Oʻzbekiston Respublikasi Vazirlar Mahkamasi huzurida ijtimoiy tadqiqotlar institutini tashkil etish toʻgʻrisida (PQ-930-son)

30.07.2008

Oʻzbekiston Respublikasi Prezidentining

Qarori

Aholi turmush darajasi va sifatini oshirish muammolarini chuqur tizimli tadqiq qilish, aholining pul daromadlari oʻsishi surʼatlari va tarkibining, bozor ijtimoiy-iqtisodiy islohotlarini chuqurlashtirish sharoitida jamiyatdagi ijtimoiy tabaqalanish jarayonlarining kompleks ijtimoiy tekshirishlarini tashkil etish, shuningdek aholi turmush darajasini oshirish, ijtimoiy barqarorlik va muttasil ijtimoiy taraqqiyotni taʼminlash boʻyicha ilmiy asoslangan takliflarni ishlab chiqish maqsadida:

1. Oʻzbekiston Respublikasi Vazirlar Mahkamasi huzurida Ijtimoiy tadqiqotlar instituti (keyingi oʻrinlarda — Institut deb yuritiladi) tashkil etilsin.

Institut faoliyatini bevosita muvofiqlashtirish va boshqarish Oʻzbekiston Respublikasi Iqtisodiyot vazirligi zimmasiga yuklanadi.

2. Quyidagilar Institutning asosiy vazifalari va yoʻnalishlari etib belgilansin:

respublika aholisining turmush darajasini baholash boʻyicha ishlab chiqilgan obyektiv mezonlar asosida mamlakat va mintaqalar doirasida aholi turmush darajasi va sifatini oshirish, aholi farovonligi oʻzgarishlarining surʼatlari ustidan tizimli monitoring olib borish va tahlil etish;

aholi turmush darajasining turli koʻrsatkichlari, shu jumladan uning daromad miqdorlari va manbalarini tizimli ravishda ijtimoiy tadqiq qilish metodologiyasini ishlab chiqish va olib borish;

jamiyatning ijtimoiy tabaqalanish jarayonlari va surʼatini chuqur oʻrganish hamda monitoring qilish, ularning eng quyi holatlari oldini olish boʻyicha taklif va tavsiyalar ishlab chiqish;

mahalliy isteʼmol xususiyatlari, anʼanalar, tabiiy-iqlim sharoitlari va Oʻzbekistonning boshqa oʻziga xosliklarini hisobga olgan holda aholining turli guruhlari uchun isteʼmol savatining ilmiy asoslangan tarkibini belgilash, mamlakat va mintaqalar koʻlamida uning narxi oʻzgarishini monitoring qilish;

ijtimoiy-iqtisodiy koʻrsatkichlarni, aholi turmush darajasi va sifatini kuzatib borish hamda tahlil qilish bilan shugʻullanuvchi yetakchi xorijiy tadqiqotchilik, tahliliy markazlari va institutlarining ish tajribasini oʻrganish, shu asosda undan Institutning tadqiqot faoliyatida foydalanish chora-tadbirlarini ishlab chiqish;

aholi turmush darajasining holati va uni rivojlantirish istiqbollari, mamlakatdagi ijtimoiy-iqtisodiy vaziyat masalalari boʻyicha davlat hokimiyati va boshqaruv organlarini tezkor axborot-tahliliy maʼlumotlar bilan taʼminlash.

3. Belgilansinki:

Institut tadqiqotlarining eng muhim funksional yoʻnalishlari boʻyicha shakllantiriladigan loyihalar Institutning asosiy tarkibiy boʻlinmalari hisoblanadi;

tadqiqot loyihalariga ilmiy ish tajribasiga ega boʻlgan yuqori darajada malakali mutaxassislar orasidan tanlov asosida tayinlanadigan loyihalar rahbarlari boshchilik qiladilar;

qonun hujjatlariga muvofiq, loyihalarning rahbarlari va ijrochilari bilan bir yilga moʻljallangan, mavzu, maqsadlar, vazifalar va loyihani amalga oshirishning asosiy bosqichlari aniq koʻrsatilgan mehnat shartnomalari (kontraktlari) tuziladi;

loyihalar rahbarlarining hisobotlari Institut ilmiy kengashi majlislarida muntazam ravishda tinglab boriladi, ilmiy kengash yil yakunlari boʻyicha olib borilgan tadqiqotlar natijalari va sifatini baholaydi hamda loyiha doirasidagi tadqiqotlarni davom ettirish yoki uni yopish toʻgʻrisida qaror qabul qiladi;

Institut xodimlariga davlat boshqaruvi organlari xodimlari uchun belgilangan mehnatga haq toʻlash, mukofotlash va moddiy yordam koʻrsatish shartlari tatbiq etiladi.

4. Xodimlarning cheklangan soni 64 nafar (yordamchi va xizmat koʻrsatuvchi xodimlardan tashqari), shu jumladan 39 nafar ilmiy xodimlardan iborat boʻlgan Ijtimoiy tadqiqotlar instituti tuzilmasi ilovaga* muvofiq tasdiqlansin.

Belgilab qoʻyilsinki, Institut direktori Oʻzbekiston Respublikasi Vazirlar Mahkamasi tomonidan lavozimga tayinlanadi va ozod etiladi.

Institut direktoriga Oʻzbekiston Respublikasi Vazirlar Mahkamasi bilan kelishilgan holda Institutning tasdiqlangan tuzilmasiga zarur hollarda xodimlarning belgilangan cheklangan soni doirasida oʻzgartish kiritish huquqi berilsin.

* Ilova rus tilidagi matinda berilgan.

5. Oʻzbekiston Respublikasi Iqtisodiyot vazirligi (B. Xoʻjayev):

ikki hafta muddatda Ijtimoiy tadqiqotlar instituti toʻgʻrisidagi Nizomni tasdiqlasin;

ikki oy muddatda Institutning joylashtirilishini va uni zarur kompyuter texnikasi hamda nusxa koʻpaytirish texnikasi, dasturiy vositalar, idora mebellari hamda Institut samarali ish olib borishi uchun zarur boʻlgan boshqa moddiy-texnika vositalari, metodik materiallar bilan taʼminlasin;

2008-yilning yakunigacha Institut boʻlinmalarini ijtimoiy jarayonlarni tahlil qilish koʻnikmalariga ega, mamlakatda olib borilayotgan iqtisodiy islohotlar mohiyatini chuqur anglab yetgan yuqori malakali, tajribali mutaxassislar bilan toʻldirishni taʼminlasin .

6. Institut Oʻzbekiston Respublikasi Moliya vazirligi bilan kelishilgan holda Institutning shtat jadvalini ishlab chiqsin va belgilangan tartibda tasdiqlasin.

7. Institutga quyidagi huquqlar berilsin:

boshqa ilmiy-tadqiqot tashkilotlari, jamgʻarmalar, taʼlim muassasalari, shu jumladan xalqaro va xorijiy tashkilotlar bilan qoʻshma tadqiqotlar olib borish uchun shartnomalar tuzish;

ilmiy-tadqiqot loyihalari va dasturlarini ishlab chiqish uchun shartnoma asosida davlat boshqaruvi organlari, idoralar, banklar mutaxassislarini, tadqiqot markazlari xodimlarini, olimlar va taʼlim muassasalari oʻqituvchilarini, shu jumladan xorijiy muassasalardan jalb etish;

noshirlik faoliyatini amalga oshirish, turmush darajasi va inson rivoji muammolariga bagʻishlangan axborot-tahliliy sharhlar, maʼruzalarni chop etish;

Institut zimmasiga yuklangan vazifalar doirasida markaziy organlar, vazirliklar, idoralar va boshqa tashkilotlardan barcha zarur normativ, statistik va tahliliy axborotlarni soʻrash hamda bepul olish.

8. Quyidagilar Institutning moliyalash manbalari etib belgilansin:

Institut taʼminoti, uning moddiy-texnika bazasini shakllantirish, foydalanish va rivojlantirish, ijtimoiy tadqiqotlar oʻtkazish va Institutning boshqa ehtiyojlari uchun ajratiladigan maqsadli budjet mablagʻlari;

Oʻzbekiston Respublikasi Vazirlar Mahkamasi huzuridagi Fan va texnologiyalar rivojlanishini muvofiqlashtirish qoʻmitasi tomonidan oʻtkaziladigan grant tanlovlari natijalari boʻyicha ajratiladigan mablagʻlar;

vazirliklar va idoralarning buyurtmanomalari boʻyicha tadqiqotlar oʻtkazish uchun ular tomonidan ajratiladigan mablagʻlar;

xalqaro moliya institutlari va donor tashkilotlarning grantlari, amaldagi qonun hujjatlari doirasidagi boshqa mablagʻlar.

Belgilansinki, Institut daromadlari soliqqa tortish obyekti hisoblanmaydi.

9. Institutning oʻz ehtiyojlari uchun import qilinadigan jihozlar, jumladan kompyuter va telekommunikatsiya tizimlari, dasturiy taʼminot vositalari bojxona toʻlovlari (bojxona rasmiylashtiruvi yigʻimlaridan tashqari) toʻlashdan ozod qilinsin, boʻshaydigan mablagʻlar esa Institut zimmasiga yuklatilgan vazifalarni bajarishga yoʻnaltirsin.

10. Oʻzbekiston Respublikasi Davlat statistika qoʻmitasi aholi turmush darajasi bilan bogʻliq barcha oʻtkaziladigan ijtimoiy va budjet tadqiqotlariga oid maʼlumotlarni muntazam ravishda Institutga belgilangan tartibda bepul taqdim etib borsin.

Institut:

Oʻzbekiston Respublikasi Prezidenti farmonlari, qarorlari va farmoyishlari, Oliy Majlis materiallari, Vazirlar Mahkamasi qarorlari va farmoyishlari, vazirliklar va idoralarning normativ hamda yoʻriqnoma tarzidagi hujjatlari yuborilishi shart boʻlgan tashkilotlar roʻyxatiga;

Institut kutubxonasini shakllantirish uchun matbuot nashri va kitob mahsulotlaridan (ijtimoiy-siyosiy, iqtisodiy va huquqiy nashrlar) bittadan nazorat nusxalarini (1 nusxa) bepul oladigan tashkilotlar roʻyxatiga;

Oʻzbekiston Respublikasi Davlat statistika qoʻmitasi, Moliya vazirligi, Tashqi iqtisodiy aloqalar, investitsiyalar va savdo vazirligi, Mehnat va aholini ijtimoiy muhofaza qilish vazirligi, Davlat soliq qoʻmitasi, Davlat bojxona qoʻmitasi, Davlat raqobat qoʻmitasi, boshqa vazirliklar hamda idoralarining statistik axborotnomalari yuborilishi shart boʻlgan reyestrga kiritilsin.

11. Oʻzbekiston Respublikasi Moliya vazirligi (R. Azimov):

2008-yilda Institutning asoslangan hisob-kitoblari boʻyicha uning joriy taʼminoti, xodimlar mehnatiga haq toʻlash, ajratilgan binoni kapital va joriy taʼmirlash, mebel, tashkiliy texnika, aloqa vositalari bilan jihozlash, ikkita yengil avtomobilni xarid qilish va uning taʼminoti, axborotnoma nashrlari, shu jumladan xorijiy nashrlarga obunani tashkil etish, ijtimoiy tadqiqotlar oʻtkazish uchun mablagʻlar ajratsin;

2009-yildan boshlab fan uchun moʻljallangan mablagʻlar hisobidan har yili Institutga taʼminot, texnik jihozlash, moddiy-texnika bazasini mustahkamlash, axborotnoma nashrlari, shu jumladan xorijiy nashrlarga obunani tashkil etish, shuningdek muntazam ravishda ijtimoiy tadqiqotlar oʻtkazish uchun mablagʻlar ajratsin.

12. Toshkent shahar hokimligi ikki hafta muddatda Ijtimoiy tadqiqotlar institutini joylashtirish uchun bino ajratsin.

13. Oʻzbekiston Aloqa va axborotlashtirish agentligi (A. Aripov) bir oy muddatda Institutni zarur turdagi aloqa vositalari, jumladan hukumat aloqa vositasi bilan, shuningdek Internet tarmogʻidan foydalanishni belgilangan tartibda taʼminlasin.

14. Mazkur qarorning ijrosini nazorat qilish Oʻzbekiston Respublikasining Bosh vaziri Sh.M. Mirziyoyev zimmasiga yuklansin.

Oʻzbekiston Respublikasi Prezidenti I. KARIMOV

Toshkent sh.,

2008-yil 30-iyul,

PQ-930-son