Oʻzbekiston Respublikasi Xalq taʼlimi vazirligi bilan Misr Arab Respublikasi Tarbiya va taʼlim vazirligi oʻrtasida

26.12.2007

ANGLAShUV Memorandumi

Oʻzbekiston Respublikasi Xalq taʼlimi vazirligi va Misr Arab Respublikasi Tarbiya va taʼlim vazirligi quyida “Tomonlar” deb ataluvchilar,

Tomonlar oʻrtasida umumtaʼlim sohasidagi oʻzaro aloqalarni yaxshilash maqsadida,

Shuningdek, davlatlar va fuqarolar oʻrtasida doʻstlik anʼanalari va yaratuvchanlik tamoyillariga asoslangan oʻzaro munosabat hamda hamkorlikni mustahkamlash uchun,

Taʼlim sohasidagi hamkorlik ikki davlat oʻrtasidagi mustahkam aloqalarni shakllantirish maqsadida oʻzaro aloqalar oʻrnatishga imkoniyat yaratish uchun,

quyidagilar toʻgʻrisida kelishdilar:

1-modda

Tomonlar hujjatlar, tadqiqot ishlari, oʻquv rejalari hamda umumiy va texnik taʼlim sohasidagi dasturlar boʻyicha oʻzaro almashinuvni amalga oshirishni ragʻbatlantiradilar.

2-modda

Tomonlar texnologiya taraqqiyoti, masofadan oʻqitish va kompyuterdan foydalanish sohasida tajriba almashinuvini qoʻllab-quvvatlaydilar.

3-modda

Tomonlar ikki davlat taʼlim tizimi bilan tanishish maqsadida umumtaʼlim maktablari delegatsiyalarining tashriflari almashinuvini qoʻllab-quvvatlaydilar.

4-modda

Misr tomoni soʻrovnomaga binoan — Oʻzbekiston maktablarida arab tilini oʻqitish maqsadida arab tili oʻqituvchilari bilan taʼminlaydi.

Misr tomoni ish jarayonining boshidan oxirigacha mazkur oʻqituvchilarga turar joy va chipta xarajatlariga qoʻshib, oylik ish haqi bilan taʼminlashga masʼuldir.

Oʻzbekiston tomoni arab tili oʻqituvchilari va ularning oila aʼzolariga vizalar berish va viza muddatini uzaytirish shuningdek ularni vaqtincha qayddan oʻtkazish va vaqtincha qayddan oʻtkazish muddatini uzaytirish uchun olinadigan toʻlovlardan ozod qiladi.

5-modda

Tomonlar yoshlarga ikki davlat haqida ovozli fikrlarni taqdim etish maqsadida har ikki davlatning oʻquv rejalari toʻgʻrisidagi tarixiy va geografik maʼlumotlar almashinuvini ragʻbatlantiradilar.

6-modda

Tomonlar bolalarning sanʼatkorlik qobiliyatlarini ochish maqsadida ular chizgan rasmlar va sanʼat asarlarini almashishadi.

7-modda

Tomonlar qobiliyatli va imkoniyati cheklangan bolalarga homiylik qilish sohasida hamkorlik qiladilar.

8-modda

Ushbu Anglashuv Memorandumi imzolangan kundan kuchga kiradi va 5 (besh) yil muddatga tuziladi hamda Tomonlardan biri uning amal qilinishini toʻxtatish niyati toʻgʻrisida boshqa Tomonni tegishli muddat tugashidan olti oy ilgari yozma ravishda xabardor qilmagunicha, Memorandumning amal qilish muddati oʻz-oʻzidan yana besh yilga uzaytiriladi.

Ushbu Anglashuv Memorandumini talqin qilish va qoʻllash bilan bogʻliq boʻlgan barcha kelishmovchiliklar oʻzaro maslahatlashuv va muzokaralar orqali hal qilinadi.

Qohira shahrida 2007-yil 26-dekabrda ikki asl nusxada, har biri oʻzbek, arab va ingliz tillarida tuzildi, bunda barcha matnlar bir xil kuchga ega.

Ushbu Memorandum qoidalarini talqin qilishda kelishmovchiliklar yuzaga kelganda, ingliz tilidagi matn asos sifatida qabul qilinadi.

(imzolar)