Xorijiy fuqarolarni Oʻzbekiston Respublikasi taʼlim muassasalariga oʻqishga qabul qilish va oʻqitish tartibini takomillashtirish toʻgʻrisida (169-son)
04.08.2008
Oʻzbekiston Respublikasi Vazirlar Mahkamasining
qarori
Xorijiy davlatlar fuqarolarini Oʻzbekiston Respublikasi taʼlim muassasalariga oʻqishga qabul qilish va oʻqitish tizimini takomillashtirish, shuningdek Oʻzbekiston Respublikasining taʼlim va fan sohasidagi xalqaro shartnomalarini bajarish maqsadida Vazirlar Mahkamasi qaror qiladi:
1. Belgilab qoʻyilsinki:
xorijiy fuqarolarni Oʻzbekiston Respublikasi taʼlim muassasalariga oʻqishga qabul qilish Oʻzbekiston Respublikasining xalqaro shartnomalari, shuningdek jamoaviy va yakka tartibdagi (shu jumladan, kelish maqsadidan qatʼi nazar, respublikaga haqiqiy vizalar boʻyicha kelgan xorijiy fuqarolar bilan tuzilgan) Oʻzbekiston Respublikasi Oliy va oʻrta maxsus taʼlim vazirligi hamda Xalq taʼlimi vazirligi tomonidan belgilangan tartibda oldindan ekspertizadan va roʻyxatdan oʻtkaziladigan shartnomalar va kontraktlar asosida amalga oshiriladi;
xorijiy fuqarolarni oʻqishga qabul qilish va oʻqitish boʻyicha barcha ishlarni tashkil etish, oʻquv-metodik rahbarlik qilish va muvofiqlashtirish umumtaʼlim maktablarida — Oʻzbekiston Respublikasi Xalq taʼlimi vazirligi tomonidan, boshqa taʼlim muassasalarida — Oliy va oʻrta maxsus taʼlim vazirligi tomonidan amalga oshiriladi;
xorijiy fuqarolar Oʻzbekiston Respublikasi taʼlim muassasalariga toʻlov-kontrakt asosida hamda, agar qonun hujjatlari yoki Oʻzbekiston Respublikasining xalqaro shartnomalarida boshqacha tartib nazarda tutilmagan boʻlsa, Oʻzbekiston Respublikasi fuqarolari uchun belgilangan tartibda qabul qilinadi.
2. Xorijiy fuqarolarni Oʻzbekiston Respublikasi taʼlim muassasalariga oʻqishga qabul qilish va oʻqitish tartibi toʻgʻrisidagi Nizom ilovaga muvofiq tasdiqlansin.
3. Oʻzbekiston Respublikasi Oliy va oʻrta maxsus taʼlim vazirligi Moliya vazirligi va taʼlim muassasalariga ega boʻlgan boshqa manfaatdor vazirliklar va idoralar bilan kelishgan holda bir hafta muddatda Oʻzbekiston Respublikasi taʼlim muassasalariga qabul qilish boʻyicha Davlat komissiyasiga xorijiy fuqarolarning Oʻzbekiston Respublikasi taʼlim muassasalarida oʻqiganlik uchun toʻlov miqdorlari va tartibini, 2008/2009 oʻquv yiliga xorijiy fuqarolarning oliy taʼlim muassasalarida oʻqiganligi uchun toʻlov miqdorini oʻqitishning real xarajatlaridan kelib chiqib, 2 ming AQSH dollaridan 4 ming AQSH dollarigacha miqdorda belgilashni nazarda tutgan holda, tasdiqlash uchun kiritsin.
4. Oʻzbekiston Respublikasi Oliy va oʻrta maxsus taʼlim vazirligi, Xalq taʼlimi vazirligi tegishli vazirliklar va idoralar bilan birgalikda:
xorijiy fuqarolarni Oʻzbekiston Respublikasi taʼlim muassasalarida oʻqitish yuzasidan namunaviy shartnoma (kontrakt)larga oʻn kun muddatda zarur oʻzgartirish va qoʻshimchalar kiritsinlar;
xorijiy fuqarolar uchun til markazlarining zarur darajada ishlashi yuzasidan doimiy nazorat oʻrnatsinlar.
5. Oʻzbekiston Respublikasi Vazirlar Mahkamasining “Oʻzbekiston Respublikasida xorijiy fuqarolarni oʻqitish toʻgʻrisida” 1994-yil 24-maydagi 266-son qarori oʻz kuchini yoʻqotgan deb hisoblansin.
6. Oʻzbekiston Respublikasi Oliy va oʻrta maxsus taʼlim vazirligi Adliya vazirligi hamda boshqa manfaatdor vazirliklar va idoralar bilan birgalikda bir oy muddatda Vazirlar Mahkamasiga qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida takliflar kiritsin.
7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Qosimov zimmasiga yuklansin.
Oʻzbekiston Respublikasining Bosh vaziri Sh. MIRZIYOYEV
Toshkent sh.,
2008-yil 4-avgust,
169-son
Vazirlar Mahkamasining 2008-yil 4-avgustdagi 169-son qaroriga ILOVA
Xorijiy fuqarolarni Oʻzbekiston Respublikasi taʼlim muassasalariga oʻqishga qabul qilish va oʻqitish tartibi toʻgʻrisida
NIZOM
I. Umumiy qoidalar
1. Mazkur Nizom xorijiy fuqarolarni Oʻzbekiston Respublikasi taʼlim muassasalariga oʻqishga qabul qilish va oʻqitish tartibini belgilaydi.
2. Xorijiy fuqarolarni Oʻzbekiston Respublikasi taʼlim muassasalariga oʻqishga qabul qilish va oʻqitish “Taʼlim toʻgʻrisida”gi Qonunga, boshqa qonunchilik hujjatlariga va ushbu Nizomga muvofiq amalga oshiriladi.
3. Xorijiy fuqarolarni oʻqitish umumtaʼlim maktablari boʻyicha — Oʻzbekiston Respublikasi Xalq taʼlimi vazirligi tomonidan belgilanadigan, boshqa taʼlim muassasalari boʻyicha — Oliy va oʻrta maxsus taʼlim vazirligi tomonidan belgilanadigan taʼlim muassasalarida amalga oshiriladi.
4. Oʻzbekiston Respublikasi taʼlim muassasalarida xorijiy fuqarolarni oʻqitish tegishli taʼlim muassasalarining taʼlim dasturlarida nazarda tutilgan tillarda olib boriladi.
5. Xorijiy fuqarolarni oʻqishga qabul qilish va oʻqitish boʻyicha barcha ishlarni tashkil etish, oʻquv-metodik rahbarlik qilish va muvofiqlashtirish umumtaʼlim maktablarida Oʻzbekiston Respublikasi Xalq taʼlimi vazirligi tomonidan, boshqa taʼlim muassasalarida — Oliy va oʻrta maxsus taʼlim vazirligi tomonidan amalga oshiriladi.
II. Oʻqishga qabul qilish tartibi, shartlari va oʻqitish turlari
6. Oʻzbekiston Respublikasida xorijiy fuqarolarni taʼlim muassasalariga oʻqishga qabul qilish:
a) Oʻzbekiston Respublikasining xalqaro shartnomalari;
b) Oʻzbekiston Respublikasi Oliy va oʻrta maxsus taʼlim vazirligi va Xalq taʼlimi vazirligi tomonidan belgilangan tartibda dastlabki ekspertizadan va roʻyxatdan oʻtkaziladigan jamoaviy va shaxsiy shartnomalar hamda kontraktlar (shu jumladan, kelish maqsadlaridan qatʼi nazar respublikaga haqiqiy vizalar boʻyicha kelgan xorijiy fuqarolar bilan tuzilgan) asosida amalga oshiriladi.
7. Xorijiy fuqarolar xohishlariga koʻra:
umumiy oʻrta maʼlumot;
oʻrta maxsus, kasb-hunar taʼlimi;
oliy maʼlumot;
oliy taʼlim muassasasidan keyingi taʼlim olishlari mumkin.
8. Xorijiy fuqarolar Oʻzbekiston Respublikasi taʼlim muassasalariga toʻlov-kontrakt asosida hamda, agar qonunchilik yoki Oʻzbekiston Respublikasining xalqaro shartnomalarida boshqacha tartib nazarda tutilmagan boʻlsa, Oʻzbekiston Respublikasi fuqarolari uchun belgilangan tartibda qabul qilinadi.
9. Oʻzbekiston Respublikasi taʼlim muassasalarida toʻlov-kontrakt asosida oʻqish qiymati Oʻzbekiston Respublikasi Moliya vazirligi va taʼlim muassasalariga ega boʻlgan boshqa vazirliklar va idoralar bilan kelishgan holda Oliy va oʻrta maxsus taʼlim vazirligining taklifi asosida Oʻzbekiston Respublikasi taʼlim muassasalariga qabul qilish boʻyicha Davlat komissiyasi tomonidan belgilanadi.
10. Oʻrta maxsus, kasb-hunar taʼlimi muassasalariga umumiy oʻrta taʼlim maʼlumotiga muvofiq boʻlgan maʼlumotga ega boʻlgan xorijiy fuqarolar qabul qilinadi.
11. Oliy taʼlim muassasalariga umumiy oʻrta yoki oʻrta maxsus, kasb-hunar taʼlimi maʼlumotiga muvofiq boʻlgan maʼlumotga ega xorijiy fuqarolar qabul qilinishi mumkin.
12. Xorijiy fuqarolar oliy taʼlim muassasalari bakalavriatiga oliy taʼlim muassasasi tomonidan belgilanadigan tartibda oʻtkaziladigan suhbat natijasiga koʻra qabul qilinadi.
Belgilangan tartibda taqdim etilgan suhbat natijalari Oʻzbekiston Respublikasi taʼlim muassasalariga qabul qilish boʻyicha davlat komissiyasi tomonidan koʻrib chiqiladi hamda Oʻzbekiston Respublikasi Oliy va oʻrta maxsus taʼlim vazirligining xorijiy fuqarolarni oliy taʼlim muassasasiga oʻqishga qabul qilish yuzasidan qaror qabul qilishi uchun asos hisoblanadi. Oʻzbekiston Respublikasi oliy va oʻrta maxsus taʼlim vazirining buyrugʻi asosida oliy taʼlim muassasalari rahbarlari oʻqishga qabul qilish toʻgʻrisida tegishli buyruq chiqaradilar.
13. Oʻzbekiston Respublikasining tayanch doktoranturasi va doktoranturasiga oliy maʼlumotga muvofiq boʻlgan maʼlumotga ega boʻlgan xorijiy fuqarolar qabul qilinishi mumkin.
Aspiranturaga kiruvchi xorijiy fuqarolar Oʻzbekiston Respublikasida belgilangan talablarga muvofiq tayyorlangan referat yoki eʼlon qilingan ishlarining rasmiy ravishda tasdiqlangan roʻyxatini taqdim etishlari kerak.
14. Oʻzbekiston Respublikasi Ichki ishlar vazirligi Oʻzbekiston Respublikasi Oliy va oʻrta maxsus taʼlim vazirligi buyurtmanomasiga binoan, belgilangan tartibda xorijiy fuqarolarga vizalar berish va ularning muddatini uzaytirish, shuningdek ularning vaqtincha turgan joyi boʻyicha roʻyxatga olishni va uning muddatini uzaytirishni taʼminlaydi.
15. Oʻqishni tugatgandan keyin xorijiy fuqarolarga maʼlumoti toʻgʻrisida belgilangan namunadagi tegishli hujjatlar beriladi.
16. Xorijiy fuqarolar oʻqish davrida ushbu Nizomning 6-bandida koʻrsatilgan shartnomalar va kontraktlarda nazarda tutilgan hollarda Oʻzbekiston Respublikasiga oila aʼzolari va boshqa qarindoshlari bilan kelishlari mumkin.
17. Oʻqish uchun kelgan xorijiy fuqarolar tibbiy tekshiruvdan oʻtadilar. Tibbiy tekshiruvdan oʻtish tartibi va mavjudligi aniqlangan taqdirda Oʻzbekiston Respublikasi taʼlim muassasalariga oʻqishga qabul qilish uchun ruxsat berilmaydigan kasalliklar roʻyxati Oʻzbekiston Respublikasi Sogʻliqni saqlash vazirligi tomonidan belgilanadi.
III. Hujjatlarning roʻyxati va ularni taqdim etish tartibi
18. Xorijiy fuqarolar Oʻzbekiston Respublikasi taʼlim muassasalariga oʻqishga kirish uchun tegishli taʼlim muassasasiga quyidagi hujjatlarni taqdim etadilar:
oʻqishga qabul qilish haqida ariza;
oʻrganilgan fanlar va ular boʻyicha imtihonlarda olingan baholar (ballar) koʻrsatilgan maʼlumoti haqidagi hujjatlarning asl nusxalari;
referat yoki eʼlon qilingan ishlarning rasmiy ravishda tasdiqlangan roʻyxati (tayanch doktoranturaga kiruvchilar uchun);
sogʻligʻi toʻgʻrisidagi tibbiy xulosa;
milliy pasport (amaldagi vizasi bilan) yoki tugʻilganlik haqidagi guvohnoma;
4 x 6 sm oʻlchamdagi 6 ta fotosurat.
Hujjatlarni taqdim etish va koʻrib chiqish tartibi Oʻzbekiston Respublikasi Oliy va oʻrta maxsus taʼlim vazirligi va Xalq taʼlimi vazirligi tomonidan tasdiqlanadigan yoʻriqnomaga muvofiq belgilanadi.
IV. Tayyorlov oʻquvi
19. Oliy va oʻrta maxsus, kasb-hunar taʼlimi muassasalariga, tayanch doktorantura, adyunkturaga, doktoranturaga oʻqishga kirishni xohlovchi, oʻzbek yoki rus tilini bilmaydigan xorijiy fuqarolar Oʻzbekiston Respublikasi Oliy va oʻrta maxsus taʼlim vazirligi tomonidan belgilanadigan tegishli muassasalarda oʻqitiladi. Oʻzbek yoki rus tilini Oʻzbekiston Respublikasidan tashqarida oʻrgangan xorijiy fuqarolarga oʻqishga kirish uchun yoʻllanmalar ularning tilni bilishlari boʻyicha Oʻzbekiston Respublikasi Oliy va oʻrta maxsus taʼlim vazirligi tomonidan belgilanadigan tartibda baholanganidan keyin beriladi.
20. Umumtaʼlim maktablariga oʻqishga kirayotgan xorijiy fuqarolar, zarurat boʻlganda Oʻzbekiston Respublikasi Xalq taʼlimi vazirligi tomonidan belgilanadigan tartibda, oʻqiyotgan joyida til oʻrganish boʻyicha tayyorgarlik kursini oʻtaydilar.
21. Til oʻrganish boʻyicha tayyorgarlik tugagach imtihonlar oʻtkaziladi. Imtihonlarni muvaffaqiyatli topshirgan xorijiy fuqarolarga belgilangan namunadagi guvohnoma (sertifikat) va oʻqishga yoʻllanma beriladi. Oʻqish davrida zarur umumtaʼlim bilimlarini egallay olmagan va til oʻrganishga boʻlgan layoqatini namoyon qila olmagan xorijiy fuqarolarga oʻqish uchun yoʻllanma berilmaydi hamda ular roʻyxatdan chiqariladi.
V. Oʻzbekiston Respublikasida taʼlim olayotgan xorijiy fuqarolarning huquq va majburiyatlari
22. Xorijiy oʻquvchilar quyidagi huquqlarga ega:
kafedralarning ilmiy-tadqiqot ishlarida, talabalarning ilmiy jamiyatlari va toʻgaraklarida qatnashish;
taʼlim muassasalarining kutubxonalari, sport komplekslari, klublari va madaniyat saroylaridan foydalanish;
dam olishning uyushtirilgan turlarida qatnashish.
23. Xorijiy oʻquvchilar quyidagilarga majbur:
Oʻzbekiston Respublikasi Konstitutsiyasiga va boshqa qonunchilik hujjatlariga amal qilish, mahalliy urf-odat va anʼanalarga hurmat bilan munosabatda boʻlish, respublikada xorijiy fuqarolarning boʻlishi va harakatlanishi boʻyicha belgilangan qoidalarni bajarish;
intizomga rioya qilish, mashgʻulotlarga qatnashish, oʻquv rejalari va dasturlarida nazarda tutilgan oʻquv va ishlab chiqarish ishlarining barcha turlarini bajarish, imtihon va sinovlarni belgilangan muddatlarda topshirish;
taʼlim muassasasining va talabalar yotoqxonasining ichki tartib-qoidalarini bajarish;
taʼlim muassasasi rahbarlarining koʻrsatma va farmoyishlarini bajarish.
24. Oʻqishda oʻzlashtirmaslik, intizomni, taʼlim muassasasi va talabalar yotoqxonasining ichki tartib-qoidalarini buzganlik uchun, shuningdek Oʻzbekiston Respublikasining normativ-huquqiy hujjatlarida nazarda tutilgan boshqa sabablarga koʻra xorijiy oʻquvchilarga nisbatan taʼlim muassasasi roʻyxatidan chiqarib yuborishgacha boʻlgan maʼmuriy choralar koʻrilishi mumkin;
Oʻzbekiston Respublikasi hududida boʻlish qoidalarini buzganlik uchun ular belgilangan tartibda respublikadan tashqariga chiqarib yuboriladi.
Oʻqish uchun kelgan xorijiy fuqarolarning zarur mablagʻlari boʻlmagan taqdirda ularni Oʻzbekiston Respublikasidan chiqarib yuborish boʻyicha xarajatlar tegishli taʼlim muassasasi tomonidan amalga oshiriladi.
25. Oʻzbekiston Respublikasi hududida jinoyat sodir etgan xorijiy fuqarolar, agar Oʻzbekiston Respublikasining xalqaro shartnomalarida boshqacha qoida nazarda tutilmagan boʻlsa, Oʻzbekiston Respublikasi qonunchiligiga binoan javobgarlikka tortiladi.
26. Oʻqishni tugatgan yoki taʼlim muassasalari roʻyxatidan oʻchirilgan xorijiy fuqarolar bir oy muddatda Oʻzbekiston Respublikasidan chiqib ketishi shart, Oʻzbekiston Respublikasining xalqaro shartnomalarida, shuningdek jamoaviy va shaxsiy shartnomalar hamda kontraktlarda nazarda tutilgan holatlar bundan mustasno.
27. Taʼlim muassasalarida oʻquv yili 2-sentabrdan boshlanadi. Taʼtillarning boshlanish va tugash vaqti, ularning davom etish muddati muayyan taʼlim muassasasining oʻquv rejalariga muvofiq belgilanadi.
VI. Xorijiy fuqarolarni ushbu Nizom bilan tanishtirish tartibi
28. Oʻzbekiston Respublikasi taʼlim muassasalariga oʻqishga kirish istagini bildirgan xorijiy fuqarolar mazkur Nizom bilan tanishtirilishi va ular Nizom talablarini bajarishi toʻgʻrisida oʻz majburiyatlarini yozma ravishda tasdiqlashi kerak.