Ilmiy, ilmiy-tadqiqot muassasalari va tashkilotlarining moddiy-texnika bazasini mustahkamlash chora-tadbirlari toʻgʻrisida (241-son)

10.11.2008

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Innovatsion loyihalar va texnologiyalarni ishlab chiqarishga tatbiq etishni ragʻbatlantirish borasidagi qoʻshimcha chora-tadbirlar toʻgʻrisida” 2008-yil 15-iyuldagi PQ-916-son qarorini bajarish yuzasidan hamda ilmiy, ilmiy-tadqiqot muassasalari va tashkilotlarini ilmiy, texnologik va laboratoriya asbob-uskunalari bilan jihozlash (qoʻshimcha jihozlash) maqsadida Vazirlar Mahkamasi qaror qiladi:

1. Oʻzbekiston Respublikasi Fanlar akademiyasi, Qishloq va suv xoʻjaligi vazirligi, Sogʻliqni saqlash vazirligi, Oliy va oʻrta maxsus taʼlim vazirligi tomonidan ilmiy, ilmiy-tadqiqot muassasalari va tashkilotlarining mavjud moddiy-texnika bazasi kompleks xatlovdan oʻtkazilganligi maʼlumot uchun qabul qilinsin.

2. 2009—2012-yillarda Oʻzbekiston Respublikasi Fanlar akademiyasi, Qishloq va suv xoʻjaligi vazirligi, Sogʻliqni saqlash vazirligi, Oliy va oʻrta maxsus taʼlim vazirligining ilmiy, ilmiy-tadqiqot muassasalari va tashkilotlarini ilmiy, texnologik va laboratoriya asbob-uskunalari bilan jihozlash (qoʻshimcha jihozlash) dasturi (keyingi oʻrinlarda Dastur deb ataladi) ilovaga* muvofiq tasdiqlansin.

* Ilova rus tilidagi matnda berilgan.

3. Belgilab qoʻyilsinki, Oʻzbekiston Respublikasi Prezidentining 2008-yil 15-iyuldagi PQ-916-son qarorining 9-bandiga muvofiq Dastur doirasida Oʻzbekiston Respublikasiga olib kelinadigan asbob-uskunalar bojxona toʻlovlaridan (bojxonada rasmiylashtirish yigʻimlaridan tashqari) ozod qilinadi.

4. Oʻzbekiston Respublikasi Fanlar akademiyasi, Qishloq va suv xoʻjaligi vazirligi, Sogʻliqni saqlash vazirligi, Oliy va oʻrta maxsus taʼlim vazirligi:

ilmiy, texnologik va laboratoriya asbob-uskunalari xarid qilish uchun qonun hujjatlariga muvofiq tender komissiyalari tashkil etsinlar;

asbob-uskunalar xarid qilish uchun ajratilgan mablagʻlarning oʻz vaqtida oʻzlashtirilishini taʼminlasinlar;

xarid qilinadigan asbob-uskunalarning olib kelinishi va ulardan samarali foydalanilishi ustidan amaliy nazorat oʻrnatsinlar;

Dasturning bajarilishi toʻgʻrisida har yili keyingi yilning 15-yanvarigacha Oʻzbekiston Respublikasi Vazirlar Mahkamasiga axborot bersinlar.

5. Oʻzbekiston Respublikasi Moliya vazirligi Dastur parametrlariga muvofiq har yili ilmiy, texnologik va laboratoriya asbob-uskunalari xarid qilish uchun mablagʻlarni nazarda tutsin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S.Azimov va Oʻzbekiston Respublikasi Bosh vazirining oʻrinbosari R.S.Qosimov zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2008-yil 10-noyabr,

241-son