Bolalar sportini rivojlantirish sohasida boshqaruvni yanada takomillashtirish chora-tadbirlari toʻgʻrisida (76-son)

19.03.2009

Oʻzbekiston Respublikasi Vazirlar Mahkamasining

qarori

Oʻzbekiston bolalar sportini rivojlantirish jamgʻarmasi Vasiylik kengashi majlisining 2009-yil 19-yanvardagi 1-76-son bayonnomasi 4-bandini bajarish yuzasidan, bolalar sportini rivojlantirish sohasida boshqaruvni yanada takomillashtirish, bolalar sport inshootlaridan samarali foydalanishni taʼminlash, saqlash va sport bazasini mustahkamlash maqsadida Vazirlar Mahkamasi qaror qiladi:

1.Oʻzbekiston Respublikasi Xalq taʼlimi vazirligi va Moliya vazirligining Oʻzbekiston Respublikasi Xalq taʼlimi vazirligining markaziy apparati tuzilmasida Bolalar sportini rivojlantirish boshqarmasi tashkil etish toʻgʻrisidagi taklifiga rozilik berilsin.

Quyidagilar Bolalar sportini rivojlantirish boshqarmasining asosiy vazifalari etib belgilansin:

jismoniy tarbiya boʻyicha maktabgacha, oʻrta umumiy va maktabdan tashqari taʼlim tizimini rivojlantirishga yoʻnaltirilgan yagona davlat siyosatini amalga oshirishda qatnashish, oʻsib kelayotgan avlodni jismoniy madaniyat va sport bilan shugʻullanishga ommaviy jalb qilish, taʼlim muassasalarida bolalar sportini rivojlantirishga, ularning sport bazasini mustahkamlashga koʻmaklashish;

yangidan ishga tushirilgan bolalar sporti obyektlari ekspertizadan oʻtkazish asosida, xalqaro standartlardan kelib chiqib sport zallari, sport komplekslari va boshqa sport inshootlari uchun ishlab chiqilayotgan va joriy etilayotgan yangi talablar va meʼyorlarni hisobga olgan holda xalq taʼlimi muassasalari balansiga qabul qilib olinishini taʼminlash;

bolalar sporti obyektlarini normativlarga muvofiq asbob-uskunalar va inventar bilan jihozlashni moliyalashtirish boʻyicha hisob-kitoblar, takliflar va buyurtmanomalarni tayyorlash;

sport inshootlari, inventar va asbob-uskunalardan meʼyorlar va binolardan foydalanish muddatlariga muvofiq, shuningdek foydalanilayotgan sport asbob-uskunalari va inventarning har bir turidan samarali va maqsadli foydalanilishi ustidan monitoring olib borilishini taʼminlash.

3. Oʻzbekiston Respublikasi Xalq taʼlimi vazirligi bir oy muddatda:

Bolalar sportini rivojlantirish boshqarmasini zarur kasb koʻnikmalari va tajribaga ega boʻlgan yuqori malakali kadrlar bilan butlasin;

Bolalar sportini rivojlantirish boshqarmasi toʻgʻrisidagi nizomni ishlab chiqsin va tasdiqlasin.

4. Belgilansinki, Bolalar sportini rivojlantirish boshqarmasining taʼminoti Oʻzbekiston Respublikasi Davlat budjetida nazarda tutilgan Oʻzbekiston Respublikasi Xalq taʼlimi vazirligining umumiy xarajatlari doirasida amalga oshiriladi.

5. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish, shuningdek baʼzilarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “Fan va texnologiyalar rivojlanishini muvofiqlashtirish va boshqarishni takomillashtirish chora-tadbirlari toʻgʻrisida” 2006-yil 7-avgustdagi PQ-436-son qarori)” 2006-yil 2-oktabrdagi 207-son qarori 2-bandining toʻrtinchi xat boshi (Oʻzbekiston Respublikasi QT, 2006-y., 10-son, 73-modda) va qarorga 4-ilova oʻz kuchini yoʻqotgan deb hisoblansin

6. Oʻzbekiston Respublikasi Xalq taʼlimi vazirligi Adliya vazirligi va boshqa manfaatdor vazirliklar va idoralar bilan birgalikda bir oy muddatda Oʻzbekiston Respublikasi Vazirlar Mahkamasiga qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida taklif kiritsin.

7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S.Qosimov zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2009-yil 19-mart,

76-son