Oʻzbekiston Respublikasi xalq xoʻjaligi tashkilotlari uchun boshqaruv kadrlarini oʻqitishda hamkorlik toʻgʻrisida

12.09.2007

Oʻzbekiston Respublikasi Hukumati va Germaniya Federativ Respublikasi Hukumati oʻrtasida

Anglashuv memorandumi

Oʻzbekiston Respublikasi Hukumati va Germaniya Federativ Respublikasi Hukumati, kelgusida “Tomonlar” deb nomlanadilar.

Oʻzbekiston Respublikasi xalq xoʻjaligi tashkilotlari uchun boshqaruv kadrlarini ikki tomonlama tayyorlash dasturini (bundan buyon — dastur) amalga oshirish orqali ikki mamlakat oʻrtasida iqtisodiy hamkorlikni qoʻllab-quvvatlash istaklarini bildirib,

Zamonaviy menejment uslublari bilimlariga ega boʻlgan yuqori malakali mutaxassislar iqtisodiyotning oʻsishi va rivojlanishiga munosib hissa qoʻshishi mumkinligi va shu tarzda xoʻjalik tashkilotlarining yosh boshqaruvchilarini tayyorlash va malakasini oshirish davlatning kelgusidagi taraqqiyotida muhim ahamiyat kasb etishi toʻgʻrisida fikr bildirib,

2006-yilda 20 ta oʻzbek boshqaruvchilaridan iborat boshlangʻich guruh malaka oshirish maqsadida Germaniyada amaliyot oʻtab qaytganligini mamnuniyat bilan qayd etib,

Boshlangʻich dasturning sezilarli natijalarini inobatga olib Tomonlar quyidagilar toʻgʻrisida ahdlashdilar:

I. Germaniya Federativ Respublikasi Hukumati oʻzbek tomonining Oʻzbekiston iqtisodiyotini modernizatsiyalashga munosib hissa qoʻsha oladigan yangi boshqaruvchilar avlodini oʻqitishga yoʻnaltirilgan ikki tomonlama dasturni amalga oshirish boʻyicha tashabbusini koʻllab-quvvatlaydi.

II. Oʻzbekiston Respublikasi Hukumati yaqin kelajakda xalq xoʻjaligi tashkilotlari, xususan ishlab chiqarish sohasidagi korxonalar uchun boshqaruv kadrlarini kasbiy va til boʻyicha tayyorlash milliy dasturini ishlab chiqish va amalga oshirishdan oʻz manfaatdorligini maʼlum qiladi.

III. Germaniya Federativ Respublikasi Hukumati 2009-yilgacha oʻzbek dasturini amalga oshirishda oʻzining imkoniyati darajasida koʻmaklashishga tayyorligini tasdiqlaydi. Boshqaruvchilarni oʻqitish ikki tomonlama dasturini amalga oshirishdagi Germaniya tomonining hissasi tanlab olingan boshqaruvchilarning Germaniya Federativ Respublikasida korxonalarga maqsadli tashrif buyurishlari bilan birgalikda, ixtisoslashtirilgan maʼruza seminarlari va amaliy treninglar oʻtkazish orqali har xil amaliyot turlarini oʻtashni nazarda tutadi.

Alohida tadbirlarning davomiyligi va mazmuni oʻzbek boshqaruvchilarining xorijiy tilni bilish va kasbiy talab darajasi, shuningdek Germaniya tomonining imkoniyatlariga bogʻliq. Germaniyada qabul qilinadigan boshqaruvchilarning soni Germaniya tomonidan har yili Federal budjet moliyaviy mablagʻlari hisobidan ajratiladigan mablagʻlarning miqdoriga bogʻliq.

IV. Dasturni amalga oshirish maqsadida:

— Germaniya tomoni bosh boshqaruvchi sifatida “Invent” (Xalqaro malaka oshirish va rivojlantirish MChJ) jamiyatini;

— Oʻzbek tomoni Oʻzbekiston Savdo-sanoat palatasini (SSP) belgilaydi.

V. SSP oʻzbek tomonidan dasturning muvofiqlashtiruvchisi sifatida dasturga Germaniya hissasi (ulushi) uchun zarur kasbiy va tilga oid bilimlarga ega boʻlgan yetarlicha daʼvogarlar tanlovini amalga oshiradi. Bunda SSP oʻqitish kurslarini taklif etuvchi barcha oʻzbek tashkilotlari bilan teng huquqlilik asosida va Oʻzbekistonning barcha hududlarida hamkorlik qiladi. Shunday qilib, barcha munosib daʼvogarlarning va mamlakatning barcha hududlari vakillarining dasturda qatnashishlari uchun teng imkoniyatlar taʼminlanishi lozim.

VI. Oʻzbek boshqaruvchilarini kasbiy va til boʻyicha tayyorlash va Oʻzbekiston Respublikasi hududida yuzaga keluvchi xarajatlar, shuningdek barcha xalqaro transport xarajatlari boshqaruv kadrlarini yuborayotgan oʻzbek tomonining tashkilotlari hisobidan qoplanadi.

VII. Germaniya tomoni dasturni amalga oshirish bilan bogʻliq va Germaniya Federativ Respublikasi hududida yuzaga keluvchi barcha xarajatlarni qoplashga tayyorligini tasdiqlaydi. Ushbu xarajatlar stipendiyalar toʻlash, sugʻurta va dastur ishtirokchilarining yashashi bilan bogʻliq xarajatlarni oʻz ichiga oladi.

VIII. Dasturni amalga oshirish natijalarini baholash uchun zaruriyatga qarab xalq xoʻjaligi tashkilotlarining boshqaruvchi kadrlari malakalarini oshirishga xizmat qiladigan uzoq muddatli barqaror faoliyat tadbirlarini taʼminlash va ularning samaradorligini oshirish boʻyicha takliflarni ishlab chiquvchi Germaniya — Oʻzbek Boshqaruvchi qoʻmitasi tashkil etiladi.

Ushbu anglashuv Memorandumi Toshkent shahrida 2007-yil 12-sentabrda, ikki asl nusxada, har biri nemis va oʻzbek tillarida tuzildi, bunda barcha matnlar bir xil kuchga ega.

(imzolar)