Bolalar musiqa va sanʼat maktablarining moddiy-texnik bazasini mustahkamlash va ularning faoliyatini yanada yaxshilash boʻyicha 2009-2014-yillarga moʻljallangan Davlat dasturi toʻgʻrisida (PQ-910-son)

08.07.2008

OʻZBEKISTON RESPUBLIKASI PREZIDENTINING

QARORI

Unib-oʻsib kelayotgan yosh avlodning isteʼdodini har tomonlama kamol toptirish va madaniy saviyasini yuksaltirish, yoshlarimizning milliy va jahon musiqalari, tasviriy sanʼatining yuksak namunalaridan keng bahramand boʻlishi uchun zarur sharoitlar yaratish, boshlangʻich musiqiy taʼlim tizimini tubdan takomillashtirish, bolalar musiqa va sanʼat maktablarini rivojlantirish hamda zamonaviy moddiy-texnik bazasini shakllantirish, ularni musiqiy madaniyat va sanʼat sohasidagi yuqori malakali pedagog kadrlar va mutaxassislar bilan taʼminlash maqsadida:

1. Oʻzbekiston Respublikasi Madaniyat vazirligi zimmasiga quyidagi vazifalar yuklansin:

boshlangʻich musiqiy taʼlimni tashkil etish va uning rivojlanishini taʼminlash, ushbu yoʻnalish boʻyicha mutaxassislar hamda pedagoglarning mahorati va malaka darajasini oshirish;

bolalar musiqa va sanʼat maktablarida taʼlim tizimini takomillashtirish, oʻsib kelayotgan yosh avlodning madaniy saviyasini yuksaltirish, ular orasida isteʼdodlarni har tomonlama rivojlantirish, yoshlarning milliy va jahon sanʼatining yuksak namunalaridan keng bahramand boʻlishi uchun zarur shart-sharoitlar yaratish;

R. Glier nomidagi va V. Uspenskiy nomidagi respublika ixtisoslashtirilgan musiqa akademik litseylarining moddiy-texnik hamda umumtaʼlim oʻquv bazasini rivojlantirish va mustahkamlashni, ularning samarali faoliyat koʻrsatishi uchun zarur sharoitlar yaratilishini taʼminlash.

R. Glier nomidagi va V. Uspenskiy nomidagi respublika ixtisoslashtirilgan musiqa akademik litseylarining kasbiy yoʻnalishiga oid faoliyatini oʻquv-metodik jihatdan taʼminlash vazifasi Oʻzbekiston davlat konservatoriyasi zimmasiga yuklanishi belgilab qoʻyilsin.

2. Oʻzbekiston Respublikasi Prezidentining 2008-yil 7-yanvardagi F-2908-sonli farmoyishiga binoan tuzilgan Respublika komissiyasi tomonidan ishlab chiqilgan Bolalar musiqa va sanʼat maktablarining moddiy-texnik bazasini mustahkamlash va ularning faoliyatini yanada yaxshilash boʻyicha 2009—2014-yillarga moʻljallangan, quyidagi masalalarni oʻz ichiga olgan Davlat dasturi (keyingi oʻrinlarda Davlat dasturi deb yuritiladi) tasdiqlansin:

2009—2014-yillarda bolalar musiqa va sanʼat maktablarining moddiy-texnik bazasini mustahkamlash, ularning faoliyatini yanada yaxshilash tadbirlari 1-ilovaga muvofiq;

2009—2014-yillarda yangitdan quriladigan hamda kapital rekonstruksiya qilinadigan bolalar musiqa va sanʼat maktablarining asosiy parametrlari 2 va 3-ilovalarga* muvofiq.

* 2-3-ilovalar rus tilidagi matnda berilgan.

Oʻzbekiston Respublikasi “Davarxitektqurilish” qoʻmitasi va Xalq taʼlimi vazirligi tomonidan bolalar musiqa taʼlimi sohasidagi mutaxassis va pedagoglarni jalb etgan holda, bolalar musiqa va sanʼat maktablarining 1-tipi uchun 200 oʻquvchiga va 2-tipi uchun 150 oʻquvchiga moʻljallangan ikkita namunaviy loyiha ishlab chiqilgani maʼlumot uchun qabul qilinsin.

Bolalar musiqa va sanʼat maktablarini kapital rekonstruksiya qilish Oʻzbekiston Respublikasi “Davarxitektqurilish” qoʻmitasi va Xalq taʼlimi vazirligi tomonidan tasdiqlangan 1-va 2-tipdagi namunaviy loyihalarga qatʼiy muvofiq ravishda amalga oshirilishi lozimligi belgilab qoʻyilsin.

3. Oʻzbekiston Respublikasi Iqtisodiyot vazirligi, Moliya vazirligi, Xalq taʼlimi vazirligi, Xalq taʼlimi vazirligi huzuridagi Bolalar sportini rivojlantirish jamgʻarmasi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari:

ushbu qarorga binoan tasdiqlangan Davlat dasturida nazarda tutilgan chora-tadbirlar belgilangan muddatlarda samarali va sifatli bajarilishini taʼminlasin;

har yili Investitsiya dasturi loyihasini va qurilishlarning manzilli roʻyxatlarini shakllantirishida bolalar musiqa va sanʼat maktablarining aniq soni va roʻyxatini koʻrsatgan holda, ularning yangilarini qurish va kapital rekonstruksiya qilish, zarur asboblar, uskunalar va inventarlar bilan jihozlash boʻyicha ishlarni moliyalashtirish hajmlarini belgilasin;

2009-2010-yillarga moʻljallangan Investitsiya dasturi loyihasi va Davlat budjeti parametrlarini shakllantirishda R. Glier nomidagi va V. Uspenskiy nomidagi akademik litseylarni kengaytirish va rekonstruksiya qilish uchun zarur budjet mablagʻlari, shuningdek, ularning moddiy-texnik bazasini mustahkamlash uchun mablagʻlarni nazarda tutsin.

4. Bolalar musiqa va sanʼat maktablarini yangitdan qurish uchun maydonlarni tanlashda tasdiqlangan normativ va parametrlarga muvofiq ularning, qoida tariqasida, albatta respublika tuman va shaharlarining turar-joy massivlarida joylashtirilishi hisobga olinsin.

5. Quyidagilar belgilansin:

bolalar musiqa va sanʼat maktablarini qurish va kapital rekonstruksiya qilish boʻyicha buyurtmachi vazifasi Oʻzbekiston Respublikasi Xalq taʼlimi vazirligi huzuridagi Bolalar sportini rivojlantirish jamgʻarmasi va uning joylardagi tuzilmalari zimmasiga yuklatiladi;

mahalliy shart-sharoitlarni hisobga olgan holda tasdiqlangan namunaviy loyihalar va loyihaga tegishli qarorlardan har qanday chetga chiqishlarga faqat bosh loyiha instituti bilan kelishilgan va Oʻzbekiston Respublikasi “Davarxitektqurilish” qoʻmitasi tomonidan tasdiqlangan taqdirdagina yoʻl qoʻyiladi;

yangitdan qurilgan hamda kapital rekonstruksiya qilingan bolalar musiqa va sanʼat maktablari obyektlarini foydalanishga qabul qilish 4-ilovaga muvofiq tarkibdagi Davlat komissiyasi tomonidan tasdiqlangan sifat standartlari va namunaviy loyihalarga qatʼiy muvofiq ravishda amalga oshiriladi;

bolalar musiqa va sanʼat maktablarining samarali faoliyat koʻrsatishi, ularning har tomonlama toʻliq ishlashini taʼminlash hamda malakali pedagog kadrlar bilan toʻldirish masʼuliyati Oʻzbekiston Respublikasi Madaniyat vazirligi zimmasiga yuklatiladi.

6. Quyidagilar:

moliyalashtirish manbalaridan qatʼi nazar, namunaviy loyihalarga asoslanmagan hamda tasdiqlangan qurilish normalari va standartlariga mos kelmaydigan yangi bolalar musiqa va sanʼat maktablari qurish va ularni kapital rekonstruksiya qilish;

yangitdan quriladigan va kapital rekonstruksiya qilinadigan bolalar musiqa va sanʼat maktablarida tiklash ishlarini amalga oshirishda 2 va 3-ilovalarda koʻrsatilgan parametrlarga qattiq rioya qilinsin va ularni bir toifadan boshqa toifaga oʻtkazish qatʼiyan taqiqlansin.

7. Oʻzbekiston Respublikasi “Davarxitektqurilish” qoʻmitasi Xalq taʼlimi vazirligi, Xalq taʼlimi vazirligi huzuridagi Bolalar sportini rivojlantirish jamgʻarmasi bilan birgalikda:

bolalar musiqa va sanʼat maktablarini qurish va kapital rekonstruksiya qilish uchun tasdiqlangan namunaviy loyihalar boʻyicha ishlarni batamom tugatib topshirish sharti bilan tanlov pudrat tender savdolarini oʻtkazish oʻz vaqtida va aniq tashkil qilinishini taʼminlasin;

buyurtmachi va pudratchi oʻrtasidagi shartnoma majburiyatlari bajarilishi ustidan, jumladan, tasdiqlangan namunaviy loyihalarga, qurilish normalari va qoidalariga muvofiq bajarilgan loyiha va qurilish ishlarining sifatiga qatʼiy rioya etilishi ustidan qattiq monitoring oʻrnatsin.

8. Oʻzbekiston Respublikasi Xalq taʼlimi vazirligi huzuridagi Bolalar sportini rivojlantirish jamgʻarmasi, “Davarxitektqurilish” qoʻmitasi rahbarlari, Qoraqalpogʻiston Respublikasi Vazirlar Kengashi raisi, viloyatlar va Toshkent shahar hokimlari zimmasiga:

bolalar musiqa va sanʼat maktablari obyektlarini qurish hamda kapital rekonstruksiya qilish manzilli dasturiga kiritilgan obyektlar boʻyicha tanlov pudrat tender savdolari oʻz vaqtida oʻtkazilishi;

bolalar musiqa va sanʼat maktablari obyektlaridagi qurilish-montaj ishlarini amalga oshirishda namunaviy loyihalarga, shuningdek, tasdiqlangan qurilish norma va qoidalariga qatʼiy rioya etilishi boʻyicha shaxsiy masʼuliyat yuklansin.

9. Oʻzbekiston Respublikasi Xalq taʼlimi vazirligi Tashqi iqtisodiy aloqalar, investitsiyalar va savdo vazirligi, Iqtisodiyot vazirligi, Moliya vazirligi bilan birgalikda tasdiqlangan Davlat dasturiga kiritilgan bolalar musiqa va sanʼat maktablarini rivojlantirish va moddiy-texnik bazasini yaxshilash, shu jumladan, ularni jihozlash uchun imtiyozli shartlar asosidagi xorijiy kreditlar va grantlarni jalb etish borasidagi ishlarni faollashtirsin.

10. Vazirlar Mahkamasi tomonidan tasdiqlanadigan roʻyxat boʻyicha Davlat dasturi doirasida bolalar musiqa va sanʼat maktablarining moddiy-texnika bazasini mustahkamlash uchun olib kelinadigan musiqa asboblari va maxsus uskunalar 2015-yil 1-yanvargacha boʻlgan muddatda bojxona toʻlovlaridan ozod qilinsin (bojxona rasmiylashtiruvi yigʻimlari bundan mustasno).

11. Oʻzbekiston Respublikasi Prezidentining 2008-yil 7-yanvardagi F-2908-sonli farmoyishi asosida tuzilgan Respublika komissiyasiga Oʻzbekiston Respublikasi Iqtisodiyot vazirligi, Xalq taʼlimi vazirligi, Moliya vazirligining taqdimnomasiga binoan yangitdan quriladigan hamda kapital rekonstruksiya qilinadigan bolalar musiqa va sanʼat maktablarining har yili tasdiqlanadigan manzilli roʻyxatiga tasdiqlangan umumiy parametrlar doirasida oʻzgartirishlar kiritish huquqi berilsin.

13. Respublika komissiyasi (Sh.M. Mirziyoyev):

bolalar musiqa va sanʼat maktablarining moddiy-texnik bazasini mustahkamlash va ularning faoliyatini yanada yaxshilash boʻyicha 2009—2014-yillarga moʻljallangan Davlat dasturining amalga oshirilishi ustidan tizimli monitoring olib borsin;

har yili yarim yil va kalendar yili yakunlari boʻyicha Vazirlar Mahkamasining majlislarida tasdiqlangan Davlat dasturini amalga oshirish natijalarini muhokama qilib borsin.

14. Oʻzbekiston Respublikasi Xalq taʼlimi vazirligi boshqa manfaatdor vazirliklar va idoralar bilan birgalikda bir oy muddatda qonun hujjatlariga ushbu qarordan kelib chiqadigan oʻzgartish va qoʻshimchalar toʻgʻrisida Vazirlar Mahkamasiga takliflar kiritsin.

15. Mazkur qarorning ijrosini nazorat qilish Oʻzbekiston Respublikasi Bosh vaziri Sh.M. Mirziyoyev zimmasiga yuklansin.

Oʻzbekiston Respublikasi Prezidenti I. KARIMOV

Toshkent sh.,

2008-yil 8-iyul,

PQ-910-son

Oʻzbekiston Respublikasi Prezidentining 2008-yil 8-iyuldagi PQ-910-son qaroriga 1-ILOVA

Bolalar musiqa va sanʼat maktablarining moddiy-texnik bazasini mustahkamlash va ularning faoliyatini yanada yaxshilash boʻyicha 2009—2014-yillarga moʻljallangan tadbirlar

Oʻzbekiston Respublikasi Prezidentining 2008-yil 8-iyuldagi PQ-910-son qaroriga 4-ILOVA

Yangitdan qurilgan hamda kapital rekonstruksiya qilingan bolalar musiqa va sanʼat maktablari obyektlarini foydalanishga qabul qilish boʻyicha Davlat komissiyasi

TARKIBI

Gʻ. Shoumarov — xalq taʼlimi vaziri, komissiya raisi A.R. Toxtayev — Davlat arxitektura va qurilish qoʻmitasi raisi oʻrinbosari A.M. Achilov — Bolalar sportini rivojlantirish jamgʻarmasi ijrochi direktori, xalq taʼlimi vaziri oʻrinbosari J.A. Qoʻchqorov — moliya vaziri oʻrinbosari R.Sh. Shoabduraxmanov — iqtisodiyot vaziri oʻrinbosari A.X. Xaydarov — madaniyat va sport ishlari vaziri oʻrinbosari B.I. Niyazmatov — Oʻzbekiston Respublikasi Bosh davlat sanitariya vrachi, sogʻliqni saqlash vaziri oʻrinbosari A.X. Kuldashev — ichki ishlar vaziri oʻrinbosari

Komissiya tarkibiga lavozimi boʻyicha Qoraqalpogʻiston Respublikasi Vazirlar Kengashi raisi oʻrinbosari, viloyatlar va Toshkent shahar hokimlarining qurilish masalalari boʻyicha oʻrinbosarlari, Qoraqalpogʻiston Respublikasi xalq taʼlimi vaziri, viloyatlar va Toshkent shahar xalq taʼlimi boshqarmalari boshliqlari, bosh loyiha institutlari rahbarlari — cheklangan normativ xarajatlar va bolalar musiqa va sanʼat maktablarining namunaviy loyihalarini ishlab chiquvchilar kiradi.

Izoh: Komissiya aʼzolari boshqa ishga oʻtgan taqdirda uning tarkibiga ushbu lavozimga yangidan tayinlangan shaxslar kiritiladi.