Oʻzbekiston Respublikasi taʼlim muassasalariga chet el fuqarolarini oʻqishga qabul qilish oldidan tibbiy koʻrikdan oʻtkazish haqidagi nizomni tasdiqlash toʻgʻrisida (1862-son)
24.09.2008
Oʻzbekiston Respublikasi Sogʻliqni saqlash vazirining
buyrugʻi
[Oʻzbekiston Respublikasi Adliya vazirligi tomonidan 2008-yil 24-sentabrda 1862-son bilan davlat roʻyxatidan oʻtkazildi]
Oʻzbekiston Respublikasi Vazirlar Mahkamasining 2008-yil 4-avgustdagi “Xorijiy fuqarolarni Oʻzbekiston Respublikasi taʼlim muassasalariga oʻqishga qabul qilish va oʻqitish tartibini takomillashtirish toʻgʻrisida”gi 169-sonli qarori ijrosini taʼminlash maqsadida buyuraman:
1. Oʻzbekiston Respublikasi taʼlim muassasalariga chet el fuqarolarini oʻqishga qabul qilish oldidan tibbiy koʻrikdan oʻtkazish haqidagi nizom ilovaga muvofiq tasdiqlansin.
2. Mazkur buyruq Oʻzbekiston Respublikasi Adliya vazirligida davlat roʻyxatidan oʻtkazilgandan soʻng oʻn kun oʻtgach kuchga kiradi.
Sogʻliqni saqlash vaziri F. NAZIROV
Toshkent sh.,
2008-yil 25-avgust,
376-son
Sogʻliqni saqlash vazirining 2008-yil 25-avgustdagi 376-sonli buyrugʻi bilan TASDIQLANGAN
Oʻzbekiston Respublikasi taʼlim muassasalariga chet el fuqarolarini oʻqishga qabul qilish oldidan tibbiy koʻrikdan oʻtkazish haqida
NIZOM
Mazkur Nizom Oʻzbekiston Respublikasi Vazirlar Mahkamasining “Xorijiy fuqarolarni Oʻzbekiston Respublikasi taʼlim muassasalariga oʻqishga qabul qilish va oʻqitish tartibini takomillashtirish toʻgʻrisida”gi 2008-yil 4-avgustdagi 169-sonli qaroriga asosan Oʻzbekiston Respublikasi taʼlim muassasalariga chet el fuqarolarini oʻqishga qabul qilish oldidan tibbiy koʻrikdan oʻtkazish tartibini belgilaydi.
I. Umumiy qoidalar
1. Chet el fuqarolari Oʻzbekiston Respublikasi taʼlim muassasalariga oʻqishga kirish oldidan albatta tibbiy koʻrikdan oʻtkaziladi.
2. Tibbiy koʻrik Oʻzbekiston Respublikasi taʼlim muassasalariga kiruvchi chet el fuqarolarini salomatlik holati va jismoniy rivojlanganligini inobatga olib oʻqishga layoqatliligini aniqlash maqsadida oʻtkaziladi.
3. Oʻzbekiston Respublikasi taʼlim muassasalariga oʻqishga kiruvchi chet el fuqarolarini tibbiy koʻrikdan oʻtkazish mazkur Nizomning 1-ilovasida belgilangan tibbiy muassasalarda pulli xizmat asosida oʻtkaziladi.
Oʻzbekiston Respublikasi Vazirlar Mahkamasining 2008-yil 18-martdagi 48-sonli qarori bilan tasdiqlangan “Viloyat koʻp tarmoqli tibbiyot markazi toʻgʻrisida”gi nizomning 9-bandiga muvofiq, viloyat koʻp tarmoqli tibbiyot markazlari tomonidan koʻrsatiladigan pulli tibbiy xizmatlar, amalga oshiriladigan ishlarning barcha turlariga tariflar va narxlar markaz tomonidan mustaqil ravishda, Oʻzbekiston Respublikasi Sogʻliqni saqlash vazirligi va tegishli iqtisodiyot va moliya organlari bilan kelishgan holda belgilashga haqli.
4. Chet el fuqarolarining oʻqishga qobiliyati mazkur Nizomning 2-ilovasida keltirilgan kasalliklar roʻyxati asosida tibbiy koʻrik natijasi boʻyicha aniqlanadi.
Ushbu roʻyxatda keltirilgan kasalliklar aniqlangan taqdirda chet el fuqarolarini Oʻzbekiston Respublikasining taʼlim muassasalariga oʻqishiga qabul qilish ruxsat etilmaydi.
5. Chet el fuqarolarini tibbiy koʻrikdan sifatli oʻtkazilishiga tibbiy muassasaning rahbari masʼuldir.
II. Oʻzbekiston Respublikasi taʼlim muassasalariga chet el fuqarolarini oʻqishga qabul qilish oldidan tibbiy koʻrikdan oʻtkazish
6. Chet el fuqarolari tibbiy koʻrikdan oʻtish davrida shaxsini tasdiqlovchi hujjat (pasport yoki identifikatsiya ID-kartasi, tugʻilganlik haqida guvohnoma yoki boshqa hujjat)ni taqdim etadilar.
7. Umumtaʼlim maktabiga rasmiylashtirish jarayonida bola oilaviy shifokor, pediatr, va boshqa shifokor mutaxassislar: otolaringolog, oftalmolog, nevropatolog, stomatolog, xirurg, ortoped koʻrigidan oʻtkaziladi. Shuningdek, bolalarga antropometriya, tegishli klinik va laboratoriya tahlillari oʻtkaziladi.
Tibbiy koʻrik natijasi boʻyicha Vrachlar konsultativ komissiyasi tomonidan bolaning oʻqishga layoqatliligi yoki layoqatsizligi toʻgʻrisida profilaktik emlashlari (063u shakli) koʻrsatilgan holda bolaning tibbiy kartasi (026 shakli) beriladi.
8. Chet el fuqarolari oʻrta maxsus, professional taʼlim tashkilotlari va oliy taʼlim muassasalariga oʻqishga kirish jarayonida oilaviy shifokor va boshqa shifokor mutaxassislar: otolaringolog, oftalmolog, nevropatolog, xirurg, urolog, ginekolog, psixiatr koʻrigi va flyuorografiya tekshiruvidan, tegishli klinik tahlillari oʻtkaziladi.
Tibbiy koʻrik natijasi boʻyicha Vrachlar konsultativ komissiyasi tomonidan chet el fuqarosining oʻqishga layoqatliligi yoki layoqatsizligi toʻgʻrisida profilaktik emlashlari (063u shakli) koʻrsatilgan holda tibbiy maʼlumotnoma (086 shakli) beriladi.
9. Oʻzbekiston Respublikasi taʼlim muassasalariga kiruvchi chet el fuqarolar mazkur Nizomning 7 va 8-bandlarida keltirilgan tekshiruvlardan oʻtkazilgandan soʻng test oldi maslahati va OITS/OIV tekshiruvidan oʻtkaziladi.
10. Profilaktik emlashlari toʻgʻrisida maʼlumotni (063u shakli) taqdim qilmagan chet el fuqarolari yoshiga munosib emlanganligi toʻgʻrisidagi koʻchirmani taqdim qilishlari lozim.
11. Tibbiy koʻrik davomida fuqaroda oʻtkir kasalliklar aniqlangan taqdirda, kasallik tuzalgandan soʻng qayta tibbiy koʻrikdan oʻtkaziladi va belgilangan tartibda Vrachlar konsultativ komissiyasi xulosasi beriladi.
12. Murakkab va bahsli holatlarda chet el fuqarosi tibbiy koʻrikni ixtisoslashtirilgan muassasalarda davom ettirishi uchun Oʻzbekiston Respublikasi Sogʻliqni saqlash vazirligiga (yoki uning hududiy boshqarmalariga) yuboriladi.
13. Vrachlar konsultativ komissiyasi tomonidan berilgan fuqaroning sogʻligʻi toʻgʻrisidagi tibbiy xulosasi Oʻzbekiston Respublikasi taʼlim muassasalariga oʻqishga kirishda topshiriladigan hujjatlar bilan birgalikda taqdim etilishi uchun beriladi.
14. Chet el fuqarosining sogʻligʻi toʻgʻrisidagi tibbiy xulosasi yoʻqolgan taqdirda, u tibbiy koʻrikdan mazkur Nizomda belgilangan tartibda qayta oʻtkazilib tegishli tibbiy xulosa rasmiylashtiriladi.
III. Yakuniy qoidalar
15. Mazkur Nizom Oʻzbekiston Respublikasining Oliy va oʻrta maxsus taʼlim vazirligi, Tashqi ishlar vazirligi, Xalq taʼlimi vazirligi va Vazirlar Mahkamasi huzuridagi Davlat test markazi bilan kelishilgan.
Oliy va oʻrta maxsus taʼlim vaziri A. PARPIYEV
Toshkent sh.,
2008-yil 24-avgust,
Xalq taʼlimi vaziri G. SHOUMAROV
Toshkent sh.,
2008-yil 24-avgust,
Tashqi ishlar vaziri birinchi oʻrinbosari I. NEʼMATOV
Toshkent sh.,
2008-yil 24-avgust,
Vazirlar Mahkamasi huzuridagi Davlat test markazi direktori B. ISMOILOV
Toshkent sh.,
2008-yil 24-avgust,
Oʻzbekiston Respublikasi taʼlim muassasalariga chet el fuqarolarini oʻqishga qabul qilish oldidan tibbiy koʻrikdan oʻtkazish haqidagi nizomga 1-ILOVA
Chet el fuqarolarini oʻqishga qabul qilish oldidan tibbiy koʻriklarni oʻtkazuvchi tibbiyot muassasalari
ROʻYXATI
Oʻzbekiston Respublikasi taʼlim muassasalariga chet el fuqarolarini oʻqishga qabul qilish oldidan tibbiy koʻrikdan oʻtkazish haqidagi nizomga 2-ILOVA
Taʼlim muassasalariga qabul qilish uchun ruxsat berilmaydigan kasalliklar
ROʻYXATI
1. Sil kasalligining ochiq formalari (aktiv rivojlanuvchi oʻpka sili, traxeobronxial, qorinorti va pereferik limfa tugunlari, yirik suyaklar, halqum, ichak va teri aktiv sili).
2. Rivojlangan oʻpka-yurak yetishmovchiligi (III-daraja) bilan kechuvchi oʻpkaning surunkali kasalliklari.
3. Barcha bosqichdagi xavfli oʻsma kasalliklari, ikki yil oldin radikal davolangan holatlaridan tashqari.
4. II va III-darajali qon aylanishining buzilishi bilan kechuvchi yurak mushak va klapanlarining organik oʻzgarishlari (tugʻma va orttirilgan).
5. Turgʻun buyrak yetishmovchiligi bilan kechuvchi buyrak va boshqa aʼzolar kasalliklari.
6. Endokrin kasalliklar: aqliy faoliyatni pasayishiga olib keluvchi tugʻma gipoterioz va boshqa tugʻma kasalliklar.
7. Qon kasalliklari: oʻtkir leykozlar, aplastik kamqonlik.
8. Tugʻma va surunkali organik asab kasalliklari, shuningdek, aql-zakovatning chuqur va turgʻun buzilishlari, psixopatik buzilishi, yaqqol namoyon boʻlgan nevrologik belgilar yoki psixopatik xulq-atvor asoratlari bilan oʻtkazilgan ogʻir kasalliklar (ensefalit, meningit, araxnoidit, bosh va orqa miyaning yopiq jarohatlari va boshqalar).
9. Toʻxtovsiz rivojlanish bilan kechuvchi shizofreniya (oddiy, gebefrenik, paranoid turlari): a) xurujsimon rivojlanish bilan kechuvchi shizofreniya (turlari: katotonik, galyutsinator, paranoid); b) toʻlqinsimon kechuvchi shizofreniya (turlari: sirkulyar, depressiv-paranoid, oneyroid-katotonik) tez-tez xurujlanuvchi va qisqa remissiyali holatlarda; v) sust kechuvchi shizofreniyaning xuruj davri.
10. Tez-tez takrorlanuvchi tutqanoqli, tutqanoqsiz va psixomator xurujlari bilan, shuningdek, xushning xiralashuvi va ogʻir disforiya bilan.
11. Kam takrorlanuvchi xurujlar bilan kechuvchi epilepsiya, shaxsning chuqur oʻzgarishi va aql-zakovat buzilishi bilan, epileptik psixozlar, tez-tez xurujlanuvchi siklotimiya, maniakal depressiv psixoz, tez-tez takrorlanuvchi maniakal depressiv holatlar.
12. Shaxsning patologik rivojlanishi har xil turlari, mehnatga qobiliyati pasayishi bilan, psixopatiyaning yaqqol turi yoki tez-tez dekompensatsiyalanishi bilan kechuvchi turlari.
13. Ogʻir, surunkali kechuvchi, qaytalanuvchi teri kasalliklarining nogironlikka olib keluvchi (pufakchali epidermoliz, slerodaktiliya, artropatik psoriaz turlari, tarqok qizil teri sili (volchanka).
14. Zaxmning yuqumli bosqichi.
15. Traxomaning I, II, III-darajalari.
16. Giyohvandlik, toksikomaniyaning (tamakiga tobelikdan tashqari) barcha turlari.
17. Orttirilgan immun tanqisligi sindromi (OITS/OIV).