Ayrim normativ-huquqiy hujjatlarni davlat reyestridan chiqarish toʻgʻrisida (1783-son)

02.04.2008

OʻZBEKISTON RESPUBLIKASI ADLIYA VAZIRINING

BUYRUGʻI

[Oʻzbekiston Respublikasi Adliya vazirligi tomonidan 2008-yil 2-aprelda 1783-son bilan davlat roʻyxatidan oʻtkazildi]

Oʻzbekiston Respublikasi Adliya vazirligiga Davlat reyestridan chiqarish uchun taqdim etilgan normativ-huquqiy hujjatlarni huquqiy ekspertiza qilish natijasi boʻyicha 2008-yil 1-apreldagi xulosaga hamda Oʻzbekiston Respublikasi Vazirlar Mahkamasining “Vazirliklar, davlat qoʻmitalari va idoralar meʼyoriy hujjatlarining qonuniyligini taʼminlash chora-tadbirlari toʻgʻrisida” 1997-yil 9-oktabrdagi 469-son qaroriga va “Vazirliklar, davlat qoʻmitalari va idoralarning meʼyoriy hujjatlarini qabul qilish tartibini takomillashtirish toʻgʻrisida”gi 2000-yil 19-maydagi 197-son qaroriga muvofiq, shuningdek, Oʻzbekiston Respublikasi Davlat arxitektura va qurilish qoʻmitasining 2008-yil 6-martdagi 750/01-12-son xatini inobatga olgan holda, buyuraman:

1. Oʻzbekiston Respublikasi Davlat arxitektura va qurilish qoʻmitasining quyidagi normativ-huquqiy hujjatlari:

Oʻzbekiston Respublikasi Adliya vazirligi tomonidan 1995-yil 31-avgustda 166-son bilan davlat roʻyxatidan oʻtkazilgan “Qurilayotgan korxonalar va boshqa obyektlar direksiyalarini taʼminlab turish, shu jumladan texnik nazorati uchun xarajatlarni belgilash tartibi”;

Oʻzbekiston Respublikasi Adliya vazirligi tomonidan 1998-yil 23-noyabrda 545-son bilan davlat roʻyxatidan oʻtkazilgan “Qurilishi tugallangan obyektlarni foydalanishga qabul qilish. Asosiy holatlar KMK 3.01.04-99” Qurilish meʼyorlari va qoidalari;

Oʻzbekiston Respublikasi Adliya vazirligi tomonidan 2001-yil 14-sentabrda 1063-son bilan davlat roʻyxatidan oʻtkazilgan “Davlat budjeti mablagʻlari va hukumat kafolati ostidagi kreditlar hisobiga mablagʻ bilan taʼminlanayotgan bino va inshootlarni kapital taʼmirlashning loyiha-smeta hujjatlarini ishlab chiqish tartibi toʻgʻrisidagi nizom” Oʻzbekiston Respublikasi vazirliklari, davlat qoʻmitalari va idoralari normativ-huquqiy hujjatlarning Davlat reyestridan chiqarilsin va bu haqida mazkur Davlat reyestriga tegishli yozuv kiritilsin.

2. Oʻzbekiston Respublikasi Davlat arxitektura va qurilish qoʻmitasi mazkur hujjatlarning Oʻzbekiston Respublikasi vazirliklari, davlat qoʻmitalari va idoralari normativ-huquqiy hujjatlarining Davlat reyestridan chiqarilganligini barcha manfaatdor shaxslar eʼtiboriga yetkazishi lozimligi maʼlumot uchun qabul qilinsin.

3. Idoraviy meʼyoriy hujjatlarni davlat roʻyxatidan oʻtkazish boshqarmasi (S. Sattarov) ushbu normativ-huquqiy hujjatlarni Davlat reyestridan chiqarilganligini barcha manfaatdor shaxslar eʼtiboriga yetkazilishi ustidan nazoratni taʼminlasin.

4. Qonun hujjatlarini turkumlash va huquqiy axborot boshqarmasi (A. Inanbabayev) ushbu normativ-huquqiy hujjatlarni “Oʻzbekiston Respublikasi qonun hujjatlari toʻplami” — “Sobraniye zakonodatelstva Respubliki Uzbekistan”da nashr etilishini taʼminlasin.

5. Mazkur buyruqning ijrosini nazorat qilish vazir oʻrinbosari E. Kanyazov zimmasiga yuklansin.

Adliya vaziri R. MUHITDINOV

Toshkent sh.,

2008-yil 2-aprel,

52-mh-son