“Korxonalar, birlashmalar va tashkilotlardan olinadigan soliqlar toʻgʻrisida”gi Oʻzbekiston Respublikasi Qonunini kuchga kiritish tartibi haqida (226-XII-son)

15.02.1991

Oʻzbekiston Respublikasi Oliy Kengashining

Qarori

Oʻzbekiston Respublikasi Oliy Kengashi qaror qiladi:

1. “Korxonalar, birlashmalar va tashkilotlardan olinadigan soliqlar toʻgʻrisida”gi Oʻzbekiston Respublikasi Qonuni 1991-yilning 1-yanvaridan kuchga kiritilsin, ushbu Qarorning 4-bandida koʻzda tutilgan qoida bundan mustasnodir.

2. Oʻzbekiston Respublikasi, Qoraqalpogʻiston Respublikasi qonunlari “Korxonalar, birlashmalar va tashkilotlardan olinadigan soliqlar toʻgʻrisida”gi Oʻzbekiston Respublikasi Qonuniga muvofiqlashtirilgunga qadar SSR Ittifoqi, Oʻzbekiston Respublikasi va Qoraqalpogʻiston Respublikasining amaldagi qonun hujjatlari ushbu Qonunga zid boʻlmasa, qoʻllanaveradi.

3. “Korxona, birlashmalar va tashkilotlardan olinadigan soliqlar toʻgʻrisida”gi Oʻzbekiston Respublikasi Qonuni korxonalar, birlashmalar va tashkilotlar tomonidan, mulkchilikning shaklidan qatʼi nazar, budjet bilan hisob-kitob qilinayotganda 1991-yilgi faoliyat yakunlaridan boshlab qoʻllaniladi.

Qonunning 6-modda 6-bandidagi “a” kichik bandida nazarda tutilgan qoidalar sovet va chet el yuridik shaxslari va fuqarolari ishtirokida Oʻzbekiston Respublikasi hududida yaratilgan va 1991-yilning 1-yanvarigacha roʻyxatdan oʻtgan qoʻshma korxonalarga nisbatan ularning faoliyat sohasidan qatʼi nazar, qoʻllaniladi.

4. Isteʼmolga qaratilgan mablagʻlar xarajatini tartibga soluvchi soliq 1991-yilda olinmasligi belgilab qoʻyilsin.

5. Belgilab qoʻyilsinki, foydadan olinadigan soliq stavkasini qoʻllayotganda hisobga olinadigan rentabellik eng yuqori darajasi uning tarmoqdagi oʻrtacha darajasiga nisbatan ikki hissa ortiq holda qabul qilinadi.

Oʻzbekiston Respublikasi Prezidenti huzuridagi Vazirlar Kabineti 1991-yilning 1-apreliga qadar yangi ulgurji, xarid, chakana va smeta narxlarini va tariflarni hisobga olgan holda xalq xoʻjaligi tarmoqlari boʻyicha rentabellik va uning oʻrtacha hajmini hisoblash tartibini belgilasin.

6. Belgilab qoʻyilsinki, 1991-yilda soliq solinadigan foyda hisoblab chiqilayotgan mehnatga haq toʻlash uchun qilinadigan xarajatlarning norma belgilanadigan meʼyori korxonalar tomonidan ishlab chiqarish (ish, xizmatlar) hajmining oʻsishiga yoki faoliyatining boshqa koʻrsatkichlariga qarab aniqlanadi.

Oʻzbekiston Respublikasi Prezidenti huzuridagi Vazirlar Kabineti 1991-yilning 1-apreligacha xalq xoʻjaligi tarmoqlari va sanoat (asosiy faoliyat turlari) boʻyicha mehnatga haq toʻlash uchun qilinadigan xarajatlarning oʻsish koeffitsiyenti belgilansin.

1991-yilda mehnatga haq toʻlash uchun qilinadigan xarajatlarni hisoblab chiqarishning bazaviy miqdori sifatida 1990-yilda mazkur maqsadlar uchun qilingan, asosiy faoliyatda band boʻlgan xodimlar ( shu jumladan ishlab chiqarish kooperativlari xodimlari) ning tarkib topgan oʻrtacha ish haqining Qonundagi 3-modda 4-bandga muvofiq mahsulot (ishlar, xizmatlar) tannarxiga qoʻshiladigan qismiga qarab hisoblab chiqariladigan, lekin 400 soʻmdan koʻp boʻlmagan, 1991-yilning II kvartalidan boshlab esa 480 soʻmdan ortiq boʻlmagan xarajatlar qabul qilinadi.

7. Belgilansinki, Qonunning 7-moddasi qoidalari, basharti ajnabiy qatnashchining ulushi ustav fondining 30 foizidan oshib ketmasa, Oʻzbekiston Respublikasi hududida sovet yuridik shaxslari hamda ajnabiy yuridik shaxslar va fuqarolar ishtirokida tuzilgan qoʻshma korxonalarga, xoʻjalik faoliyatini amalga oshirayotgan xalqaro nohukumat tashkilotlar (birlashmalar) hamda xalqaro birlashmalarga hamda boshqa ittifoqdosh respublikalar va chet el davlatlari hududida respublika korxonalar, tashkilotlar, muassasalari va tadbirkorlari ishtirokida tuzilgan qoʻshma korxonalarning Oʻzbekiston Respublikasi territoriyasida joylashgan filiallariga soliq solishga daxl qilmaydi.

8. Oʻzbekiston Respublikasi Prezidenti huzuridagi Vazirlar Kabineti 1991-yilga respublika budjeti loyihasi bilan birga Oʻzbekiston Respublikasi Oliy Kengashiga korxonalar, birlashmalar va tashkilotlardan undiriladigan soliqlar boʻyicha qoʻshimcha imtiyozlar berishning tarkibi, miqdorlari va tartibi toʻgʻrisidagi takliflarni taqdim etsin.

9. Oʻzbekiston Respublikasi Prezidenti huzuridagi Vazirlar Kabineti:

mazkur Qonunni roʻyobga chiqarishni taʼminlash uchun zarur qarorlar qabul qilsin;

1991-yil 1-mayga qadar Oʻzbekiston Respublikasi Oliy Kengashiga Oʻzbekiston Respublikasi va Qoraqalpogʻiston ASSR hujjatlarini “Korxonalar, birlashmalar va tashkilotlardan olinadigan soliqlar toʻgʻrisida”gi Oʻzbekiston Respublikasi Qonuniga muvofiqlashtirishga doir takliflarini taqdim etsin;

Oʻzbekiston Respublikasi Hukumati qarorlarini “Korxona, birlashmalar va tashkilotlardan olinadigan soliqlar toʻgʻrisida”gi Oʻzbekiston Respublikasi Qonuniga muvofiqlashtirsin;

Oʻzbekiston Respublikasi vazirliklari, davlat qoʻmitalari va idoralari Qonunga zid keluvchi normativ hujjatlarini qayta koʻrib chiqishlari va bekor qilishlarini taʼminlasin.

10. Qoraqalpogʻiston Respublikasi Oliy Kengashiga kolxozlar, sovxozlar va boshqa qishloq xoʻjalik korxonalarning foydalariga solinadigan soliq stavkalarini hamda mazkur soliqlar boʻyicha imtiyozlarni belgilash chogʻida Qonun amalga kiritilgan paytda jumhuriyat boʻyicha koʻrsatilgan xoʻjaliklarning tarkib topgan budjetga toʻlovlari oʻrtacha darajasidan kelib chiqish tavsiya qilinsin.

11. Xalq deputatlari mahalliy Sovetlariga korxonalar balansida turgan sogʻliqni saqlash, maktabgacha tarbiya muassasalari, pioner lagyerlari va Qonunning 6-moddasi 1-bandi “j” kichik bandida sanab oʻtilgan boshqa obyektlarni saqlab turish uchun ketadigan xarajatlar normativlarini tasdiqlash tavsiya etilsin.

Oʻzbekiston Respublikasi Oliy Kengashining Raisi M. IBROHIMOV

Toshkent sh.,

1991-yil 15-fevral,

226-XII-son