Advokatlik guvohnomasini berishning vaqtinchalik tartibi toʻgʻrisida (1888-son)

20.01.2009

OʻZBEKISTON RESPUBLIKASI ADLIYA VAZIRINING

buyrugʻi

[Oʻzbekiston Respublikasi Adliya vazirligi tomonidan 2009-yil 20-yanvarda roʻyxatdan oʻtkazildi, roʻyxat raqami 1888]

“Advokatura instituti takomillashtirilishi munosabati bilan Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida”gi Oʻzbekiston Respublikasining 2008-yil 31-dekabrdagi OʻRQ-198-son Qonuni (Oʻzbekiston Respublikasi qonun hujjatlari toʻplami, 2008-y., 52-son, 514-modda) (bundan buyon matnda Qonun deb yuritiladi) talablarini taʼminlash maqsadida buyuraman:

1. Qonunning 7-moddasiga asosan 2009-yil 1-yanvar holatiga faoliyat koʻrsatayotgan advokatlik byurolari, hayʼatlari va firmalari, shuningdek ularda ishlayotgan advokatlar advokatlik byurolari, hayʼatlari va firmalarining tashkiliy-huquqiy shakllarini, litsenziyalarini hamda advokat maqomlarini 2009-yil 1-iyulga qadar Qonunga muvofiqlashtirishi shartligi maʼlumot uchun qabul qilinsin.

Advokat maqomini Qonunga muvofiqlashtirish Oʻzbekiston Respublikasi Adliya vazirligi tomonidan belgilangan tartibda tasdiqlanadigan advokatlik guvohnomasining yangi namunasi bilan tasdiqlanadi.

2. Belgilab qoʻyilsinki, advokatlarga tegishli advokatlik byurolari, hayʼatlari va firmalari tomonidan muqaddam berilgan guvohnomalar adliya organlari tomonidan ularga yangi namunadagi advokatlik guvohnomasi berilgunga qadar amalda boʻladi.

3. Advokatlarga tegishli advokatlik byurolari, hayʼatlari va firmalari tomonidan muqaddam berilgan va amal qilish muddati 2008-yil 31-dekabrdan keyin tugagan guvohnomalarning muddati yangi namunadagi advokatlik guvohnomasi berilgunga qadar uzaytirilgan deb hisoblansin.

4. Mazkur buyruq davlat roʻyxatidan oʻtkazilsin hamda Oʻzbekiston Respublikasi vazirliklari, davlat qoʻmitalari va idoralari normativ-huquqiy hujjatlarining Davlat reyestriga tegishli yozuv kiritilsin.

5. Qonun hujjatlarini turkumlash va huquqiy axborot boshqarmasi (A. Inanbabayev) va Notariat, FHDY va advokatura boshqarmasi (D. Yakubova) ushbu normativ-huquqiy hujjatni 10 kun muddat ichida barcha manfaatdor shaxslarga yetkazilishini va “Oʻzbekiston Respublikasi qonun hujjatlari toʻplami” — “Sobraniye zakonodatelstva Respubliki Uzbekistan”da nashr etilishini taʼminlasin.

6. Mazkur buyruq davlat roʻyxatidan oʻtkazilgan kundan boshlab oʻn kundan keyin kuchga kiradi va 2009-yilning 1-iyuliga qadar amal qiladi.

7. Ushbu buyruqning ijrosini nazorat qilish vazir oʻrinbosari E. Kanyazov zimmasiga yuklatilsin.

Adliya vaziri R. MUHITDINOV

Toshkent sh.,

2009-yil 20-yanvar,

13-mh-son