Geologiya-qidiruv ishlari olib borishga va qattiq foydali qazilma konlarini ishlatishga investitsiyalarni yanada jalb etish chora-tadbirlari toʻgʻrisida (142-son)

25.06.2008

Oʻzbekiston Respublikasi Vazirlar Mahkamasining

qarori

[Koʻchirma]

Oʻzbekistonda qattiq foydali qazilmalar 43 turining 700 dan ortiq konlari, shu jumladan mis, rux, molibden, volfram, litiy, stronsiy, tomirsimon joylashgan kvars hamda texnik kremniy ishlab chiqarish uchun kvarsitlar, mineral tuzlar, fosforitlar, toshkoʻmir va qoʻngʻir koʻmir, oʻtga chidamli va keramik xomashyo, qurilish materiallari va boshqa materiallar singari jahon bozorida talab yuqori boʻlgan foydali qazilmalar qidirib topilganligi qayd etilsin.

Foydali qazilmalarning ayrim turlari boʻyicha prognoz resurslar qidirib topilgan resurslardan ancha ortiqdir, shu jumladan polimetallar va sement xomashyosi boʻyicha — 2 baravar, volfram boʻyicha — 6 baravar, fosforit ruda va bazalt boʻyicha — 10 baravar, tomirsimon joylashgan kvars va kvarsitlar boʻyicha — 50 baravar ortiqdir.

Shu bilan birga hozirgi vaqtda foydali qazilma boyliklar mavjud konlarining qariyb 80 foizi hali sanoat jihatidan oʻzlashtirishga jalb etilmagan. Qattiq foydali qazilmalarning prognoz resurslarini sanoat zaxiralari toifasiga oʻtkazish uchun birinchi navbatda xorijiy va mamlakatimiz investorlarini jalb etish hisobiga geologiya-qidiruv ishlari hajmini ancha oshirish talab etiladi.

Foydali qazilma konlarini izlash va qidirishning zamonaviy usullari va texnologiyalarini qoʻllash hisobiga qattiq foydali qazilmalar boʻyicha geologiya-qidiruv ishlari samaradorligini oshirish, toʻgʻridan toʻgʻri xorijiy investitsiyalarni keng jalb etish asosida qattiq foydali qazilmalar konlarini sanoat jihatidan oʻzlashtirishga jalb etish maqsadida Vazirlar Mahkamasi qaror qiladi:

1. Oʻzbekiston Respublikasi Davlat geologiya qoʻmitasi, Iqtisodiyot vazirligi, Moliya vazirligi, Davlat tabiatni muhofaza qilish qoʻmitasi, “Sanoatkontexnazorat” davlat inspeksiyasining:

2008-2009-yillarda Oʻzbekiston Respublikasi hududida qattiq foydali qazilmalar konlarini (oltin va uran konlaridan tashqari) xatlovdan oʻtkazish, yer osti boyliklaridan foydalanuvchilarni va foydali qazilmalarni kavlab olish uchun foydalanishga berilgan yer osti boyliklarining tegishli uchastkalaridan foydalanishning aniq shartlarini belgilash;

sanoat yoʻsinida ishlatilmayotgan konlar, shuningdek foydalanish paytida Oʻzbekiston Respublikasining yer osti boyliklari toʻgʻrisidagi qonun hujjatlari muntazam buzilishiga, shu jumladan foydali qazilmalarni kavlab olish uchun yer osti boyliklari uchastkalaridan foydalanish huquqini beradigan litsenziyalarda belgilangan yer osti boyliklaridan foydalanish shartlari buzilishiga yoʻl qoʻyilgan konlar boʻyicha zaxiralarni belgilangan tartibda Oʻzbekiston Respublikasi Davlat geologiya qoʻmitasi balansiga berish toʻgʻrisidagi takliflari qabul qilinsin.

2. Qattiq foydali qazilmalar konlarini xatlovdan oʻtkazish tartibi toʻgʻrisidagi Nizom 1-ilovaga muvofiq tasdiqlansin.

3. Qattiq foydali qazilmalar konlarini xatlovdan oʻtkazishni muvofiqlashtirish uchun 2-ilovaga muvofiq tarkibda Komissiya tashkil etilsin.

Quyidagilar Komissiyaning asosiy vazifalari etib belgilansin:

Qoraqalpogʻiston Respublikasida va viloyatlar boʻyicha qattiq foydali qazilmalar konlarini (oltin va uran konlaridan tashqari) xatlovdan oʻtkazish jadvalini tasdiqlash;

hududlar boʻyicha qattiq foydali qazilmalar konlari dala tadqiqotlari boʻyicha ishchi guruhlarning shaxsiy tarkibini tasdiqlash;

qattiq foydali qazilmalar konlarini xatlovdan oʻtkazishning borishini nazorat qilish va uning natijalarini tizimli asosda koʻrib chiqish.

Komissiya bir oy muddatda oʻz ishi reglamentini tasdiqlasin.

4. Komissiyaga quyidagi huquqlar berilsin:

zaruriyat boʻlganda qattiq foydali qazilmalar konlarini xatlovdan oʻtkazishga vazirliklar va idoralarning yuqori malakali mutaxassislarini, mahalliy davlat hokimiyati organlari vakillarini jalb etish;

zaxiralari yer osti boyliklari toʻgʻrisidagi qonun hujjatlarida belgilangan tartibda Oʻzbekiston Respublikasi Davlat geologiya qoʻmitasi balansiga berilayotgan qattiq foydali qazilmalar konlari roʻyxatini tasdiqlash;

foydali qazilmalarni noqonuniy qazib olish holatlari aniqlangan taqdirda sanoat jihatidan oʻzlashtirishga jalb etilmagan konlarda kavlab olingan foydali qazilmalar hajmi Oʻzbekiston Respublikasi Davlat geologiya qoʻmitasi tomonidan instrumental oʻlchanishi toʻgʻrisida qaror chiqarish.

5. “Sanoatkontexnazorat” davlat inspeksiyasi, Oʻzbekiston Respublikasi Davlat tabiatni muhofaza qilish qoʻmitasi 2008-yil 10-iyulgacha boʻlgan muddatda Komissiyaga oʻzlari tomonidan oʻz vakolatlari doirasida 2007-yilda va 2008-yilning birinchi yarim yilligida yer osti boyliklaridan foydalanuvchilar tomonidan yer osti boyliklari toʻgʻrisidagi Oʻzbekiston Respublikasi qonun hujjatlariga rioya qilinishi yuzasidan oʻtkazilgan tekshirishlar natijalari toʻgʻrisida axborot taqdim etsinlar.

6. Qoraqalpogʻiston Respublikasi Vazirlar Kengashi, viloyatlar hokimliklari Oʻzbekiston Respublikasi Davlat geologiya qoʻmitasining soʻrovi boʻyicha foydali qazilmalarni kavlab olish uchun yuridik yoki jismoniy shaxslarga berilgan yer uchastkalari toʻgʻrisidagi maʼlumotlar taqdim etilishini taʼminlasinlar.

8. Oʻzbekiston Respublikasi Davlat geologiya qoʻmitasi Iqtisodiyot vazirligi va Moliya vazirligi bilan birgalikda 2009-yilda Davlat geologiya qoʻmitasi tizimi boʻyicha geologiya-qidiruv ishlari dasturini shakllantirishda qattiq foydali qazilmalar konlarini xatlovdan oʻtkazish xarajatlarini moliyalashtirishga mablagʻlarni nazarda tutsin.

9. Oʻzbekiston Respublikasi Davlat geologiya qoʻmitasi uch oy muddatda:

Oʻzbekiston Respublikasi Tashqi iqtisodiy aloqalar, investitsiyalar va savdo vazirligi bilan birgalikda — potensial xorijiy investorlarga obyekt va investitsiyalar qoʻyish samaradorligi toʻgʻrisida dastlabki xulosa qilish uchun yetarli boʻlgan hajmda ixtisoslashtirilgan axborot tizimlari orqali sanoat yoʻsinida ishlatilmayotgan konlar va qattiq foydali qazilmalarning istiqbolli maydonlari toʻgʻrisida geologik axborotni taqdim etish tartibi toʻgʻrisidagi nizomni;

Oʻzbekiston Respublikasi Iqtisodiyot vazirligi, Moliya vazirligi, Davlat tabiatni muhofaza qilish qoʻmitasi va “Sanoatkontexnazorat” davlat inspeksiyasi bilan birgalikda — Oʻzbekiston Respublikasi foydali qazilmalarining strategik muhim turlari roʻyxatini ishlab chiqsin va tasdiqlash uchun Vazirlar Mahkamasiga taqdim etsin, ular toʻgʻrisidagi maʼlumotlar, shu jumladan konlar va istiqbolli maydonlar toʻgʻrisidagi axborot investitsiya loyihasining dastlabki texnik-iqtisodiy asoslashini tuzish uchun yetarli boʻlgan hajmda Vazirlar Mahkamasining qarori boʻyicha potensial investorlarga taqdim etilishi mumkin;

Oʻzbekiston Respublikasi Iqtisodiyot vazirligi va Moliya vazirligi bilan birgalikda — geologiya-qidiruv ishlari faqat davlatning buyurtmasi boʻyicha ular doirasida olib boriladigan asl, rangli, nodir metallar va “qumtosh” tipdagi uran konlarini aniqlash uchun istiqbolli boʻlgan maydonlar roʻyxatini, shuningdek mahsulot taqsimotiga oid bitimlar, qoʻshma korxonalar tashkil etish toʻgʻrisidagi bitimlar shartlarida yoki boshqa shartlarda, foydali qazilmalarni keyinchalik chuqur qayta ishlashni nazarda tutgan holda, xorijiy va mamlakatimiz investorlari mablagʻlari hisobiga izlash va qidirish ishlari olib borish uchun maydonlar roʻyxatini ishlab chiqsin va tasdiqlash uchun Vazirlar Mahkamasiga taqdim etsin.

10. Oʻzbekiston Respublikasi Davlat geologiya qoʻmitasi Tashqi iqtisodiy aloqalar, investitsiyalar va savdo vazirligi bilan birgalikda:

gelogiya-qidiruv ishlarini olib borishga xorijiy investitsiyalarni jalb etish, shuningdek qattiq foydali qazilmalar konlarini ularni chuqur qayta ishlashni nazarda tutadigan loyihalar doirasida ustun darajada sanoat yoʻsinida ishlatish ishlarini faollashtirsin;

har yillik asosida “Oʻzbekistonning qattiq foydali qazilmalar investitsiya salohiyati” xalqaro konferensiyalar tashkil etilishi va oʻtkazilishini taʼminlasin.

Oʻzbekiston Respublikasi Iqtisodiyot vazirligi va Moliya vazirligi gelogiya-qidiruv ishlari yillik dasturlarini va ularni moliyalashtirish manbalarini shakllantirishda 2009-yildan boshlab koʻrsatib oʻtilgan xalqaro konferensiyani oʻtkazish xarajatlarini budjet mablagʻlari hisobiga qoplashga mablagʻlarni nazarda tutsinlar.

11. Oʻzbekiston Respublikasi Davlat geologiya qoʻmitasi markaziy apparat xodimlarining belgilangan umumiy soni doirasida 4 shtat birligidan iborat xorijiy investitsiyalarni jalb etish va investorlar bilan ish olib borish boʻlinmasi tashkil etsin.

12. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.

Oʻzbekiston Respublikasi Prezidenti I. KARIMOV

Toshkent sh.,

2008-yil 25-iyun,

142-son

Vazirlar Mahkamasining 2008-yil 25-iyundagi 142-son qaroriga 1-ILOVA

Qattiq foydali qazilmalar konlarini xatlovdan oʻtkazish tartibi toʻgʻrisida

NIZOM

I. Umumiy qoidalar

1. Ushbu Nizom qattiq foydali qazilmalar konlarini xatlovdan oʻtkazishning asosiy maqsadlari va vazifalarini, sanoat jihatidan oʻzlashtirishga jalb etilgan qattiq foydali qazilmalar konlarini ishlatish samaradorligini baholash uchun zarur va yetarli boʻlgan maʼlumotlar tarkibini, foydalanilmayotgan konlar joylashgan maydonlarning holatini, Oʻzbekiston Respublikasi hududida qattiq foydali qazilmalar konlarini xatlovdan oʻtkazish mexanizmini belgilaydi.

2. Xatlovni oʻtkazish ishlarini muvofiqlashtirish va nazorat qilishni Qattiq foydali qazilmalar konlarini xatlovdan oʻtkazishni muvofiqlashtirish komissiyasi (keyingi oʻrinlarda “Komissiya” deb yuritiladi) amalga oshiradi.

Quyidagilar Komissiyaning asosiy vazifalari hisoblanadi:

Qoraqalpogʻiston Respublikasida va viloyatlar boʻyicha qattiq foydali qazilmalar konlarini (oltin va uran konlaridan tashqari) xatlovdan oʻtkazish jadvalini tasdiqlash;

hududlar boʻyicha qattiq foydali qazilmalar konlari dala tadqiqotlari boʻyicha ishchi guruhlarning shaxsiy tarkibini tasdiqlash;

qattiq foydali qazilmalar konlarini xatlovdan oʻtkazishning borishini nazorat qilish va uning natijalarini tizimli asosda koʻrib chiqish.

3. Komissiya quyidagi huquqlarga ega:

zaruriyat boʻlganda qattiq foydali qazilmalar konlarini xatlovdan oʻtkazishga vazirliklar va idoralarning yuqori malakali mutaxassislarini, mahalliy davlat hokimiyati organlari vakillarini jalb etish;

zaxiralari yer osti boyliklari toʻgʻrisidagi qonun hujjatlarida belgilangan tartibda Oʻzbekiston Respublikasi Davlat geologiya va mineral resurslar qoʻmitasi (keyingi oʻrinlarda “Davlat geologiya qoʻmitasi” deb yuritiladi) balansiga berilayotgan qattiq foydali qazilmalar konlari roʻyxatini tasdiqlash;

foydali qazilmalarni noqonuniy qazib olish holatlari aniqlangan taqdirda sanoat jihatidan oʻzlashtirishga jalb etilmagan konlarda kavlab olingan foydali qazilmalar hajmining Oʻzbekiston Respublikasi Davlat geologiya qoʻmitasi tomonidan instrumental oʻlchanishi toʻgʻrisida qaror chiqarish.

II. Xatlovning maqsadlari va asosiy vazifalari

4. Quyidagilar qattiq foydali qazilmalar konlarini xatlovdan oʻtkazishning maqsadlari hisoblanadi:

davlat boshqaruvi organlariga, shuningdek potensial investorlarga sanoat yoʻsinida ishlatilmayotgan obyektlar boʻyicha yer osti boyliklari uchastkalari toʻgʻrisida geologik axborotni va boshqa axborotni belgilangan tartibda tezkor taqdim etish maqsadida foydalaniladigan GIS-texnologiyalar asosida qattiq foydali qazilmalar konlari boʻyicha maʼlumotlarning yagona elektron bazasini tashkil etish;

Qattiq foydali qazilmalar konlari boʻyicha maʼlumotlarning yagona bazasini hisobga olgan holda Foydali qazilmalar zaxiralari davlat balansiga va Konlar, foydali qazilmalar va texnogen mineral xosilalar namoyon boʻlishi davlat kadastriga zarur qoʻshimchalar va oʻzgartirishlar kiritish.

5. Belgilangan maqsadlardan kelib chiqib quyidagilar xatlovning asosiy vazifalari hisoblanadi:

sanoat yoʻsinida ishlatilayotgan qattiq foydali qazilmalar konlari hamda foydali qazilmalarni kavlab olish uchun yer osti boyliklarining tegishli uchastkalaridan foydalanish huquqi berilgan yuridik shaxslar roʻyxatini aniqlashtirish;

noruda foydali qazilmalarning amalda kavlab olingan hajmining (marksheyderlik hisobotlari maʼlumotlari boʻyicha) yer osti boyliklaridan foydalanuvchilar tomonidan Davlat geologiya qoʻmitasi huzuridagi Davlat geologiya fondiga taqdim etiladigan maʼlumotlarga muvofiqligini aniqlash (“5-GR” shakl);

sanoat jihatidan oʻzlashtirishga jalb etilmagan konlarning holatini baholash;

sanoat jihatidan oʻzlashtirishga jalb etilmagan noruda foydali qazilmalar konlarida noqonuniy kavlash holatlarini aniqlash va Komissiyaga kavlab olingan foydali qazilmalar hajmini Davlat geologiya qoʻmitasi tomonidan instrumental oʻlchash oʻtkazilishi toʻgʻrisida takliflar kiritish;

foydali qazilmalar zaxiralarini hisobdan chiqarishning maqsadga muvofiqligining yiriklashtirilgan texnik-iqtisodiy hisob-kitoblarini ishlab chiqish zarurligi toʻgʻrisidagi masalani hal etish uchun ishlatilmayotgan umumiy tarqalgan foydali qazilmalar konlari boʻyicha foydali qazilmalar joylashgan maydonlar yer uchastkalarining oʻzlashtirilishi darajasini aniqlash (imorat qurilganligi, qishloq xoʻjaligi ekinlari mavjudligi va boshqalar);

xatlov natijalari boʻyicha sanoat yoʻsinida ishlatilmayotgan konlar, shuningdek foydalanish paytida kon munosabatlari sohasida maxsus vakolatli davlat organlari yoki mahalliy davlat hokimiyati organlari tomonidan aniqlangan yer osti boyliklari toʻgʻrisidagi qonun hujjatlari buzilgan, shu jumladan foydali qazilmalarni kavlab olish uchun yer osti boyliklari uchastkalaridan foydalanish huquqini beradigan litsenziyalarda belgilangan yer osti boyliklaridan foydalanish shartlari buzilgan konlar boʻyicha zaxiralarni Davlat geologiya qoʻmitasi balansiga berish haqidagi takliflarni tayyorlash.

III. Xatlovni oʻtkazish mexanizmi

6. Qattiq foydali qazilmalar konlarini xatlovdan oʻtkazish ikki davrda amalga oshiriladi: tayyorgarlik (kameral) va dala sharoitida oʻtkazish davrlari.

7. Tayyorgarlik (kameral) davrida Davlat geologiya qoʻmitasi tomonidan Qoraqalpogʻiston Respublikasida va viloyatlar boʻyicha qattiq foydali qazilmalarning barcha konlari boʻyicha zarur maʼlumotlarni toʻplash, tizimlashtirish va umumlashtirish amalga oshiriladi.

8. Xatlovni dala sharoitida oʻtkazish davrida barcha noruda foydali qazilmalar konlari maydonlarini, shuningdek sanoat yoʻsinida ishlatilmayotgan qattiq foydali qazilmalar konlari maydonlarini (oltin va uran konlaridan tashqari) tekshirish amalga oshiriladi.

9. Tayyorgarlik (kameral) davrida qattiq foydali qazilmalarning har bir koni boʻyicha pasport tuziladi, u quyidagi maʼlumotlarni oʻz ichiga oladi:

konning nomi;

maʼmuriy joylashuvi (viloyat, tuman);

jugʻrofiy joylashuvi (togʻ tizimining, togʻlarning va shu kabilarning nomi);

kon maydonining burchakli nuqtalari koordinatlari;

maydoni konning 1:50000 yoki undan yirik masshtabda koʻrsatilgan holdagi topografik asosi;

foydali qazilmaning turi, konni kavlab olish usuli;

kon razvedka qilingan davr;

razvedkani amalga oshirgan, zaxiralarni hisoblab chiqqan va ularni tasdiqlashga taqdim etgan tashkilot toʻgʻrisidagi maʼlumotlar;

Foydali qazilmalar zaxiralarining davlat balansi maʼlumotlariga muvofiq kon (sanoat yoʻsinida ishlatilayotgan, zaxira tarzida qidirib topilgan, sanoat yoʻsinida ishlatilmayotgan) mansub boʻlgan razryad;

tasdiqlangan zaxiralar miqdori (rudali foydali qazilmalar konlari boʻyicha, shuningdek qoʻshimcha foydali qazilmalar va foydali komponentlar zaxiralari), zaxirani tasdiqlagan organ protokolining sanasi va tartib raqami;

konning tajriba-sanoat yoʻsinida ishlatilganligi toʻgʻrisidagi maʼlumotlar, uni amalga oshirish jarayonida kavlab olingan zaxiralar hajmi;

yer osti uchastkasidan foydalanish huquqi uchun litsenziya olgan yuridik shaxsning nomi va uning rekvizitlari;

yer osti uchastkasidan foydalanish huquqi uchun litsenziyaning tartib raqami, seriyasi, uning berilgan sanasi;

yer osti uchastkasidan foydalanish shartlari nusxasi;

zaxiralarning xatlov oʻtkazilayotgan yilning 1-yanvaridagi holati.

10. Noruda konlar maydonlarini, shuningdek sanoat yoʻsinida ishlatilmayotgan rudali foydali qazilmalar konlarini tekshirish maqsadida Komissiya qarori bilan “Sanoatgeokontexnazorat” davlat inspeksiyasi, Oʻzbekiston Respublikasi Ekologiya va atrof muhitni muhofaza qilish davlat qoʻmitasi, Davlat geologiya qoʻmitasi, Iqtisodiyot vazirligi, Yer resurslari, geodeziya, kartografiya va davlat kadastri davlat qoʻmitasi, “Oʻzqurilishmateriallari” aksiyadorlik jamiyati, Qoraqalpogʻiston Respublikasi Vazirlar Kengashi va viloyatlar hokimliklari vakillaridan hududlar boʻyicha qattiq foydali qazilmalar konlarini dala sharoitida tekshirish boʻyicha ishchi guruhlar (keyingi oʻrinlarda “ishchi guruh” deb ataladi) tuziladi.

Qarorda tekshirishni oʻtkazish davrida ishchi guruh hal etishi zarur boʻlgan vazifalar, ishlarning hududlari, guruhning rahbari, xulosalarni taqdim etish muddatlari koʻrsatiladi.

11. Ishchi guruh dala sharoitida tekshirish jarayonida:

a) xatlovdan oʻtkazilayotgan barcha noruda foydali qazilmalar konlari va sanoat yoʻsinida ishlatilmayotgan rudali foydali qazilmalar konlari (oltin va uran konlaridan tashqari) boʻyicha GPS global pozitsiyalash tizimlari asbob-uskunalari yordamida obyektning ikki-uchta koordinatlarini aniqlashi, shuningdek keyinchalik pozitsiyalarning joylariga (nomi koʻrsatilgan holda tur yoki qoziqlarni) biriktirgan holda privyazka qilishni amalga oshirishi, ulardan raqamli fotokamera bilan (kamida 5 ta megapikselni hal etgan holda) kon maydonining eng xarakterli xususiyatlarining (relyefning alohida shakllari, mavjud imoratlar, karyerda yer osti suvlarining mavjudligi, chiqindilarning tarqoq holda saqlanishi va shu kabilar) kamida uchta suratini olishi kerak;

b) sanoat yoʻsinida ishlatilayotgan noruda foydali qazilmalar boʻyicha:

foydali qazilmalarni kavlab olish uchun yer osti boyliklari uchastkasidan foydalanish huquqi uchun litsenziyada belgilangan yer osti boyliklari uchastkasidan foydalanish shartlarining yer osti boyliklari uchastkasidan foydalanuvchi tomonidan bajarilishining toʻliqligini baholashi;

yer osti boyliklaridan foydalanuvchida konni ochish va tayyorlash loyihasining belgilangan tartibda mavjudligini aniqlashi;

yer osti boyliklaridan foydalanuvchi tomonidan kavlab olingan foydali qazilmalar hajmlarining marksheyder oʻlchovlarini amalga oshirishning davriyligini aniqlashi, marksheyder oʻlchovlari maʼlumotlarini oʻrganishi va ularning Foydali qazilmalar zaxiralarining davlat balansi maʼlumotlariga muvofiqligi toʻgʻrisida xulosa chiqarishi;

karyerni uning tubida yer osti suvlari mavjudligini aniqlash maqsadida tekshirishi, sabablarini aniqlashi;

suv obyektlarining qoʻriqlanadigan zonasi doirasida qum-shagʻalli materiallar kavlab olingan taqdirda qoʻriqlanadigan tabiiy hudud doirasida foydali qazilmalarni kavlab olishga ruxsatnomalar mavjudligini tekshirishi;

karyer xoʻjaligini va xodimlarni suv bilan taʼminlash uchun foydalaniladigan suv quduqlarining mavjudligini aniqlashi, suv olishning belgilangan limitiga yer osti boyliklaridan foydalanuvchi tomonidan rioya qilinishini, yer osti suvlari sathini oʻlchashlarning muntazamligini kimyoviy va bakterialogik tekshirishlarning oʻtkazilishini tekshirishi;

suvdan maxsus foydalanishga ruxsatnomalar mavjudligini, uning amal qilish muddatini aniqlashi kerak;

v) sanoat yoʻsinida ishlatilmayotgan qattiq foydali qazilmalar konlari boʻyicha (oltin va uran konlaridan tashqari):

obyektda foydali qazilmalarning noqonuniy kavlab olish amalga oshirilganligi yoki amalga oshirilmaganligini aniqlashi;

agar kon kavlangan qilingan boʻlsa, kavlab olingan kon massasi, shu jumladan foydali qazilmalar hajmini baholashi hamda axborotni Davlat geologiya qoʻmitasiga tezkorlik bilan joʻnatishi;

Foydali qazilmalar zaxiralarining davlat balansida “Sanoat yoʻsinida ishlatilmagan konlar” yoki “Zaxira tarzida qidirib topilgan konlar” razryadiga kiritilgan konlarda foydali qazilmalarni noqonuniy kavlab olgan yuridik yoki jismoniy shaxsni imkoni boricha aniqlashi;

foydali qazilmalar joylashgan maydonda yer uchastkasining oʻzlashtirilganligi darajasini (uy-joylar, turli imoratlar, qishloq xoʻjaligi yerlari va shu kabilar mavjudligini) baholashi kerak.

12. Dala sharoitida tekshirish natijalariga koʻra har bir kon boʻyicha qisqacha maʼlumotnoma tuziladi, u ishchi guruhning barcha aʼzolari tomonidan imzolanadi. Maʼlumotnomaga konning privyazkasi va kon maydonining eng xarakterli xususiyatlari fotosurati boʻyicha maʼlumotlar qogʻoz va elektron manbalarda ilova qilinadi.

IV. Xatlov materiallarini tayyorlash va Komissiyaga taqdim etish

13. Qoraqalpogʻiston Respublikasida yoki viloyatlarda joylashgan konlarni dala sharoitida tekshirish tugallangach ishchi guruh tomonidan xulosa tuziladi, unda tekshirilgan har bir obyekt boʻyicha yer osti boyliklari, tabiatni muhofaza qilish, suv va suvdan foydalanish toʻgʻrisidagi qonun hujjatlarining buzilishlari, shuningdek ushbu Nizomning 11-bandida koʻrsatilgan barcha masalalar aks ettiriladi. Zaruriyat boʻlganda, xulosaga konlarni dala sharoitida tekshirish natijalarini tavsiflovchi jadval maʼlumotlari ilova qilinadi.

14. Xulosada quyidagilar ham aks ettirilgan boʻlishi kerak:

sanoat yoʻsinida nooqilona ishlatilayotgan, ulardan foydalanish huquqi, tegishli asoslar koʻrsatilgan holda, muddatidan oldin toʻxtatilishi mumkin boʻlgan noruda foydali qazilmalar konlarining roʻyxati;

zaruriyat boʻlganda, sanoat yoʻsinida ishlatilmayotgan konlarda noqonuniy kavlab olingan foydali qazilmalar hajmlarini instrumental oʻlchashlarni oʻtkazish toʻgʻrisidagi takliflar;

zaxiralarini Davlat geologiya qoʻmitasi balansiga berish tavsiya etilayotgan konlar roʻyxati.

15. Xulosa ishchi guruhning barcha aʼzolari tomonidan imzolanadi. Ishchi guruhning xulosada bayon qilingan xulosalarga norozi boʻlgan aʼzolari oʻz fikrini yozma tarzda guruh raisiga taqdim etadilar.

16. Xulosa Qoraqalpogʻiston Respublikasida yoki tegishli viloyatlarda oʻtkazilgan qattiq foydali qazilmalar konlarini xatlovdan oʻtkazish natijalari boʻyicha yigʻma xulosa tuzish uchun Davlat geologiya qoʻmitasiga taqdim etiladi.

17. Davlat geologiya qoʻmitasi tekshirilgan Qoraqalpogʻiston Respublikasida yoki viloyatlar boʻyicha qattiq foydali qazilmalar konlarini xatlovdan oʻtkazish materiallarining umumlashtirilishiga qarab ularni Komissiyaga taqdim etadi, unda quyidagilar toʻgʻrisidagi takliflar mavjud boʻladi:

yer osti boyliklaridan foydalanuvchilar tomonidan foydali qazilmalarni kavlab olish uchun yer osti uchastkalaridan foydalanish huquqiga berilgan litsenziyalarda belgilangan shartlarga rioya qilinmagan taqdirda yer osti boyliklari uchastkalaridan foydalanish huquqini muddatidan oldin toʻxtatish hamda zaxiralarni belgilangan tartibda Davlat geologiya qoʻmitasi balansiga oʻtkazish;

qattiq foydali qazilmalarning sanoat yoʻsinida ishlatilmayotgan konlari zaxiralarini belgilangan tartibda Davlat geologiya qoʻmitasi balansiga oʻtkazish;

aniq konlarda kavlab olingan foydali qazilmalar hajmlarini, shu jumladan kavlangan sanoat yoʻsinida ishlatilmayotgan obyektlarni instrumental oʻlchashlarning maqsadga muvofiqligi;

kon joylashgan maydonda qurilmalar, qishloq xoʻjaligi yerlari mavjud boʻlgan yoxud bu maydonlardan boshqa maqsadlarda foydalanilayotgan konlar boʻyicha keng tarqalgan foydali qazilmalar zaxiralarini qonun hujjatlarida belgilangan tartibda hisobdan chiqarish maqsadga muvofiqligining yiriklashtirilgan texnik-iqtisodiy hisob-kitoblarini ishlab chiqish.

18. Taqdim etilgan materiallar asosida Komissiya oʻz vakolatlari doirasida tegishli qaror qabul qiladi.

Vazirlar Mahkamasining 2008-yil 25-iyundagi 142-son qaroriga 2-ILOVA

Qattiq foydali qazilmalar konlarini xatlovdan oʻtkazishni muvofiqlashtirish komissiyasining

TARKIBI

Izoh. Komissiya aʼzolari boshqa ishga oʻtgan taqdirda uning tarkibiga ushbu lavozimlarga yangidan tayinlangan yoki zimmasiga tegishli vazifalarni bajarish yuklangan shaxslar kiritiladi.