Oʻzbekiston-Koreya “Uz-kor silicon” masʼuliyati cheklangan jamiyat qoʻshma korxonasini tashkil etish toʻgʻrisida (201-son)

08.09.2008

Oʻzbekiston Respublikasi Vazirlar Mahkamasining

qarori

Xorijiy investitsiyalarni jalb etgan holda geologiya-qidiruv ishlarini hamda Oʻzbekiston Respublikasi hududida yuqori texnologiyalar industriyasini rivojlantirish uchun xom ashyo bazasi hisoblangan qattiq foydali qazilmalar qazib olishni yanada kengaytirish maqsadida Vazirlar Mahkamasi qaror qiladi:

1. Oʻzbekiston Respublikasi Davlat geologiya va mineral resurslar qoʻmitasining “NeoPLANT” kompaniyasi (Koreya Respublikasi) bilan birgalikda Qashqadaryo viloyatining Tolakoʻl va Quduq hamda Samarqand viloyatining Sarikoʻl istiqbolli maydonlarida kvars va kvarsitlar konlarini aniqlash va keyinchalik qazib olish maqsadida tadbirkorlik tavakkalchiligi shartlarida geologiya-qidiruv ishlarini amalga oshirish uchun “Uz-Kor Silicon” qoʻshma korxonasi tashkil etish toʻgʻrisidagi taklifiga rozilik berilsin.

2. “Uz-Kor Silicon” masʼuliyati cheklangan jamiyat qoʻshma korxonasining ustav kapitali miqdori ekvivalentda 10,4 mln AQSH dollariga teng ekanligi, undan:

50 foiz miqdoridagi “NeoPLANT” kompaniyasi (Koreya Respublikasi) ulushining pul mablagʻlari va asbob-uskunalar hisobiga shakllanishi;

50 foiz miqdoridagi Oʻzbekiston Respublikasi Davlat geologiya qoʻmitasi ulushining Qashqadaryo viloyatining Tolakoʻl va Quduq hamda Samarqand viloyatining Sarikoʻl istiqbolli maydonlarida tarkibida kvars mavjud boʻlgan xom ashyo yuzasidan ilgari oʻtkazilgan geologiya-qidiruv ishlari davomida olingan geologiya, geofizika axborotlari va boshqa axborotlar hisobiga shakllanishi maʼlumot uchun qabul qilinsin.

3. Oʻzbekiston Respublikasi Davlat geologiya qoʻmitasi va “Uz-Kor Silicon” masʼuliyati cheklangan jamiyat qoʻshma korxonasining:

Qashqadaryo viloyatining Tolakoʻl va Quduq hamda Samarqand viloyatining Sarikoʻl istiqbolli maydonlari uchastkalari doirasida texnik kremniy, shuningdek kremniyning poli- va monokristallar ishlab chiqarish uchun yaroqli boʻlgan kvars va kvarsitlar konlarini aniqlash boʻyicha geologiya-qidiruv ishlari olib borish;

geologiya-qidiruv ishlari natijalari boʻyicha texnik kremniy, shuningdek kremniyning poli- va monokristallari ishlab chiqarishini tashkil etish va keyinchalik ular asosida geologiya-qidiruv ishlari olib borish davomida aniqlangan konlar bazasida mikroelektronika elementlari, shu jumladan quyosh elementlari va fotoelektrik modullar ishlab chiqarishni tashkil etishning maqsadga muvofiqligi toʻgʻrisida takliflar kiritish haqidagi taklifiga rozilik berilsin.

4. Oʻzbekiston Respublikasi Davlat geologiya qoʻmitasi “Uz-Kor Silicon” masʼuliyati cheklangan jamiyat qoʻshma korxonasiga Sarikoʻl, Tolakoʻl va Quduq istiqbolli maydonlarini geologik oʻrganish maqsadida yer osti uchastkalaridan foydalanish huquqi uchun uch yil muddatga belgilangan tartibda litsenziya bersin.

5. Samarqand va Qashqadaryo viloyatlari hokimliklari “Uz-Kor Silicon” masʼuliyati cheklangan jamiyat qoʻshma korxonasiga Sarikoʻl, Tolakoʻl va Quduq istiqbolli maydonlarida yer osti uchastkalarini geologik oʻrganish uchun zarur boʻlgan yer uchastkalarini belgilangan tartibda ajratsin.

6. Oʻzbekiston Respublikasi Tashqi ishlar vazirligi “Uz-Kor Silicon” masʼuliyati cheklangan jamiyat qoʻshma korxonasining buyurtmanomalariga binoan qoʻshma korxona faoliyatida ishtirok etadigan xorijiy mutaxassislarga kirish vizalari, shu jumladan koʻp martalik kirish vizalari belgilangan tartibda rasmiylashtirilishini taʼminlasin.

7. Oʻzbekiston Respublikasi Ichki ishlar vazirligi “Uz-Kor Silicon” masʼuliyati cheklangan jamiyat qoʻshma korxonasining buyurtmanomalariga binoan qoʻshma korxona faoliyatida ishtirok etadigan xorijiy mutaxassislarga koʻp martalik vizalar belgilangan tartibda berilishini, shuningdek ularning yashash joyida vaqtinchalik roʻyxatdan oʻtkazilishini va vaqtinchalik roʻyxatdan oʻtkazish muddati uzaytirilishini taʼminlasin.

8. Oʻzbekiston Respublikasi Mehnat va aholini ijtimoiy muhofaza qilish vazirligi “Uz-Kor Silicon” masʼuliyati cheklangan jamiyat qoʻshma korxonasiga yuqori malakali xorijiy mutaxassislarni jalb etishga belgilangan tartibda ruxsatnomalar berilishini taʼminlasin.

9. Mazkur qarorning bajarilishini nazorat qilish Oʻzbekiston Respublikasining Bosh vaziri Sh.M. Mirziyoyev zimmasiga yuklansin.

Oʻzbekiston Respublikasi Prezidenti I. KARIMOV

Toshkent sh.,

2008-yil 8-sentabr,

201-son