnomalar tuzilgandan keyin, biroq tanlov takliflari amal qilish muddatidan kechikmay;

v) oʻz taklifini taklifni taqdim etishning oxirgi kuni va vaqti tamom boʻlgunga qadar qaytarib olgan qatnashchiga.

Zakalat qaytarish uchun asoslar paydo boʻlgan paytdan boshlab besh kun mobaynida qaytariladi.

55. Zakalat quyidagi hollarda qaytarilmaydi:

a) taklifni taqdim etishning oxirgi kuni va vaqti tamom boʻlgandan keyin oʻz taklifiga oʻzgartirish kiritgan yoki uni qaytarib olgan qatnashchiga;

b) taklifi amal qilishi davrida oʻz taklifini qaytarib olgan, tanlov hujjatlarida belgilangan shartlarda shartnoma tuzishni yoki shartnoma bajarilishining talab etiladigan taʼminlanishini (kafolatini) taqdim etishni rad etgan tanlov savdolari gʻolibiga.

56. Tanlov komissiyasi va baholash guruhi aʼzolari tanlov bilan bogʻliq axborotlarni oshkor qilinganligi uchun qonun hujjatlarida belgilangan tartibda javob beradilar.