15-modda. Sugʻurta polisi
Transport vositalari egalarining fuqarolik javobgarligini majburiy sugʻurta qilish toʻgʻrisida (O‘RQ-155-son) · Sana: 21.04.2008 · Amalda
Majburiy sugʻurta transport vositasining egasi va sugʻurtalovchi oʻrtasida majburiy sugʻurta shartnomasini tuzish orqali amalga oshiriladi.
Majburiy sugʻurta shartnomasi tuzilganda sugʻurtalovchi sugʻurta qildiruvchi hisoblab chiqarilgan sugʻurta mukofotini toʻlaganidan keyin unga majburiy sugʻurta amalga oshirilganligini tasdiqlovchi hujjat boʻlgan sugʻurta polisini taqdim etadi.
Sugʻurta polisi qonunchilikka muvofiq rasmiylashtiriladi.
Sugʻurta polisida quyidagi maʼlumotlar koʻrsatilgan boʻlishi kerak:
sugʻurtalovchi toʻgʻrisidagi;
sugʻurta qildiruvchining, haydovchining nomi (familiyasi, ismi, otasining ismi) va joylashgan yeri (pochta manzili) yoki yashash joyi toʻgʻrisidagi;
sugʻurtalovchining, uning barcha filiallarining nomi, joylashgan yeri (pochta manzili), ular bilan aloqa bogʻlash vositalari haqidagi hamda filiallarning ish vaqti toʻgʻrisidagi;
sugʻurta qildiruvchining faoliyati turi toʻgʻrisidagi;
majburiy sugʻurta shartnomasining amal qilish davri toʻgʻrisidagi;
sugʻurta mukofoti toʻgʻrisidagi;
sugʻurta summasi toʻgʻrisidagi;
egasining fuqarolik javobgarligi sugʻurta qilinayotgan transport vositasi toʻgʻrisidagi;
majburiy sugʻurta shartnomasining boshqa muhim shartlari toʻgʻrisidagi.
Sugʻurta polisining namunasi, shuningdek yoʻl-transport hodisasi toʻgʻrisidagi xabarnomaning namunasi hamda uni tuzish tartibi Oʻzbekiston Respublikasi Vazirlar Mahkamasi tomonidan belgilanadi.