Bugʻdoy, un, guruch va non-bulka mahsulotlarini olib chiqib ketish hollari ustidan nazoratni kuchaytirish va ularning oldini olishga oid qoʻshimcha chora-tadbirlar toʻgʻrisida (153-son)

08.07.2008

Oʻzbekiston Respublikasi Vazirlar Mahkamasining

qarori

Vazirlar Mahkamasi qayd etadiki, respublikada ichki isteʼmol bozorini oziq-ovqat mahsulotlarining muhim turlari bilan barqaror va kafolatli taʼminlashga yoʻnaltirilgan shart-sharoitlar yaratish boʻyicha chora-tadbirlar izchillik bilan amalga oshirilmoqda.

Shu bilan birga, oʻtkazilgan tekshirishlar bugʻdoy, un, guruch va ayniqsa non-bulka mahsulotlarini olib chiqib ketish taqiqlanishiga qaramasdan, ularni Oʻzbekiston Respublikasi hududidan olib chiqib ketishga urinish hollari mavjudligini koʻrsatmoqda. Oʻzbekiston Respublikasi Davlat bojxona qoʻmitasi va uning joylardagi boʻlinmalari tomonidan olib chiqib ketish hollari ustidan nazorat va ularning oldini olish zarur darajada taʼminlanmayapti.

Bugʻdoy, un, guruch va ayniqsa non-bulka mahsulotlarini olib chiqib ketish ustidan nazoratni kuchaytirish va oldini olish maqsadida Vazirlar Mahkamasi qaror qiladi:

1. Oʻzbekiston Respublikasi Davlat bojxona qoʻmitasi, Qoraqalpogʻiston Respublikasi Vazirlar Kengashi, viloyatlar, tumanlar va shaharlar hokimliklari Oʻzbekiston Respublikasi Prezidentining “Tashqi bozorlarda mahalliy mahsulotlar eksport qilinishini ragʻbatlantirish va raqobatbardoshligini taʼminlash yuzasidan qoʻshimcha chora-tadbirlar toʻgʻrisida” 2017-yil 15-dekabrdagi PF-5286-son Farmoni talablarining soʻzsiz bajarilishi ustidan nazoratni kuchaytirsinlar.

2. Oʻzbekiston Respublikasi Davlat bojxona qoʻmitasi Ichki ishlar vazirligi va Davlat xavfsizlik xizmati Chegara qoʻshinlari bilan birgalikda:

Oʻzbekiston Respublikasi Davlat chegaralari boʻyicha joylashgan chegara yonidagi temir yoʻllar va avtomobil oʻtish joylari hamda aylanma yoʻllar orqali bugʻdoy, un, guruch, ayniqsa non-bulka mahsulotlarini olib chiqib ketish hollarini bartaraf etish va ularning oldini olish yuzasidan qattiq tezkor chora-tadbirlar koʻrsin;

bugʻdoy, un, guruch va ayniqsa non-bulka mahsulotlarini olib chiqib ketish holatlarini bartaraf etish boʻyicha joylarda amalga oshirilayotgan ishlar toʻgʻrisida har oʻn kunda Vazirlar Mahkamasiga axborot bersin.

3. Oʻzbekiston Respublikasining huquqni muhofaza qilish organlari bugʻdoy, un, guruch va ayniqsa non-bulka mahsulotlarini olib chiqib ketishga uringan shaxslarni qonun hujjatlariga muvofiq javobgarlikka tortsinlar.

4. Oʻzbekiston Respublikasi Bosh prokuraturasiga bugʻdoy, un, guruch va ayniqsa non-bulka mahsulotlarini olib chiqib ketayotgan shaxslarni oʻz vaqtida qatʼiy javobgarlikka tortish boʻyicha qonun hujjatlarida belgilangan chora-tadbirlarga soʻzsiz rioya qilinishi ustidan prokuror nazoratini kuchaytirish tavsiya etilsin.

5. Oʻzbekiston Milliy axborot agentligi, Oʻzbekiston milliy teleradiokompaniyasi va boshqa ommaviy axborot vositalari radio, televideniye va matbuotda respublika tashqarisiga oziq-ovqat tovarlarining muhim turlarini olib chiqib ketishga urinish hollari fosh qilinishini har tomonlama yoritsinlar hamda bugʻdoy, un, guruch va ayniqsa non-bulka mahsulotlarini respublika tashqarisiga olib chiqib ketganlik uchun javobgarlik toʻgʻrisida aholi orasida keng tushuntirish ishlarini olib borsinlar.

6. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2008-yil 8-iyul,

153-son