Banklarning depozit (omonat) sertifikatlarini chiqarish va muomalada boʻlish tartibi toʻgʻrisidagi nizomni tasdiqlash haqida (1859-son)

24.09.2008

Oʻzbekiston Respublikasi Markaziy Banki Boshqaruvining

Qarori

[Oʻzbekiston Respublikasi Adliya vazirligi tomonidan 2008-yil 24-sentabrda 1859-son bilan davlat roʻyxatidan oʻtkazildi]

Oʻzbekiston Respublikasining “Oʻzbekiston Respublikasining Markaziy banki toʻgʻrisida”, “Banklar va bank faoliyati toʻgʻrisida” va “Qimmatli qogʻozlar bozori toʻgʻrisida”gi qonunlariga muvofiq Markaziy bank Boshqaruvi qaror qiladi:

1. Banklarning depozit (omonat) sertifikatlarini chiqarish va muomalada boʻlish tartibi toʻgʻrisidagi nizom ilovaga muvofiq tasdiqlansin.

2. Quyidagilar oʻz kuchini yoʻqotgan deb topilsin:

Oʻzbekiston Respublikasi Markaziy banki Boshqaruvining 1994-yil 24-dekabrdagi 31-sonli qarori bilan tasdiqlangan “Banklarning depozit sertifikatlarini chiqarish, roʻyxatga olish va muomalada boʻlish Qoidalari” (1998-yil 9-noyabr, roʻyxat raqami 522);

Oʻzbekiston Respublikasi Markaziy banki Boshqaruvining 1999-yil 20-fevraldagi 3/3-sonli qarori bilan tasdiqlangan “Banklarning depozit sertifikatlarini chiqarish, roʻyxatga olish va muomalada boʻlish Qoidalariga kiritilgan oʻzgartirishlar” (1999-yil 1-aprel, roʻyxat raqami 522-1);

Oʻzbekiston Respublikasi Markaziy banki Boshqaruvining 2003-yil 6-dekabrdagi 30/7-sonli “Banklarning depozit sertifikatlarini chiqarish, roʻyxatga olish va muomalada boʻlish Qoidalariga oʻzgartirish kiritish toʻgʻrisida”gi qarori (2003-yil 19-dekabr, roʻyxat raqami 522-2 –– Meʼyoriy hujjatlar axborotnomasi, 2003-yil, 24-son);

Oʻzbekiston Respublikasi Markaziy banki Boshqaruvining 2008-yil 19-apreldagi 10/4-sonli “Banklarning depozit sertifikatlarini chiqarish, roʻyxatga olish va muomalada boʻlish Qoidalariga qoʻshimcha va oʻzgartirishlar kiritish haqida”gi qarori (2008-yil 12-may, roʻyxat raqami 522-3 –– Oʻzbekiston Respublikasi qonun hujjatlari toʻplami, 2008-yil, 20-21-son, 179-modda).

3. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kundan keyin kuchga kiritilsin.

Markaziy bank raisi F. MULLAJONOV

Toshkent sh.,

2008-yil 14-avgust,

17/2-son

Oʻzbekiston Respublikasi Markaziy banki Boshqaruvining 2008-yil 14-avgustdagi 17/2-son qarori bilan TASDIQLANGAN

Banklarning depozit (omonat) sertifikatlarini chiqarish va muomalada boʻlish tartibi toʻgʻrisida

NIZOM

Mazkur Nizom banklar, shu jumladan mikromoliya banklari tomonidan depozit (omonat) sertifikatlarini chiqarish va ularning muomalada boʻlish tartibini belgilaydi.

I. Umumiy qoidalar

1. Mazkur Nizomda quyidagi asosiy tushunchalardan foydalaniladi:

depozit (omonat) sertifikati(bundan buyon matnda sertifikat deb yuritiladi) — bankka qoʻyilgan depozit (omonat) summasini va omonatchining (sertifikat saqlovchining) depozit (omonat) summasini hamda sertifikatda shartlashilgan foizlarni sertifikatni bergan bankdan yoki shu bankning istalgan filialidan (bank xizmatlari ofisidan) belgilangan muddat tugaganidan keyin olish huquqini tasdiqlovchi noemissiyaviy qimmatli qogʻoz;

sessiya — sertifikat boʻyicha talab qilib olish huquqidan boshqa shaxs foydasiga voz kechish;

sedent — sertifikat boʻyicha talab qilib olish huquqidan boshqa shaxs foydasiga voz kechayotgan tomon;

sessionariy — sertifikat boʻyicha talab qilib olish huquqini olayotgan tomon.

2. Sertifikatlar blankalar tarzida hujjatli shaklda chiqariladi.

3. Sertifikatlar ikki turda chiqarilishi mumkin:

a) “depozit sertifikatlari” — yuridik shaxslar uchun;

b) “omonat sertifikatlari” — jismoniy shaxslar uchun.

5. Sertifikatlar oldi-sotdi, hadya qilish, meros qilib olish, ustav fondiga kiritish va egasi almashuviga olib keladigan boshqa bitimlarda, shuningdek garovda bitim obyekti boʻlishi mumkin.

Sertifikatni tovarlar oldi-sotdisi yoki koʻrsatilgan xizmatlar (ishlar) uchun hisob-kitob qilishda toʻlov vositasi sifatida qoʻllash mumkin emas.

51. Banklar bevosita oʻzlari yoki boshqa banklar tomonidan joylashtirilgan sertifikatlar bilan taʼminlangan kredit ajratishga haqli.

6. Depozit sertifikatlarining oldi-sotdisi va ular boʻyicha summalarni toʻlashga doir pullik hisob-kitoblar naqdsiz shaklda, omonat sertifikatlari boʻyicha— naqdsiz hamda naqd shaklida amalga oshiriladi.

7. Sertifikatlarning qiymati Oʻzbekiston Respublikasining milliy valyutasida ifodalanadi. Sertifikatlarni xorijiy valyutada chiqarish taqiqlanadi.

71. Mikromoliya banklari tomonidan omonat sertifikatlarini jismoniy shaxslar orasida joylashtirish Oʻzbekiston Respublikasining “Banklar va bank faoliyati toʻgʻrisida”gi Qonunining 7-moddasiga asosan bir jismoniy shaxsdan omonatga jalb qilingan pul mablagʻlari miqdori Oʻzbekiston Respublikasining “Banklardagi omonatlarni himoya qilish kafolatlari toʻgʻrisida”gi Qonunida belgilangan kafolatlangan omonat miqdoridan oshmagan holda amalga oshiriladi.

8. Sertifikatlar 6 oydan 3 yilgacha boʻlgan muddatga (sertifikat berilgan vaqtdan boshlab sertifikat saqlovchisi sertifikat boʻyicha depozitni talab qilib olish huquqini qoʻlga kiritish vaqtiga qadar) chiqariladi.

81. Banklar tomonidan sertifikatga oid axborotlar Oʻzbekiston Respublikasining “Qimmatli qogʻozlar bozori toʻgʻrisida”gi Qonuni va Vazirlar Mahkamasining 2014-yil 2-iyuldagi 176-sonli qarori bilan tasdiqlangan Aksiyadorlik jamiyatlarining korporativ veb-saytlariga qoʻyiladigan talablar toʻgʻrisidagi nizom talablariga muvofiq oshkor qilinadi.

II. Sertifikat blankalarini rasmiylashtirishga oid talablar

9. Sertifikat blankasida quyidagi majburiy rekvizitlar aks ettirilgan boʻlishi shart (1 va 3-ilovalar):

a) “depozit sertifikati” yoki “omonat sertifikati” degan nom;

b) sertifikat raqami va seriyasi;

v) depozit yoki omonat qoʻyilgan sana;

g) sertifikat boʻyicha summani talab qilib olish sanasi;

d) sertifikat bilan rasmiylashtirilgan omonat yoki depozit miqdori (raqamlar va soʻzlar bilan);

e) bankning depozit yoki omonatga qoʻyilgan summani qaytarish va tegishli foizlarni toʻlash yuzasidan majburiyati;

j) depozit yoki omonatdan foydalanish uchun foiz stavkasi;

z) toʻlanishi lozim boʻlgan foiz summasi (raqamlar va soʻzlar bilan);

i) bankning nomi, joylashgan manzili;

k) depozit sertifikatida omonatchi— yuridik shaxsning nomi va joylashgan manzili;

l) omonat sertifikatida omonatchi –– jismoniy shaxsning familiyasi, ismi, sharifi va shaxsini tasdiqlovchi hujjat maʼlumotlari;

m) bank tomonidan sertifikatni imzolash huquqi berilgan ikki nafar mansabdor shaxsning bank muhri bilan tasdiqlangan imzolari.

Sertifikat blankining matnida yuqorida koʻrsatilgan majburiy rekvizitlardan biri koʻrsatilmagan taqdirda sertifikat haqiqiy emas deb hisoblanadi.

10. Sertifikatda sessiya sertifikat blankasining orqa tomonida rasmiylashtiriladi. Agar sessiyani rasmiylashtirish uchun qoʻshimcha varaqlar talab etilsa, unda sertifikatning ilovalari ham boʻlishi mumkin. Ushbu ilovalar sertifikat saqlovchisining talabi bilan sertifikatni muomalaga chiqaruvchi bank tomonidan rasmiylashtiriladi.

Sertifikatning ilovalari raqamlangan, sertifikat blankasiga tikilgan va sertifikatni imzolash huquqi berilgan ikki nafar mansabdor shaxs tomonidan imzolangan hamda bank (bank filiali yoki bank xizmatlari ofisi) muhri bilan tasdiqlangan boʻlishi lozim.

11. Sertifikat blankasida sertifikatni chiqarish va uning muomalada boʻlish shartlari (bundan buyon matnda chiqarilish shartlari deb yuritiladi), shu jumladan sessiyani rasmiylashtirish hamda sertifikat yoʻqotilganda uni qayta tiklash tartibi aks ettirilgan boʻlishi lozim.

12. Sertifikat blankasi bank tomonidan chop etish qoʻlda sharikli ruchkada, yozuv mashinkasida yoki kompyuterning yozuv moslamasida (printerida) toʻldiriladi.

Sertifikat bilan rasmiylashtirilgan omonat yoki depozit miqdori raqamlar va soʻzlar bilan yoziladi.

Sertifikatning raqamda yozilgan qiymatidan oldin va keyingi boʻsh joylar, shuningdek nominalning soʻzda yozilgan qiymatidan keyin qolgan boʻsh joylar ikki parallel chiziq tortish yoʻli bilan toʻldirib qoʻyilishi kerak. Soʻzlar bilan yozilgan hamda raqamlar bilan belgilangan summalar oʻrtasida farq boʻlgan taqdirda soʻzlar bilan yozilgan summa haqiqiy hisoblanadi.

13. Sertifikatda imzo va bank muhrlarini bosmaxona usulida qoʻyish taqiqlanadi.

14. Sertifikatni berishda bank sertifikat koreshogidagi barcha rekvizitlarni toʻldiradi. Sertifikat koreshogi sertifikat egasi yoki uning qonunchilik hujjatlariga binoan rasmiylashtirilgan ishonchnomaga ega boʻlgan vakolatli shaxsi tomonidan imzolanadi, sertifikatdan ajratiladi va bankda saqlanadi.

15. Omonatchining (sertifikat saqlovchining) vakili depozit sertifikatni olish uchun ishonchnomaga ega boʻlishi lozim, ishonchnoma depozit sertifikat koreshogi bilan birga saqlanadi.

16. Bank tomonidan sertifikatni toʻldirishda tuzatish va oʻchirishlarga yoʻl qoʻyilmaydi.

17. Sertifikat blankasini omonatchiga berishda toʻgʻri rasmiylashtirish va toʻldirish uchun javobgarlik bank zimmasiga yuklatiladi.

18. Depozit (omonat) sertifikati blankalari, shuningdek sertifikatlarga qoʻshimcha varaqlar (ilovalar) “Davlat belgisi” masʼuliyati cheklangan jamiyat tomonidan ishlab chiqariladi. Sertifikatga qoʻshimcha varaqlar (ilovalar) sertifikat blankasi bilan bir vaqtda tayyorlanadi.

III. Sertifikatlarning muomalada boʻlish tartibi

20. Sertifikatdan boshqa shaxs foydasiga voz kechish mumkin. Bunda qimmatli qogʻozlarning uyushgan savdosida sertifikatlarga doir bitimlarni tuzish va roʻyxatdan oʻtkazish ularni yozma ravishda (qogʻozda) rasmiylashtirish zaruratisiz elektron shaklda amalga oshiriladi. Sertifikatlarga doir boshqa bitimlar yozma shaklda tuziladi va qonunchilik hujjatlarida belgilangan tartibda roʻyxatdan oʻtkaziladi.

21. Depozit sertifikati boʻyicha sessiya faqat yuridik shaxslar oʻrtasida rasmiylashtiriladi.

22. Omonat sertifikati boʻyicha sessiya faqat jismoniy shaxslar oʻrtasida, sertifikatni bergan bankda yoki uning filialida (bank xizmatlari ofisida) rasmiylashtiriladi.

Mikromoliya banklari tomonidan omonat sertifikatlari boʻyicha sessiya Oʻzbekiston Respublikasining “Banklar va bank faoliyati toʻgʻrisida”gi Qonunining 7-moddasiga asosan bir jismoniy shaxsdan omonatga jalb qilingan pul mablagʻlari miqdori Oʻzbekiston Respublikasining “Banklardagi omonatlarni himoya qilish kafolatlari toʻgʻrisida”gi Qonunida belgilangan kafolatlangan omonat miqdoridan oshmagan holda amalga oshiriladi.

24. Sessiya sertifikatning orqa tomonida yoki qoʻshimcha varaqlarda (ilovalar) sedent va sessionariyning ikki tomonlama bitimi bilan rasmiylashtiriladi.

Depozit sertifikati boʻyicha sessiya har bir tomondan shu kabi bitimlarni amalga oshirish uchun yuridik shaxs tomonidan vakolat berilgan ikki nafar shaxs tomonidan imzolanadi.

Omonat sertifikati boʻyicha sessiyani har ikki tomon shaxsan imzolaydi.

Har bir sessiya sedent tomonidan raqamlanadi.

Sessiyani rasmiylashtirish uzluksiz boʻlishi shart.

25. Sessiya sertifikat muomalada boʻlgan davrdagina amalga oshirilishi mumkin.

26. Depozit sertifikati sessiyasini rasmiylashtirishda yoʻl qoʻyilgan xatolar tuzatilganda u tuzatish kiritilgan sana koʻrsatilgan holda “tuzatildi” yozuvi bilan tasdiqlanishi hamda sedent va sessionariy tomonidan imzolanishi shart.

27. Omonat sertifikati sessiyasini rasmiylashtirishda tuzatishlar kiritish sertifikatni bergan bankda yoki uning filialida (bank xizmatlari ofisida) amalga oshiriladi.

28. Sessiya rasmiylashtirilganda sertifikat koreshogiga oʻzgartirishlar kiritilmaydi.

29. Depozit sertifikati boʻyicha depozitni talab qilib olish muddati yetib kelganda bank depozit sertifikat saqlovchisining arizasiga muvofiq asosiy talab qilib olinguncha depozit hisobvaragʻiga toʻlovni amalga oshiradi.

30. Omonat sertifikati boʻyicha omonatni talab qilib olish muddati yetib kelganda bank omonat sertifikati saqlovchisiga naqd pul bilan yoki uning arizasiga koʻra omonat hisobvaragʻiga oʻtkazib berish yoʻli bilan naqd pulsiz hisob-kitoblar tarzida toʻlovlarni amalga oshirishi mumkin.

31. Sertifikat saqlovchisi tomonidan bankka toʻlab berish uchun taqdim etilgan sertifikatlarda sessiyalar mavjud boʻlsa, bank sessiyalarning rasmiylashtirilishi va uzluksizligini tekshiradi. Bunda:

omonat sertifikatlari boʻyicha — oxirgi sessiyada qayd etilgan shaxsning familiyasi, ismi, sharifi va imzosi, sertifikatni toʻlab berishni soʻrab yozilgan arizadagi shaxsning familiyasi, ismi, sharifi va imzosiga mos kelmagan taqdirda, sertifikat saqlovchisi tomonidan merosga boʻlgan huquq toʻgʻrisidagi guvohnoma (nusxasi olinib, asli qaytariladi) yoki belgilangan tartibda rasmiylashtirilgan ishonchnoma;

depozit sertifikatlari boʻyicha — oxirgi sessiyada qayd etilgan sessionariy vakolatli shaxsining imzosi va nomi sertifikat toʻlab berilishi haqidagi arizada vakolatli shaxs imzosi, yuridik shaxsning nomi mos kelmagan taqdirda, sertifikat saqlovchisi tomonidan sertifikat summasini talab qilib olish huquqini tasdiqlovchi hujjat(lar) taqdim etilishi lozim.

Sertifikat saqlovchisi tomonidan taqdim etilgan sertifikat summasi boʻyicha talab qilib olish huquqini tasdiqlovchi hujjat(lar) yoki uning nusxasi bank tomonidan toʻlab berilgan sertifikatga qoʻshib tikib qoʻyiladi.

311. Sertifikatlarga doir shartnomalarga oʻzgartirish va (yoki) qoʻshimchalar kiritish qonunchilik hujjatlarida belgilangan tartibda amalga oshiriladi.

Sertifikatlarni chiqarish shartlari Markaziy bankda roʻyxatga olingandan soʻng, ushbu shartlarda boshqacha tartib nazarda tutilmagan boʻlsa:

sertifikatlarga doir shartnomalarni imzolagan mansabdor shaxslar;

bank va (yoki) sertifikat egasining joylashgan manzili;

bankning tashkiliy-huquqiy shakli oʻzgartirilmagan holda nomi, shu jumladan kirill harflaridan lotin harflariga oʻzgarganda, sertifikatni chiqarish shartlari, sertifikat blankalari va sertifikatlarni joylashtirish jarayonida rasmiylashtirilgan shartnomalarga oʻzgartirish va (yoki) qoʻshimchalar kiritish talab etilmaydi.

IV. Sertifikatlar boʻyicha foizlarni hisoblash

32. Sertifikatlar boʻyicha foiz stavkalari, ushbu sertifikatlarni muomalaga chiqarayotgan bank tomonidan belgilanadi.

33. Sertifikat boʻyicha foizlarni hisoblash Tijorat banklarida foizlarni hisoblash tartibi toʻgʻrisidagi nizomga (roʻyxat raqami 3460, 2023-yil 29-sentabr) muvofiq amalga oshiriladi.

34. Sertifikat boʻyicha foizlarni toʻlash bank tomonidan sertifikatni toʻlovga taqdim etish bilan bir vaqtda toʻlanadi yoki sertifikat chiqarilish shartlarida belgilangan boʻlsa sertifikatning muomalada boʻlish muddati davomida har bir davrdan keyin toʻlab boriladi.

35. Bank sertifikatni berish vaqtida shartlashilgan va sertifikatda belgilangan foiz stavkasini bir tomonlama oʻzgartirishga (kamaytirishi yoki koʻpaytirishi) haqli emas.

36. Sertifikatni berish vaqtida belgilangan va muomala muddati tugaganidan soʻng (sertifikat egasi sertifikat boʻyicha omonatini yoki depozitini talab qilib olish huquqini qoʻlga kiritganda) sertifikat egasiga toʻlanishi lozim boʻlgan foizlar mazkur sertifikat sotib olingan vaqtdan qatʼi nazar, bank tomonidan toʻlanadi.

37. Bank chiqarilish shartlarida sertifikatlarni muddatidan oldin toʻlovga taqdim etish imkoniyatini nazarda tutishi mumkin.

38. Sertifikat saqlovchisi sertifikatni muddati tugagunga qadar yoxud sertifikatda koʻrsatilgan boshqa holatlar yuz bergunga qadar qaytarib berishni talab qilish niyati boʻlsa, u oʻzining bu niyatidan bankni omonatni olishni moʻljallayotgan sanadan kamida bir oy oldin xabardor qilishi shart. Bunda bank tomonidan depozit (omonat) summasiga toʻlanadigan foizlar, agar sertifikatni chiqarilish shartlarida boshqacha tartib nazarda tutilgan boʻlmasa, talab qilib olinguncha saqlanadigan omonatlar boʻyicha toʻlanadigan foizlar miqdorida toʻlanadi.

39. Sertifikatlar bank tashabbusi bilan qonunchilik hujjatlarida belgilangan holatlarida muddatidan oldin toʻlovga taqdim etilganda, bank tomonidan depozit (omonat) summasiga sertifikatning amalda boʻlgan muddati uchun foizlar toʻlanadi. Bunda, bank sertifikatlarni muddatidan oldin toʻlovga taqdim etilishi va ularni toʻlovga taqdim etish shartlari toʻgʻrisida kamida bir oy oldin ommaviy axborot vositalari orqali eʼlon berishi lozim.

40. Agar sertifikat boʻyicha depozitni (omonatni) olish muddati depozit saqlovchisi tomonidan oʻtkazib yuborilgan boʻlsa, u holda bank sertifikatda belgilangan depozit summasi va hisoblangan foizlarni sertifikat egasining talabiga koʻra toʻlashga majburdir. Sertifikat summasini talab qilish kunidan haqiqatda sertifikatni toʻlov uchun taqdim etish kunigacha boʻlgan muddat uchun foizlar, agarda sertifikatni chiqarilish shartlarida boshqalar koʻzda tutilmagan boʻlsa, talab qilib olinguncha omonatlar boʻyicha toʻlanadigan foizlar miqdorida toʻlanadi.

V. Sertifikatlarning chiqarilish shartlarini roʻyxatdan oʻtkazish

42. Sertifikatlarni chiqarish toʻgʻrisidagi qaror qonunchilik hujjatlari va bank ustaviga muvofiq bunday vakolatga ega boʻlgan bank boshqaruvi organi tomonidan qabul qilinadi.

43. Sertifikatlarning muomalaga chiqarayotgan bank oʻz sertifikatlarini chiqarish va ularni muomalada boʻlish shartlarini tasdiqlashi lozim.

44. Sertifikatlarning chiqarilish shartlarida sertifikatlar chiqarish, muomalada boʻlish va ular boʻyicha bank tomonidan toʻlash tartibi, shuningdek chiqarilish haqidagi maʼlumotlar va sertifikat namunasi aks ettirilishi lozim.

45. Sertifikatlarning chiqarilish shartlarining varaqlari raqamlangan, tikilgan va muhr bilan tasdiqlangan boʻlishi lozim.

46. Sertifikatlarning chiqarilish shartlarida sertifikatlarni chiqarish toʻgʻrisidagi qarorni qabul qilgan va shartlarni tasdiqlagan bank boshqaruv organining nomi, qabul qilgan sanasi koʻrsatilishi lozim, shuningdek ushbu shartlar bank rahbari tomonidan imzolanishi va qaror qabul qilingan sanadan boshlab ikki hafta muddat ichida Markaziy bankka taqdim etilishi zarur.

47. Bank sertifikatlarning faqatgina sertifikatlar chiqarilishi va ularning muomalada boʻlishi shartlarini Markaziy bankdan (roʻyxatdan oʻtkazuvchi organ) roʻyxatdan oʻtkazganidan keyin joylashtirishga haqlidir.

48. Bank sertifikatlarning chiqarilish shartlarini roʻyxatdan oʻtkazish uchun Markaziy bankka roʻyxatdan oʻtkazish haqida erkin shaklda yozilgan va bank rahbari tomonidan imzolangan arizani taqdim etishi lozim. Arizaga quyidagi hujjatlar ilova qilinadi:

a) sertifikatlarning chiqarish va ularning muomalada boʻlish shartlari— ikki nusxada;

b) tegishli boshqaruv organining sertifikatlarni chiqarish va chiqarish shartlarini tasdiqlash toʻgʻrisidagi qarori nusxasi.

49. Sertifikatlarning chiqarilish shartlarini va u bilan birga taqdim etilgan hujjatlarni Markaziy bank tomonidan koʻrib chiqish muddati oʻttiz kundan oshmasligi lozim.

50. Roʻyxatga olish hujjatlari qayta ishlab chiqish uchun qaytarib yuborilganida ularni koʻrib chiqish muddati qayta ishlangan hujjatlar Markaziy bankka taqdim etilgan kundan boshlab qayta hisoblanadi.

51. Markaziy bank sertifikatlar chiqarilish shartlarini, ularga roʻyxat raqamini bergan holda alohida jurnalda qayd etadi. Jurnalda sertifikatni muomalaga chiqarayotgan bankning nomi, qaror qabul qilingan sana, chiqarilish shartlari Markaziy bankka taqdim etilgan sana hamda chiqarilishga oid boshqa maʼlumotlar aks ettiriladi.

52. Sertifikatlarning chiqarilish shartlarini roʻyxatga olish uchun yigʻimlar olinmaydi.

53. Depozit va omonat sertifikatlarining chiqarilish shartlari roʻyxatga olingandan soʻng, Markaziy bank chiqarilish shartlari roʻyxatga olinganligini tasdiqlovchi xat hamda mazkur shartlarining bir nusxasini bankka taqdim etadi.

VI. Sertifikatlarning chiqarilish shartlarini roʻyxatga olishni rad etish, sertifikatlar chiqarilishini toʻxtatish, roʻyxatga olinganligini bekor qilish

54. Sertifikatning chiqarilish shartlarini roʻyxatga olishni rad etish uchun quyidagilar asos boʻlishi mumkin:

a) sertifikatlarning chiqarilish shartlari qonunchilik va mazkur Nizom talablariga nomuvofiq boʻlganida;

b) Markaziy bank tomonidan bankka nisbatan omonatlarni qabul qilish operatsiyalarini cheklash, toʻxtatish kabi sanksiyalar qoʻllanilganida;

v) Oʻzbekiston Respublikasining qonunchiligida nazarda tutilgan boshqa holatlarda.

Sertifikatlarning chiqarilish shartlarini roʻyxatga olish rad etilganligi toʻgʻrisida roʻyxatga oluvchi organ tomonidan bankka tegishli sabablar koʻrsatilgan xat yuboriladi.

55. Sertifikatlarning chiqarilishini toʻxtatib qoʻyish uchun quyidagilar asos boʻladi:

a) chiqarilgan sertifikatlarni joylashtirish jarayonida qoidabuzarliklar aniqlanganda;

b) sertifikatlar roʻyxatga olinganidan yuqori hajmda joylashtirilganida;

v) bankning moliyaviy ahvoli yomonlashganida;

g) bank faoliyatini amalga oshirish huquqini beruvchi litsenziya Markaziy bank tomonidan chaqirib olinganda;

d) Oʻzbekiston Respublikasining qonunchiligida nazarda tutilgan boshqa holatlarda.

56. Sertifikatlar chiqarilishining toʻxtatib turilishi bankka ushbu turdagi qimmatli qogʻozlarni joylashtirish taqiqlanganligini (yoki vaqtinchalik taqiqlanganligini), shuningdek ushbu chiqarilishdagi qimmatli qogʻozlarni joylashtirishga doir reklama kompaniyasi toʻxtatilganligini (yoki vaqtincha toʻxtatilganligini) bildiradi.

57. Bank qimmatli qogʻozlarni joylashtirishni qoidabuzarlikni bartaraf qilish haqida tegishli koʻrsatma olingan paytdan boshlab toʻxtatib turishi va aniqlangan qoidabuzarliklarni roʻyxatga oluvchi organ belgilagan muddatlarda bartaraf qilishga majburdir.

Qimmatli qogʻozlarni joylashtirishning qayta tiklanishi roʻyxatga oluvchi organning qoidabuzarliklar tegishli koʻrsatmada belgilangan muddatlarda bartaraf qilinganligi toʻgʻrisidagi hisobotni (tasdiqlovchi hujjatlar ilova qilingan holda) koʻrib chiqish natijalariga koʻra qabul qilgan qaroriga asosan amalga oshiriladi.

58. Sertifikatlarning chiqarilish shartlarini bekor qilinishi Markaziy bank tomonidan quyidagilarga asosan amalga oshiriladi.

a) bank qonunchiligi qoʻpol ravishda buzilganligi hamda roʻyxatga oluvchi organning bank faoliyatida aniqlangan qoidabuzarliklarni bartaraf qilish yuzasidan bergan tegishli koʻrsatmalari bajarilmaganligi tufayli roʻyxatga oluvchi organ tomonidan qabul qilingan qarorga asosan;

b) bank faoliyatini amalga oshirish huquqini beruvchi litsenziya Markaziy bank tomonidan chaqirib olinganda;

v) sud qaroriga binoan.

Bank qayta tashkil etilganda chiqarilish shartlarini bekor qilish toʻgʻrisidagi qaror uning huquqiy vorisi hisoblangan bank tomonidan qabul qilinadi.

VII. Yakunlovchi qoidalar

59. Depozit (omonat) sertifikatlarining koreshoklarini, sertifikat blankalarini va sertifikatlarning qoʻshimcha varaqlarini (ilovalarini) saqlash, shuningdek sertifikat blankalarining buxgalteriya hisobini yuritish hamda sertifikatlar bilan bogʻliq amaliyotlar bank tomonidan Markaziy bank belgilagan tartibda amalga oshiriladi.

61.Yoʻqotilgan sertifikatlar boʻyicha huquqlar ularni muomalaga chiqargan bank tomonidan qayta tiklanadi.

62.Sertifikat yoʻqotilganda sertifikat saqlovchisi uning dublikatini berishni soʻrab sertifikatni muomalaga chiqargan bankka yozma ravishda ariza bilan murojaat etishga haqlidir.

63. Sertifikat yoʻqolganligi aniqlanganda sertifikat saqlovchisi bu haqda ariza taqdim qilish orqali bankni xabardor qilishi shart. Ariza bankning maxsus jurnalida qayd etiladi, ushbu jurnal raqamlangan, tikilgan va bank muhri bilan tasdiqlangan boʻlishi lozim.

64. Ariza sertifikatning koreshogi bilan birga saqlanadi. Arizada sertifikat rasmiylashtirilgan sana, sertifikat raqami, sertifikat bankning qaysi boʻlimi orqali berilganligi, kimning nomiga rasmiylashtirilganligi (yuridik shaxsning nomi yoki jismoniy shaxsning familiyasi, ismi va otasining ismi koʻrsatiladi) va qancha miqdordaligi koʻrsatiladi.

Ariza va boshqa zarur hujjatlar bank Boshqaruvi tashkil etgan maxsus komissiya tomonidan koʻrib chiqilgandan soʻng va ariza boʻyicha ijobiy qaror qabul qilinganidan keyin bank yoʻqolgan sertifikat boʻyicha toʻlovlarni amalga oshiradi yoki arizachiga sertifikat dublikatini beradi.

65. Mazkur Nizom Oʻzbekiston Respublikasi Davlat mulki qoʻmitasi huzuridagi Qimmatli qogʻozlar bozori faoliyatini muvofiqlashtirish va nazorat qilish markazi bilan kelishilgan.

Davlat mulki qoʻmitasi huzuridagi Qimmatli qogʻozlar bozori faoliyatini muvofiqlashtirish va nazorat qilish markazi bosh direktori K. TOLIPOV

Toshkent sh.,

2008-yil 12-avgust,

Banklarning depozit (omonat) sertifikatlarini chiqarish va muomalada boʻlish tartibi toʻgʻrisidagi nizomga 1-ILOVA

Omonat sertifikati koreshogi seriyasi ____________raqami ____________summasi ___________(raqam bilan)___________________(soʻzlar bilan) 20___ y. "___" _______berilgan sanasi___________________(sertifikat kimga___________________berilgani: jismoniy shaxsningism-sharifi, otasining ismi,pasport maʼlumotlari) Sertifikatni oldim 20___ y. "___" _______ ___________________(omonatchining yoki uning vakolatlishaxsining imzosi) OMONAT SERTIFIKATI seriyasi __________ raqami ___________ omonat qoʻyilgan sana 20___ y. "___" __________sertifikat boʻyicha omonatni talab qilib olish sanasi: 20___y. "___" _______________ Omonat miqdori: ___________________________________________(summa raqamlar va soʻzlar bilan)foiz stavkasi: _____________________________________________(raqamlar va soʻzlar bilan yoziladi)___________________________________________________________(bankning nomi va manzili)___________________________________________________________(jismoniy shaxsning ismi-sharifi, otasining ismi)___________________________________________________________(shaxsini tasdiqlovchi hujjat maʼlumotlari)___________________________________________________________(summa raqamlar va soʻzlar bilan yoziladi)miqdoridagi omonatni joylashtirgani toʻgʻrisida guvohlikberadi, shuningdek omonatchiga yoki uning huquqiy vorisiga*koʻrsatilgan summani yiliga ____ foiz hisobidan_______________________________________________________ soʻm (summa raqamlar va soʻzlar bilan yoziladi)soʻm miqdoridagi foizlarini qoʻshib, jami ___________________ __________________________________________________________(summa raqamlar va soʻzlar bilan yoziladi)qaytarish majburiyatini oladi. Imzolar: __________________________________________________(bankning mansabdor shaxsi) M.Oʻ.___________________________________________________________(bank buxgalteri) Omonat sertifikatini chiqarish va muomalada boʻlishining asosiy shartlari: _________________________________________________________________________________ _________________________________________________________________________________

* Sertifikatni boshqa shaxsga berish (sessiya) sertifikatning orqa tomoniga rasmiylashtiriladi.

Banklarning depozit (omonat) sertifikatlarini chiqarish va muomalada boʻlish tartibi toʻgʻrisidagi nizomga 3-ILOVA

* Sertifikatni boshqa shaxsga berish (sessiya) sertifikatning orqa tomoniga rasmiylashtiriladi.

(3-ilova Oʻzbekiston Respublikasi Markaziy banki Boshqaruvining 2020-yil 16-yanvardagi 1/4-sonli qarori (roʻyxat raqami 1859-5, 06.02.2020-y.) tahririda — Qonun hujjatlari maʼlumotlari milliy bazasi, 06.02.2020-y., 10/20/1859-5/0137-son)