Bolalarning sanʼat va madaniyat sohasidagi qobiliyat hamda iqtidorini barvaqt aniqlash, rivojlantirish bilan shugʻullanadigan nodavlat tashkilotlarni ragʻbatlantirish chora-tadbirlari toʻgʻrisida (225-son)

13.10.2008

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining 2008-yil 29-fevraldagi PQ-805-son qarori bilan tasdiqlangan “Yoshlar yili” Davlat dasturi ijrosini taʼminlash, bolalarning sanʼat va madaniyat sohasidagi qobiliyat hamda iqtidorini barvaqt aniqlash, rivojlantirish borasida respublikamizda faoliyat yuritayotgan nodavlat tashkilotlarni har tomonlama qoʻllab-quvvatlash, ularning mazkur yoʻnalishda amalga oshirgan ishlarini targʻib etish hamda ragʻbatlantirish maqsadida Vazirlar Mahkamasi qaror qiladi:

1. Oʻzbekiston Respublikasi Madaniyat va sport ishlari vazirligi, Xalq taʼlimi vazirligi, Oliy va oʻrta maxsus taʼlim vazirligi, Oʻzbekiston Badiiy akademiyasi, ijodiy uyushmalar va jamoatchilikning bolalarning sanʼat va madaniyat sohasidagi qobiliyat hamda iqtidorini barvaqt aniqlash, rivojlantirish bilan shugʻullanadigan nodavlat tashkilotlarni ragʻbatlantirish haqidagi takliflari maʼqullansin.

2. Quyidagilar:

Bolalarning sanʼat va madaniyat sohasidagi qobiliyat hamda iqtidorini barvaqt aniqlash, rivojlantirish bilan shugʻullanadigan nodavlat tashkilotlarni ragʻbatlantirish toʻgʻrisidagi nizom 1-ilovaga;

Bolalarning sanʼat va madaniyat sohasidagi qobiliyat hamda iqtidorini barvaqt aniqlash, rivojlantirish bilan shugʻullanadigan nodavlat tashkilotlarning yil davomidagi faoliyatini oʻrganish boʻyicha Kengash tarkibi 2-ilovaga muvofiq tasdiqlansin.

3. Bolalarning sanʼat va madaniyat sohasidagi qobiliyat hamda iqtidorini barvaqt aniqlash, rivojlantirish bilan shugʻullanadigan nodavlat tashkilotlarning yil davomidagi faoliyatini oʻrganish boʻyicha Kengash qaroriga muvofiq, Oʻzbekiston Respublikasi Madaniyat vazirligi tomonidan har yili nodavlat tashkilotlarni ragʻbatlantirish marosimi tashkil etilsin.

Mazkur marosimni tashkil etish va oʻtkazishda Oʻzbekiston Respublikasi Oliy va oʻrta maxsus taʼlim vazirligi, Xalq taʼlimi vazirligi, Oʻzbekiston Badiiy akademiyasi, Yoshlar ittifoqi Markaziy Kengashi hamda homiy tashkilotlar qatnashishi belgilab qoʻyilsin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R. Qosimov zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2008-yil 13-oktabr,

225-son

Vazirlar Mahkamasining 2008-yil 13-oktabrdagi 225-son qaroriga 1-ILOVA

Bolalarning sanʼat va madaniyat sohasidagi qobiliyat hamda iqtidorini barvaqt aniqlash, rivojlantirish bilan shugʻullanadigan nodavlat tashkilotlarni ragʻbatlantirish toʻgʻrisidagi

NIZOM

I. Umumiy qoidalar

1. Ushbu Nizom bolalarning sanʼat va madaniyat sohasidagi qobiliyat hamda iqtidorini barvaqt aniqlash, rivojlantirish bilan shugʻullanadigan nodavlat tashkilotlarni (keyingi oʻrinlarda “nodavlat tashkilotlar” deb ataladi) ragʻbatlantirishga qaratilgan tanlovni oʻtkazish tartibini belgilaydi.

2. Mazkur tanlov Oʻzbekistonda bolalarning sanʼat va madaniyat sohasidagi qobiliyat hamda iqtidorini barvaqt aniqlash, rivojlantirish bilan shugʻullanadigan nodavlat tashkilotlarni har tomonlama qoʻllab-quvvatlash, ularning mazkur yoʻnalishda amalga oshirgan ishlarini targʻib etish hamda ragʻbatlantirish va shu orqali iqtidorli bolalarning namunali taʼlim olishi, oʻz ustida ishlashi uchun zarur sharoitlar yaratilishi jarayoniga nodavlat tashkilotlarni yanada kengroq jalb etishga erishish maqsadida oʻtkaziladi.

II. Tanlovni oʻtkazish va gʻoliblarni aniqlash tartibi

3. Tanlov har yil yakunida Bolalarning sanʼat va madaniyat sohasidagi qobiliyat hamda iqtidorini barvaqt aniqlash, rivojlantirish bilan shugʻullanadigan nodavlat tashkilotlarning yil davomidagi faoliyatini oʻrganish boʻyicha Kengash (keyingi oʻrinlarda “Kengash” deb ataladi) tomonidan belgilangan muddatda oʻtkaziladi.

4. Mazkur tanlovda Oʻzbekiston Respublikasida faoliyat koʻrsatayotgan nodavlat tashkilotlar ishtirok etadi.

5. Tanlov nodavlat tashkilotlar oʻrtasida gʻoliblikka nomzodlarni aniqlashdan boshlanadi.

Nomzodlar quyidagi nominatsiyalar boʻyicha aniqlanadi:

yilning eng faol nodavlat tashkiloti;

Oʻzbekiston yoshlari isteʼdodining kashfiyotchisi;

yilning eng yaxshi madaniyat va sanʼat targʻibotchisi.

6. Kengash nomzodlar orasidan gʻoliblarni aniqlab, bu haqda qaror qabul qiladi.

III. Tanlov gʻoliblarini taqdirlash marosimi

7. Kengash qarori asosida aniqlangan gʻoliblarni taqdirlash marosimi Oʻzbekiston davlat konservatoriyasining katta zalida oʻtkaziladi. Konservatoriya katta zalining foyesida tasviriy sanʼat va xalq amaliy sanʼati sohasidagi eng iqtidorli bolalarning ijodiy ishlari koʻrgazmasi tashkil etiladi.

Katta zal sahnasida iqtidorli bolalar va jamoalarning cholgʻu ijrochiligi, xonandalik, raqs va boshqa yoʻnalishdagi ijrolaridan iborat maxsus konsert dasturi namoyish etiladi.

8. Tanlovda gʻolib chiqqan nodavlat tashkilotlar Oʻzbekiston Respublikasi Madaniyat vazirligi, Oliy va oʻrta maxsus taʼlim vazirligi, Xalq taʼlimi vazirligi, Oʻzbekiston Badiiy akademiyasi va Yoshlar ittifoqi Markaziy Kengashi tomonidan sertifikat hamda har bir nominatsiya boʻyicha bazaviy hisoblash miqdorining 50 baravari miqdoridagi maxsus sovgʻalar bilan taqdirlanadi.

9. Mazkur tanlovda respublikada faoliyat koʻrsatayotgan davlat tashkilotlari va nodavlat tashkilotlar homiylik qilishlari, yangi nominatsiyalar boʻyicha oʻz sovgʻalarini taqdim etishlari mumkin.

10. Taqdirlash marosimi Oʻzbekiston Milliy teleradiokompaniyasida, “Oʻzbekiston adabiyoti va sanʼati” gazetasida va boshqa ommaviy axborot vositalarida keng yoritiladi.

IV. Moliyalashtirish

11. Tanlovni oʻtkazish bilan bogʻliq xarajatlar Oʻzbekiston Respublikasi Madaniyat vazirligi, Oliy va oʻrta maxsus taʼlim vazirligi, Xalq taʼlimi vazirligi, Oʻzbekiston Badiiy akademiyasi va Yoshlar ittifoqi Markaziy Kengashi tomonidan teng ulushlarda qoplanadi.

Vazirlar Mahkamasining 2008-yil 13-oktabrdagi 225-son qaroriga 2-ILOVA

Bolalarning sanʼat va madaniyat sohasidagi qobiliyat hamda iqtidorini barvaqt aniqlash, rivojlantirish bilan shugʻullanadigan nodavlat tashkilotlarning yil davomidagi faoliyatini oʻrganish boʻyicha Kengash

TARKIBI

Izoh: kengash aʼzosi boshqa ishga oʻtgan taqdirda uning lavozimiga yangidan tayinlangan kishi Kengash tarkibiga kiritiladi.