Oitsga qarshi kurash markazlarining tashkiliy tuzilmasini va faoliyatini takomillashtirish chora-tadbirlari toʻgʻrisida (1-son)

05.01.2009

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Oʻzbekiston Respublikasida OIV infeksiyasi tarqalishiga qarshi kurash samaradorligini oshirishga doir qoʻshimcha chora-tadbirlar toʻgʻrisida” 2008-yil 26-dekabrdagi PQ-1023-son qarorini bajarish yuzasidan Vazirlar Mahkamasi qaror qiladi:

1. Quyidagilar:

Respublika OITSga qarshi kurash markazi tuzilmasi va mintaqaviy markazlarning namunaviy tuzilmasi 1 va 2-ilovalarga muvofiq;

OITSga qarshi kurash markazlari toʻgʻrisidagi nizom 3-ilovaga muvofiq;

2009 — 2011-yillarda Oʻzbekiston Respublikasida OIV infeksiyasi tarqalishi profilaktikasi boʻyicha saʼy-harakatlar milliy rejasi 4-ilovaga muvofiq tasdiqlansin.

2. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, vazirliklar va idoralar 2009 — 2011-yillarda Oʻzbekiston Respublikasida OIV infeksiyasi tarqalishi profilaktikasi boʻyicha saʼy-harakatlar milliy rejasini bajarish uchun qabul qilsinlar va uning oʻz vaqtida bajarilishini taʼminlasinlar.

Belgilansinki, vazirliklar, idoralar va boshqa tashkilotlar har chorakda Respublika favqulodda epidemiyaga qarshi kurashish komissiyasi majlisiga 2009 — 2011-yillarda Oʻzbekiston Respublikasida OIV infeksiyasi tarqalishi profilaktikasi boʻyicha saʼy-harakatlar milliy rejasiga kiritilgan tadbirlarning bajarilishi toʻgʻrisida hisobotlar taqdim etadilar.

3. Oʻzbekiston Respublikasi Sogʻliqni saqlash vazirligi manfaatdor vazirliklar va idoralar, shuningdek Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda:

2009-2010-yillar mobaynida budjet mablagʻlari va budjetdan tashqari mablagʻlar, xalqaro tashkilotlarning grantlari va qarzlarini jalb etish hisobiga OITSga qarshi kurash Respublika va mintaqaviy markazlarining zamonaviy davolash-diagnostika asbob-uskunalari bilan qoʻshimcha ravishda jihozlanishini va taʼmirlash-rekonstruksiya qilish ishlari amalga oshirilishini;

OITSga qarshi kurash markazlarining tayyorlangan va yuqori malakali mutaxassislar bilan butlanishini;

OIV infeksiyasiga qarshi kurash sohasida faoliyat olib borayotgan tibbiyot xodimlari va boshqa mutaxassislarning malakasi doimiy va muntazam ravishda oshirilishini nazarda tutadigan tizim yaratilishini taʼminlasin.

4. Oʻzbekiston Respublikasi Sogʻliqni saqlash vazirligi:

OITSga qarshi kurash markazlari faoliyati muvofiqlashtirilishini, shuningdek ular tomonidan diagnostika va davolashning yagona standartlariga rioya etish nazorat qilinishini, davolash-profilaktika muassasalari amaliyotiga ilgʻor xalqaro tajriba hisobga olingan holda zamonaviy tibbiyot texnologiyalari joriy etilishini;

OIV infeksiyasi profilaktikasi, davolash, bemorlarga qarash masalalarini integratsiyalashning sogʻliqni saqlash amaliyotiga, barcha davolash-profilaktika muassasalari faoliyatiga joriy etilishini taʼminlasin;

chet el tajribasini va aholi salomatligi saqlanishini hisobga olgan holda OIV infeksiyasini diagnostika qilish va davolashning Oʻzbekistonda qoʻllanayotgan metodlari samaradorligini baholash boʻyicha tadqiqotlarni amalga oshirsin.

5. Oʻzbekiston Respublikasi Hukumatining 5-ilovaga muvofiq ayrim qarorlari oʻz kuchini yoʻqotgan deb hisoblansin.

6. Oʻzbekiston Respublikasi Sogʻliqni saqlash vazirligi Adliya vazirligi va boshqa manfaatdor vazirliklar va idoralar bilan birgalikda bir oy muddatda qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Qosimov zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2009-yil 5-yanvar,

1-son

Vazirlar Mahkamasining 2009-yil 5-yanvardagi 1-son qaroriga 1-ILOVA

Respublika OITSga qarshi kurash markazi

TUZILMASI

Vazirlar Mahkamasining 2009-yil 5-yanvardagi 1-son qaroriga 2-ILOVA

OITSga qarshi kurash mintaqaviy markazlarining

NAMUNAVIY TUZILMASI

Izoh: shtatdagi xodimlar soni hudud aholisi soniga qarab oʻzgarib boradi (38 kishidan 126,5 kishigacha).

Vazirlar Mahkamasining 2009-yil 5-yanvardagi 1-son qaroriga 3-ILOVA

OITSga qarshi kurash markazlari toʻgʻrisida

NIZOM

I. Umumiy qoidalar

1. Ushbu Nizom Oʻzbekiston Respublikasi Sogʻliqni saqlash vazirligining Respublika OITSga qarshi kurash markazi, Qoraqalpogʻiston Respublikasi Sogʻliqni saqlash vazirligining OITSga qarshi kurash markazi, viloyatlar va Toshkent shahar sogʻliqni saqlash boshqarmalarining OITSga qarshi kurash markazlari (keyingi oʻrinlarda Markazlar deb ataladi) faoliyatini tashkil etish tartibini belgilaydi.

2. Markazlar alohida tipdagi davlat mustaqil ixtisoslashtirilgan yuqumli kasalliklar tibbiyot muassasalari hisoblanadi. Oʻzbekiston Respublikasi Sogʻliqni saqlash vazirligining Respublika OITSga qarshi kurash markazi tibbiyot xodimlari va boshqa mutaxassislarni qayta tayyorlash va ularning malakasini oshirish uchun klinik, oʻquv bazasi hisoblanadi.

3. Markazlar oʻz faoliyatida Oʻzbekiston Respublikasi qonunlariga, Oʻzbekiston Respublikasi Oliy Majlisi palatalarining qarorlariga va boshqa hujjatlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, boshqa qonunchilik hujjatlariga, ushbu Nizomga, shuningdek Oʻzbekiston Respublikasi Sogʻliqni saqlash vazirligining buyruqlari va farmoyishlariga amal qiladi.

4. Markazlar faoliyati OIV infeksiyasiga chalingan shaxslar profilaktikasi, diagnostikasi, ularni davolash, psixologik va ijtimoiy qoʻllab-quvvatlashning tengligi tamoyiliga asoslanadi.

5. Markazlar mustaqil balansga, banklarda hisob raqamlariga, oʻz nomi yozilgan gerbli muhrga, shuningdek faoliyatini amalga oshirish uchun zarur boʻlgan boshqa belgilarga ega boʻladi.

II. Markazlarning maqsad va vazifalari

6. Quyidagilar Markazlarni tashkil etish va ular faoliyatining maqsadlari hisoblanadi:

aholiga OIV/OITS diagnostikasi, uni davolash va uning profilaktikasi boʻyicha ixtisoslashtirilgan tibbiy xizmat koʻrsatish;

tibbiyot muassasalariga OIV infeksiyasi profilaktikasi, diagnostikasi va uni davolashning zamonaviy usullari joriy etilishini metodik taʼminlash.

7. Quyidagilar Oʻzbekiston Respublikasi Sogʻliqni saqlash vazirligining Respublika OITSga qarshi kurash markazining asosiy vazifalari hisoblanadi:

OITSga qarshi kurash mintaqaviy markazlari faoliyatiga tashkiliy-metodik rahbarlikni amalga oshirish;

OIV infeksiyasi va qoʻshimcha kasalliklar tarqalishining oldini olishga yoʻnaltirilgan profilaktik, epidemiyaga qarshi, diagnostika, davolash tadbirlarini amalga oshirish;

OIV infeksiyasi yuqishi intensivligiga taʼsir koʻrsatadigan omillarni aniqlash va ularning faolligini baholash boʻyicha maxsus epidemiologik tadqiqotlar oʻtkazish;

OIV infeksiyasiga chalingan shaxslarga ularning salomatligini va mehnatga layoqatini saqlash uchun zarur boʻlgan diagnostika va tibbiy yordam koʻrsatishni tashkil etish hamda amalga oshirish, shuningdek OIV/OITS va qoʻshimcha kasalliklar diagnostikasini amalga oshiruvchi muassasalarga tibbiy yordam koʻrsatish;

profilaktika, diagnostika va davolash tadbirlariga ajratilgan mablagʻlardan maqsadli va samarali foydalanilishini taʼminlash;

OIV/OITSni profilaktika, diagnostika qilish va davolashning Oʻzbekistonda qoʻllanayotgan metodlari samaradorligini fuqarolar salomatligini va millat genofondini muhofaza qilish nuqtai nazaridan tahlil qilish va baholash;

OIV/OITSni diagnostika, profilaktika qilish va davolashning inson salomatligi uchun xavfsiz metodlarini qoʻllanish boʻyicha xorijiy mamlakatlar tajribasini oʻrganish va tahlil qilish, maʼlumotlarining tegishli bazasini shakllantirish va yuritish;

OIV infeksiyasi tarqalishiga qarshi kurash olib borish masalalari boʻyicha tibbiyot xodimlari, boshqa mutaxassislarni qayta tayyorlash va ularning malakasini oshirishda qatnashish.

8. Qoraqalpogʻiston Respublikasi Sogʻliqni saqlash vazirligi, viloyatlar va Toshkent shahar sogʻliqni saqlash boshqarmalarining OITSga qarshi kurash markazlarining asosiy vazifalari:

OITSga qarshi kurash markazi faoliyat koʻrsatayotgan hududda OIV infeksiyasi va qoʻshimcha kasalliklar tarqalishining oldini olishga yoʻnaltirilgan profilaktika, epidemiyaga qarshi, diagnostika, davolash tadbirlari amalga oshirilishini muvofiqlashtirish;

OIV infeksiyasini laboratoriyada diagnostika qilishni tashkil etish va amalga oshirish, davolash-diagnostika tadbirlari ustidan klinik-laboratoriya kuzatuvini taʼminlash, shuningdek OIV infeksiyasi va qoʻshimcha kasalliklar diagnostikasini amalga oshiruvchi muassasalarga tibbiy yordam koʻrsatish;

OIV infeksiyasiga chalingan shaxslarga tibbiy yordam koʻrsatish, shu jumladan ularni dispanser koʻrigidan oʻtkazish, ularning hayot sifatini yaxshilash uchun zarur boʻlgan davolash tadbirlarini amalga oshirish;

joriy epidemiologik vaziyat monitoringini olib borish, OIV infeksiyasi yuqishi intensivligiga taʼsir koʻrsatadigan omillarni aniqlash va ularning faolligini baholash boʻyicha maxsus epidemiologik tadqiqotlar oʻtkazish;

profilaktika, diagnostika va davolash tadbirlariga ajratilgan mablagʻlardan maqsadli va samarali foydalanilishini taʼminlash;

aholi oʻrtasida rejali tushuntirish ishlarini olib borish.

III. Markazlarning huquq va majburiyatlari

9. Markazlar belgilangan maqsadlarga erishish va yuklangan vazifalarni bajarish uchun qonunchilikda belgilangan tartibda:

oʻz faoliyatini ushbu Nizomda va boshqa normativ-huquqiy hujjatlarda nazarda tutilgan vazifalar doirasida rejalashtirish va amalga oshirish;

xoʻjalik faoliyatini amalga oshirish jarayonida yaratilgan intellektual mulk obyektlariga mualliflik huquqlarini olish va ulardan foydalanish;

Oʻzbekiston Respublikasining qonunchiligiga va xalqaro shartnomalariga muvofiq yuridik shaxslar bilan ilmiy-texnik hamkorlikni amalga oshirish;

oʻz balansiga berilgan davlat mulkidan foydalanish va uni tasarruf etish;

qonunchilikka, Markazlarning maqsadi va vazifalariga zid boʻlmagan faoliyatning boshqa turlarini amalga oshirish huquqiga ega.

10. Markazlar:

profilaktik, epidemiyaga qarshi, diagnostika, davolash tadbirlarini va boshqa tadbirlarni tashkil etish va amalga oshirishga;

davolash-profilaktika muassasalarida OIV infeksiyasining yuqishini oldini olish boʻyicha tadbirlar amalga oshirilishi, shuningdek davolash-profilaktika muassasalarida amalga oshirilayotgan oʻz vaqtida diagnostika qilish va davolash tadbirlari sifatli amalga oshirilishi yuzasidan monitoring olib borishga;

OIV infeksiyasi boʻyicha vaziyatning rivojlanishi toʻgʻrisidagi maʼlumotlarning ishonchliligini va davlat organlari, yuqori tashkilotlar va nazorat organlarining oʻz vaqtida xabardor qilinishini taʼminlashga;

OIV infeksiyasi tarqalishining psixologik, ijtimoiy va boshqa oqibatlarini kamaytirish tadbirlarini amalga oshirishga;

Markazlarning xodimlari uchun qonunchilikda nazarda tutilgan mehnatni tashkil etish va mehnatga haq toʻlash shart-sharoitlarini, texnika xavfsizligini, ijtimoiy taʼminotni va aniq yoʻnaltirilgan ijtimoiy himoyani kafolatlashga;

Markazlarning moddiy-texnika bazasini mustahkamlashga va zamonaviy tibbiyot texnikasi va eng yangi texnologiyalar bilan rivojlantirishga;

Markazlarning mol-mulkidan aniq maqsadda foydalanilishini, ularning saqlanishini taʼminlashga;

qonunchilikka muvofiq buxgalteriya va statistika hisobi va hisobotini yuritishga majbur.

Oʻzbekiston Respublikasi Sogʻliqni saqlash vazirligining Respublika OITSga qarshi kurash markaziga qoʻshimcha ravishda quyidagilar boʻyicha majburiyatlar yuklanadi:

Oʻzbekiston Respublikasi Sogʻliqni saqlash vazirligi tomonidan tasdiqlangan klinik standartlarga muvofiq OIV infeksiyasiga chalingan bemorlarga yuqori malakali ixtisoslashtirilgan davolash-profilaktika va statsionar yordam koʻrsatish, shuningdek Qoraqalpogʻiston Respublikasi Sogʻliqni saqlash vazirligining OITSga qarshi kurash markaziga, viloyatlar va Toshkent shahar sogʻliqni saqlash boshqarmalarining OITSga qarshi kurash markazlariga maslahat yordami va tashkiliy-metodik yordam koʻrsatish;

OIV infeksiyasi masalalari boʻyicha tibbiyot xodimlari va boshqa mutaxassislarni qayta tayyorlash va ularning malakasini oshirish tadbirlarini muntazam tashkil etish.

IV. Markazlarning tuzilmasi va faoliyatini boshqarish

11. Oʻzbekiston Respublikasi Sogʻliqni saqlash vazirligining Respublika OITSga qarshi kurash markaziga Oʻzbekiston Respublikasi Sogʻliqni saqlash vaziri tomonidan lavozimga tayinlanadigan va lavozimdan ozod qilinadigan direktor rahbarlik qiladi.

12. Qoraqalpogʻiston Respublikasi Sogʻliqni saqlash vazirligining OITSga qarshi kurash markaziga, viloyatlar va Toshkent shahar sogʻliqni saqlash boshqarmalarining OITSga qarshi kurash markazlariga Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan kelishgan holda Oʻzbekiston Respublikasi Sogʻliqni saqlash vaziri tomonidan lavozimga tayinlanadigan va lavozimdan ozod qilinadigan bosh vrach rahbarlik qiladi.

13. Oʻzbekiston Respublikasi Sogʻliqni saqlash vazirligining Respublika OITSga qarshi kurash markazi direktorining Oʻzbekiston Respublikasi Sogʻliqni saqlash vazirligi bilan kelishgan holda Respublika markazi direktori tomonidan lavozimga tayinlanadigan va lavozimdan ozod qilinadigan ikki nafar oʻrinbosari boʻladi.

14. Qoraqalpogʻiston Respublikasi Sogʻliqni saqlash vazirligining OITSga qarshi kurash markazi bosh vrachining, viloyatlar va Toshkent shahar sogʻliqni saqlash boshqarmalarining OITSga qarshi kurash markazlari bosh vrachlarining Oʻzbekiston Respublikasi Sogʻliqni saqlash vazirligi bilan kelishgan holda tegishli ravishda Qoraqalpogʻiston Respublikasi Sogʻliqni saqlash vazirligi yoki hududiy sogʻliqni saqlash boshqarmasi tomonidan lavozimga tayinlanadigan va lavozimdan ozod qilinadigan ikki nafar oʻrinbosari boʻladi.

15. Oʻzbekiston Respublikasi Sogʻliqni saqlash vazirligining Respublika OITSga qarshi kurash markazi direktori va Qoraqalpogʻiston Respublikasi Sogʻliqni saqlash vazirligining OITSga qarshi kurash markazi bosh vrachi, viloyatlar va Toshkent shahar sogʻliqni saqlash boshqarmalarining OITSga qarshi kurash markazlari bosh vrachlari belgilangan tartibda Markazlarning faoliyatiga umumiy rahbarlik qiladilar, ishlarni tashkil qiladilar, Markazlar nomidan ishonchnomasiz ish koʻradilar, barcha tashkilotlarda ularning manfaatlarini ifodalaydilar, belgilangan tartibda Markazlarning mol-mulkini tasarruf qiladilar, shartnomalar, shu jumladan mehnat shartnomalari tuzadilar, ishonchnomalar beradilar, banklarda hisob raqamlari ochadilar, moliyaviy mablagʻlarni tasarruf etish huquqidan foydalanadilar, shtatlarni tasdiqlaydilar, buyruqlar chiqaradilar va Markazlarning faoliyati natijalari yuzasidan shaxsan javob beradilar.

16. Oʻzbekiston Respublikasi Sogʻliqni saqlash vazirligining Respublika OITSga qarshi kurash markazi direktori boʻlmagan vaqtda uning vazifalarini Oʻzbekiston Respublikasi Sogʻliqni saqlash vazirligi bilan kelishgan holda uning oʻrinbosarlaridan biri bajaradi.

17. Qoraqalpogʻiston Respublikasi Sogʻliqni saqlash vazirligining OITSga qarshi kurash markazi, viloyatlar va Toshkent shahar sogʻliqni saqlash boshqarmalarining OITSga qarshi kurash markazlari bosh vrachlari boʻlmagan vaqtda ularning vazifalarini tegishli ravishda Qoraqalpogʻiston Respublikasi Sogʻliqni saqlash vazirligi yoki hududiy sogʻliqni saqlash boshqarmasi bilan kelishgan holda ularning oʻrinbosarlaridan biri bajaradi.

V. Markazlarning moliya-xoʻjalik faoliyati

18. Markazlarning moliya-xoʻjalik faoliyati qonunchilikda belgilangan tartibda amalga oshiriladi.

19. Markazlar faoliyat maqsadlariga muvofiq, belgilangan tartibda oʻz mol-mulkiga egalik qiladilar, undan foydalanadilar va uni tasarruf etadilar, bunda budjet mablagʻlaridan va budjetdan tashqari mablagʻlardan samarali foydalanilishini taʼminlaydilar.

Asosiy fondlar, shuningdek boshqa moddiy boyliklar va moliyaviy resurslar Markazlarning mol-mulkini tashkil etadi.

20. Markazlar asbob-uskunalar va mol-mulkni qonunchilikda belgilangan tartibda balansdan chiqarish huquqiga egadirlar.

21. Davlat budjeti mablagʻlari, budjetdan tashqari mablagʻlar va qonunchilikda taqiqlanmagan boshqa manbalar Markazlar faoliyatini moliyalashtirish manbalari hisoblanadi.

VI. Hisob va hisobot

22. Markazlar qonunchilikda belgilangan tartibda buxgalteriya hisobi va hisobotini yuritadilar hamda ularni Oʻzbekiston Respublikasi Sogʻliqni saqlash vazirligiga ham taqdim etadilar, hujjatlarning saqlanishi va kelishilgan roʻyxatga muvofiq ularning davlat tomonidan saqlashga berilishi uchun javob beradilar.

23. Markazlarning moliya-xoʻjalik faoliyatini nazorat qilish va tekshirish sogʻliqni saqlash organlari, soliq va moliya organlari, davlat boshqa organlari tomonidan ularning vakolatlari doirasida, shuningdek qonunchilikda nazarda tutilgan tartibda auditorlik tashkilotlari bilan tuzilgan shartnomalar asosida auditorlik tashkilotlari tomonidan amalga oshiriladi.

VII. Yakunlovchi qoidalar

24. Markazlar davlat tasarrufidan chiqarilmaydi va xususiylashtirilmaydi.

25. Markazlarni qayta tashkil etish va tugatish qonunchilikda belgilangan tartibda amalga oshiriladi.

Vazirlar Mahkamasining 2009-yil 5-yanvardagi 1-son qaroriga 4-ILOVA

2009 — 2011-yillarda Oʻzbekiston Respublikasida OIV infeksiyasi tarqalishi profilaktikasi boʻyicha saʼy-harakatlar

MILLIY REJASI

Vazirlar Mahkamasining 2009-yil 5-yanvardagi 1-son qaroriga 5-ILOVA

Oʻzbekiston Respublikasi Hukumatining oʻz kuchini yoʻqotgan qarorlari roʻyxati

1. Oʻzbekiston Respublikasi Vazirlar Mahkamasining “Respublika favqulodda epidemiyaga qarshi kurashish komissiyasining OITS/OIV (orttirilgan immunitet tanqisligi sindromi/OIV kasalligi) epidemiyasi tarqalishiga qarshi kurashish strategik dasturini muvofiqlashtirish boʻyicha kichik komissiyasi toʻgʻrisida” 2003-yil 14-maydagi 214-son qarori.

2. Vazirlar Mahkamasining “Oʻzbekiston Respublikasi Bosh vazirining oʻrinbosari — Oliy va oʻrta maxsus taʼlim vaziri boshchilik qiladigan respublika komissiyalari va kengashlari tarkiblarini tasdiqlash toʻgʻrisida” 2004-yil 4-noyabrdagi 519-son qaroriga 8-ilova.