“Gaz eksporti va tranzitidan tushadigan valyuta tushumlarini sotishdan olinadigan mablagʻlarni taqsimlash haqida nizom”ni tasdiqlash toʻgʻrisida (1935-son)

06.04.2009

Oʻzbekiston Respublikasi Moliya vazirligi Oʻzbekiston Respublikasi Davlat soliq qoʻmitasi

Qarori

[Oʻzbekiston Respublikasi Adliya vazirligi tomonidan 2009-yil 6-aprelda 1935-son bilan davlat roʻyxatidan oʻtkazilgan]

Oʻzbekiston Respublikasi Prezidentining 2008-yil 29-dekabrdagi PQ-1024-sonli “Oʻzbekiston Respublikasining 2009-yilgi asosiy makroiqtisodiy koʻrsatkichlari va davlat budjeti parametrlari toʻgʻrisida”gi qarorining (Oʻzbekiston Respublikasi qonun hujjatlari toʻplami, 2008-yil, 52-son, 515-modda) 9-bandi ijrosini taʼminlash maqsadida qaror qilamiz:

1. “Gaz eksporti va tranzitidan tushadigan valyuta tushumlarini sotishdan olinadigan mablagʻlarni taqsimlash haqidagi nizom” ilovaga muvofiq tasdiqlansin.

2. Mazkur Nizom Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kundan keyin kuchga kiradi.

Moliya vaziri R. AZIMOV

Toshkent sh.,

2009-yil 27-fevral,

31-son

Davlat soliq qoʻmitasi raisi B. PARPIYEV

Toshkent sh.,

2009-yil 27-fevral,

2009-13-son

Oʻzbekiston Respublikasi Moliya vazirligi va Davlat soliq qoʻmitasining 2009-yil 27-fevraldagi 31, 2009-13-sonli qarori bilan TASDIQLANGAN

Gaz eksporti va tranzitidan tushadigan valyuta tushumlarini sotishdan olinadigan mablagʻlarni taqsimlash haqida

NIZOM

Mazkur Nizom Oʻzbekiston Respublikasi Prezidentining 2008-yil 29-dekabrdagi PQ–1024-sonli “Oʻzbekiston Respublikasining 2009-yilgi asosiy makroiqtisodiy koʻrsatkichlari va davlat budjeti parametrlari toʻgʻrisida”gi qarorining (Oʻzbekiston Respublikasi qonun hujjatlari toʻplami, 2008-yil, 52-son, 515-modda) 9-bandiga muvofiq gaz eksporti va tranzitidan tushadigan valyuta tushumini korxonalar tomonidan majburiy sotishdan olinadigan mablagʻlarni taqsimlash tartibini belgilaydi.

Mazkur Nizom qoidalari mahsulot taqsimoti toʻgʻrisidagi bitimlar doirasida oʻz faoliyatini amalga oshiruvchi investorlarga tatbiq etilmaydi.

I. Umumiy qoidalar

1. Gaz eksporti va tranziti bilan shugʻullanuvchi barcha korxonalar (keyingi oʻrinlarda eksport qiluvchi korxonalar deb yuritiladi) valyuta tushumi qismini majburiy sotishni oʻrnatilgan tartibda amalga oshiradilar.

2. Gaz eksporti va tranzitidan tushadigan valyuta tushumi qismini majburiy sotishdan olinadigan mablagʻlar eksport qiluvchi korxonalarga xizmat koʻrsatuvchi bankda ochilgan alohida maxsus hisob raqamga kirim qilinadi (keyingi oʻrinlarda maxsus hisob raqam deb yuritiladi).

Maxsus hisob raqamga boshqa manbalardan mablagʻlar oʻtkazishga yoʻl qoʻyilmaydi.

II. Majburiy sotishdan olingan mablagʻlarni taqsimlash

3. Maxsus hisob raqamdan mablagʻlar quyidagi maqsadlarga yoʻnaltiriladi:

a) birinchi navbatda budjetga, maqsadli davlat jamgʻarmalari va budjetdan tashqari Maktab taʼlimi jamgʻarmasiga toʻlovlar boʻyicha:

eksport qiluvchi korxonaning oʻzining qarzini toʻlashga;

eksport qiluvchi korxonaning qarzi (toʻgʻridan toʻgʻriyoki “Oʻzbekneftegaz” MXKning boshqa korxonalari orqali) mavjud boʻlgan hamda budjetga, maqsadli davlat jamgʻarmalari va budjetdan tashqari Maktab taʼlimi jamgʻarmasiga toʻlovlar boʻyicha qarzi mavjud “Oʻzbekneftegaz” MXK korxonalarining qarzini toʻlashga;

b) Oʻzbekiston Respublikasi Prezidentining 2008-yil 29-dekabrdagi PQ–1024-sonli “Oʻzbekiston Respublikasining 2009-yilgi asosiy makroiqtisodiy koʻrsatkichlari va davlat budjeti parametrlari toʻgʻrisida”gi qarorining 10-bandida koʻzda tutilgan maqsadlarga.

4. Mazkur Nizomning 3-bandi “a” kichik bandida qayd etilgan hollarda eksport qiluvchi korxona maxsus hisob raqamdagi mablagʻlarni budjetga, maqsadli davlat jamgʻarmalari va budjetdan tashqari Maktab taʼlimi jamgʻarmasiga toʻlovlar boʻyicha qarzlarini kelgusida toʻlash uchun “Oʻzbekneftegaz” MXK oldidagi kreditorlik qarzdorlikni (tasdiqlangan solishtirma dalolatnomaga muvofiq) qoplashga yoʻnaltiradi. Bunda mablagʻlar alohida toʻlov orqali oʻtkaziladi, tegishli toʻlov topshiriqnomasining “toʻlov maqsadi” bandida esa toʻlovning mazkur Nizomga muvofiq amalga oshirilganligi koʻrsatiladi. Ushbu mablagʻlarni “Oʻzbekneftegaz” MXK korxonalari va tashkilotlari hisobvaraqlaridan toʻlovlarni amalga oshirish va ularga “Oʻzkommunxizmat” agentligining hududiy gaz taʼminoti korxonalaridan tushadigan toʻlovlari toʻgʻrisida”gi nizomga (2005-yil 14-yanvar, roʻyxat raqami 1441 — Oʻzbekiston Respublikasi qonun hujjatlari toʻplami, 2005-yil, 2-son, 12-modda) muvofiq taqsimlashga yoʻl qoʻyilmaydi.

5. “Oʻzbekneftegaz” MXK har bir hisobot choragi boshlanishidan kamida besh kun oldin Oʻzbekiston Respublikasi Davlat soliq qoʻmitasi va Oʻzbekiston Respublikasi Moliya vazirligiga maxsus hisob raqamdan mablagʻlarni budjetga, maqsadli davlat jamgʻarmalari va budjetdan tashqari Maktab taʼlimi jamgʻarmasiga yoʻnaltirishning tegishli chorak uchun prognoz koʻrsatkichlarini taqdim qiladi.

6. Oʻzbekiston Respublikasi Davlat soliq qoʻmitasi har oyning 15-sanasidan kechiktirmay Moliya vazirligi va “Oʻzbekneftegaz” MXKga valyuta tushumi qismini majburiy sotishdan olingan soʻmdagi mablagʻlarni “Oʻzbekneftegaz” MXK korxonalari boʻyicha budjetga, maqsadli davlat jamgʻarmalari va budjetdan tashqari Maktab taʼlimi jamgʻarmasiga yoʻnaltirish boʻyicha joriy oy uchun taqsimot taqdim qiladi.

7. Grafik boʻyicha maxsus hisob raqamga mablagʻlarning navbatdagi kelib tushishi quyidagi hollarda kutilayotgan taqdirda, eksport qiluvchi korxona zaruriyat yuzasidan joriy oy boʻyicha mazkur Nizomning 3-bandida qayd etilgan kelgusi toʻlovlarni amalga oshirish uchun maxsus hisob raqamdagi mablagʻlar qoldigʻi doirasida:

a) tegishli toʻlovlarni amalga oshirish muddati kelgandan soʻng;

b) joriy oy uchun belgilangan toʻlov miqdoridan kam miqdorda mablagʻ kutilganda mablagʻlarni zaxira qilib qoʻyadi.

8. Eksport qiluvchi korxona yoki uning kreditorlarining budjet oldidagi, maqsadli davlat jamgʻarmalari va budjetdan tashqari Maktab taʼlimi jamgʻarmasi oldida qarzlari mavjud boʻlmagan hollarda maxsus hisob raqamdagi mablagʻlar muvofiq ravishda muddati kechiktirilgan budjet toʻlovlari, maqsadli davlat jamgʻarmalari va budjetdan tashqari Maktab taʼlimi jamgʻarmasi toʻlovlarini amalga oshirishga yoʻnaltiriladi (Hukumat qarorlariga koʻra muddatidan oldin toʻlash imkoniyati mavjud boʻlmagan qarzdorliklar bundan mustasno).

9. Yuqorida qayd etilgan toʻlovlar amalga oshirilgach, hisob raqamda qolgan mablagʻlar eksport qiluvchi korxonaning asosiy depozit hisob raqamiga oʻtkaziladi va, davlat soliq xizmatining toʻlovlar boʻyicha qarzdorlik yoʻqligini tasdiqlovchi maʼlumoti mavjud boʻlgan holda, ushbu Nizomning 3-bandiga muvofiq qonunchilikda koʻzda tutilgan tarzda sarflanadi.

III. Yakuniy qoidalar

10. Eksport qiluvchi korxonalar gaz eksporti va tranziti boʻyicha operatsiyalarning, shuningdek ulardan tushgan mablagʻlarning maxsus hisob raqamdagi harakatining alohida hisobini olib boradilar.

11. Eksport qiluvchi korxonalar hisobot oyidan keyingi oyning 10 sanasiga qadar gaz eksporti va tranzitidan tushgan valyuta tushumining majburiy sotilishi lozim boʻlgan miqdorini hisoblab, quyidagi Nizomning 1- va 2-ilovalarida keltirilgan tarzda roʻyxatga olingan davlat soliq xizmati organlariga topshiradilar.

12. Mazkur Nizom talablarining buzilishida aybdor boʻlgan shaxslar qonun hujjatlarida belgilangan tartibda javobgar boʻladilar.

13. Mazkur Nizom ijrosi nazorati davlat soliq xizmati organlari tomonidan amalga oshiriladi.

14. Mazkur Nizom “Oʻzbekneftegaz” MXK bilan kelishilgan.

“Oʻzbekneftegaz” MXK Boshqaruvi raisi U. NAZAROV

Toshkent sh.,

2009-yil 27-fevral

Gaz eksporti va tranzitidan tushadigan valyuta tushumlarni sotishdan olinadigan mablagʻlarni taqsimlash haqidagi nizomga 1-ILOVA

* Yil boshigacha boʻlgan muddatda eksport qilingan gaz hajmi uchun toʻlovlar chegirmasidan tashqari. Oʻtgan yil hajmi boʻyicha toʻlovlar haqidagi maʼlumotlar yillik hisobot bilan birga taqdim etiladi.

Hisob-kitobda yil davomida tuzilgan har bir eksport shartnomasi boʻyicha koʻrsatkichlar, hisobot oyida eksport amalga oshirilmagan boʻlsa ham, alohida qatorda koʻrsatilishi lozim.

Gaz eksporti va tranzitidan tushadigan valyuta tushumlarni sotishdan olinadigan mablagʻlarni taqsimlash haqidagi nizomga 2-ILOVA

* SRP bitim doirasida qazib olingan gaz tranzitida shartnoma kim bilan tuzilganligi inobatga olinib, investor yoki operator nomi koʻrsatilishi kerak.

** Yil boshigacha boʻlgan muddatda tranzit qilingan gaz uchun toʻlovlar chegirmasidan tashqari. Oʻtgan yil hajmi uchun toʻlovlar haqida maʼlumot yillik bilan birga taqdim etiladi.

Oʻzbekiston Respublikasi hududi orqali transportirovkaga moʻljallangan har bir yoʻnalish uchun koʻrsatkichlar alohida qatorda koʻrsatiladi.

Hisob-kitobda yil davomida tuzilgan har bir tranzit shartnomasi boʻyicha koʻrsatkichlar, eksport amalga oshirmagan boʻlsa ham, alohida qatorda koʻrsatilishi lozim.