“Texnologiyalar transferi agentligi” davlat unitar korxonasi faoliyatini takomillashtirish toʻgʻrisida (228-son)

15.10.2008

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Innovatsion loyihalar va texnologiyalarni ishlab chiqarishga tatbiq etishni ragʻbatlantirish borasidagi qoʻshimcha chora-tadbirlar toʻgʻrisida” 2008-yil 15-iyuldagi PQ-916-son qarorini bajarish yuzasidan Vazirlar Mahkamasi qaror qiladi:

1. Oʻzbekiston Respublikasi Iqtisodiyot vazirligi, Davlat mulki qoʻmitasi hamda Vazirlar Mahkamasi huzuridagi Fan va texnologiyalarni rivojlantirishni muvofiqlashtirish qoʻmitasining “Texnologiyalar transferi agentligi” davlat unitar korxonasini (keyingi oʻrinlarda “Agentlik” deb ataladi) Oʻzbekiston Respublikasi Iqtisodiyot vazirligi tasarrufiga oʻtkazish toʻgʻrisidagi taklifi qabul qilinsin.

2. Quyidagilar Agentlikning asosiy vazifalari va faoliyati yoʻnalishlari etib belgilansin:

innovatsion loyihalarni ishlab chiqish va ularni ishlab chiqarishga joriy etish;

innovatsion texnologiyalarni, shu jumladan xorijiy innovatsion texnologiyalarni mustaqil ekspertizadan oʻtkazish, moslashtirish va mamlakatimiz amaliyotiga joriy etish;

ilmiy-texnik ishlanmalarni tijorat sotuvi obyekti sifatida ishlab chiqarishga joriy etish loyihalarini tuzish va amalga oshirish;

ilmiy-texnik ishlanmalar natijalarini tijoratlashtirish sohasida xalqaro ilmiy-texnik hamkorlikni amalga oshirish.

3. Belgilab qoʻyilsinki, Agentlik faoliyatini moliyalashtirish Agentlikning oʻz mablagʻlari va qonun hujjatlariga zid boʻlmagan boshqa manbalar hisobiga amalga oshiriladi.

4. Oʻzbekiston Respublikasi Iqtisodiyot vazirligi bir oy muddatda Agentlik ustavi belgilangan tartibda qayta koʻrib chiqilishini taʼminlasin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2008-yil 15-oktabr,

228-son