Oʻzbekiston Respublikasi advokatlar palatasining hududiy boshqarmalari huzuridagi malaka komissiyalari toʻgʻrisidagi nizomni tasdiqlash toʻgʻrisida (1921-son)

14.03.2009

Oʻzbekiston Respublikasi Adliya vazirining

buyrugʻi

[Oʻzbekiston Respublikasi Adliya vazirligi tomonidan 2009-yil 14-martda 1921-son bilan davlat roʻyxatidan oʻtkazildi]

Oʻzbekiston Respublikasi “Advokatura toʻgʻrisida”gi Qonunining 13-moddasiga muvofiq buyuraman:

1. Oʻzbekiston Respublikasi Advokatlar palatasining hududiy boshqarmalari huzuridagi malaka komissiyalari toʻgʻrisidagi nizom ilovaga muvofiq tasdiqlansin.

2. Mazkur buyruq davlat roʻyxatidan oʻtkazilsin va bu haqda Oʻzbekiston Respublikasi vazirliklari, davlat qoʻmitalari va idoralari normativ-huquqiy hujjatlarining Davlat reyestriga tegishli yozuv kiritilsin.

3. Qonun hujjatlarini turkumlash va huquqiy axborot boshqarmasi (A. Inanbabayev) hamda Notariat, FHDY va advokatura boshqarmasi (D. Yakubova) ushbu normativ-huquqiy hujjatni oʻn kun muddat ichida barcha manfaatdor shaxslarga yetkazilishini va “Oʻzbekiston Respublikasi qonun hujjatlari toʻplami” — “Sobraniye zakonodatelstva Respubliki Uzbekistan”da nashr etilishini taʼminlasin.

4. Ushbu buyruq davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

5. Mazkur buyruq ijrosini nazorat qilish vazir oʻrinbosari E. Kanyazov zimmasiga yuklatilsin.

Adliya vaziri R. MUHITDINOV

Toshkent sh.,

2009-yil 14-mart,

69-mh-son

Adliya vazirining 2009-yil 14-martdagi 69-mh-son buyrugʻiga ILOVA

Oʻzbekiston Respublikasi Advokatlar palatasi hududiy boshqarmalari huzuridagi malaka komissiyalari toʻgʻrisida

NIZOM

Mazkur Nizom Oʻzbekiston Respublikasi Advokatlar palatasi hududiy boshqarmalari huzuridagi malaka komissiyalari (bundan keyingi oʻrinlarda malaka komissiyalari deb yuritiladi) vakolatlarini va ularning faoliyatini tashkil etish tartibini belgilaydi.

I. Umumiy qoidalar

1. Malaka komissiyalari:

advokat maqomiga ega boʻlishga talabgor shaxslardan (bundan keyingi oʻrinlarda talabgor deb yuritiladi) malaka imtihonini qabul qilish;

advokat qasamyodini qabul qilish;

advokat maqomini toʻxtatib turish va tiklash;

advokatga malaka darajasi berish;

advokatning noqonuniy xatti-harakatlari yuzasidan murojaatlarni koʻrib chiqish;

advokatlar tomonidan qonunchilik hujjatlari talablari, Advokatlarning kasb etikasi qoidalari, advokatlik siri va advokat qasamyodi buzilganligi toʻgʻrisidagi intizomiy ish yuritishni koʻrib chiqish uchun tuziladi.

Ushbu bandning oltinchi xatboshisida nazarda tutilgan advokatning noqonuniy xatti-harakatlari yuzasidan murojaatlar deganda jismoniy va yuridik shaxslarning murojaatlari, huquqni muhofaza qiluvchi organlarning taqdimnomalari va xat-xabarlari, advokatlarning xatti-harakatlariga oid boshqa murojaatlar tushuniladi.

2. Malaka komissiyalari Oʻzbekiston Respublikasi Advokatlar palatasi hududiy boshqarmalarining (bundan keyingi oʻrinlarda hududiy boshqarmalar deb yuritiladi) va Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalarining (bundan keyingi oʻrinlarda adliya organlari deb yuritiladi) qoʻshma qarorlari bilan hamkasblari orasida hurmatga sazovor advokatlar, shuningdek huquq sohasidagi tajribali mutaxassislar orasidan toq miqdorda tuziladi.

3. Malaka komissiyalari oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga hamda boshqa qonunchilik hujjatlariga, shuningdek, Oʻzbekiston Respublikasi Advokatlar palatasi huzuridagi Oliy malaka komissiyasi toʻgʻrisidagi nizomga (roʻyxat raqami 1920, 2009-yil 14-mart), Advokatlarning kasb etikasi qoidalariga, Oʻzbekiston Respublikasi Advokatlar palatasi qarorlariga va mazkur Nizomga amal qiladi.

4. Malaka komissiyalari masalalarni koʻrib chiqish va ular boʻyicha qarorlar qabul qilishda hududiy boshqarmalar va adliya organlari, ularning yuqori turuvchi tuzilmalari, boshqa tashkilotlar, shuningdek, mansabdor shaxslar va fuqarolardan mustaqildir.

5. Malaka komissiyalarining moddiy-texnika va moliyaviy taʼminoti hududiy boshqarmalar tomonidan amalga oshiriladi.

II. Malaka komissiyalarining vakolatlari

6. Malaka komissiyalari oʻz zimmasiga yuklatilgan vazifalarni bajarish uchun:

talabgorlar, advokatlar va boshqa manfaatdor shaxslarning murojaatlarini koʻrib chiqadi;

zarur boʻlganda, manfaatdor shaxslar va tegishli tashkilotlardan qoʻshimcha hujjatlarni soʻrab oladi;

talabgorlar tomonidan malaka imtihonlari topshirilishi natijalari boʻyicha qarorlar qabul qiladi;

talabgorlar tomonidan advokat qasamyodi qabul qilinishi natijalari boʻyicha qarorlar qabul qiladi;

advokat maqomini toʻxtatib turish va tiklash toʻgʻrisida qarorlar qabul qiladi;

advokatga malaka darajasi berish va uni bekor qilish toʻgʻrisida qarorlar qabul qiladi;

advokatning noqonuniy xatti-harakatlari yuzasidan murojaatlarni koʻrib chiqish natijalari boʻyicha intizomiy ish yuritishni qoʻzgʻatish yoki intizomiy ish yuritishni qoʻzgʻatishni rad qilish haqida qarorlar qabul qiladi;

advokatlarga nisbatan intizomiy ish yuritishni koʻrib chiqish natijalari boʻyicha qarorlar qabul qiladi.

7. Malaka komissiyalari oʻz zimmalariga yuklatilgan vazifalarni bajarishda:

malaka komissiyasi koʻrib chiqishi uchun kiritilgan masalalarni har tomonlama va xolisona koʻrib chiqishga;

qonunchilik hujjatlariga, advokatlik faoliyatining asosiy prinsiplariga qatʼiy rioya etishga;

advokatlik faoliyatining kafolatlari va himoyasini, advokatning daxlsizligini, advokatning faoliyatiga aralashmaslikni taʼminlashga;

Oʻzbekiston Respublikasi Advokatlar palatasi huzuridagi Oliy malaka komissiyasining (bundan keyingi oʻrinlarda Oliy malaka komissiyasi deb yuritiladi) qarorlarini ijro etishga majburdir.

III. Malaka komissiyalarining faoliyatini tashkil etish

8. Malaka komissiyalarining tarkibi hududiy boshqarmalar va adliya organlari rahbarlarining qoʻshma qarorlari bilan hamkasblari orasida hurmatga sazovor advokatlar, shuningdek huquq sohasidagi tajribali mutaxassislar orasidan 7 — 9 kishidan iborat tarkibda ikki yil muddatga tasdiqlanadi. Bunda 7 kishidan iborat komissiya aʼzolarining kamida 4 nafari, 9 kishidan iborat komissiya aʼzolarining kamida 5 nafari advokat boʻlishi lozim. Malaka komissiyalari tarkibiga kelishuv asosida sud, adliya organlari hamda boshqa tashkilotlarning huquq sohasidagi tajribali xodimlari jalb etiladi.

Malaka komissiyasi raisi va oʻrinbosari komissiyaning birinchi yigʻilishida aʼzolar umumiy sonining oddiy koʻpchilik ochiq ovoz berishi orqali malaka komissiyasi aʼzolari orasidan saylanadi. Malaka komissiya raisligi va uning oʻrinbosarligiga nomzodlar ovoz berishda qatnashmaydilar.

Malaka komissiyasi raisining oʻrinbosari malaka komissiyasining majlisida rais hozir boʻlmagan hollarda raislik qiladi.

9. Bir shaxs bir vaqtning oʻzida malaka komissiyasining va Oliy malaka komissiyasining aʼzosi boʻlishi mumkin emas.

Malaka komissiyalari aʼzoligiga advokatlardan nomzodlar advokatlarning tegishli davlat reyestriga kiritilgan va advokatlik faoliyati boʻyicha kamida besh yillik ish stajiga ega boʻlgan advokatlar orasidan taqdim etiladi.

Advokatlar palatasi va uning hududiy boshqarmalari xodimlari, ularning yaqin qarindoshlari malaka komissiyasining aʼzosi boʻlishi mumkin emas.

91. Quyidagi holatlarda komissiya aʼzosi komissiya tarkibidan chiqariladi:

oʻz arizasiga binoan;

advokat maqomi toʻxtatilgan yoki tugatilganda;

komissiya aʼzosi boʻlgan sud, adliya organlari va boshqa tashkilotlar xodimining ish joyi oʻzgarganda yoki xodim ishdan boʻshatilganda;

komissiya aʼzosi tomonidan mazkur Nizom talablari qoʻpol ravishda buzilganda;

komissiya aʼzosi sogʻligʻining holatiga koʻra vazifalarini bajarish imkoni boʻlmaganda;

komissiya aʼzosi komissiya yigʻilishlarida surunkali 3-marta uzrli sabablarsiz ishtirok etmagan taqdirda.

Ushbu bandning beshinchi — yettinchi xatboshilarida nazarda tutilgan asoslar boʻyicha komissiya aʼzosini komissiya tarkibidan chiqarish masalasi komissiya raisi tomonidan kiritiladi.

Komissiya aʼzosini komissiya tarkibidan chiqarish toʻgʻrisidagi qaror komissiya aʼzolarining uchdan ikki qismi ovozlari bilan qabul qilinadi. Qabul qilingan qaror haqida komissiya tarkibidan chiqarilgan komissiya aʼzosiga yozma ravishda maʼlum qilinadi.

Komissiya aʼzosini komissiya tarkibidan chiqarish toʻgʻrisidagi qaror ustidan sudga shikoyat keltirilishi mumkin.

Malaka komissiyasi aʼzosini ushbu bandda nazarda tutilmagan asoslar boʻyicha komissiya tarkibidan chiqarilishiga yoʻl qoʻyilmaydi.

Komissiya tarkibidan chiqarilgan aʼzo oʻrniga mazkur Nizomda nazarda tutilgan tartibda komissiya tasdiqlangan muddat doirasida yangi komissiya aʼzosi kiritiladi.

10. Malaka komissiyasining aʼzosi boʻlgan advokatga nisbatan intizomiy ish yuritish koʻrib chiqilishi yoki malaka komissiyasi aʼzosidan malaka imtihoni va advokat qasamyodi qabul qilinayotganda ular malaka komissiyasi majlisida qatnashishga haqli emas.

Komissiya aʼzosi, agar u:

komissiya majlisi koʻrilayotgan masalalar boʻyicha talabgor, advokat va boshqa manfaatdor shaxs malaka komissiyasi aʼzosining yaqin qarindoshi boʻlsa;

komissiya majlisining natijasidan va unda qabul qilinadigan qarordan bevosita yoki bilvosita manfaatdor boʻlsa yoxud uning begʻarazligiga shubha tugʻdiradigan boshqa holatlar mavjud boʻlsa, komissiya majlisida ishtirok etishi mumkin emas va u rad etilishi kerak.

Mazkur bandda koʻrsatilgan holatlar mavjud boʻlgan taqdirda, komissiya aʼzosi oʻzini oʻzi rad etishi shart. Agar u bunday qilmasa, ayni shu asoslar boʻyicha komissiyaning boshqa aʼzolari tomonidan, shuningdek masalasi koʻrilayotgan talabgorlar, advokatlar va boshqa manfaatdor shaxslar tomonidan rad etilishi mumkin.

Rad etish haqidagi bayonot asoslantirilgan boʻlishi kerak.

Rad etish bildirilgan komissiya aʼzosi rad etish toʻgʻrisidagi masala koʻrilishidan oldin oʻz tushuntirishlarini berishga haqli.

Rad etish toʻgʻrisidagi masala rad qilinayotgan shaxsning yoʻqligida komissiyaning qolgan aʼzolari tomonidan oddiy koʻpchilik ovoz bilan hal etiladi. Ovozlar teng boʻlib qolgan taqdirda, komissiya aʼzosi rad etilgan hisoblanadi.

Malaka komissiyasining majlisi, agar unda malaka komissiyasi aʼzolarining kamida uchdan ikki qismi qatnashsa, komissiya vakolatli (kvorumga ega) hisoblanadi.

Kvorum boʻlmagan holda malaka komissiyasining majlisda hozir boʻlgan aʼzolari tomonidan majlisni keyinga qoldirish toʻgʻrisida qaror qabul qilinadi, majlis oʻtkaziladigan sana, vaqt va joy haqida qoʻshimcha ravishda xabar qilinadi.

Oliy malaka komissiyasining qaroriga binoan malaka komissiyalarining majlislarida Oliy malaka komissiyasining aʼzolari kuzatuvchi sifatida ishtirok etishlari mumkin.

11. Malaka komissiyasining majlislari zaruratga qarab, lekin bir oyda kamida bir marta oʻtkaziladi. Malaka komissiyasining raisi komissiya majlisi oʻtkazilishidan kamida yetti kun oldin majlisning kun tartibi, sanasi, vaqti va joyini belgilaydi.

12. Malaka komissiyasining qarorlari uning majlisida qatnashayotgan malaka komissiyasi aʼzolarining oddiy koʻpchilik ovozi bilan, ochiq ovoz berish orqali manfaatdor shaxslar ishtirokisiz qabul qilinadi. Ovozlar teng boʻlganda, raislik qiluvchining ovozi hal qiluvchi ovoz hisoblanadi.

Malaka komissiyasining qarorlari ular qaysi majlisda qabul qilingan boʻlsa, oʻsha majlisda raislik qiluvchi tomonidan eʼlon qilinadi.

13. Malaka komissiyasining ishini yuritish hududiy boshqarma rahbari tomonidan tayinlanadigan malaka komissiyasining masʼul kotibi (bundan keyingi oʻrinlarda masʼul kotib deb yuritiladi) zimmasiga yuklatiladi. Masʼul kotib malaka komissiyasining va Oliy malaka komissiyasining aʼzosi boʻlishi mumkin emas.

Masʼul kotib:

talabgorlardan hujjatlarni, shuningdek, advokatlarga nisbatan intizomiy ish yuritishga taalluqli hujjatlarni qabul qiladi;

talabgorlarga sabablarini koʻrsatgan holda hujjatlarni qaytarib beradi;

malaka komissiyasi majlisida koʻrib chiqish uchun materiallarni tayyorlashni amalga oshiradi va ularning saqlanishini taʼminlaydi;

malaka komissiyasi aʼzolarini, shuningdek, qaysi advokatga nisbatan intizomiy ish yuritish olib borilayotgan boʻlsa, oʻsha advokatni va boshqa manfaatdor shaxslarni komissiya majlisining oʻtkaziladigan sana, vaqt va joy toʻgʻrisida xabardor qiladi;

malaka komissiyasi aʼzolari va manfaatdor shaxslarning majlisda hozir boʻlganligini tekshiradi, hozir boʻlmaganlik sabablarini aniqlaydi va bu haqda malaka komissiyasiga axborot beradi;

intizomiy ish yuritish bilan bogʻliq maʼlumot olish uchun tegishli organlarga soʻrovnoma yuborilishini tashkil etadi;

malaka komissiyasi majlislarining bayonnomalarini yuritadi;

malaka imtihonini topshirmagan talabgorlarning hisobini yuritadi;

raislik qiluvchining malaka komissiyasi majlisiga tayyorgarlik koʻrish va uni oʻtkazish bilan bogʻliq boshqa topshiriqlarini bajaradi, shuningdek, mazkur Nizomga muvofiq boshqa vazifalarni ham bajaradi.

14. Malaka komissiyasining majlislarida bayonnoma yuritiladi, u majlisda raislik etuvchi va masʼul kotib tomonidan imzolanadi. Malaka komissiyasining qaroridan rozi boʻlmagan malaka komissiyasining aʼzosi komissiya majlisining bayonnomasiga kiritiladigan oʻzining nuqtai nazarini yozma shaklda bayon etishga haqli.

15. Malaka komissiyasi majlisining kun tartibiga kiritilgan masalalarga qarab, bayonnomada:

komissiya majlisi oʻtkaziladigan sana va joy;

komissiya majlisida qatnashgan komissiya aʼzolarining roʻyxati;

komissiya majlisining kun tartibi;

talabgorlar toʻgʻrisidagi axborot;

talabgorning tanlagan ixtisoslik boʻyicha imtihon biletining raqami va unga kiritilgan savollar mazmuni;

talabgorning imtihon biletida nazarda tutilgan savollarga javoblari;

komissiya aʼzolari tomonidan berilgan qoʻshimcha savollar va talabgorning javoblari;

baholash byulletenlaridagi ballarni hisoblash natijalari, shu jumladan talabgor tomonidan toʻplangan ballar;

advokat qasamyodini qabul qilayotgan talabgorga berilgan litsenziya toʻgʻrisidagi maʼlumotlar;

advokat maqomini toʻxtatib turish va tiklash haqida murojaat qilgan advokatlar haqida maʼlumotlar;

malaka darajasi berish masalasi koʻrib chiqilayotgan advokatlar haqida maʼlumotlar;

advokatning noqonuniy xatti-harakatlari yuzasidan murojaatlar mazmuni;

intizomiy ish yuritishga oid holatlar, malaka komissiyasi aʼzolarining, manfaatdor shaxslarning soʻzga chiqishlari hamda tegishli tashkilotlar tomonidan taqdim etilgan hujjatlarning asosiy mazmuni;

intizomiy ish yuritishni koʻrib chiqish natijalari boʻyicha ovoz berish yakunlari;

malaka komissiyasi aʼzolari tomonidan bildirilgan fikrlar;

komissiya majlisining kun tartibiga kiritilgan har bir masala boʻyicha qarorlar;

komissiya qarorlari ustidan shikoyat qilish tartibi;

qaror qabul qilish uchun zarur boʻlgan boshqa maʼlumotlar aks ettiriladi.

Imtihon varaqalari, baholash byulletenlari, komissiya aʼzolari roʻyxati hamda yigʻma baholash byulleteni majlis bayonnomasiga ilova qilinadi.

16. Malaka komissiyasi majlisi bayonnomasining nusxalari bir haftalik muddatda Oliy malaka komissiyasiga va tegishli adliya organiga yuboriladi.

17. Malaka komissiyasi majlisining bayonnomasidan koʻchirmalar qaror qabul qilingan kundan eʼtiboran uch kundan kechiktirmay masʼul kotib imzosi bilan manfaatdor shaxslarga yuboriladi yoki tilxat olingan holda topshiriladi. Malaka komissiyasi majlisining bayonnomasidan koʻchirmalar hududiy boshqarmaning muhri bilan tasdiqlanadi.

Malaka komissiyasi majlisi bayonnomasidan koʻchirmalarda komissiya majlisi oʻtkazilgan sana va joy toʻgʻrisidagi maʼlumotlar, komissiya majlisining kun tartibiga kiritilgan qismidagi, tegishli manfaatdor shaxslarga taalluqli boʻlgan masala boʻyicha qaror va ushbu qaror ustidan shikoyat qilish tartibi bayon etiladi.

IV. Malaka imtihonini topshirish uchun zarur boʻlgan hujjatlar

18. Talabgor malaka imtihonini topshirish uchun doimiy yashash joyidagi hududiy boshqarmaga quyidagi hujjatlarni taqdim etadi:

malaka imtihonini topshirish toʻgʻrisidagi ariza;

Oʻzbekiston Respublikasi fuqarosi pasportining nusxasi;

oliy yuridik maʼlumot toʻgʻrisidagi diplom (nusxasi olinib, asli qaytariladi);

mehnat daftarchasi (nusxasi olinib, asli qaytariladi) yoki uning ish joyida tasdiqlangan nusxasi;

talabgor toʻgʻrisidagi maʼlumotlardan iborat boʻlgan shaxsiy varaqa;

talabgor stajirovka oʻtagan advokatlik tuzilmasi tomonidan berilgan tavsifnoma;

3 x 4 sm hajmdagi (soʻnggi 12 oy ichida olingan) 2 dona rangli fotosurat;

talabgorning sudlanganligi yoki sudlanmaganligi hamda muomalaga layoqatliligi toʻgʻrisida maʼlumot.

181. Malaka imtihonini topshirish uchun zarur boʻlgan hujjatlar talabgor tomonidan hududiy boshqarmaga bevosita, pochta aloqa vositasi orqali yoki ularning olingani toʻgʻrisidagi bildirishnoma bilan elektron shaklda taqdim etiladi.

19. Talabgor tomonidan malaka imtihonini topshirish uchun taqdim etilayotgan hujjatlar roʻyxat boʻyicha bevosita, pochta aloqasi vositasi orqali yoki elektron shaklda masʼul kotib tomonidan qabul qilinadi, roʻyxat nusxasi hujjatlar qabul qilib olingan sana toʻgʻrisida belgi qoʻyilgan holda talabgorga yuboriladi (topshiriladi).

21. Malaka imtihonini topshirish uchun materiallarni tayyorlab boʻlganidan keyin masʼul kotib ularni malaka komissiyasining raisiga masalani komissiya majlisining kun tartibiga kiritish uchun taqdim etadi.

22. Masʼul kotib tomonidan talabgor taqdim etgan hujjatlar oʻrganib chiqilgandan keyin ular talabgorga quyidagi hollarda qaytarib berilishi mumkin:

talabgor malaka imtihonini topshira olmagan kundan eʼtiboran olti oy oʻtmasdan takroran malaka imtihonini topshirish uchun murojaat qilsa;

hujjatlarning toʻliq roʻyxatini topshirmasa yoki ularni lozim tarzda rasmiylashtirmay taqdim etsa;

advokatlik tuzilmasida kamida uch oylik stajirovkadan oʻtmagan boʻlsa, stajirovka oʻtashdan ozod qilingan shaxslar bundan mustasno;

talabgor taqdim etgan hujjatlarda notoʻgʻri yoki buzib koʻrsatilgan maʼlumotlar mavjud boʻlsa;

agar litsenziyasining amal qilishi tugatilgan shaxsning Oʻzbekiston Respublikasining “Advokatura toʻgʻrisida”gi Qonuniga (bundan keyingi oʻrinlarda Qonun deb yuritiladi) muvofiq talabgor boʻlishga haqli boʻlmagan uch yillik muddat oʻtmagan boʻlsa;

talabgor belgilangan tartibda muomalaga layoqatsiz yoki muomala layoqati cheklangan deb topilgan, shuningdek, uning sudlanganlik holati tugallanmagan yoki sudlanganligi olib tashlanmagan boʻlsa;

agar talabgor oʻz hujjatlarini qaytarib berish toʻgʻrisida ariza bilan murojaat etsa.

23. Hujjatlar talabgorga sabablarini koʻrsatgan holda masʼul kotib tomonidan qaytarib beriladi. Hujjatlar qaytarib berishning barcha sabablari bartaraf etilgandan keyin takroran taqdim etilishi mumkin.

V. Talabgorlardan malaka imtihoni qabul qilish

24. Malaka imtihoni masʼul kotib tomonidan talabgorlardan zarur hujjatlar qabul qilib olingan kundan eʼtiboran bir oy ichida oʻtkaziladi.

Talabgor malaka komissiyasi majlisining oʻtkazilishidan kamida oʻn kun oldin majlis oʻtkaziladigan sana, vaqt va joy toʻgʻrisida xabardor qilinadi.

25. Talabgor malaka komissiyasining majlisiga uzrli sabablarga koʻra hozir boʻlmasa, komissiya talabgor malaka imtihonini komissiyaning keyingi majlisida topshirishi toʻgʻrisida qaror qabul qiladi, majlis oʻtkaziladigan sana, vaqt va joy haqida qoʻshimcha ravishda maʼlum qilinadi.

Talabgor malaka komissiyasining majlisida hozir boʻlmagan boshqa barcha hollarda u tomonidan taqdim etilgan hujjatlar hududiy boshqarmada koʻpi bilan bir oy saqlanadi. Ushbu muddat oʻtgandan keyin masʼul kotib koʻrsatilgan hujjatlarni talabgorlarga qaytarib beradi.

26. Malaka imtihoni barcha talabgorlar uchun bitta xonada, ogʻzaki va yozma shakllarda oʻtkaziladi.

Malaka imtihoni oʻtkazilayotgan xonada begona shaxslarning boʻlishiga yoʻl qoʻyilmaydi.

Malaka imtihoni jarayoni Internet tarmogʻida real vaqt rejimida videotranslyatsiya qilinadi.

27. Talabgorlarga mazkur Nizomning 1-ilovasiga muvofiq shaklda imtihon varaqalari beriladi.

Har bir imtihon varaqasi malaka komissiyasi majlisida ishtirok etayotgan barcha komissiya aʼzolari tomonidan imzolangan boʻlishi shart. Imtihon varaqasining birinchi beti hududiy boshqarmaning muhri bilan tasdiqlanadi.

Malaka komissiyasi aʼzolarining har biriga talabgorlarni baholash uchun mazkur Nizomning 2-ilovasiga muvofiq shaklda bittadan baholash byulleteni beriladi. Baholash byulletenlari hududiy boshqarmaning muhri bilan tasdiqlangan boʻlishi hamda malaka komissiyasi aʼzolariga mazkur Nizomning 3-ilovasiga muvofiq shaklda imzo qoʻydirilgan holda tarqatilishi lozim.

28. Talabgorning imtihon biletidagi savollarga javoblar tayyorlashi uchun koʻpi bilan bir soat vaqt beriladi.

29. Malaka imtihoni Oʻzbekiston Respublikasi Advokatlar palatasi tasdiqlagan roʻyxatdagi savollardan tuzilgan imtihon biletlari asosida oʻtkaziladi.

Imtihon biletlarida koʻpi bilan beshta, shu jumladan, huquqni amaliy qoʻllanilishi sohasiga, ulardan kamida yarmi huquqning turli tarmoqlari nazariyasiga oid savollarni oʻz ichiga olishi kerak.

Imtihon biletidagi savollarga talabgorning javoblari imtihon varaqlarida aks ettiriladi.

30. Imtihon biletidagi savollarga javoblar tayyorlashda talabgorga:

boshqa talabgorlar bilan suhbatlashish;

axborot manbai sifatida xizmat qilishi mumkin boʻlgan qonunchilik hujjatlaridan, adabiyotlardan, har qanday turdagi texnika vositalari yoki boshqa hujjatlar va vositalardan foydalanish;

imtihon biletini topshirmasdan oldin, xonadan chiqish taqiqlanadi.

31. Talabgor oʻzining imtihon biletidagi savollarga ogʻzaki javob beradi. Malaka komissiyasining aʼzolari imtihon biletidagi savollarga aniqlik kiritish maqsadida talabgorga qoʻshimcha savollar berishi mumkin.

311. Malaka komissiyasi aʼzolari baholash byulletenida talabgorning bergan javoblarini oʻn ballik tizimda baholaydi.

32. Talabgor imtihon varagʻini topshirganidan keyin malaka imtihoni oʻtkazilgan xonani tark etishi kerak.

33. Imtihon varagʻi malaka komissiyasi majlisining bayonnomasiga ilova qilinadi.

331. Baholash byulletenida ballarni hisoblab chiqish uchun malaka komissiyasi aʼzolari orasidan 3 kishidan iborat hisoblash guruhi tuziladi.

Hisoblash guruhi tomonidan baholash byulletenlaridagi ballar hisoblab chiqiladi. Hisoblash natijalari mazkur Nizomning 4-ilovasiga muvofiq shakldagi yigʻma baholash byulleteniga kiritiladi va malaka komissiyasi aʼzolariga eʼlon qilinadi.

332. Talabgorni malaka imtihonini topshirgan deb topish uchun talabgor toʻplagan ball malaka imtihonida olinishi mumkin boʻlgan eng yuqori ballning 60 foizidan kam boʻlmasligi lozim.

34. Malaka imtihonini topshirish natijalari boʻyicha malaka komissiyasi quyidagi qarorlarning birini qabul qiladi:

talabgorni malaka imtihonini topshirgan deb topish toʻgʻrisida;

talabgorni malaka imtihonini topshirmagan deb topish toʻgʻrisida.

35. Malaka imtihonini topshira olmagan talabgorning yozma shakldagi talabiga binoan u malaka komissiyasi majlisining bayonnomasidan koʻchirma olgan kundan eʼtiboran bir oy ichida hududiy boshqarmaga u tomonidan malaka imtihonini topshirish uchun taqdim etilgan hujjatlar qaytarib berilishi mumkin, ariza bundan mustasno.

36. Talabgor tomonidan talab qilib olinmagan hujjatlar malaka komissiyasi qaror qabul qilgan kundan eʼtiboran uch yil davomida hududiy boshqarma arxivida saqlanadi. Ushbu muddat oʻtganidan keyin hujjatlar belgilangan tartibda yoʻq qilib yuborilishi lozim.

V1. Advokat maqomini toʻxtatib turish va tiklash

361. Advokat maqomini toʻxtatib turish advokatlik guvohnomasi berilgan joydagi malaka komissiyasi qarori bilan quyidagi hollarda amalga oshiriladi:

advokat advokatlik faoliyati bilan birga olib borib boʻlmaydigan doimiy lavozimga saylanganda yoki tayinlanganda — ish davriga;

taʼlim muassasalariga, shu jumladan kadrlar malakasini oshirish va ularni qayta tayyorlash kurslariga oʻqishga kirganda — oʻqish davriga, biroq koʻpi bilan uch yilga;

homiladorlik va tugʻish, uch yoshgacha boʻlgan bolani parvarish qilish boʻyicha taʼtillar berilganda — taʼtil vaqtiga;

advokat yoki uning yaqin qarindoshi ogʻir kasalligi sababli vaqtincha mehnatga qobiliyatsizlik tufayli tibbiy xulosa taqdim etilganda — sogʻayguncha, biroq koʻpi bilan bir yilga;

advokat qonunchilik hujjatlarida belgilangan tartibda bedarak yoʻqolgan deb topilganda — bedarak yoʻqolgan deb topish haqidagi qaror sud tomonidan bekor qilinguniga qadar boʻlgan davrga;

advokat harbiy xizmatga chaqirilganda — harbiy xizmatni oʻtash davriga;

sud tomonidan advokatga nisbatan tibbiy yoʻsindagi majburlov choralarini qoʻllash toʻgʻrisida qaror qabul qilinganda, agar sudning mazkur qarori Qonunning 16-moddasiga muvofiq litsenziyaning amal qilishini tugatish uchun asos boʻlmasa, — tibbiy yoʻsindagi majburlov choralari sud tomonidan bekor qilinguniga qadar yoki oʻzgartirilguniga qadar boʻlgan davrga;

Qonunning 15-moddasiga muvofiq litsenziyaning amal qilishi toʻxtatib turilganda — litsenziyaning amal qilishi toʻxtatib turilgan davrga;

advokatlik tuzilmasi tugatilganda yoki advokat undan chiqqanida — advokat tomonidan uch oydan oshmaydigan muddatda amalga oshiriladigan boshqa advokatlik tuzilmasi tashkil etilguniga qadar yoxud mavjud advokatlik tuzilmalaridan biriga kirguniga qadar boʻlgan davrga.

Advokatda advokatlik faoliyati bilan bir oydan ortiq muddatga shugʻullanishdan ozod qilinishiga qonunchilik hujjatlarida nazarda tutilgan boshqa asoslar mavjud boʻlganda, advokatning maqomi uning arizasiga binoan bunday ozod qilinish muddatiga toʻxtatib turilishi mumkin.

Advokatlik maqomini toʻxtatib turish haqidagi qaror qabul qilingan kundan eʼtiboran advokat maqomi toʻxtatiladi.

Adliya organi uch kunlik muddat ichida malaka komissiyasi orqali advokatning guvohnomasini olib qoʻyadi, bundan advokat bedarak yoʻqolgan deb topilgan hol mustasno va Advokatlar palatasining tegishli hududiy boshqarmasiga advokat maqomi toʻxtatilganligi haqida xabar beradi. Advokat maqomining toʻxtatib turilishi advokatning Advokatlar palatasiga aʼzoligi toʻxtatib turilishiga sabab boʻladi.

Advokat maqomining toʻxtatib turilishi mazkur advokatga nisbatan qonunda nazarda tutilgan kafolatlarning amal qilishi toʻxtatilishiga olib keladi, Qonun 10-moddasining uchinchi va toʻrtinchi qismlarida hamda Oʻzbekiston Respublikasi “Advokatlik faoliyatining kafolatlari va advokatlarning ijtimoiy himoyasi toʻgʻrisida”gi Qonunining 6-moddasi toʻrtinchi va beshinchi qismlarida nazarda tutilgan kafolatlar bundan mustasno.

Shaxs advokat maqomini toʻxtatib turish uchun asos boʻlgan hollar tugatilganidan keyin uch oy ichida advokatlik faoliyatiga kirishishi kerak. Mazkur talabni bajarmaslik litsenziyaning amal qilishi Qonunning 16-moddasida belgilangan tartibda tugatilishiga sabab boʻladi.

362. Advokat maqomini mazkur Nizom 361-bandining ikkinchi — toʻrtinchi xatboshilarida koʻrsatilgan asoslar boʻyicha toʻxtatib turish advokatning yozma arizasi hamda advokat advokatlik faoliyati bilan birga olib borib boʻlmaydigan doimiy lavozimga saylangan yoki tayinlanganligi, taʼlim muassasalariga, shu jumladan kadrlar malakasini oshirish va ularni qayta tayyorlash kurslariga oʻqishga kirganligi, homiladorlik va tugʻish, uch yoshgacha boʻlgan bolani parvarish qilish boʻyicha taʼtillar berilganligini tasdiqlovchi hujjatlar asosida hollarda amalga oshiriladi.

Advokat maqomini mazkur Nizom 361-bandining beshinchi xatboshisida koʻrsatilgan asos boʻyicha toʻxtatib turish advokatning yozma arizasi, bunday ariza taqdim etishning imkoni boʻlmagan taqdirda, yaqin qarindoshlarining yozma arizasi yoki advokatlik tuzilmasining murojaati va tibbiy xulosa asosida amalga oshiriladi.

Advokat maqomini uning yaqin qarindoshi ogʻir kasalligi sababli toʻxtatib turishga yaqin qarindoshni parvarish qilish advokatlik faoliyatini amalga oshirishga toʻsqinlik qilgan taqdirda yoʻl qoʻyiladi.

Advokat maqomini mazkur Nizom 361-bandining oltinchi va sakkizinchi xatboshilarida koʻrsatilgan asoslar boʻyicha toʻxtatib turish tegishli ravishda sudning advokatni bedarak yoʻqolgan deb topish haqida hamda sudning advokatga nisbatan tibbiy yoʻsindagi majburlov choralarini qoʻllash toʻgʻrisida qonuniy kuchga kirgan qarorlariga koʻra advokatning yaqin qarindoshlari yozma arizasi yoki advokatlik tuzilmasining murojaati asosida amalga oshiriladi.

Advokat maqomini mazkur Nizom 361-bandining yettinchi xatboshisida koʻrsatilgan asos boʻyicha toʻxtatib turish advokatning yozma arizasi yoki advokatlik tuzilmasining murojaatiga koʻra tegishli mudofaa ishlari boʻlimi maʼlumotnomasi asosida amalga oshiriladi.

Advokat maqomini mazkur Nizom 361-bandining oʻninchi xatboshisida koʻrsatilgan asos boʻyicha toʻxtatib turish advokatlik tuzilmasining tugatilayotganligi yoki advokat undan chiqqanligi haqidagi yozma bildirishnomasi asosida amalga oshiriladi. Bunda, advokat maqomi advokat advokatlik tuzilmasi tugatilishi yoki undan chiqqanidan soʻng keyingi ish kunidan kechiktirmasdan boshqa mavjud advokatlik tuzilmasiga kirgan taqdirda toʻxtatilmaydi.

363. Advokat maqomini tiklash malaka komissiyasi qarori bilan advokat maqomini toʻxtatib turish uchun asos boʻlgan hollar tugatilganidan keyin amalga oshiriladi.

Advokat maqomi toʻxtatib turilgan shaxs mazkur Nizomning 361-bandi oʻn beshinchi xatboshisida koʻrsatilgan muddat oʻtishiga kamida oʻn kun qolganida tegishli malaka komissiyasiga advokat maqomini tiklash toʻgʻrisidagi ariza bilan murojaat qiladi. Arizaga advokat maqomini toʻxtatib turish uchun asos boʻlgan hollar tugatilganligini tasdiqlovchi tegishli hujjatlar ilova qilinadi.

Malaka komissiyasi koʻrsatilgan muddatda arizani koʻrib chiqadi va tegishli qaror qabul qiladi. Malaka komissiyasining advokat maqomini tiklash haqidagi qarori u qabul qilingan kunning ertasidan kechiktirmasdan adliya organiga yuboriladi.

VI. Advokatga nisbatan intizomiy ish yuritish

37. Intizomiy ish yuritishni qoʻzgʻatish uchun quyidagilar asos boʻladi:

advokatura toʻgʻrisidagi qonunchilik hujjatlarining, Advokatlarning kasb etikasi qoidalari, advokatlik sirining va advokat qasamyodining advokat tomonidan buzilishi hududiy boshqarma yoki adliya organi tomonidan aniqlanganligi;

advokatning noqonuniy xatti-harakatlari yuzasidan murojaatlar;

sudning advokatga nisbatan chiqargan xususiy ajrimi.

38. Mazkur Nizom 37-bandining ikkinchi xatboshisida nazarda tutilgan asoslarni Oʻzbekiston Respublikasi Advokatlar palatasi va uning hududiy boshqarmalari, shuningdek adliya organlari oʻz vakolatlari doirasida amalga oshirayotgan nazorat faoliyati jarayonida aniqlagan taqdirda, tegishli hududiy boshqarmaning yoki adliya organining rahbari malaka komissiyasiga vajlarni bayon etgan holda advokatga nisbatan intizomiy ish yuritishni qoʻzgʻatish masalasini koʻrib chiqish toʻgʻrisida murojaat qiladi. Murojaatda u bilan bogʻliq barcha hujjatlar va materiallar ilova qilinadi.

Hududiy boshqarma yoki adliya organiga kelib tushgan advokatning noqonuniy xatti-harakatlari yuzasidan murojaatlar, sudning advokatga nisbatan chiqargan xususiy ajrimi malaka komissiyasiga koʻrib chiqish uchun kiritiladi.

381. Hududiy boshqarma yoki adliya organiga kelib tushgan murojaatlarda koʻrsatilgan masalalarni hal etish malaka komissiyasi vakolati doirasiga kirmagan taqdirda, murojaatlar besh kunlik muddatdan kechiktirmay tegishli davlat organlariga, boshqa tashkilotlarga va mansabdor shaxslarga yuborilib, bu haqda murojaat etuvchiga yozma yoxud elektron shaklda xabar qilinadi.

Hududiy boshqarma yoki adliya idorasiga kelib tushgan murojaatda jinoyat toʻgʻrisidagi xabar mavjudligi haqida yetarli asoslar mavjud boʻlsa, tegishli hududiy boshqarma yoki adliya organi rahbari murojaat kelib tushgan kunning ertasidan kechiktirmay murojaatni tegishli huquqni muhofaza qiluvchi organga yuborishni taʼminlaydi va murojaat nusxasini malaka komissiyaga taqdim qiladi.

39. Intizomiy ish yuritishni qoʻzgʻatish masalasini koʻrib chiqish toʻgʻrisidagi va advokatning noqonuniy xatti-harakatlari yuzasidan murojaatlar hududiy boshqarma tomonidan roʻyxatga olinadi va barcha hujjatlar bilan birga masʼul kotibga topshiriladi. Masʼul kotib ularni qabul qilib olgan kunning ertasidan kechiktirmay advokatni bu haqida xabardor qiladi.

40. Masʼul kotib komissiya aʼzolari va manfaatdor shaxslarni komissiya majlisining oʻtkazilishidan kamida yetti kun oldin majlis oʻtkaziladigan sana, vaqt va joy toʻgʻrisida xabardor qiladi.

43. Advokat malaka komissiyasi majlisining oʻtkaziladigan sanasi, vaqti va joyi toʻgʻrisida belgilangan tartibda xabardor qilinganligiga qaramasdan malaka komissiyasining majlisiga kelmagan taqdirda, malaka komissiyasining qarori bilan murojaatni koʻrib chiqish keyingi majlisga qoldirilishi yoki uning ishtirokisiz koʻrib chiqilishi mumkin.

Advokatning noqonuniy harakatlari yuzasidan murojaatlarni koʻrib chiqish natijalari boʻyicha malaka komissiyasi intizomiy ish yuritishni qoʻzgʻatish yoki intizomiy ish yuritishni qoʻzgʻatishni rad qilish haqida qaror qabul qiladi.

Malaka komissiyasi intizomiy ish yuritishni qoʻzgʻatish haqida qaror qabul qilgan taqdirda intizomiy ish yuritish komissiyaning mazkur majlisida koʻrib chiqadi.

Agar intizomiy ish yuritishni koʻrib chiqishda malaka komissiyasi intizomiy ish yuritish bilan bogʻliq ayrim masalalarni oʻrganish talab qilinadi degan xulosaga kelsa, komissiya qarori bilan intizomiy ish yuritish qoʻzgʻatilib, oʻrganishni oʻtkazish hududiy boshqarmaga yuklatiladi.

Malaka komissiya tomonidan qoʻzgʻatilgan intizomiy ish yuritish boʻyicha oʻrganish Oʻzbekiston Respublikasi Advokatlar palatasi Boshqaruvi tomonidan belgilangan tartibda amalga oshiriladi.

Oʻrganish natijalari boʻyicha toʻplangan hujjatlar masʼul xodim tomonidan imzolangan va hududiy boshqarma boshligʻi tomonidan tasdiqlangan xulosa bilan malaka komissiyasiga taqdim etiladi.

Xulosada murojaatda keltirilgan vajlarni oʻrganishda aniqlangan holatlar va advokatura toʻgʻrisidagi qonunchilik hujjatlari, Advokatlarning kasb etikasi qoidalari, advokatlik siri va qasamyodi buzilishi holatlari batafsil yoritilishi lozim. Bunda advokatning javobgarligi va intizomiy taʼsir choralari qoʻllanilishiga oid taklif va izohlar bayon etilishiga yoʻl qoʻyilmaydi.

431. Masʼul kotib qaysi advokatga nisbatan intizomiy ish yuritish qoʻzgʻatilgan boʻlsa, oʻsha advokatni ish materiallari bilan tanishtirishi kerak.

Advokatga nisbatan intizomiy ish qoʻzgʻatilishiga asos boʻlgan murojaat muallifini intizomiy ish yuritish materiallari bilan tanishtirish va undan nusxa berish advokatlik siriga qatʼiy rioya etilgan holda amalga oshiriladi.

432. Oʻziga nisbatan intizomiy ish yuritish qoʻzgʻatilgan advokat:

intizomiy ish yuritish qoʻzgʻatilishiga asos boʻlgan barcha materiallar bilan tanishib chiqishga va oʻz hisobidan nusxa olishga;

intizomiy ish yuritish holatlari boʻyicha yozma shaklda tushuntirishlar berishga, qoʻshimcha maʼlumotlar taqdim etishga;

malaka komissiyasiga holat yuzasidan aniqlik kiritish uchun zarur boʻlgan maʼlumotga ega boʻlgan shaxslarni komissiya yigʻilishiga taklif qilish va tushuntirishlarini eshitish toʻgʻrisida iltimosnoma kiritishga;

malaka komissiyasi yoki Oliy malaka komissiyasi qaror qabul qilguniga qadar (agar bu uning koʻrib chiqish predmeti boʻlsa), intizomiy ish qoʻzgʻatilishiga sabab boʻlgan shikoyatni bergan shaxs bilan yarashuv choralarini koʻrishga;

intizomiy ish yuritish jarayonida advokat xizmatidan foydalanishga haqli.

Advokatga nisbatan intizomiy ish yuritish qoʻzgʻatish uchun asos boʻlgan murojaat muallifi:

ushbu Nizomning 431-bandida nazarda tutilgan talablarga rioya qilgan holda intizomiy ish yuritish qoʻzgʻatilishiga asos boʻlgan barcha materiallar bilan tanishib chiqishga va oʻz hisobidan nusxa olishga;

intizomiy ish yuritish holatlari boʻyicha yozma shaklda tushuntirishlar berishga, qoʻshimcha maʼlumotlar taqdim etishga;

malaka komissiyasiga holat yuzasidan aniqlik kiritish uchun zarur boʻlgan maʼlumotga ega boʻlgan shaxslarni komissiya yigʻilishiga taklif qilish va tushuntirishlarini eshitish toʻgʻrisida iltimosnoma kiritishga;

intizomiy ish yuritish jarayonida advokat xizmatidan foydalanishga haqli.

433. Malaka komissiyasi tomonidan advokat advokatura toʻgʻrisidagi qonunchilik hujjatlari talablari, Advokatning kasb etikasi qoidalari, advokatlik siri va advokat qasamyodi muntazam ravishda yoki bir marta qoʻpol ravishda buzgan, advokatning shaʼni va qadr-qimmatiga dogʻ tushiradigan hamda advokaturaning obroʻsini tushiradigan qilmish sodir etgan deb topilgan taqdirda, yarashuv qabul qilinmasdan, intizomiy ish yuritish mazmunan koʻrib chiqiladi.

434. Advokatning noqonuniy xatti-harakatlari yuzasidan murojaatlarni koʻrib chiqishda, shuningdek intizomiy ish yuritish jarayonida quyidagi holatlar aniqlangan taqdirda, intizomiy ish yuritishni qoʻzgʻatish rad etiladi, qoʻzgʻatilgan intizomiy ish yuritish tugatiladi:

koʻrib chiqilayotgan yoki intizomiy ish yuritishni qoʻzgʻatish uchun asos boʻlgan murojaat anonim ekanligi yoki unda koʻrsatilgan muallif haqidagi maʼlumotlar haqiqatga toʻgʻri kelmasligi;

koʻrib chiqilayotgan holat yuzasidan advokatni intizomiy javobgarlikka tortish muddati oʻtib ketganligi;

aynan shu advokatga nisbatan aynan shu holatlar boʻyicha muqaddam tegishli qaror qabul qilinganligi;

koʻrib chiqilayotgan holat advokatlik faoliyatiga taalluqli emasligi;

murojaatda koʻrsatilgan advokat advokatlar va advokatlik tuzilmalari reyestrida mavjud emasligi.

44. Intizomiy ish yuritishni qoʻzgʻatish masalasini koʻrib chiqish yoki intizomiy ish yuritish jarayonida koʻrib chiqilayotgan murojaatda jinoyat toʻgʻrisidagi xabar mavjudligi aniqlansa, malaka komissiya qarori bilan intizomiy ish yuritishni toʻxtatadi va materiallarni tegishli huquqni muhofaza qiluvchi organga yuboradi, natijasi boʻyicha maʼlumot olish choralarini koʻradi.

Huquqni muhofaza qiluvchi organ tomonidan advokatga nisbatan jinoyat ishi qoʻzgʻatish rad etilgan taqdirda intizomiy ish yuritish tiklanadi va umumiy tartibda koʻrib chiqiladi.

45. Malaka komissiyasi tomonidan advokatga nisbatan intizomiy jazo choralari qoʻllash toʻgʻrisida qaror qabul qilinishida, sodir etilgan huquqbuzarlikning ogʻirligi, uning sodir etilgan holatlari, advokatning oldingi faoliyati va xulq-atvori eʼtiborga olinadi.

46. Advokatga nisbatan intizomiy ish yuritishni koʻrib chiqish natijalari boʻyicha malaka komissiyasi quyidagi qarorlardan birini qabul qiladi:

ogohlantirish toʻgʻrisida;

litsenziyaning amal qilishini olti oygacha muddatga toʻxtatib turish toʻgʻrisida maʼmuriy sudga murojaat qilish haqida;

litsenziyaning amal qilishini tugatish masalasini koʻrib chiqish toʻgʻrisida Oliy malaka komissiyasiga murojaat qilish haqida;

qoʻshimcha oʻrganishni hududiy boshqarmaga yuklash haqida;

intizomiy jazo choralari qoʻllashni rad etish va intizomiy ish yuritishni tugatish toʻgʻrisida.

461. Advokatga nisbatan intizomiy jazo nojoʻya xatti-harakat sodir etilgan kundan eʼtiboran olti oy oʻtganidan keyin, moliya-xoʻjalik faoliyatini taftish etish yoki tekshirish natijalari boʻyicha esa, advokat tomonidan nojoʻya xatti-harakat sodir etilgan kundan eʼtiboran ikki yil oʻtganidan keyin qoʻllanilishi mumkin emas.

47. Malaka komissiyasining litsenziyaning amal qilishini toʻxtatib turish toʻgʻrisida maʼmuriy sudga murojaat qilish haqidagi qarori, u qabul qilingan kundan eʼtiboran uch kundan kechiktirmay hududiy boshqarma tomonidan tegishli adliya organiga yozma shaklda yuboriladi.

Adliya organi mazkur qaror kelib tushgan kundan yetti kun ichida litsenziyaning amal qilishini toʻxtatib turish toʻgʻrisida tegishli maʼmuriy sudga murojaat qiladi.

Malaka komissiyasining litsenziyaning amal qilishini tugatish masalasini koʻrib chiqish toʻgʻrisida Oliy malaka komissiyasiga murojaat qilish haqidagi qarori, u qabul qilingan kundan eʼtiboran uch kundan kechiktirmay qaror bilan bogʻliq barcha hujjatlar va materiallarni ilova qilgan holda Oliy malaka komissiyasiga yuboriladi va bu haqida manfaatdor shaxslar yozma tartibda xabardor qilinadi.

48. Intizomiy jazo choralari qoʻllashni rad etish va intizomiy ish yuritishni tugatish toʻgʻrisidagi qaror malaka komissiyasi tomonidan, agar intizomiy ish yuritishni koʻrib chiqish vaqtida u advokatga nisbatan intizomiy ish yuritishni koʻrib chiqish toʻgʻrisidagi taqdimnomada bayon etilgan vajlar tasdiqlanmadi, degan xulosaga kelsa, shuningdek, qilmishning kam ahamiyatliligi va advokatning intizomiy ish qoʻzgʻatilishiga sabab boʻlgan shikoyatni bergan shaxs bilan yarashuvga erishganligi munosabati bilan qabul qilinadi.

VII. Talabgordan advokatlik qasamyodini qabul qilish

49. Oʻzbekiston Respublikasi “Advokatura toʻgʻrisida”gi Qonunining 31-moddasiga muvofiq, belgilangan tartibda litsenziya olgan talabgor uch oy ichida advokat qasamyodini qabul qilishi va yakka tartibda yoki litsenziyaga ega boʻlgan boshqa shaxslar bilan birgalikda advokatlik tuzilmasini tuzishi yoki faoliyat koʻrsatayotgan advokatlik tuzilmalarining biriga kirishi shart.

50. Talabgor advokat qasamyodini qabul qilish uchun litsenziya berilgan joydagi malaka komissiyasiga tegishli ariza bilan murojaat etadi, unga litsenziyaning nusxasi ilova qilinadi.

51. Talabgor malaka komissiyasi majlisining oʻtkazilishidan kamida yetti kun oldin majlis oʻtkaziladigan sana, vaqt va joy toʻgʻrisida xabardor qilinadi.

52. Talabgor tegishli malaka komissiyasining majlisida quyidagi mazmunda qasamyod qabul qiladi:

“Oʻz kasbiy burchimni halol va vijdonan bajarishga, inson huquqlari va erkinliklarini hamisha himoya qilishga, advokatlik sirini saqlashga, Oʻzbekiston Respublikasining Konstitutsiyasi va qonunlariga qatʼiy rioya etishga tantanali qasamyod qilaman”.

53. Talabgor advokat qasamyodi matnini ovoz chiqarib oʻqiydi va talabgor toʻgʻrisidagi maʼlumotlar, litsenziya berilgan sana va uning raqami, qasamyod qabul qilingan sana va joy bayon etilgan tegishli hujjatni imzolaydi.

Mazkur hujjat malaka komissiyasi majlisining bayonnomasiga ilova qilinadi.

54. Talabgor advokat qasamyodini qabul qilganligi natijalari boʻyicha malaka komissiyasi talabgor tomonidan advokat qasamyodi qabul qilinganligini tasdiqlash toʻgʻrisida qaror qabul qiladi.

VIII. Yakunlovchi qoidalar

55. Manfaatdor shaxslar tomonidan malaka komissiyalarining qarorlari ustidan malaka komissiyasi majlisining bayonnomasidan koʻchirma olingan kundan eʼtiboran bir oy ichida Oliy malaka komissiyasiga shikoyat berilishi mumkin, litsenziyaning amal qilishini toʻxtatib turish va tugatish bilan bogʻliq malaka komissiyasi qarorlari bundan mustasno.

Shikoyat Oliy malaka komissiyasi nomiga yoziladi va Advokatlar palatasiga bevosita yoki tegishli hududiy boshqarmalar orqali yuboriladi.

Malaka komissiyasining qarori ustidan shikoyat hududiy boshqarma orqali berilgan holda, hududiy boshqarma uch kun ichida shikoyatni u bilan bogʻliq barcha hujjatlar va materiallarni ilova qilgan holda Oliy malaka komissiyasiga yuborishi shart.

56. Malaka komissiyalarining qarorlari ustidan sudga shikoyat qilinishi mumkin.

57. Mazkur Nizomni buzilishida aybdor boʻlgan shaxslar qonunchilik hujjatlariga muvofiq javobgarlikka tortiladilar.

58. Mazkur Nizom Oʻzbekiston Respublikasi Advokatlar palatasi bilan kelishilgan.

Advokatlar palatasining raisi T. SAYIDOV

Toshkent sh.,

2009-yil 14-mart

Oʻzbekiston Respublikasi Advokatlar palatasining hududiy boshqarmalari huzuridagi malaka komissiyalari toʻgʻrisidagi nizomga 1-ILOVA

Oʻzbekiston Respublikasi Advokatlar palatasining hududiy boshqarmalari huzuridagi malaka komissiyalari toʻgʻrisidagi nizomga 2-ILOVA

Oʻzbekiston Respublikasi Advokatlar palatasining hududiy boshqarmalari huzuridagi malaka komissiyalari toʻgʻrisidagi nizomga 3-ILOVA

Oʻzbekiston Respublikasi Advokatlar palatasining hududiy boshqarmalari huzuridagi malaka komissiyalari toʻgʻrisidagi nizomga 4-ILOVA

(1 ― 4-ilovalar Oʻzbekiston Respublikasi adliya vazirining 2019-yil 9-yanvardagi 11-mh-sonli buyrugʻiga (roʻyxat raqami 1921-3, 09.01.2019-y.) asosan kiritilgan — Qonun hujjatlari maʼlumotlari milliy bazasi, 09.01.2019-y., 10/19/1921-3/2447-son)