Iqtisodiy rivojlanish hamkorlik fondi (EDCF) tomonidan kredit ajratilishi toʻgʻrisida

28.03.2006

Oʻzbekiston Respublikasi Hukumati bilan Koreya Respublikasi Hukumati oʻrtasida

Bitim

Oʻzbekiston Respublikasi Hukumati bilan Koreya Respublikasi Hukumati (bundan keyin “Ahdlashuvchi Tomonlar” deb ataluvchilar),

Oʻzbekiston Respublikasi Hukumati bilan Koreya Respublikasi Hukumati oʻrtasida Iqtisodiy Rivojlanish Hamkorlik Fondi (bundan keyin “EDCF” deb ataladi) tomonidan kreditlar ajratilishi toʻgʻrisida 1999-yil 8-iyulda imzolangan Bitimga muvofiq,

quyidagilar toʻgʻrisida ahdlashib oldilar:

1-modda

1. Koreya Respublikasi Hukumati Oʻzbekiston Respublikasi umumtaʼlim maktablarini axborotlashtirish loyihasini (bundan keyin “Loyiha” deb ataladi) amalga oshirish uchun Oʻzbekiston Respublikasi Hukumatiga Iqtisodiy Rivojlanish Hamkorlik Fondi uchun hukumat agentligi boʻlgan Koreya Eksport-Import banki (bundan keyin “Bank” deb ataladi) kreditining (bundan keyin “Kredit” deb ataladi) taqdim etilishini taʼminlaydi.

2. Oʻzbekiston Respublikasi Hukumati Kredit oluvchi (bundan keyin “Kredit oluvchi” deb ataluvchilar) hisoblanadi.

3. Kredit summasi Koreya vonida taqdim etiladi. Kredit summasi oʻttiz million AQSH dollari ($30,000,000)ga teng miqdoridan oshmasligi va Kredit oluvchi bilan Bank oʻrtasida tuziladigan kredit bitimi (bundan keyin “Kredit Bitimi” deb ataladi)ning tegishli qoidalariga muvofiq belgilanishi lozim.

2-modda

Kredit shartlari va talablari, hamda uni oʻzlashtirish protsedurasi quyidagi prinsiplarni inter alia oʻz ichiga olgan Kredit Bitimiga muvofiq tartibga solinadi:

(1) Kreditni qaytarish muddati oʻttiz (30) yil, oʻn (10) yillik imtiyozli muddat shu jumladan;

(2) Foiz stavkasi yillik ikki foiz (1.0%)ni tashkil etadi;

(3) Kreditni qoplash muddati Kredit Bitimi kuchga kirgan sanadan yoki Kredit oluvchi bilan Bank kelishib olgan boshqa muddatdan qirq ikki (42) oyni tashkil etadi;

(4) Xizmat haqi toʻgʻridan-toʻgʻri toʻlash hollarida har bir qoplash summasining bir foizining oʻndan biri (0.1%) miqdorida, yoki majburiyat hollarida kafolat xatida koʻrsatilgan summa miqdorda Bankka toʻlanadi. Barcha bank toʻlovlari va/yoki Kredit tushumlarini qoplash, asosiy summani qaytarish yoki Kredit Bitimiga muvofiq bankka toʻlanadigan foizlarni toʻlash bilan bogʻliq bank tomonidan koʻrsatilayotgan xizmatlar uchun xarajatlar Kredit oluvchi tayinlagan banklar bilan Bank oʻrtasida tuziladigan bank bitimi bilan tartibga solinadi; va

(5) Agar Kredit oluvchi Kreditning asosiy summasining toʻla yoki har qanday bir qismini yoxud Kredit Bitimida koʻrsatilgan har qanday boshqa summani toʻlay olmasa, toʻlanmay qolgan summaga yiliga yuqorida keltirilgan foiz stavkasining ikki foizi (2.0%) miqdorida ustama toʻlanadi.

3-modda

1. Loyiha uchun talab qilinadigan konsalting xizmatlaridan tashqari, tovar va xizmatlarni yetkazib beruvchi manba davlatlar Oʻzbekiston Respublikasi bilan Koreya Respublikasi hisoblanadi.

2. Loyiha uchun talab qilinadigan konsalting xizmatlarini sotib olish uchun manbaa davlat Koreya Respublikasi hisoblanadi va konsultant Bank tomonidan taʼminlangan EDCF Krediti boʻyicha konsultantlarning ish faoliyatini tashkil etish Qoʻllanmasiga muvofiq Koreya konsultantlari orasidan raqobat tanlovi asosida tanlab olinadi.

3. Loyihani amalga oshirish uchun zarur boʻlgan tovarlar va xizmatlarni yetkazib beruvchilar Koreya yetkazib beruvchilari orasidan raqobat tanlovi asosida tanlab olinadi.

4. Kredit Bitimi kuchga kirgan sanadan oʻn sakkiz (18) oy ichida konsalting shartnomasi tuziladi.

5. Yetkazib berishning batafsil usullari va tartibi Kredit Bitimi bilan tartibga solinadi.

4-modda

Loyihani toʻliq amalga oshirish uchun Kredit tushumlaridan olingan mablagʻlar yetarli boʻlmagan holda, Kredit oluvchi zarur boʻlgan mablagʻlarni taʼminlash uchun darhol bitim tuzishi lozim.

5-modda

Kredit tushumlari Bank tomonidan Kredit oluvchiga yoki Kredit oluvchi nomidan harakat qilayotgan yetkazib beruvchiga Loyihaning bajarilishiga koʻra, Kredit summasi doirasida, Kredit Bitimida koʻrsatilgan qoplash muddati mobaynida va Kredit Bitimining qoplash tartibiga muvofiq toʻlanadi.

6-modda

Kredit Bitimida koʻrsatiladigan boshqa shartlar va talablar Kredit oluvchi va Bank oʻrtasidagi muzokaralar orqali belgilanadi.

7-modda

Ushbu Bitim imzolangan kundan boshlab kuchga kiradi va Ahdlashuvchi Tomonlar oʻzgacha kelishib olmagan boʻlsalar, Kredit oluvchi Kredit Bitimida belgilangan barcha majburiyatlarni bajargunga qadar amal qiladi.

Ushbuni tasdiqlab, oʻzlarining tegishli Hukumatlari tomonidan oʻrnatilgan tartibda vakolatlangan quyida imzo chekuvchilar ushbu Bitimni imzoladilar.

Seul shahrida 2006-yilning 28-martida ikki nusxada ingliz tilida tuzildi.

(imzolar)