Soliq qonunchiligiga rioya etish masalalarida hamkorlik qilish va oʻzaro yordam koʻrsatish toʻgʻrisida

24.05.2007

Oʻzbekiston Respublikasi Hukumati bilan Belarus Respublikasi Hukumati oʻrtasida

Bitim

Oʻzbekiston Respublikasi va Belarus Respublikasi Hukumati, bundan buyon “Tomonlar” deb ataluvchilar,

ikki tomonlama hamkorlik va soliq qonunchiligiga rioya etish masalalarida oʻzaro yordam koʻrsatishning muhimligidan kelib chiqib,

bir-birlariga imkon qadar keng koʻlamda koʻmak koʻrsatish maqsadida,

quyidagilar toʻgʻrisida kelishib oldilar:

1-modda Atamalarni aniqlash

Ushbu Bitim maqsadlari uchun qoʻllaniladigan atamalar quyidagilarni anglatadi:

“soliq qonunchiligi” — Tomonlar davlati oʻrtasida soliqlarning turlarini va ularni undirish tartibini belgilovchi hamda soliq majburiyatlarining paydo boʻlishi, oʻzgarishi va toʻxtatilishi bilan bogʻliq munosabatlarni tartibga soluvchi yuridik normalar majmuasi;

“soliq qonunchiligining buzilishi” — soliq toʻlovchi tomonidan budjet oldidagi majburiyatlarning bajarilmasligida yoxud lozim darajada bajarilmasligida ifodalangan va yuridik javobgarlik belgilangan huquqqa zid harakat yoki harakatsizlik;

“vakolatli soliq idoralari”:

Oʻzbekiston Respublikasiga nisbatan — Oʻzbekiston Respublikasi Davlat soliq qoʻmitasi;

Belarus Respublikasiga nisbatan — Belarus Respublikasi Soliqlar va yigʻimlar vazirligi;

“soʻrayotgan vakolatli soliq idorasi” — Tomonning soliq soʻrovlari boʻyicha yordam koʻrsatish toʻgʻrisida soʻrov yuboruvchi vakolatli soliq idorasi (quyida “koʻmaklashish toʻgʻrisidagi soʻrov” deb ataladi);

“soʻralayotgan vakolatli soliq idorasi” — Tomonning koʻmaklashish toʻgʻrisidagi soʻrovini oluvchi vakolatli soliq idorasi.

Agarda vakolatli soliq idoralarining rasmiy nomlanishi oʻzgargan taqdirda Tomonlar bu toʻgʻrida bir-birlariga yozma ravishda diplomatik kanallar orqali xabar beradilar.

2-modda Bitim qoʻllaniladigan soha

Tomonlar vakolatli soliq idoralari orqali soliq qonunchiligining zarur darajada bajarilishini taʼminlash maqsadida, bir-birlariga quyidagi masalalarda oʻzaro koʻmak koʻrsatadilar:

soliq qonunchiligi buzilishining oldini olish va uni bartaraf etishda;

koʻmaklashish toʻgʻrisidagi soʻrov boʻyicha yoki tashabbus koʻrsatish tartibida yuridik va jismoniy shaxslar tomonidan soliq qonunchiligiga rioya etilishi yuzasidan axborotlarni taqdim etishda;

milliy soliq tizimlari va soliq qonunchiligidagi joriy oʻzgarishlar toʻgʻrisidagi maʼlumotlarni taqdim etishda;

soliq idoralari ishini taʼminlovchi kompyuter tizimlarini yaratish va ishlatishda;

soliq toʻlovchilar va soliq idoralari bilan ishlarni tashkil etish, jumladan soliq qonunchiligiga rioya etilishi ustidan nazoratni taʼminlash boʻyicha uslubiy tavsiyalarni ishlab chiqishda;

kadrlarni oʻqitish va mutaxassislarni ayirboshlash sohasida;

birgalikdagi harakatlarni talab etuvchi boshqa masalalar boʻyicha.

Ushbu Bitim qoidalari Tomonlar oʻrtasida tuzilgan boshqa bitimlarga muvofiq vakolatli soliq idoralarining hamkorligiga toʻsqinlik qilmaydi.

3-modda Taqdim etiladigan maʼlumotning mazmuni

Vakolatli soliq idoralari oʻz tashabbusi yoki koʻmak koʻrsatish toʻgʻrisidagi soʻrov boʻyicha oʻz vakolati va oʻz davlati qonunchiligi doirasida bir-birlariga quyidagilarga oid maʼlumotlarni taqdim etadilar:

tashkilotlar, ularning filiallari va vakolatxonalarini roʻyxatga olish, jumladan joylashgan joyi, boʻysunishi, mulk shakli va boshqalar;

Tomonlarning milliy qonunchiliklarida oʻrnatilgan tartibda yuridik va jismoniy shaxslar tomonidan davlat va tijorat banklarida hisob raqamlarining ochilishi, shuningdek ularda pul mablagʻlarining mavjudligi va aylanishi;

yuridik va jismoniy shaxslarning hududida Tomon hududida olgan barcha turdagi daromadlari va soliqqa tortish obyektlari, toʻlangan soliq summalari va boshqa soliqqa tortish bilan bogʻliq masalalar.

4-modda Hujjat va boshqa materiallarni taqdim etish

Soʻralayotgan vakolatli soliq idorasi koʻmaklashish toʻgʻrisidagi soʻrovga asosan, normativ hujjatlarni, hujjatlarning tasdiqlangan nusxalarini va boshqa materiallarni taqdim etadi.

Nusxalar rasmiy mansabdor shaxsning imzosi va soʻralayotgan vakolatli soliq idorasining muhri bilan tasdiqlanadi.

Tasdiqlangan nusxalar tekshiruv uchun yetarli boʻlmagan hollarda hujjat va boshqa materiallarning asl nusxalari talab qilinishi mumkin. Berilayotgan hujjat va boshqa materiallarning asl nusxalari kelishilgan muddatlarda qaytarilishi lozim.

Materiallar kompyuterlashtirilgan maʼlumot koʻrinishida ushbu materiallarni sharhlash uchun zarur boʻlgan qoʻshimcha maʼlumotlar bilan birga berilishi mumkin.

5-modda Koʻmak koʻrsatish toʻgʻrisidagi soʻrovning shakli va mazmuni

Koʻmak koʻrsatish toʻgʻrisidagi soʻrov yozma shaklda uning koʻrib chiqilishi uchun zarur boʻlgan hujjatlar ilova qilingan holda yuboriladi. Favqulodda vaziyatda koʻmak koʻrsatish toʻgʻrisidagi soʻrov ogʻzaki shaklda va keyinchalik imkon qadar qisqa muddatlarda yozma shaklda tasdiqlangan holda berilishi mumkin.

Koʻmak koʻrsatish toʻgʻrisidagi soʻrov oʻz ichiga quyidagilarni olishi kerak:

coʻrayotgan vakolatli soliq idorasining nomi;

soʻralayotgan vakolatli soliq idorasining nomi;

soʻrovning maqsadi va sababi;

berilayotgan soʻrovdagi soliq toʻlovchining nomi (ismi) va manzili;

soʻrovning mohiyati va koʻrib chiqilayotgan davr va soliqlarning aniq turlari koʻrsatilgan holda u bilan bogʻliq yuridik holatlarning qisqacha bayoni.

Soʻrov rus tilida berilishi lozim.

Soʻralayotgan vakolatli idoraga koʻmaklashish toʻgʻrisidagi kelib tushgan soʻrov boʻyicha qoʻshimcha maʼlumot talab qilishga haqlidir.

6-modda Koʻmak koʻrsatish toʻgʻrisidagi soʻrovni ijro etish tartibi

Tomonlarning vakolatli soliq idoralari bir-birlariga ushbu Bitim va milliy qonunchilikka muvofiq koʻmak koʻrsatadilar.

Soʻrayotgan vakolatli soliq idorasi uning iltimosiga koʻra, koʻmaklashish toʻgʻrisidagi soʻrov ijro etilayotgan harakat vaqti va joyi toʻgʻrisida xabardor qilinishi, uning vakillari bu toʻgʻrisida qoʻshimcha ravishda kelishilgan holda ular oʻtkazilishida ishtirok etishlari mumkin.

Agar koʻmaklashish toʻgʻrisidagi soʻrovni soʻralayotgan soliq idorasi tomonidan bajarish mumkin boʻlmasa, u soʻrov kelgan kundan boshlab 1 oy davomida bu haqida koʻmaklashish toʻgʻrisidagi soʻrovni bajarilmasligining sabablarini koʻrsatgan holda soʻrayotgan vakolatli soliq idorasini yozma ravishda xabardor qiladi.

Agar koʻmaklashish toʻgʻrisidagi soʻrovning bajarilishi soʻralayotgan Tomonning milliy qonunchiligiga yoki davlat manfaatiga zid boʻlsa, koʻmaklashish toʻgʻrisidagi soʻrovning bajarilishi rad etilishi mumkin.

Soʻralayotgan Tomon uning hududida koʻmaklashish toʻgʻrisidagi soʻrovning bajarilishi bilan bogʻliq barcha xarajatlarni qoplaydi.

7-modda Maʼlumotni berish tartibi

Koʻmaklashish toʻgʻrisidagi soʻrovlar, hujjatlar, materiallar va boshqa maʼlumotlar Tomonlar bilan kelishilgan tartibda beriladi.

Koʻmaklashish vakolatli soliq idoralarining rahbarlari tomonidan belgilangan rasmiy mansabdor shaxslarning toʻgʻridan toʻgʻri aloqalari doirasida amalga oshiriladi.

8-modda Maxfiylikka rioya qilish

Aniq bir soliq toʻlovchilarga taalluqli maʼlumotlar maxfiy hisoblanadi va Tomonlar davlatlarining milliy qonunchiliklariga muvofiq hamda soʻralayotgan vakolatli idoraning talabiga binoan himoya rejimi bilan taʼminlanadi.

Olingan maʼlumotlar Tomonlar tarafidan faqatgina ushbu Bitimda nazarda tutilgan maqsadlarda, shu jumladan maʼmuriy yoki sud ishlarida foydalanilishi mumkin. Maʼlumotdan boshqa maqsadlarda faqat soʻralayotgan Tomonning yozma ravishdagi roziligi bilan foydalanish mumkin.

9-modda Bitimning ijro etilishi

Tomonlar ushbu Bitimni talqin qilish yoki qoʻllashda vujudga kelishi mumkin boʻlgan nizoli masalalarni tartibga solishda oʻzaro kelishuvga erishishga intiladilar.

Tomonlar zaruriyat boʻlganda ushbu Bitimning qanday bajarilayotganligini baholash yoki unga oʻzgartishlar kiritish maqsadga muvofiqligi masalasida maslahatlashuvlar oʻtkazadilar. Bunday maslahatlashuvlarning muddati Tomonlarning kelishuvlariga koʻra qoʻshimcha ravishda aniqlanadi.

Tomonlar ushbu Bitim qoidalarini amalda qoʻllash uchun alohida masalalar boʻyicha qoʻshimcha bitimlar tuzishlari mumkin.

10-modda Oʻzgartirish va qoʻshimchalar

Tomonlarning oʻzaro roziligi bilan ushbu Bitimga oʻzgartirish va qoʻshimchalar kiritilishi mumkin, ular alohida bayonnomalar orqali rasmiylashtiriladi va mazkur Bitimning ajralmas qismi hisoblanadi.

11-modda Bitimning kuchga kirishi va amal qilishining toʻxtatilishi

Ushbu Bitim imzolangan kundan boshlab kuchga kiradi va Tomonlardan biri boshqa Tomonning uning harakatini toʻxtatish toʻgʻrisida xabarnomasini olgan kundan boshlab olti oy oʻtgandan soʻng oʻz faoliyatini toʻxtatadi.

Toshkent shahrida 2007-yil 24-mayda, ikki nusxada, har biri oʻzbek, belarus va rus tillarida tuzildi, bunda barcha matnlar bir xil kuchga egadir.

Ushbu Bitim qoidalarini talqin qilish uchun rus tilidagi matndan foydalaniladi.

(imzolar)