Qishloq xoʻjalik texnikasi va texnologiyalarini sinovdan oʻtkazish tartibi toʻgʻrisidagi nizomni tasdiqlash haqida (1800-son)

30.04.2008

OʻZBEKISTON RESPUBLIKASI QIShLOQ VA SUV XOʻJALIGI VAZIRLIGI OʻZBEKISTON STANDARTLAShTIRISh, METROLOGIYA VA SERTIFIKATLAShTIRISh AGENTLIGINING

QARORI

[Oʻzbekiston Respublikasi Adliya vazirligi tomonidan 2008-yil 30-aprelda 1800-son bilan davlat roʻyxatidan oʻtkazildi]

Oʻzbekiston Respublikasi Vazirlar Mahkamasining 1998-yil 5-martdagi “Qishloq xoʻjaligi texnikasi va texnologiyalarini davlat sinovlaridan oʻtkazish sifatini oshirish chora-tadbirlari toʻgʻrisida”gi 97-sonli hamda 2003-yil 28-iyundagi “Oʻzbekiston Respublikasi Qishloq va suv xoʻjaligi vazirligi faoliyatini tashkil etishni takomillashtirish toʻgʻrisida”gi 290-sonli qarorlariga asosan qaror qilamiz:

1. Qishloq xoʻjalik texnikasi va texnologiyalarini sinovdan oʻtkazish tartibi toʻgʻrisidagi nizom ilovaga muvofiq tasdiqlansin.

2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

Qishloq va suv xoʻjaligi vaziri S. ISMOILOV

Toshkent sh.,

2008-yil 14-aprel,

3/1-son

Oʻzbekiston standartlashtirish, metrologiya va sertifikatlashtirish agentligi bosh direktori R. BOʻRIYEV

Toshkent sh.,

2008-yil 14-aprel,

1-K-son

Qishloq va suv xoʻjaligi vazirligi “Oʻzstandart” agentligining 2008-yil 14-apreldagi 3/1, 1-K-son qarori bilan TASDIQLANGAN

Qishloq xoʻjalik texnikasi va texnologiyalarini sinovdan oʻtkazish tartibi toʻgʻrisida

NIZOM

Mazkur Nizom Oʻzbekiston Respublikasi Vazirlar Mahkamasining “Qishloq xoʻjalik texnikasi va texnologiyalarini davlat sinovlaridan oʻtkazish sifatini oshirish chora-tadbirlari toʻgʻrisida”gi 1998-yil 5-martdagi 97-son, “Mahsulotlarni sertifikatlashtirish tartibotini soddalashtirishga doir qoʻshimcha chora-tadbirlar toʻgʻrisida”gi 2004-yil 6-iyuldagi 318-sonli qarorlari hamda Oʻzbekiston Respublikasi standartlariga muvofiq, “Oʻzagromashservis” uyushmasi huzuridagi Qishloq xoʻjalik texnikasi va texnologiyalarini sertifikatsiyalash va sinash davlat markazi (bundan keyingi oʻrinlarda OʻzQTTSDM deb yuritiladi) tomonidan oʻtkaziladigan sinov turlarini, sinovlar rejasini tuzish tartibini, ishni bajarish va isteʼmolchiga yetkazib berish jarayonida sinovdan oʻtadigan mahsulotlarning normativ-texnik hujjatlar talablarini qoniqtirish holatini nazorat qilish tartibini belgilab beradi.

I. Umumiy qoidalar

1. Sinov mahsuloti boʻlib respublikada yoki xorijda ishlab chiqarilgan traktorlar, qishloq xoʻjalik texnikalari, uskunalar va texnologiyalar hisoblanadi.

2. Respublikaning mahalliy-tub korxonalarida ishlab chiqarishga tayyorlangan va Oʻzbekiston ichki bozoriga yetkazib berish uchun rejalashtirilgan qishloq xoʻjaligi texnikalarining barcha nusxalari, shuningdek tegishli tashkilotlar tomonidan keltirilishi koʻzda tutiladigan va tartibga solinadigan xorijiy qishloq xoʻjalik texnikalari, ularni respublika qishloq xoʻjaligida ishlatishda ishonchliligini va samaradorligini tekshirib koʻrish maqsadida, Oʻzbekiston Respublikasi Vazirlar Mahkamasining 1998-yil 5-martdagi 97-sonli qarori bilan vakolat berilgan OʻzQTTSDMda majburiy tartibda davlat sinovlaridan oʻtkazilishi shart.

3. Sinov mahsulotini sinovdan oʻtkazish, shu jumladan uni olib kelish muddatlari hamda unga ilova qilinadigan zarur hujjatlar OʻzQTTSDM bilan “Buyurtmachi” oʻrtasida tuziladigan shartnoma shartlari bilan belgilanadi.

4. Sinov jarayonidan olingan natijalar bayonnoma shaklida rasmiylashtiriladi va uning nusxalari Oʻzbekiston Respublikasi Qishloq va suv xoʻjaligi vazirligi, “Oʻzagromashservis” uyushmasi hamda sinov oʻtkazish uchun shartnoma tuzgan tashkilotlarga yuboriladi.

5. Sinovdan oʻtgan barcha mahsulotlar “Buyurtmachi”ga qaytariladi.

II. OʻZQTTSDM oʻtkazadigan sinov turlari

6. OʻzQTTSDMda oʻtkaziladigan qishloq xoʻjaligi uchun moʻljallangan texnika va texnologiya sinovlari, ularni oʻtkazilish maqsadiga muvofiq quyidagilarga boʻlinadi:

a) Oʻzbekiston Respublikasi Vazirlar Mahkamasining 1998-yil 5-martdagi 97-son qaroriga binoan oʻtkaziladigan “Davlat sinovlari”:

qabul sinovlari — tajriba namunasi sifatida ishlab chiqarilgan mahsulotlarning sinovlari, shu mahsulotni ishlab chiqarilishi maqsadga muvofiqligi va (yoki) ishlatishga toʻgʻri kelish-kelmasligini aniqlash maqsadida oʻtkaziladi;

davriy sinovlar — ishlab chiqarilayotgan mahsulotning nazorat sinovi boʻlib, normativ-texnik hujjatlar asosida belgilangan hajmlar va muddatlarda, mahsulot sifatini muntazam ravishda nazorat qilib borish va uni ishlab chiqarishni davom ettirish maqsadga muvofiqligini aniqlash maqsadida oʻtkaziladi;

xorijiy mahsulotlar sinovlari — qishloq xoʻjaligida foydalanishning ishonchliligi va samaradorligini tekshirib koʻrish maqsadida, shuningdek xususiyat va tavsiflarini baholagan holda muayyan belgilangan vazifasini bajarishga mos kelishini aniqlash uchun mahsulotni respublika sharoitida sinovdan oʻtkazish;

b) “Davlat sinovlari”dan tashqari oʻtkaziladigan sinovlar:

sertifikatsiyalash sinovlari — mahsulotlar xususiyatlarini milliy va xalqaro normativ hujjatlarga muvofiqligini aniqlash maqsadida oʻtkaziladigan nazorat sinovlari;

takroriy sinovlar (hakamlik sinovlari) — ishlatish jarayonida texnikalarda tez-tez sodir boʻladigan nosozliklar sabablarini oʻrganish va bu nosozliklar sababchisi ishlatuvchi yoki ishlab chiqaruvchi korxona ekanligini aniqlash maqsadida, ishlab chiqaruvchi korxonaning oxirgi mahsulotlari toʻplamidan ajratib olingan texnika namunalarining maxsus dastur boʻyicha oʻtkaziladigan sinovlari;

v) OʻzQTTSDM bevosita tuzilgan shartnomalar asosida, mahsulotlarni “Buyurtmachi”ni qiziqtiradigan xususiyatlarini aniqlash maqsadida, dastlabki, malakaviy, umumlashtirilgan va boshqa sinovlarni (shu jumladan, respublika qishloq xoʻjaligi sohasiga joriy qilishga tavsiya etilgan, turli xil ekinlarni yetishtirish va parvarishlashda qoʻllaniladigan yangi texnologiyalar sinovi) oʻtkazadi.

III. Sinov ishlarini rejalashtirish

7. Texnika va texnologiyalar sinovining yillik rejalarini tuzish maqsadida “Oʻzagromashservis” uyushmasi joriy yilning oktyabr oyidan kechikmasdan quyidagi vazirlik va tashkilotlarga sinovdan oʻtkazish uchun taklif qilinadigan texnika va texnologiyalar roʻyxati soʻrovini joʻnatadi:

a) Oʻzbekiston Respublikasi Qishloq va suv xoʻjaligi vazirligiga;

b) Oʻzbekiston Respublikasi Vazirlar Mahkamasi huzuridagi Fan va texnologiyalarni rivojlantirishni muvofiqlashtirish qoʻmitasiga;

v) mahsulot ishlab chiqaruvchi tashkilot va korxonalarga.

8. Yuqorida koʻrsatib oʻtilgan vazirlik va tashkilotlar soʻrovni olgan kundan boshlab bir oy muddat ichida, sinash uchun oʻzlari taklif etadigan mahsulotlar, ularni taqdim etuvchi tashkilotlar roʻyxati, oʻtkazish muddatlari hamda sinov ishlarini moliyaviy taʼminlash manbalarini koʻrsatgan holda takliflarini ishlab chiqib, “Oʻzagromashservis” uyushmasiga taqdim etadilar.

9. Yuqorida koʻrsatib oʻtilgan vazirlik va tashkilotlar bilan kelishilgan, “Oʻzagromashservis” uyushmasi raisi tomonidan tasdiqlangan sinovlar rejasi OʻzQTTSDMda mahsulotlar sinovini oʻtkazish uchun asos boʻladi.

IV. Davriy sinovlarni oʻtkazishning ayrim shartlari

10. Respublikada ishlab chiqarilayotgan qishloq xoʻjalik texnikalarining davriy sinovlari, ularning normativ-texnik hujjatlarida belgilangan muayyan muddatlar va dasturlar asosida oʻtkaziladi.

11. Xorijdan keltirilishi koʻzda tutiladigan mahsulotlarning sifati barqarorligini nazorat qilish maqsadida bunday mahsulotlar davriy sinovlardan oʻtkazish uchun taqdim etilishi lozim, bunda:

a) davriy sinovlarini oʻtkazish, ularni respublikaga kirib kelishi boshlangandan soʻng, har 2 yilda;

b) olib kelinadigan va sotiladigan mahsulotlarning soni yiliga 5 donadan kam boʻlmagan taqdirda, bu mahsulotlarni sinovga taqdim etish, olib keluvchi tashkilot zimmasiga yuklanadi;

v) sinov haqini toʻlash va sinov jarayonida texnikaning eyilishi natijasida hosil boʻlgan olib keluvchi tashkilotning xarajatlari, xorijdan olib kelingan mahsulot toʻplamining barchasiga baravar taqsimlanishi hisobidan qoplanadi.

12. Davriy sinovlarni oʻtkazish jarayonida aniqlangan, murakkabligi III-turkumga taalluqli har bir nosozlik hodisalari hamda yoʻl-transport hodisalarini yuzaga kelishiga sabab boʻladigan, mazkur texnikaga xizmat koʻrsatuvchi xodimlarning xavfsizligiga tahlika soladigan, tabiiy muhitga salbiy taʼsir koʻrsatadigan nosozliklar haqida, ular aniqlangan kundan boshlab bir oy muddat ichida OʻzQTTSDM tomonidan majburiy ravishda “Oʻzagromashservis” uyushmasiga, ishlab chiqaruvchi korxonaga, “Oʻzstandart” agentligiga va Qishloq va suv xoʻjaligi vazirligining “Oʻzdavtexnazorat” mashina va asbob-uskunalarning texnik holatini nazorat qilish bosh davlat inspeksiyasiga axborot joʻnatishi lozim.

V. Bajarilgan ish va koʻrsatilgan xizmatlar uchun hisob-kitoblar

13. Bajarilgan sinov ishlariga OʻzQTTSDM va “Buyurtmachi” oʻrtasida tuzilgan shartnoma (kontrakt) asosida haq toʻlanadi.

14. OʻzQTTSDM Oʻzbekiston Respublikasi Prezidentining 2005-yil 27-dekabrdagi PQ-244-son qaroriga asosan 2010-yildan toʻliq oʻzini-oʻzi mablagʻ bilan taʼminlashga oʻtishi munosabati bilan 2008-2009-yillar mobaynida oʻtkaziladigan Oʻzbekiston Respublikasi mahalliy-tub korxonalari ishlab chiqaradigan texnikalarning xarajatlari, davlat budjeti tomonidan ajratiladigan pul mablagʻlariga mos ravishda qisman “Buyurtmachi” hisobidan toʻlanadi. 2010-yildan boshlab oʻtkaziladigan qabul sinovlari “Buyurtmachi” mablagʻlari hisobiga amalga oshiriladi.

VI. Yakuniy qoida

15. Ushbu Nizom Oʻzbekiston Respublikasi Monopoliyadan chiqarish, raqobat va tadbirkorlikni qoʻllab-quvvatlash davlat qoʻmitasi, Oʻzbekiston Respublikasi Vazirlar Mahkamasi huzuridagi “Fan va texnologiyalarni rivojlantirishni muvofiqlashtirish qoʻmitasi” va “Oʻzagromashservis” uyushmasi bilan kelishilgan.

Monopoliyadan chiqarish, raqobat va tadbirkorlikni qoʻllab-quvvatlash davlat qoʻmitasi raisi v.b B. ULAShOV

Toshkent sh.,

2008-yil 11-aprel

Vazirlar Mahkamasi huzuridagi “Fan va texnologiyalarni rivojlantirishni muvofiqlashtirish qoʻmitasi” raisining oʻrinbosari, ijro apparati rahbari E. ZOHIDOV

Toshkent sh.,

2008-yil 11-aprel

“Oʻzagromashservis” uyushmasi raisi v.v.b. X. IShMURATOV

Toshkent sh.,

2008-yil 11-aprel